Maribye ya ku sila a ma tirhisiwa ku sila mavele leswaku ku endliwa mapa ya ku baka xinkwa. Ku tirhisiwa ka wona a ku ri ntirho wa siku ni siku wa vavasati kumbe mahlonga lawa a ma tirha emitini. Eminkarhini ya khale pongo ra maribye ya ku sila a ri tolovelekile.—Eksoda 11:5; Yeremiya 25:10.

AEgipta wa khale ku ni swifaniso leswi kovotliweke leswi kombisaka endlelo leri. Mavele a ma cheriwa eka ribye leri a ri celekilenyana ri tlhela ri leha. Munhu loyi a a sila a a ri veka emahlweni ka yena a khinsama ivi ribye leritsongo leri a silaka ha rona a ri khoma hi mavoko mambirhi a sungula ku sila mavele. Xiviko xin’wana xi vula leswaku maribye wolawo ma tika kwalomu ka tikhilogiramu timbirhi ku ya eka mune. Loko ribye rolero ro tirhisiwa tanihi tlhari, ri nga dlaya munhu.—Vaavanyisi 9:50-54.

Ku siriwa ka mavele a ku ri ka nkoka swinene lerova nawu wa Bibele a wu nga pfumeli leswaku munhu a xupuriwa hi ku tekeriwa ribye leri. Deteronoma 24:6 yi ri: “A nga kona la faneleke a teka ribye ro sila kumbe xisilo xa rona, xi va xitiyisekiso xa nandzu, hikuva lexi a xi tekeke xi va xitiyisekiso xa nandzu i moya-xiviri.”

Bibele yi vula leswaku Yesu u le ‘xifuveni xa Tata wakwe.’ (Yohane 1:18) Marito lawa ma vula ku va Yesu a ri ekusuhi kumbe a tsakeriwa hi Xikwembu. Ma tlhela ma fambisana ni mukhuva wa Vayuda lowu a va wu endla loko va dya.

Eminkarhini ya Yesu, Vayuda a va vurhama esofeni leri rhendzeleke tafula. Un’wana ni un’wana a a vurhama hi rihlanguti ra ximatsi ivi nhloko yakwe yi va ekusuhi ni tafula, milenge yi va ekule na rona kasi voko ra ximatsi ri khigela eka xikhegelo lexitsongo. Voko ra xinene leri nga khigelangiki helo, a va dya hi rona. Leswi vanhu lava dyaka etafuleni a va vurhama hi tlhelo ra ximatsi, un’wana a a va kusuhi ni un’wana naswona vulavisisi byin’wana byi vule leswaku “nhloko ya un’wana a yi va ekusuhi ni xifuva xa un’wana loyi a tshameke endzhaku ka yena naswona a ku vuriwa leswaku ‘u tshame exivufeni’ xa un’wana.”

Loko munhu a tshame exifuveni xa nhloko ya ndyangu kumbe n’wini wa nkhuvo, sweswo a swi tekiwa ku ri lunghelo ro hlawuleka. Hikwalaho, eka Paseka ya Yesu yo hetelela, muapostola Yohane “mudyondzisiwa loyi Yesu a a n’wi rhandza” hi yena a atshame exifuveni xa Yesu. Yohane a a “khegetela exifuveni xa Yesu” leswaku a n’wi vutisa.—Yohane 13:23-25; 21:20.