An patriyarkang si Job pigsasabing sarong ‘matanos na tawo asin naglilikay sa paggibo nin maraot.’ (Job 1:1, BPV) * Si Lot inapod na “lalaking matanos.” (2 Pedro 2:8) Si David man pigsasabing ‘matanos an piggigibo’ sa atubangan nin Diyos. (1 Hade 14:8) Minsan siring, aramon ta kun ano talaga an nagin buhay kan mga karakter na iyan sa Bibliya. Mahihiling ta na (1) may mga nagibo sindang sala, (2) dakul an manunudan ta sa halimbawa ninda, asin (3) talagang mapapaugma an Diyos nin mga tawong bakong perpekto.

Si Job nag-agi nin sunod-sunod na problema na garo baga bakong makatanusan. Nagkaigwa siya nin salang paghuna, na iniisip na mayong pakiaram an Diyos magdanay man siyang maimbod o dai. (Job 9:20-22) Kumbinsidong marhay si Job na siya matanos kaya para sa iba garo baga pinapaluwas ni Job na mas matanos siya kisa sa Diyos.—Job 32:1, 2; 35:1, 2.

 Nag-alangan si Lot na gibuhon an malinaw asin simple man sana kutanang desisyon. Napupurisaw siyang marhay sa grabe kaimoral na mga tawo sa Sodoma asin Gomora, asin talagang ‘nagtios siya nin makuri’ huli sa mga ginigibo ninda. (2 Pedro 2:8, BPV) Ipinahayag nin Diyos na pupuhuon niya an maraot na mga siyudad na iyan, asin tinawan niya nin pagkakataon si Lot na maligtas kaiba an pamilya niya. Tibaad isipon mo na an napupurisaw na si Lot an inot kutanang naghali. Pero sa kritikal na sitwasyon na ini, nag-alangan siya. Kinaipuhan pa kan mga isinugong anghel na butungon siya saka an pamilya niya paluwas sa siyudad pasiring sa ligtas na lugar.—Genesis 19:15, 16.

May pagkakataon na si David nawaran nin pagpupugol sa sadiri asin nakakomiter nin pagsambay sa agom kan iba. Nakakabigla nanggad ta sa pagpurbar na itago an kasalan niya, ipinagadan ni David an agom kan babayi. (2 Samuel, kapitulo 11) Sinasabi kan Bibliya na an ginibong iyan ni David ikinaanggot na marhay ni Jehova.—2 Samuel 11:27.

Si Job, si Lot, saka si David gabos nakagibo nin sala, asin an iba kaiyan grabe kagabat. Pero, arog kan mahihiling ta, sinda bilog na pusong nagmamawot na maglingkod sa Diyos asin magin makinuyog Saiya. Ipinahiling ninda na nagbabasol sinda asin andam na magbago. Kaya, yaon an pag-uyon nin Diyos sa sainda, asin sa kabilugan inaapod sinda sa Bibliya na maimbod na mga tawo.

Huling kita mga tawong bakong perpekto, dai ta malilikayan na makagibo nin sala. (Roma 3:23) Pero pag nakagibo kita nin sala, kaipuhan na ipahiling tang nagsusulsol kita dangan gibuhon ta an satong makakaya na itama iyan.

Paano itinama ni Job, Lot, asin David an saindang mga sala? Sa puso ni Job, maririsa na siya  tawong may integridad. Pagkatapos na makipagrasunan saiya an Diyos, itinama ni Job an sala niyang kaisipan asin binawi an sinabi niya. (Job 42:6) An pagmansay ni Lot sa imoral na paggawi kan mga tawo sa Sodoma asin Gomora talagang kauyon kan mga pamantayan nin Diyos. An problema ta sa kadikit na panahon dai siya nakamati nin pagkaapurado. Pero kan huri, duminulag siya paluwas sa siyudad kaya nakaligtas siya sa paghukom nin Diyos. Nagin makinuyog siya asin dai ngani nagsalingoy sa binayaan niya. Nakagibo si David nin seryosong kasalan huling binalga niya an ley nin Diyos, pero ipinahiling niya kun ano talaga an nasa puso niya paagi sa sinserong pagsulsol asin pakimahirak sa Diyos na patawadon siya.—Salmo 51.

An pag-uyon nin Diyos sa mga lalaking idto kauyon kan saiyang rasonableng inaasahan sa mga tawong bakong perpekto. Aram na marhay nin Diyos an pagkagibo sa sato, na ‘ginigirumdom na kita kabo-kabo.’ (Salmo 103:14) Kaya kun aram nin Diyos na dai ta malilikayan na makagibo nin sala, ano an linalauman niya sa sato?

Maaraman ta sa konseho ni David sa aki niyang si Solomon kun paano ta mapapaugma an Diyos. ‘Aki ko, midbidon mo an Diyos kan saimong ama, asin paglingkudan mo siya sa bilog mong puso.’ (1 Cronica 28:9, BPV) Ano an buot sabihon kan bilog na puso? Iyan an puso na may pagkamuot sa Diyos asin determinado na magin makinuyog sa saiyang kabutan asin mga kahagadan. Bako iyan perpektong puso, pero nagmamawot iyan na makinuyog na maglingkod sa Diyos asin andam iyan na itanos. Para sa Diyos, si Job sarong ‘matanos na tawo,’ si Lot “lalaking matanos,” asin si David ‘matanos sana an piggigibo’ huli sa pagkamuot ninda sa Diyos asin sa pagmawot nindang magin makinuyog. Dawa nakagibo sinda nin mga sala, napaugma ninda an Diyos.

Kaya kun may mga naiisip kitang maraot na habo ta man kutanang isipon, may nasabi kita na ikinakasupog ta, o nakagibo nin sarong bagay na napag-isip-isip tang sala palan, mapakusog lugod kita kan mga halimbawa ninda. Aram nin Diyos na dai ta kayang magin perpekto ngunyan. Pero, talagang inaasahan niya na mamumutan ta siya asin maghihinguwang kuyugon siya. Kun bilog an satong puso sa bagay na ini, makakapagtiwala kita na mapapaugma ta man an Diyos.