Pathian nih a Kan Daw kho Taktak hnga Maw?
Baibal ah Pathian nih a dawtmi hna an kong aa ṭial. Mah kong hna na rel tikah ‘Kei tah Pathian nih a ka daw ve hnga maw’ tiah naa hal bal maw? ‘Kei cu sualnak a ngei lomi le miding ka si lo caah a hmaanmi thil kha a zungzal in cun ka tuah kho lai lo’ tiah na ruah men ko lai.
Job cu “soisel awk um lo, miding” a si.—Job 1:1
Hlanlio Israel mi hna i an pupa a simi Job kha “soisel awk um lo, miding” tiah an rak auh. (Job 1:1) An pupa pakhat a si vemi Lot zong kha “mi ṭhapa” tiah an auh. (2 Piter 2:8) Hlanlio Israel singpahrang David kha Pathian mithmuh ah “a dingmi lawng a tuahtu” tiah ti a si. (1 Siangpahrang 14:8) Asinain an kong kha ṭha tein kan hlathlai tikah (1) palhnak an rak tuah, (2) an sinin cawn awk tampi a um i (3) mitlinglo a simi minung nih Pathian dawtnak hmuh khawh a si ko timi kong hna kha kan hngalh lai.
Palhnak An Rak Tuah
“Nawlbia zeihmanh i a rel lomi hna nih awlok an chonhmi, miṭha Lot kha [Pathian nih] a khamh.”—2 Piter 2:7
Job cu a ding lomi a lomi harnak a phunphun a rak tong. Mah tikah a hmaan lomi ruahnak a hun ngei i Pathian cu ka zumh zong, zumh lo zongah Pathian nih zei ah a rel lai lo ti hmanhin biachahnak a rak tuah. (Job 9:20-22) Mah lengah Job nih amah dinnak kha aa zumh tuk caah Pathian nakin ka ding deuh ti hmanhin a hun chim.—Job 32:1, 2; 35:1, 2.
Lot cu a fiang i a sawhsawh te a simi biakhiahnak tuah awkah aa cungcang. Sodom le Gomorrah mi hna i a ṭhalo tukmi an ziaza nih Lot cu a lungre a theihter i ‘a lung a fahter.’ (2 Piter 2:8) Pathian nih a sual tukmi mah khua hna a hrawh lainak kong le Lot cu a chungkhar he a luatter hna lainak kong kha a chimh. A lungre a thei tukmi Lot cu hmasa bik ah a tli lai tiah na ruah men lai. Asinain a biapi tukmi mah caan ah a tli colh lo. Mah tikah vancung mi hna nih Lot le a chungkhar cu an kut in an hnuh hna i khua leng ah an chuahpi hna.—Genesis 19:15, 16.
David cu ‘a lung dihlak in [Pathian] a zul i [Pathian] mithmuh ah a dingmi lawng a tuah.’—1 Siangpahrang 14:8
David nih voikhat cu amahle amah aa uk khawh lo caah midang nupi he nupa sualnak a tuah. A sualnak thuh awkah mah minu i a va kha a thah. (2 Samuel, dal 11) David tuahmi thil nih “BAWIPA kha lunglawm loin a tuah” tiah Baibal nih a ti.—2 Samuel 11:27.
Job, Lot le David nih palhnak an rak tuah. Asinain an pathum in Pathian bia an ngai i an lungthin dihlak in Pathian kha an biak. An tuahmi palhnak ruangah an ngaihchiatnak kha an langhter i an nunning thlen a herh ahcun i thlen ding ah timhcia an si. Cucaah annih cu Pathian nih a dawtmi, zumhfekmi an si tiah Baibal nih a ti.
An Sinin Zeidah Kan Cawn khawh?
Ahohmanh palhnak a tuah bal lomi kan um lo. (Rom 3:23) Asinain palhnak kan tuah tikah kan ngaihchiatnak langhter in a hmaanmi thil tuah awkah kan si khawh chungin kan i zuam awk a si.
