Biblu dọ gando tọgbo Job go dọ ewọ yin ‘mẹpipe podọ jlọjlọ.’ (Job 1:1) Lọti yin yiylọdọ “dawe dodonọ.” (2 Pita 2:8) Podọ Davidi wà onú “he yin jlọjlọ” to nukun Jiwheyẹwhe tọn lẹ mẹ. (1 Ahọlu lẹ 14:8) Ṣigba, mì gbọ mí ni lẹnnupọn sisosiso do gbẹzan mẹhe go Biblu donù ehelẹ tọn ji. Mí na mọdọ (1) yé ṣinuwa whlasusu, (2) mí sọgan plọnnu sọn apajlẹ yetọn mẹ, podọ (3) gbẹtọvi mapenọ lẹ sọgan hẹn homẹ Jiwheyẹwhe tọn hùn nugbonugbo.

Job jiya awufiẹsa sinsinyẹn debọdo-dego lẹ tọn, he taidi nuhe ma sọgbe. E wá tindo linlẹn agọ̀ dọ eyin emi hẹn yise emitọn go kavi lala, Jiwheyẹwhe ma tlẹ nọ hò enẹ pọ́n. (Job 9:20-22) Job tindo nujikudo dọ emi yin dodonọ sọmọ bọ mẹdevo lẹ tlẹ nọ lẹndọ e to ede jla di dodonọ hú Jiwheyẹwhe lọsu.—Job 32:1, 2; 35:1, 2.

Lọti whleawu nado basi nudide de he na ko sọgbe bosọ bọawu. Ewọ jẹflumẹ taun, na fẹnnuwiwa he gbayipe to tòmẹnu Sodọmi po Gomọla po tọn lẹ ṣẹnṣẹn  wutu, podọ walọyizan yetọn tlẹ zọ́n bọ “alindọn dodonọ etọn nọ yin yasana.” (2 Pita 2:8) Jiwheyẹwhe lá dọ emi jlo na và tòdaho ylankan ehelẹ sudo, podọ e na dotẹnmẹ Lọti po whẹndo etọn po nado yin whinwhlẹngán. Hiẹ sọgan lẹndọ, na Lọti ko jẹflumẹ pete wutu, ewọ wẹ na yin omẹ tintan he na họ̀n sọn tòdaho lọ mẹ. Etomọṣo to ojlẹ owù tọn enẹ mẹ, Lọti jẹ gbàndọn ji. Angẹli he yin didohlan nado whlẹn ewọ po whẹndo etọn po gán lẹ wá to dandannu glọ nado hẹn alọ yetọn go bo plan yé tọ́n sọn tòdaho lọ mẹ yì fie tindo hihọ́.—Gẹnẹsisi 19:15, 16.

Davidi yinuwa po wazẹjlẹgo po to ojlẹ de mẹ, bo deayọ hẹ asi mẹdevo tọn. E blawu dọ, nado tẹnpọn bo ṣinyọnnudo nuṣiwa ehe, Davidi degbe dọ asu yọnnu lọ tọn ni yin hùhù. (2 Samuẹli, weta 11) Biblu dọ dọ nuhe Davidi wà “ma hẹn homẹhun OKLUNỌ gba.”—2 Samuẹli 11:27.

Job, Lọti po Davidi po ṣinuwa, bọ delẹ to nuṣiwa yetọn lẹ mẹ sinyẹn taun. Ṣigba, dile mí na mọ do, yé yí ahundopo do sẹ̀n Jiwheyẹwhe bo setonuna ẹn. Yé tindo ojlo nado dohia dọ nuhe emi wà vẹna emi podọ nado basi vọjlado eyin e biọ domọ. Enẹwutu, Jiwheyẹwhe yí nukundagbe do pọ́n yé, podọ to popolẹpo mẹ Biblu do yé hia taidi sunnu nugbonọ lẹ.

Taidi gbẹtọvi mapenọ lẹ, mí ma sọgan dapana nuṣiwa lẹ mlẹnmlẹn. (Lomunu lẹ 3:23) Ṣigba, eyin mí wá ṣinuwa, mí dona nọ dohia dọ e vẹna mí, bo nọ wà nuhe go mí pé lẹpo nado basi vọjlado.

