KENGGIN E RE KE BABYOR NEY | ROGON NI NGAD ATHAMGILGAD U FITHIK’E MAGAFAN’ RODAD

Magafan’ Nga Boch Ban’en Ni Bay E Riya’ Riy

I yog Alona ni gaar: “Nap’an nra yan lingan e yabul, me tabab ni nge da’da’ gum’irchaeg, mug mil nggu wan ko yungi n’en ni yima yan ni mith ngay ya nge dabi aw e donmach ku be’. Machane, gu ra yan e ngaram ma kug ma rus nib gel. Machane, ngiyal’ nri ma gel e marus rog e nap’an ni gu be yan u kanawo’ u bang ndariy e gin nrayog ni nggu mith ngay. Immoy bayay nnap’an ni kug be yan u kanawo’, mug tabab ko meyor ma dakiyog ni nggu pogofan. Ba n’uw nap’an mfini yag ni nge fel’ rogog buchuuw. Ma aram miki yan lingan fare yabul bayay.”

Mahl ni yibe tay e aram boch ko pi n’en ni ma buch ni bay e riya’ riy. Machane, nap’an ni ga ra pirieg ni bay ba mit e m’ar rom ara be’ nib t’uf rom nrayog ni nga nim’ riy, ma rayog ni nge k’aring e marus ngom. Ku bay boch e girdi’ ni ma magafan’rad ni bochan e yad be rus ko pi n’en nra buch boch nga m’on. Ba ga’ ni ma lungurad, ‘Gur, ra boch nga m’on ma ra par pi fakmad ara pi fakrad u lan ba fayleng nib sug ko cham, mab alit, ma be thil e yafang riy, ma kub sug ko m’ar, fa?’ Uw rogon ni nge dab ki magafan’dad nga boch ban’en ni aray rogon?

Piin nib sul lanin’rad ngorad e yad manang nra i buch boch ban’en nib kireb, ere nap’an ni yad “ra guy e oloboch ni be yib mi yad pilo’ riy.” (Proverbs 27:12, BT) Rayog ni ngad rin’ed boch ban’en nrayog ni nge ayuweg lanin’dad nge gum’ircha’dad ni bod rogon ni gad ma guy rogon ni nga i par dowdad nib fel’ rogon. Pi n’en ni yima chuweg e chalban ngay nib sug yaan e cham riy nge pi news ni yima dag yaan boch ban’en riy nib kireb e ku aram boch ban’en ni ma k’aring e magafan’ ngodad nge pi fakdad. Gad ra siyeg e pi n’ey ma gathi aram e be yip’ fan ni  gad be fek owchedad u boch ban’en nriyul’ ni be buch. De sunmiydad Got ni ngaud pared ma gad be lemnag e tin nib kireb ban’en. Ya susun ni ngad suguyed lanin’dad ko pi “n’en nriyul’, nge n’en nib yal’uw, . . . ma mmachalbog, . . . nge tin ndariy thibngin.” Faan gad ra rin’ ni aray rogon, ma fare “Got ni ir e be pi’ e gapas” e ra pi’ e gapas nga lanin’dad nge gum’ircha’dad.​—Filippi 4:8, 9. 

FENI GA’ FAN E MEYBIL

Ra ayuwegdad e bin riyul’ e michan’ ni nge dab ki magafan’dad nib pag rogon. Be pi’ e Bible e athamgil nga lanin’dad ni ngad ‘tedan’dad, nge yog ni ud meybilgad.’ (1 Peter 4:7) Rayog ni ngad ninged e ayuw ngak Got, mu kud ninged e gonop rok mu ku dogned ngak ni nge ayuwegdad ni nge dab kud rusgad ni ngad rin’ed e tin nrayog rodad ndemtrug e miti magawon ni ke yib ngodad, ya ba pagan’dad nra “rung’ag e n’en ni gadad be yog” ngak.​—1 John 5:15.

Be yog e Bible ni Satan e ir e be “gagiyegnag e . . . fayleng,” ma ‘fayleng e ke suwey Faanem nib Kireb.’ (John 12:31; 1 John 5:19) Ere, riyul’ e n’en ni yog Jesus u nap’an ni fil ngodad ni ngaud meybilgad ni nge lungudad: “Ngam ayuwegmad rok Faanem nib Kireb.” (Matthew 6:13) I yog Alona ni gaar: “Nap’an nra yan lingan e yabul, ma gu ma meybil ngak Jehovah ni nge ayuwegeg ni nge dab gu rus nib pag rogon. Ku ma piningeg e pumoon rog ni nggu meybilgow u taabang. Meybil e aram reb e ban’en nri ma ayuwegeg.” Bod rogon ni be yog e Bible ni be gaar: “Ba chugur ngak urngin e piin ni yad ma non ngak, ni yad be non ngak u fithik’ e yul’yul’.”​—Psalm 145:18.

