I anaasa nganu ti mbia tipa ka kusa ngungo kaa ba kpakuto na ni. Adee watadu amoyambu rogo akporo dunduko anaamangasunge na mbia na aʹuru dunduko. Ka gia woro aboro i ni sa he ti mbia angia gupai naanamanga na auru dunduko bakuru kusayo.—Gate 11:5; Yeremaya 25:10.

Gu gbakigbaki akpiahe du ti ambia Ezipeta yo nayugo wai ayugo gipai re anaamanga. I anaamaa zende nganu rii kpakpu mbia. Gu boro naanasa he anaakuko gii mbia na ki zadi wirimbia na abeni ue dunduko, nga gu ni anaasa he na ni. Ringbisihe kuti kura magazini sa, barõa wirimbia anidu nga akiro ue watadu biama. Ka si adu nga boro so kurani na gu wirimbia re, ka si arengbe arengba ka imo ni.—Abasapungbanga 9:50-54.

Mbia sahe adu na nyanyakipaha tipa gu raka nga ga aborokporo, si du Ziazia Kekeapai azahe ti ni nga ka boro zingo ga boro mbia kuba kurahe ya. Pa Fu Rugute ni Ue he 24:6 naya, “A nga boro sa ka di mbia sahe watadu wiri mbia sahe ni ngbaanga te, bambiko ni di unga boro ni ngbaanga.”

Ziazia Kekeapai naya Yesu “du ti ngbadu Mbori nga Ba.” (Yoane 1:​18) Gi fugo re nayugopa gu wene pagume du dagba Yesu na Mbori. Agi afugo re nayugopa gu sino mangapai aYudo anaamangaha ti regbo riahe.

Ti regbo Yesu, aYudo anaasungo kirikiri pati mbisa ka ri riahe. Gu boro naanisungu ti ri mbisa, ni ani tai nduni na kini songodi tiní na kpurunga gare beni ri mbisa. Pa sungo ni wa gure aundo ni tipa kumba beni sungu gbua. Gu kura buku sa nasakapai tipa gipai re nga, wa duhe nga agu aboro nari riahe anaamegeda kurii garebe yo, guni pati gu kurani, “ri gu boro na nisungu pati ni animegedi tihe kuti ngbadu gu boro na nisungu gii ni, na si anidu wa ni pi kuti ngbadu gu kurani.”

Si anidu ni pa momu ka pi kuti ngbadu gu boro nga bariikporo watadu gu boro naanimangi pumbo. Sidu, ti gu regbo Yesu amangi yangara Pumbo Susiri re, gu “ko Yesu anakpi nyemuko,” nangia gu mokedi nangia Yoane amegedi kuti ngbadu Yesu. Si du Yoane arengbe ti ni ka ‘megeda kuti Yesu’ na kini sasanako na asanahe.​—Yoane 13:23-25; 21:20.