Sicaríʼ guníʼ ti gunaa láʼ Alona: «Ora gunadiagaʼ xhidi sirena, nabé ripapa ladxiduáʼ ne ruxooñeʼ ti lugar ra zanda guilaʼyaʼ pa guiaba bomba. Neca nuaaʼ raqué ridxiberuáʼ. Ne jmaruʼ si pa cadi nuaaʼ ndaaniʼ lidxeʼ ne gastiʼ ti lugar ra gucacheluáʼ. Ti dxi ziaaʼ ndaaniʼ neza málasi bizulú guxidxi sirena. Bizuluáʼ biinaʼ dede qué ganda guicaaʼ bi. Gupa xidé gudiʼdiʼ chupa chonna hora para gutadxí ladxiduáʼ. Óraque málasi guxidxi sirena que sti biaje».

Peru cadi ca binni si ni nabeza ca lugar ra raca guerra nga runi sentir zacá. Zándaca guidxíbinu pa gábicabe laanu napa ti familia stinu o ti xhamígunu ti guendahuará nabé malu. Xcaadxi riuu xhaatacaʼ xizaa xi guizaaca despué, zándaca riníʼ íquecaʼ: «Ximodo zabani ca xiiñeʼ ne ca xhiagaʼ despué yaʼ. Ñee ndaaniʼ ti guidxilayú ra cayaca guerra, nuu contaminación ne guendahuará malu nga chiguibánicabe la?». Yanna, xi zanda gúninu para cadi chúʼpenu xizaa pur ca guendanagana riʼ yaʼ.

Biblia na: «Binni nuu xpiaaniʼ rucaachilú ora guʼyaʼ maʼ zeeda xiixa guendanagana ni zuniná laa» (Proverbios 27:12). Cadi dxandíʼ nabé galán chinanda binni conseju riʼ yanna la? Cásica rápanu laanu para cadi gacananu la? laaca caquiiñeʼ gápanu xquendabiaaninu. Guiráʼ ni ridiʼdiʼ lu televisión ra cayuninácabe binni, dede né ca noticia ra rihuinni cayuuticabe  binni maca para guchíbicabe laacaʼ nabé riguu cani xizaa laanu ne ca xiiñinu. Cadi pur qué ridúʼyanu cani guininu cadi dxandíʼ cayaca cani, sínuque rúninu ni para gápanu laanu. Cadi bizáʼ diʼ Dios xquendabiaaninu para cuʼnu cosa ni guniná laanu, sínuque para guiníʼ íquenu ni dxandíʼ si, ni jneza, ni nachaʼhuiʼ ne ni gusiecheʼ laanu. Pa gúninu zacá «zaguixhe dxí Dios ladxidóʼ[no]» (Filipenses 4:8, 9).

Maʼ bidúʼyanu racané fe laanu para cadi chuʼ xhaatapenu xizaa. Biblia cayabi laanu cadi gusaana de guni orarnu Dios ora maʼ cadídinu lu guendanagana (1 Pedro 4:7). Zanda guinábanu laabe gacanebe laanu ne gudiibe laanu guendabiaaniʼ ne guendanadxibalú para gúninu ni jneza ne laaca naquiiñeʼ gánnanu «zucaa diaga be laanu» (1 Juan 5:15).

Biblia na cumu «naaze dxiichi binidxaba idubi guidxilayú» la? laa nga cayuni mandar ni ne cadi Dios (Juan 12:31; 1 Juan 5:19). Ngue runi, Jesús bisiidiʼ ca discípulo stiʼ guinábacaʼ gulá Dios laacaʼ «de lu ná» Binidxabaʼ (Mateo 6:13). Ora guni orarnu zanda gacané ni laanu gatadxí ladxidoʼno. Sicaríʼ guníʼ Alona: «Ora xhidxi sirena rinabaʼ Dios gacané naa cadi guidxibeʼ. Ne ribidxi xheelaʼ naa pur teléfono para guni orarné naa. Nga racané naa gatadxí ladxiduáʼ». Pur nga, Biblia cayabi laanu: «Jiobá nuu gaxha de guiráʼ cani rinabaʼ gacanebe laacaʼ, de guiráʼ cani dxandíʼ rinabaʼ ruaa laabe» (Salmo 145:18).

Dxi bidii Jesús ti libana lu ti dani, bisiidibe ca discípulo stibe guinábacaʼ: «Biseendaʼ Reinu stiluʼ» (Mateo 6:10, TNM). Zunduuxeʼ Reinu stiʼ Dios guiráʼ ca cosa ni riguu xhaataʼ laanu xizaa. Maʼ gulí Dios Jesucristu, «Príncipe ni rudii Guendariuudxi», para gunduuxeʼ «guendaridinde lu guidubi guidxilayú» (Isaías 9:6; Salmo 46:9). Ne Dios zuni juzgar «stale guidxi [...] ne maʼ qué zaziidicaʼ tíndecaʼ para checaʼ lu guerra». Ne laaca maʼ «qué ziuu tu guchibi laacaʼ» (Miqueas 4:3, 4). Guiráʼ familia guibani lu Guidxilayú riʼ «zucuícabe yoo ne zabézacabe ndaaniʼ ni ne zudxiibacabe lubáʼ uva ne zócabe cuananaxhi stini» (Isaías 65:21). Ne ca dxi ca «guirutiʼ tu cueza [lu Guidxilayú riʼ] zaníʼ: “Huaraʼyaʼ”» (Isaías 33:24).

Naquiiñeʼ gánnanu neca gápanu laanu, nuu tiru qué zanda gucueezanu de guizaacanu xiixa (Eclesiastés 9:11). Zándaca nuunu ra cadi naquiiñeʼ chuʼnu ne ora cadi naquiiñeʼ chuʼnu. Ne casi maca huayaca, stale binni qué gapa donda huayati lu ca guerra ni huayaca, pur guendaquéiquiiñeʼ ne pur guendahuará. Yanna, xi guizaaca ca binni ni maʼ guti ne qué gapa donda yaʼ.

Millón binni ziasa de lade gueʼtuʼ, Dios si nanna pándacabe. Nanna dxíchinu caziilaʼdxiʼ guirácabe «ndaani baʼ» ne caʼruʼ gusiaandaʼ Jiobá laacabe dede guidxiña dxi guiásacabe sti biaje (Juan 5:28, 29). Sicaríʼ ruzeeteʼ Biblia de ni chiguizaaca riʼ: «Nanna dxichi nu zuni be irá ni ma uníʼ be, ne nga nga ni naaze dxiichi ladxidóʼ no ti qué iniibi nu, casi rinaaze ancla barcu para qué iniibi» (Hebreos 6:19). Ne «ra undisa be [Jesucristu] de lade gueʼtuʼ» bisihuínnibe zandísabe guiráʼ ca binni ni maʼ guti (Hechos 17:31).

Ca dxi stinu riʼ, dede ne ca xpinni Dios riuu xhaatacaʼ xizaa. Ni huayacané Paul, Janet ne Alona para cadi chuʼ xhaatacaʼ xizaa nga guni orarcaʼ Dios para guinábacaʼ gacanebe laacaʼ ne guni crecaʼ zúnibe cani maʼ guniʼbe chigúnibe. Laaca zanda guinábanu Dios gacané laanu, purtiʼ Biblia cayabi laanu: «Dios nga racané laanu para ganda icá lú nu laa. Rinaba laabe usieche be laatu ne quixhe dxí be ladxidóʼ to» (Romanos 15:13).