Lelo Bine Tubwanya Kusangaja Leza?
Lelo kashā kodi mutange myanda ya bantu bamo ba mu Bible watendela ne kunena amba, ‘Nkibwanyapo kwikala bwa abo!’ Ubwanya kulanga’mba, ‘Ami ke ne mubwanininepo nansha moloke, kadi nkiloñangapo nyeke’nka byoloke.’
Yoba wādi “mubwaninine moloke.”—Yoba 1:1, Kunshi Kwa dyani
Mukulutuba Yoba i mutelwe bu “mubwaninine moloke.” (Yoba 1:1) Lota wāityilwe bu “muntu moloke.” (2 Petelo 2:8) Kadi Davida wātelelwe bu wādi ulonga “byobya byoloke” ku meso a Leza. (1 Balopwe 14:8) Ino, tubandaulei’ko bityetye būmi bwa bano bantu ba mu Bible. Tusa kumona amba (1) bālongele bilubo, (2) tubwanya kuboila ñeni mivule ku kimfwa kyabo, ne kya (3) bantu bakubulwa kubwaninina babwanya bine kusangaja Leza.
BĀLONGELE BILUBO
“[Leza] wāpandije Lota moloke, wādi ujingwa mutyima bininge na mwiendelejo wādi wiendeja pampikwa bumvu bantu bajilula bijila.”—2 Petelo 2:7
Yoba wāsusukile na byamalwa bivule byāmwekele bu byampikwa kwendela’mo. Wāikala na milangwe mibi na kufula kukulanga’mba Leza katanga’kopo mutyima nansha shi muntu walama lwitabijo Mwadi nansha shi kalaminelopo. (Yoba 9:20-22) Yoba wādi ukulupile bininge boloke bwandi bwine bwāmwekele ku bakwabo na aye wianya bu moloke kutabuka ne Leza.
Lota wādi kaekaka kukwata butyibi bwa patōkelela kadi bupēla. Mutyima wandi wāfītyilwe fututu pa busekese bwa munyanji bwa bantu ba mu Sodoma ne Ngomola, mwiendelejo wabo wāmwesha’nka ne “muya wandi moloke malwa.” (2 Petelo 2:8) Leza wānene’mba usaka konakanya bino bibundi bibi ne kupandija Lota ne kyandi kisaka. Ubwanya kufwatakanya amba Lota wādi mufītwe mutyima ye wādi mubajinji kutamba’mo. Mu kino kitatyi kya mvubu, Lota kalejeleje. Bamwikeulu bātuminwe kumupandija aye ne kisaka kyandi bebakwata ke ku makasa mwanda wa kwibalupwila panja pa kibundi.
Davida ‘wadi ulonda [Leza] ne mutyima wandi onso kulonga’nka byobya byoloke mu meso a [Leza].’—1 Balopwe 14:8
Davida wālombwele kyaba kimo kubulwa kwīfula ne kulonga makoji na mukaja bene. Pa kufītwa kakimbe kufya bubi, Davida wāipaija mulumya uno mwana-mukaji. (2 Samwele, shapita 11) Bible unena’mba kyālongele Davida “kyadi kibi kibi mu meso a Yehova.”
Ba Yoba, Lota ne Davida bonso bālongele bilubo, kadi bikwabo byādi bikatampe kutabuka. Ino enka motusa kwikimwena, bādi basaka na mutyima wabo onso kwingidila Leza na kikōkeji. Bālombwele na mutyima tō amba abealakanya ne kushinta pobādi basakilwa. O mwanda Leza wēbetabije, kadi mu Bible yense bebatela bu bana-balume ba kikōkeji.
LELO I ÑENI’KA YOTUBOILA’KO?
Byotudi bantu bakubulwa kubwaninina, ketubwanyapo kwepuka bilubo. (Loma 3:23) Inoko shi tubebilonga, tufwaninwe kwialakanya ne kulonga bukomo bwetu bonso mwanda wa kolola myanda.
Lelo ba Yoba, Lota ne Davida bālongolwele yabo myanda muswelo’ka? Yoba mu mutyima wandi wādi muntu mululame. Ino Leza pa kupwa kulanguluka nandi, Yoba wālemununa milangwe yandi mibi ne kwialakanya pa byaānene. (Yoba 42:6) Mumweno wa Lota pa mwiendelejo wa bantu ba mu Sodoma ne Ngomola wādi ukwatañene na misoñanya ya Leza. Inoko kilubo kyandi i kubulwa kwaābudilwe mu kitatyi kampanda mutyima wa kampeja-bukidi. Mfulo mfulō wanyema mu bibundi bya konakanibwa ne kupanda ku butyibi bwa Leza. Na kikōkeji kyonso, kātadilepo ku bintu byaāshile kunyuma. Nansha Davida byālongele kilubo kikatampe kya kutyumuna kijila kya Leza, wālombwele na bubine byādi mu mutyima wandi na kwisāsa pampikwa budimbidimbi ne kulomba Leza amufwile lusa.
Kwitabija kwāitabije Leza bano bana-balume kukwatañene na mumweno wandi mujalale wa byobya byatengele ku bantu ba kubulwa kubwaninina. Leza “uyūkile ngitu yetu; witunena’mba, i luvumbi.” (Ñimbo 103:14) Penepa, shi Leza uyukile’mba ketubwanyapo kwepuka bilubo, le i bika byatengele kotudi?
Leza “uyūkile ngitu yetu; witunena’mba, i luvumbi.”
LE BANTU BAKUBULWA KUBWANININA BABWANYA NAMANI KUSANGAJA LEZA?
Madingi a Davida kudi wandi mwanā Solomone etulombola muswelo otubwanya kusangaja Leza. “Abe wami mwana Solomone, yuka Leza wa ami shobe, kadi mwingidile ne mutyima obe onso mutuntulu.” (1 Bilongwa 28:9, Dibuku Dijila.) Le mutyima onso mutuntulu i mutyima’ka? I mutyima usenswe Leza ne usumininwe kuyuka kiswa-mutyima kyandi ne kwikilonga. Ke mutyimapo mubwaninine, ino i owa usaka kwingidila Leza na kikōkeji ne kwitabija na mutyima tō kulemununwa. Kusanswa Leza ne kusaka kumukōkela ko kwālengeje Yoba atelwe bu “mubwaninine,” Lota bu “moloke,” Davida bu ‘ulonga’nka byobya byoloke’ ku meso a Leza. Nansha byobālongele bilubo, ino bāsangeje Leza.
Mutyima onso mutuntulu i owa uyukile kiswa-mutyima kya Leza ne utononwa na kusaka kukatampe kwa kumwingidila na kikōkeji
Shi tubaikala na milangwe mibi nansha kunena kintu kampanda kyotwitopeka nansha kulonga bintu byotukamona mungya-meso bu i bibi, tumwenei bukankamane ku bimfwa byotwesambila’po bi. Leza uyukile amba mu kino kitatyi ke twafikile pa bubwaninine. Inoko, byatengele kotudi i kumusanswa ne kulonga bukomo bwa kumukōkela. Shi twikale na mutyima onso mutuntulu mu uno mwanda, tukakulupila’mba netu tusangajanga Leza.
