Ñucaca Los Ángeles (Estados Unidos) llactapimi viñarcani. Chai llactaca pandillerocunamanda shinallata drogacunata fácil jatunalla pushtu cashcamandami rijsishca rijsishca carca. Seis churicunamandaca segundo churimi carcani.

Huahua cajpica ñuca mamitaca iglesia evangelicaman apashpami purin carca. Shinapash ña solteroyajushpaca chaipi yachachishcacunataca uyana cashcamandallami uyan carcani. Domingocunataca iglesiapimi shujcunahuan candan carcani. Cutin entre semanacunaca drogacunata chupashpa, fiestacunaman rishpa, huarmicunahuan puñushpami purin carcani.

Imagumandapash ñapashmi culiranlla carcani. Pihuanbash macanajujushpaca macanajuita mishangapaj munashpami ima ricurishcahuan huactanlla carcani. Iglesiapi yachachishcacunaca casi nimapi na ayudahuarcachu. Ñucaca “Taita Diosmi imapi vengarina caipipash vengaringa, ñucaca paita ayudaitallami ayudajuni” nin carcanimi. 18 huatacunata charishpami grupo político Panteras Negras nishcacunamanda uyarcani. Paicunaca gentecuna charishca derechocunata difindinchi ninmi carca. Huaquin estudiantecunapash chai grupopa yuyaicunatallatami difindin carca. Chaimi paicunata apoyangapaj chai grupoman yaicurcani. Tauca viajemi chai derechocunata difindinchi nishpa huelgacunata ruran carcanchi. Chaimandami clasescunatapash na charin carcanchi.

Chaicunata rurashpapash na cushilla sintirinllu carcani. Chaimandami ashtahuan nalicunatapacha rurai callarircani. Por ejemplo ñuca amigocunahuanga peliculacunatami ricungapa rin carcanchi. Chai peliculacunapica Estados Unidosmanda gentecuna, África llactamanda gentegucunata ninanda maltratashpa sufrichishpa charishcatami ricun carcanchi. Chaicunata ricushpaca nimamanda na ali yarijpimi ñucanchica yuraj gentecunatapash mascashpa llaquichi callarircanchi.

Chai tiempocunapaca ñuca huauquicunahuanbashmi nali cosascunata rurashpa purin carcanchi. Chaimandami policiacunahuan, autoridadcunahuanbash problemacunata charircanchi. Ñucapa jipa huauquica shuj rijsishca pandilla grupopimi carca. Paicunahuanbashmi tandanajushpa puri callarircani. Ñuca causaica llaquinayaimi carca.

Ñuca amigopa taitacunaca testigo de Jehovami carca. Paicunami ñucataca paicunapa tandanajuicunaman invitarca. Primera vez tandanajuiman rishpaca chaipi gentecuna diferentepacha cashcatami cuenta japircani. Chaipica tucuicunami Bibliata charirca. Bibliahuanmi tucuita yachachin carca. Hasta jovengucunacamanmi Bibliamanda yachachingapa huaquin partecunata charin carca. Taita Diospa shuti Jehová cajta, paipa shutipi parlajta uyashpaca ninandami cushijurcani (Salmo 83:18). Shuj shuj llactamanda gentecuna cashpapash na agllarishpa tucuicunallatami igual, ali llevarin carca.

Primerollaca Bibliamanda yachajungapaca na munanllu carcani. Shinapash tandanajuicunaman rinataca gushtanmi carcani. Shuj tutaca ñuca tandanajuipi caj horasmi ñuca amigocunaca shuj conciertoman rishcarca. Chai conciertopimi shuj jovenba chompa de cuerota shuangapa munashpa paicunaca chai jovendaca ushashca macashpa huañuchishcarca. Cayandi punllapaca paicunaca chaita rurashcamandaca jariyashcatami parlanajurca. Juiciopi cashpapashmi na manllashpa shinallata parlanajurca. Chai juiciopica casi tucuicunatallatami carcelpi huañungacaman quidachun sentenciarca. Ñuca paicunahuan na chaipi cashcamandaca ninandami cushijuni. Chaimandami ñuca causaita cambiangapaj munashpa Bibliataca estudiai callarircani.

