Muma wacho ni Ayub ne en ng’at ‘makare, modimbore.’ (Ayub 1:1) Lut ne oluong ni “ng’at makareno.” (2 Petro 2:8) Daudi to nowach ni ne en ng’at ma ne timo “gi malong’o” e wang’ Nyasaye. (1 Ruodhi 14:8) Kata kamano, weuru wanon ane matut ngima jogo ma Muma wuoyoe. Wabiro neno (1) kaka ne gin dhano morem, (2) gik ma wanyalo puonjore kuom ranyisi ma ne giketo, kendo (3) kaka dhano morem nyalo moro Nyasaye.

Ayub noromo gi masiche mang’eny ma ne nenore ni ok nonego oyud. Nochako paro ni Nyasaye ok ne dewe, kata obedo ni notemo matek mondo obed gi yie kuom Nyasaye. (Ayub 9:20-22) Ayub ne ni gadier ni ne en ng’at makare, omiyo ne otemo nyiso ni en ng’at makare moloyo kata Nyasaye.—Ayub 32:1, 2; 35:1, 2.

Lut ne digni e timo gima ne ochike mondo otim, kata obedo ni chikno ne yot. Timbe mag  terruok ma ne opong’o Sodom gi Gomora ne “sando chunye ahinya.” (2 Petro 2:8) Nyasaye nowacho ni nodhi ketho joma richo ma nodak e gwenge ariyogo, kendo ne odhi miyo Lut kod joode thuolo mar reso ngimagi. Samoro inyalo paro ni nikech timbe marichogo ne chando chuny Lut, koro nodhi timo mapiyo mondo owuog e kind joma richogo. E kinde ma ne dwarore ni okaw okang’a mapiyono, e ma podi nogalore. Kuom mano, malaike ma ne oor mondo orese nomako lwete gi mar joode ma gigologi oko mar gweng’no.—Chakruok 19:15, 16.

Nitie kinde moro ma Daudi ne ok oritore ma oterore gi chi ng’ato. Bang’ mano, notemo umo richono kuom golo chik mondo oneg chwor dhakono. (2 Samuel, sula mar 11) Muma wacho ni “gi ma ne Daudi otimo ne rach e wang’ Jehova.”—2 Samuel 11:27.

Ayub, Lut, gi Daudi, ne oketho chik Nyasaye, kendo moko kuom kethogo ne dongo ahinya e wang’ Nyasaye. Kata kamano, wabiro neno bang’e ni giduto ne gitiyo ne Nyasaye gi chunygi duto. Ne giikore timo lokruok ma ne dwarore mondo girie yoregi. To mano nomiyo Nyasaye omor kodgi, kendo Muma wacho ni giduto ne gin joma kare e wang’ Nyasaye.

Nikech wan dhano morem, kinde mang’eny watimo richo. (Jo-Rumi 3:23) Kapo ni watimo richo, onego walok chunywa kae to watim lokruok madwarore.

Ere kaka Ayub, Lut, kod Daudi ne orieyo yoregi? Ayub ne en ng’at makare gadier. Bang’  ka Nyasaye osewuoyo kode, Ayub ne oloko pache, kendo ne owinjo malit kuom gima nowacho. (Ayub 42:6) Lut bende ne ok ohero timbe modwanyore mag jo Sodom gi Gomora nikech ne ok giluwre gi chike Nyasaye. Kata kamano, ne odigni ka ne dwarore ni okaw okang’ mapiyo. Gikone, ne oringo moa e gwenge ma ne Nyasaye dhi kethogo. To mana kaka Nyasaye ne ochikogi ne ok ong’iyo chien. Kata obedo ni Daudi ne otimo richo maduong’ kuom ketho chik Nyasaye, ne onyiso ni richono ne litne ahinya ka ne oloko chunye gadier, kendo kwayo Nyasaye mondo ong’wonne.—Zaburi 51.

Nyasaye pod nohero jogo nikech nong’eyo ni gin dhano morem. Nyasaye “ong’eyo kitwa; oparo ka wan mana buch lowo.” (Zaburi 103:14) Omiyo, ka Nyasaye ong’eyo ni wan joketho, en ang’o ma doher ni mondo watim?

Gima ne Daudi onyiso wuode Suleman nyalo konyowa ng’eyo gima wanyalo timo mondo wamor Nyasaye. “To in, Suleman wuoda, mondo ing’e Nyasach wuoru, kendo itine gi chuny modimbore.” (1 Weche mag Ndalo 28:9) Tiend bedo ng’at ma nigi chuny modimbore en ang’o? En bedo ng’at mohero Nyasaye kowuok e chunye, kendo ma timo gima Nyasaye dwaro. Ng’at ma kamano ok en ng’at makare chuth, to en ng’ama ohero luwo chik Nyasaye, kendo moikore mondo orieye. Nikech Ayub ne ohero Nyasaye, kendo ne ok odwar ketho chike Nyasaye, Muma wacho ni ne en ng’at “modimbore.” Lut bende iwacho ni ne en ng’at ‘makare,’ to Daudi ni ne en ng’at ma ‘notimo malong’o’ e wang’ Nyasaye. Kata obedo ni jogo ne otimo richo, pod ne gimoro Nyasaye.

Omiyo, sama wachako paro gik ma ok owinjore, kata wacho gimoro ma biro miyo wayuag ang’e bang’e, kata kapo ni watimo gimoro ma bang’e wafwenyo ni gino ok ber, ranyisi mag ji adekgo nyalo konyowa ahinya e kinde ma kamago. Nyasaye ong’eyo ni nikech warem ok wanyal timo gik makare chuth. Kata kamano, ong’eyo ni wanyalo temo matek mondo waluw chikene. Kapo ni wan gi chuny modimbore, wan bende wabiro moro chuny Nyasaye.