Kua Kotou Iloʼi Koa?
Neʼe feafeaʼi te teuteuʼi ʼo te falena ʼi te temi muʼa?
Neʼe fakaʼaogaʼi he foʼi maka moʼo lailaīʼi te fulumeto ke liliu ko he falena moʼo fai ʼo te pane. Ko te hahaʼi fafine peʼe ko te hahaʼi kaugana ʼe natou fakaʼaogaʼi ʼi te ʼaho fuli. ʼI te ʼu temi ʼaia, neʼe logo te logoaʼa ʼo te gaueʼi ʼo te foʼi maka ʼi te ʼu faʼahi fuli.—Ekesote 11:5; Selemia 25:10.
ʼE maʼu te ʼu pāki neʼe togi ʼi te temi muʼa, ʼi Esipito, ʼe fakaha ai pe neʼe feafeaʼi tanatou fakaʼaogaʼi te foʼi maka ʼaia moʼo fai te falena. Neʼe natou hili te fulumeto ki te fuga maka. Ko ia ʼae ka ina lailaīʼi te fulumeto, ʼe tuʼu tuli ʼi muʼa ʼo te foʼi maka, mo puke he tahi foʼi maka ʼe veliveli age, pea ina lailaīʼi te fulumeto. ʼE ui ʼi te tohi, ko te foʼi maka ʼae ʼe veliveli age ʼe kilo 2 peʼe 4 tona mamafa. Neʼe feala ke fakaʼaogaʼi ʼo hage ko he mahafu moʼo matehi he tahi.—Tui Fakamaau 9:50-54.
Ko te teuteuʼi ʼo te falena neʼe maʼuhiga ia ki te maʼuli ʼo te ʼu famili. Ko te tupuʼaga la ʼaia ʼo te fai e Sehova ia te lao ʼi te Tohi-Tapu ʼe tapuʼi ai ki he tahi ke ina toʼo he foʼi maka ohage ko he totogi. ʼE ui fenei ia Tetelonome 24:6: “E mole too anai ke fakamooni ai te totogi te u maka e lua o te mea fakamalu fulumeto, pee ko te maka ae i oluga; koteuhi ko te too anai aia o te mauli totonu ke fakamooni ai te totogi.”