Ñucaca shuj llactamanda gentecunataca na alicachinllu carcani. Shinapash Testigo de Jehovacuna shuj shuj ladocunamanda cashpapash juyaihuan tratarijta ricunami ayudahuarca. Por ejemplo viaje rina caimandami shuj testigoca na yana raza cashpapash paipa huahuacunataca yana raza Testigocunaman mingashpa saquishcarca. Shinallata cutin shuj Testigoca familia na yana raza cashpapash shuj yana raza jovengutami paicunapa huasipi mingachirca. Chaicunata ricushpami testigo de Jehovacunaca ciertopacha Juan 13:35​pi nishcata pactachinajujta ricurcani. Chaipica ninmi: “Shina juyarishpa causanajujta ricushpami, ñucapaj yachajujcuna cajtaca tucuicuna rijsinajunga” nishpa. Ciertopacha ali amigocunata tarishcamandaca ninanda cushijurcani.

Bibliata yachajujushpami ñuca causaipi cambiana cashcata cuenda japircani. Ciertopacha tranquilo, cushilla causangapami ñuca causaipi cambiangapaj esforzarircani (Romanos 12:2). Asha ashami mejorashpa catircani. Chaimi huata 1974​pica bautizarishpa testigo de Jehová tucurcani.

Bautizarishca jipapash ñucapa caractertaca controlashpa catinarami carcani. Por ejemplo shuj punllaca shuj barriopimi gentecunaman Bibliamanda villachishpa purinajurcanchi. Shinapimi shuj shuhua ñuca carropa radiota shuashpa rijujta ricurcani. Chaimi paita japingapaj munashpa catircani. Ñapachami japigrijurcani, shinapimi paica radiota alpapi shitashpa calpashpa rirca. Shina pasashcata huauquicunaman villajujpimi, shuj huauquiguca: “¿Chai shuhuata japishpaca imatashi ruranguiman carca?” nishpa tapuhuarca. Shina tapujpimi ñuca yuyaicunata todavía cambiana cashcata cuenta japircani.

Octubre de 1974 huatapimi Jehová Diosmanda ashtahuan villachi callarircani. Quillapica cien horascunatami gentecunaman Bibliamanda yachachishpa yalin carcani. Tiempohuanga Brooklyn llacta Betelpi sirvichunmi invitahuarca. Huata 1978​pica ñuca mamita asha irquilla cajpimi paita cuidangapaj munashpa cutin Los Ángeles llactaman tigrarcani. Ishcai huatacuna jipaca Aarhonda shuti huarmiguhuanmi cazararcani. Paica ñuca mamita ungushca cajpimi huañuna punllacaman paita cuidanapi ninanda apoyahuarca. Chai jipaca Escuela Bíblica de Galaad Watchtower nishcamanmi ñucanchitaca invitarca. Chai cursota tucuchishca jipaca ñucanchitaca Panamá llactamanmi misionerocuna shina sirvichun cacharca.

Bautizarishca jipapash huaquinbi ñucapa caracterta controlanaca shinllimi cahuashca. Pipash culirachijpica ama ñucapash culirarijungapaca mejor anchuritami anchurini. Shinallata imagutapash aliguman arreglangapami esforzarini. Ñuca shina controlarita ushashcataca ni ñucallata na cri ushanichu. Ñuca huarmigu y shuj huauquipanicunapashmi chaita rurashcamandaca felicitahuan. Shinapash cai cambiocunataca na ñucamandallachu rurai ushashcani. Taita Diospa shimi Bibliami ñuca causaita cambiachun ayudahuashca. Chaimandami Taita Diospa shimi Bibliaca causaita cambiachun ayudai ushashcataca seguro cani (Hebreos 4:12).

Bibliaca ñuca causaipi tranquilo, cushilla causaita charichunmi ayudahuashca. Cunanbica ñana pundashna pihuanbash macanajunichu. Ashtahuangarin Bibliamandami gentecunaman yachachini. Ñuca joven cashpaca shuj enemigotami charircani. Paimanbashmi Bibliamanda yachachircani. Y pai bautizarishca jipaca asha tiempotaca ñucanchicunahuanmi causarca. Paihuanga cunangamanmi ali amigocuna canchi. Cunangamanga 80 yali gentecunatami testigo de Jehová tucushpa bautizarichun ayudashcanchi.

Ali causaita chari ushashcamanda, ali amigocunata charishcamandapash Jehová Diostaca ninandami agradicini.