PI N’EN NI KA BAY NGA M’ON NI KE L’AGAN’DAD NGAY

Nap’an fare Welthin rok Jesus u Daken e Burey me fil ngak pi gachalpen ni ngar meybilgad ni nge lungurad: “Ma ga par ni gur e ga be gagiyegnagmad.” (Matthew 6:10) Gil’ilungun Got e aram e re am nra chuweg urngin ban’en ni ma k’aring e magafan’ ko girdi’. Ra taleg Got e “pi mahl ni yibe tay u fayleng i yan” u daken Jesus ni ir fare “Pilung ko Gapas.” (Isaiah 9:6; Psalm 46:9) “Bayi . . . par ni ir e tapuf oloboch u thilin e pi nam nib gel . . . Pi nam e dab kur sulod ngar mahlgad bayay, ara ra fal’eged rogorad bayay ni ngar mahlgad. . . . ma be par ndakuriy be’ nra k’aring e marus [ngorad].” (Mikah 4:3, 4) Pi tabinaw e yad ra toy e “naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.” (Isaiah 65:21) Ma “dariy be’ ni be par u lan e nam rodad ni bay ki yog nib m’ar.”​—Isaiah 33:24.

Ngiyal’ ney e yugu aram rogon ni gad ma kol ayuw, machane gathi gubin ngiyal’ nrayog ni ngad siyeged boch ban’en ni ma buch u “ngal’an ndan lemnag” nra buch riy ara da siyeged ni nga darod nga bang nib kireb e tayim riy. (Eklesiastes 9:11, NW) Ke yan bokum e chibog ni be yim’ e girdi’ ni bochan e mahl, nge cham, nge m’ar. Ere, mang e rayog ni nge l’agan’ e pi girdi’ ney ngay?

Bokum milyon e girdi’ ni yira fasegrad ko yam’ boch nga m’on. Ma kemus ni yigoo Got e manang urngin e pi girdi’ ney. Ma dawori pag Got tilrad. Machane, yad be toffan ni yad be sonnag e ngiyal’ ni yad ra “yib u lan e low rorad nga wuru’.” (John 5:28, 29) Be weliy e Bible murung’agen e fas ko yam’ ni gaar: “Re l’agan’ nem e ke mang angkar rok lanin’dad, ya be par nib mudugil.” (Hebrews 6:19) Ma ke “dag [Got] e mich ko re bugithin ney ngak urngin e girdi’, ni fan e ke faseg [Jesus] ko yam’!”​—Acts 17:31.

Chiney e mus ngak e piin ni yad ma athamgil ni ngar rin’ed e tin nib m’agan’ Got ngay nra i magafan’rad. Machane, bochan e athamgil ni i tay Paul, nge Janet, nge Alona, nge ku bochan ni ur pared ni yad ba chugur ngak Got u daken e meybil, ma yad be gelnag e michan’ rorad ko pi n’en ni ke micheg e Bible ni fan ngodad boch nga m’on, ma aram fan ni ke yag ni nge war e magafan’ rorad. Ere, manga yigi suguyem fare Got ni ma pi’ e l’agan’ ‘ko felfelan’ nge gapas u daken e michan’ rom ngak’ ni bod rogon ni rin’ ko pi cha’ ney.​—Roma 15:13.

[Kahol ko page 9]

Rayog ni Nge Pi’ e Togta e Ayuw, Fa?

Faanra kam rin’ urngin ban’en nrayog rom ma ka be magafan’um nib gel, ma rayog ni ngam man mu guy e togta. Faanra ke yan e magafan’ rom ke thum’ nga wuru’ e pi magawon ni ga be mada’nag, ma rayog ni ka bay tapgin e magawon rom nga bang. Ere, nap’an ni ga ra yan mu guy e togta, mab mudugil nra skengnagem ni nge guy ko bay ba mit e m’ar rom fa dariy, ni bochan e bay yu ngiyal’ ni aram tapgin e magafan’ ni ma tay boch e girdi’ nib pag rogon. Tomuren ni ga ra un ko skeng, ma aram e ra dugliy e togta rom ko ka bay ba mit e tafalay nib t’uf ni ngam un ngay fa danga’. *

[Boch e thin nra tamilangnag murung’agen]