Biblia ke tubaka nde Yobi vandaka muntu ya kukonda kifu mpi ya mbote. (Yobi 1:1) Yo ke bingaka Loti ‘muntu ya lunungu.’ (2 Piere 2:8) Diaka, yo ke tubaka nde Davidi ‘vandaka kusala kaka mambu yina ke pesaka Nzambi kiese.’ (1 Bantotila 14:8) Beto tadila mbote-mbote luzingu ya bantu yai ya Biblia ke tubilaka. Ebuna, beto ta mona nde (1) bo salaka bifu, (2) beto lenda longuka mambu mingi na mbandu na bo mpi nde (3) bantu ya kukonda kukuka lenda sepedisa Nzambi.

Yobi kutanaka ti bampasi mingi ya yandi monaka nde yo vandaka mbote ve. Yandi kumaka ti bangindu ya mbi mpi tubaka nde Nzambi ke kudibanza ve sambu na yandi, ata yandi ke tanina lukwikilu na yandi to ve. (Yobi 9:20-22) Yobi vandaka kundima kibeni lunungu na yandi mosi mpi sambu na bantu ya nkaka yo monanaka bonso nde yandi vandaka kudimona muntu ya lunungu kuluta Nzambi.—Yobi 32:1, 2; 35:1, 2.

Loti vandaka ti keti-keti na kubaka desizio mosi ya pete mpi ya pwelele. Yandi vandaka kudiyangisa  mingi sambu na mansoni yina bantu ya Sodome ti Gomore vandaka kusala. Nkutu, mambu yango vandaka “kupesa moyo na yandi ya lunungu mpasi.” (2 Piere 2:8) Nzambi bakaka lukanu ya kufwa bambanza yai ya mbi mpi pesaka Loti ti dibuta na yandi dibaku ya kuguluka. Nge lenda yindula nde Loti basikaka nswalu na mbanza yina. Kansi na ntangu yina ya mpasi, yandi vandaka kusukinina. Yo lombaka nde bawanzio yina Nzambi tindaka sambu na kugulusa yandi ti dibuta na yandi kusimba bo na maboko mpi kubasisa bo na mbanza.—Kuyantika 19:15, 16.

Davidi kudiyalaka ve na dibaku mosi buna mpi yandi vukisaka nitu ti nkento ya nkani. Sambu na kubumba disumu na yandi, Davidi salaka komplo sambu bo fwa bakala ya nkento yango. (2 Samuele, kapu 11) Biblia ke tuba nde mambu yina Davidi salaka, yo “pesaka Mfumu Nzambi kiese ve.”—2 Samuele 11:27.

Yobi, Loti mpi Davidi salaka bifu; mpi bifu na bo yankaka vandaka ya nene. Kansi, mutindu beto ta mona yo, bo vandaka ti mpusa ya kusadila Nzambi na ntima ya mvimba mpi na bulemfu yonso. Na luzolo yonso, bo vandaka kulomba ndolula mpi kusoba bikalulu na bo. Yo yina, Nzambi ndimaka bo mpi mbala mingi Biblia ke bingaka bo bantu ya kwikama.

Sambu beto kele bantu ya kukonda kukuka, beto lenda sala bifu. (Baroma 3:23) Kansi, kana beto me sala yo, beto fwete lomba ndolula mpi kusala mambu ya beto lenda sala sambu na kusungika yo.

Inki mutindu Yobi, Loti mpi Davidi sungikaka bifu na bo? Yobi vandaka muntu ya kwikama. Ntangu Nzambi solulaka ti yandi, Yobi sungikaka bangindu na yandi ya mbi mpi yandi lombaka ndolula. (Yobi 42:6) Mutindu Loti tadilaka mambu ya nsoni yina bantu ya Sodome ti Gomore vandaka kusala wakanaka mpenza ti bansiku ya Nzambi. Diambu ya  mpasi vandaka nde yandi sukininaka na kubasika na mbanza yina. Nsuka-nsuka, yandi basikaka na mbanza yina mpi ndola yina kuminaka yandi ve. Na bulemfu yonso, yandi talaka nkutu ve bima yina bikalaka na nima. Ata Davidi salaka kifu ya nene na mutindu yandi fwaka nsiku ya Nzambi, yandi monisaka mambu yina vandaka kibeni na ntima na yandi, disongidila yandi balulaka ntima na masonga yonso mpi lombaka Nzambi na kuwila yandi mawa.—Nkunga 51.

Nzambi tadilaka bantu yai na bukati-kati kaka mutindu yo ke lombaka nde yandi tadila bantu ya kukonda kukuka. Nzambi me “zaba na nki yandi salaka beto, yandi zaba mbote nde beto kele kaka putulu.” (Nkunga 103:14) Yo yina, kana Nzambi ke zabaka nde beto lenda sala bifu, nki yandi ke lombaka beto na kusala?

Ndongisila yina Davidi pesaka mwana na yandi Salomo ke monisa beto mutindu beto fwete sepedisa Nzambi. Yandi tubaka nde: “Nge mwana na mono, longuka na kuzaba mbote-mbote Nzambi ya mono tata na nge ke sambaka; sadila yandi na ntima mosi.” (1 Bansangu 28:9) Ntima mosi ke tendula nki? Yo kele ntima yina ke zolaka Nzambi, ntima ya ke zolaka kuzaba luzolo na yandi mpi kusala yo. Yo kele ve ntima ya kukuka, kansi yo kele ntima yina ke vandaka ti mpusa ya ngolo ya kusadila Nzambi na bulemfu yonso mpi yina ke zolaka nde bo sungika yo. Zola ya Nzambi mpi mpusa ya kulemfukila yandi salaka nde Yobi kuvanda muntu ya kukonda kifu, Loti ‘muntu ya lunungu’ mpi Davidi muntu ya ‘vandaka kusala kaka mambu yina ke pesaka Nzambi kiese.’ Ata bo salaka bifu, bo sepedisaka Nzambi.

Yo yina, kana bangindu ya mbi me kwisila beto na mabanza, kana beto me wa mpasi na ntima sambu na kima mosi ya beto me tuba, to kana beto me sala diambu mosi, ebuna beto me mona na nima nde yo kele mbi, bambandu ya bantu ya beto me tubila lenda pesa beto kikesa. Nzambi ke zaba nde beto lenda sala ve mambu na mutindu ya kukuka bubu yai. Kansi, yandi ke lombaka beto na kuzola yandi mpi na kusala ngolo sambu na kulemfukila yandi. Kana beto ke sadila Nzambi na ntima mosi, beto lenda vanda ti kivuvu nde beto ta sepedisa yandi.