Job, Lot le David nih an palhnak kha an hngalh tikah zeitindah an i remh? Job cu zumhawk a tlakmi a si. Pathian nih a chimhhrinh hnuah a hmaan lomi a ruahnak kha a remh i a chim sualmi bia ruang zongah a ngaihchiatnak kha a langhter. (Job 42:6) Sodom le Gomorrah khua mi hna i an ziaza ṭhalo Lot nih a hmuhning cu Pathian phunglam he aa khat. Lot a palhnak cu a biapi tukmi caan ah thil a tuah colh lomi hi a si. A donghnak ah khua leng i a tlik caah thihnak in a luat. An kaltakmi thil hna kha hnulei i her in zoh hlah u timi nawl pekmi kha a zulh. David nih Pathian nawlbia kha a buar i sualnak ngan a tuah ko nain lungtak tein aa ngaihchih kha a langhter. Cun Pathian zaangfahnak hmuh awk zongah a nawl.—Salm dal 51.
Pathian nih a tlinglomi minung kan sinin aa tlakmi zat lawng aa ruahchan caah annih kha a dawt khawhmi hna a si. Pathian nih “zei in dah ser kan si kha a hngalh i leidip men kan si kha a philh lo.” (Salm 103:14) Palhnak a tuah bal lomi kan um lo ti kha Pathian nih a hngalh caah kan sinin zeidah a kan hal?
Pathian nih “zei in dah ser kan si kha a hngalh i leidip men kan si kha a philh lo.”—Salm 103:14
A Tling lomi Minung hi Pathian nih a Kan Daw kho hnga Maw?
David nih a fapa Solomon a chimhhrinhnak bia in Pathian dawtnak hmuh awkah zeidah tuah a herh ti kha kan hngalh khawh. “Nang, Solomon ka fapa, na pa i a Pathian hi hngal law lung ṭengnge lo [lungthin dihlak, NW] te le a tha a thomi ruahnak he a rian ṭuan tuah.” (1 Chanrelnak 28:9) Lungthin dihlak timi cu zei sullam dah a si? Pathian duhnak kha hngal in dawtnak he a rian ṭuan kha a chim duhmi a si. Mah lengah Pathian nawl ngaih in chimhhrinhnak cohlan duhnak lungput ngeih zong a si. Asinain a tlingmi lungthin ngeih a hau tinak cu a si lo. Job, Lot le David nih Pathian an dawt caah a nawl ngaih an duh. Cucaah Job kha “soisel awk um lo, miding”, Lot kha “mi ṭhapa”, David kha Pathian mithmuh ah “a dingmi lawng a tuahtu” in Pathian nih a hmuhmi hna a si. Palhnak an rak tuah ko nain Pathian nih a dawt hna.
Lungthin dihlak timi cu Pathian duhnak kha hngal in dawtnak he a rian ṭuan kha a si
A ṭhalomi ruahnak kan ngeih sual tik, a ṭhalomi bia hna kan chim sual tik le a hnuah kan i ngaihchih hngami thil kan tuah sual tikah atu kan i ruahmi tahchunhnak hna in thazaang i lak hna u sih. Atu caan ah sualnak a ngei lomi an um lai lo ti kha Pathian nih a hngalh. Asinain amah kha dawt awk le a nawl ngaih awkah fakpi in i zuam ding in Pathian nih a kan hal. Mah a kan halmi kha lungthin dihlak in kan tuah ahcun Pathian nih a kan dawt lai ti kha kan zumh khawh.
Mah Kong Hna Zong Hi Na Duh Khawh Men
Baibal—A Chungah Zei Thawngpang dah A UM?
Job Nih A Zumhfehnak Kha Aa Tlaih Peng
Thilnung vialte nih Pathian cungnung bik uktu a sinak an langhter ti kha Job Baibal cauk nih zeitindah a langhter?