Nawẹ Job, Lọti po Davidi po tẹnpọn bo basi vọjlado gbọn? Na nugbo tọn, tenọgligo-hẹntọ wẹ Job yin. To whenue Jiwheyẹwhe hẹn ẹn nado lẹnnupọn godo, Job jla pọndohlan agọ̀ etọn do, bo dohia dọ  nuhe emi dọ wayi lẹ vẹna emi. (Job 42:6) Nukun he Lọti yí do pọ́n walọ gblezọn tòmẹnu Sodọmi po Gomọla po tọn lẹ tọn sọgbe taun hẹ nujinọtedo Jiwheyẹwhe tọn lẹ. Fie ewọ ṣinuwa te wẹ yindọ e dọngbàn na ojlẹ de whẹpo do yinuwa. Amọ́ to godo mẹ, e họ̀n sọn tòdaho he yin vivasudo lọ lẹ mẹ bo gbọnmọ dali lùn whẹdida Jiwheyẹwhe tọn tọ́n. E setonu bo ma tlẹ lẹkọ nado pọ́n nuhe e jodo godo lẹ. Dile etlẹ yindọ Davidi waylando sinsinyẹn bo gbàsẹ́n Jiwheyẹwhe tọn, e do nuhe tin to ahun etọn mẹ nugbonugbo hia gbọn lẹnvọjọ nujọnu tọn didohia po lẹblanu Jiwheyẹwhe tọn bibiọ po dali.—Psalm 51.

Nukundagbe he Jiwheyẹwhe yí do pọ́n sunnu ehelẹ dohia dọ nuhe e nọ donukun sọn gbẹtọvi mapenọ lẹ si nọ sọgbe hẹ lẹnpọn dagbe. Jiwheyẹwhe “yọ́n didá mítọn; e sọ flindọ kọ́gudu wẹ mí.” (Psalm 103:14) Todin, to whenuena e yindọ Jiwheyẹwhe yọnẹn dọ mí ma sọgan dapana nuṣiwa lẹ mlẹnmlẹn, etẹwẹ e nọ donukun sọn mí si?

Ayinamẹ he Davidi na visunnu etọn Sọlomọni do nuhe mí sọgan wà nado hẹn homẹ Jiwheyẹwhe tọn hùn hia. E dọmọ: “Hiẹ, Sọlomọni visunnu ṣie, hiẹ ni yọ́n Jiwheyẹwhe otọ́ towe tọn, bo nọ yí [ahun] pipé de do sẹ̀n ẹn.” (1 Otannugbo lẹ 28:9) Etẹwẹ hogbe lọ ahun pipé zẹẹmẹdo? E zẹẹmẹdo ahun he nọ whànmẹ nado yiwanna Jiwheyẹwhe bo magbe nado yọ́n ojlo etọn bosọ nọ wà ẹ. E ma zẹẹmẹdo ahun he ma tindo oblọ de gba, ṣigba ahun de he nọ whànmẹ bọ yè nọ jlo vẹkuvẹku nado setonuna Jiwheyẹwhe podọ nado nọ kẹalọyi mẹplọnlọ sọn ojlo mẹ wá. Jiwheyẹwhe pọ́n Job hlan taidi ‘mẹpipe,’ Lọti taidi “dodonọ,” podọ Davidi taidi mẹhe ‘wà nuhe yin jlọjlọ kẹdẹ’ to nukun Jiwheyẹwhe tọn mẹ, na yé yiwanna ẹn bo tindo ojlo nado setonuna ẹn wutu. Mahopọnna dọ yé ṣinuwa, yé penugo nado hẹn homẹ Jiwheyẹwhe tọn hùn.

Enẹwutu, eyin mí tindo linlẹn ylankan lẹ he mí ma na ko jlo nado tindo, kavi mí dọ nude he wá huwinyan na mí, kavi mí wà nude bo wá doayi e go to godo mẹ dọ e ma sọgbe, mì gbọ apajlẹ he ji mí ṣẹṣẹ dọhodo lẹ ni gọalọna mí ma nado gbọjọ. Jiwheyẹwhe yọnẹn dọ mí ma sọgan yinuwa taidi mẹpipe to egbehe. Etomọṣo, e nọ donukun dọ mí ni yiwanna emi bo dovivẹnu nado setonuna emi. Eyin mí yinuwa po ahun pipé po to whẹho ehe mẹ, mí sọgan deji dọ mí na hẹn homẹ Jiwheyẹwhe tọn hùn.