KWAAR JEL̦Ã KE?

Ewi wãween aer kar kõjerbal kein irir ko ilo iien ko etto?

Rekõn kõjerbal kein irir ko ñan irir wiit bwe ren erom pilawã. Kõrã ro im rũkarejar ro ilo enañin aolep em̦ rekõn kõjerbal kein irir ko, im eñin ej juon iaan jerbal ko rekõn kõm̦m̦ani kajjojo raan. Aolep raan ej wal̦o̦k ainikien aer kõjerbal kein irir ko kõnke eñin wãween aer kar mour ilo iien ko etto.​—Exodus 11:5; Jeremaia 25:10.

Pija im ekjab ko jãn Ijipt ilo iien ko etto rej kaalikkar wãween aer kar irir wiit kõn kein irir ko. M̦okta rej likũt wiit ko ioon juon dekã. Im eo ej irir ej jubukwe im̦aanin dekã eo im ej kõjerbal aolep pã ko pein ñan jibwe juon bar dekã edikl̦o̦k me ej kõm̦akũti m̦aanl̦o̦k im likl̦o̦k ñan an iri wiit ko ioon dekã eo juon. Ekkar ñan juon bok, dekã in me rej jibwe ñan irir ear 4 l̦o̦k ñan 9 bo̦un eddon. Ñe renaaj kar kõjerbal dekã in ñan tarin̦ae, emaroñ mej armej ro kake.​—Ri Ekajet 9:50-54.

Dekã in irir ko rar lukkuun aorõk ñan kajjojo baam̦le ilo iien ko etto kõnke rej bõk aer mour jãne. Eñin unin, kar kamo an juon rũkam̦uri bõk kein irir eo an eo ear m̦uri ippãn. Bokin Duteronomi 24:6 (UBS) ej ba: “El̦aññe kwõj kam̦uriik juon em̦m̦aan, kwõn jab bõk dekã in irir wiit ko an bwe en am̦ kein kam̦ool, bwe el̦aññe kwõj bõki innem kwõj bõki men ko e im ro nukũn rej bõk aer mour jãni.”

Naan kein “pãd iubõn” rej jitõñl̦o̦k ñan ta?

Baibõl̦ ej ba bwe Jijej ej “pãd iubõn Jemãn.” (Jon 1:18) Naan kein rej kaalikkar bwe Jijej elukkuun epaake Anij im ej kabuñbũruon. Naan kein rej bar jitõñl̦o̦k ñan m̦anit eo an RiJu ro ñe rej m̦õñã ippãn doon.

Ilo tõre ko an Jijej, RiJu ro rekõn jepdak im rauni juon tebõl̦ in m̦õñã. Bõran kajjojo iaan rein rej jujall̦o̦k ñan tebõl̦ eo im rej jepdak kõn peier ituanmiiñ ioon juon pet. Wãween in ekõm̦m̦an bwe ren maroñ kõjerbal wõt peier ituanmoon̦. Juon bok ej kwal̦o̦k bwe kõnke aolep ro rej m̦õñã rej jepdak kõn ituanmiiñin peier im pãd iturin doon, “bõran kajjojo em̦m̦aan ej pãd iturin ubõn em̦m̦aan eo ej pãd iturin. Eñin unin rekõn kwal̦o̦k kõn an juon armej ‘pãd iubõn’ eo juon.”

Ear juon jeraam̦m̦an ejejuwaan ñe juon ej pãd iturin eo ej bõran baam̦le eo ak eo ej tõl tebõl̦ in m̦õñã eo. Ilo iien Kõjota eo an Jijej ãliktata, “rũkal̦oor eo Jijej ej yokwe,” rijjilõk Jon, ear pãd iturin. Kõn an kar Jon pãd iturin Jijej, ear pidodo an “atartar ioon ubõn” Jijej im kwal̦o̦k kajjitõk ñane.​—Jon 13:23-25; 21:20.