Ne taku a Iopu e pelā me se tagata “tapuaki ki te Atua kae fakamaoni ki ei.” (Iopu 1:1) Ne taku a Lota ki se “tino amiotonu.” (2 Petelu 2:8) Kae ko Tavita ne fai ne ia “a mea kolā e ‵tonu” i te kilokiloga a te Atua. (1 Tupu 14:8) Kae ke na onoono faka‵lei tatou ki olaga o tino konā i te Tusi Tapu. Ka lavea atu ne tatou me (1) ne fai ne latou a mea ‵se, (2) e mafai o tauloto ne tatou a mea e uke mai i olotou fakaakoakoga, mo te (3) e mafai eiloa ne tino sē ‵lei katoatoa o fakafiafia a te Atua.

Ne logo‵mae a Iopu i te fia o fakalavelave totino kolā ne foliga mai me e se ‵lei. Ne maua ne ia se manatu ‵se, mai te fakaikuga me ne seki atafai atu te Atua faitalia me ne tumau tena fakatuanaki ki a Ia io me ikai. (Iopu 9:20-22) Ne talitonu malosi a Iopu ki tena amiotonu telā ne foliga atu ki nisi tino me ko folafola atu ne ia me e sili atu tena amiotonu i lō te Atua.—Iopu 32:1, 2; 35:1, 2.

Ne fakatamala a Lota o fai ne ia se fakaikuga telā ne ‵tau o manino kae faigofie. Ne mafatia malosi tou tagata  i amioga finalalolagi o tino i Sotoma mo Komolo, kae “ne logo‵mae malosi a te tino amiotonu” tenei i olotou amioga. (2 Petelu 2:8) Ne fakailoa atu ne te Atua me ko mafaufau a ia ke fakaseai atu a fa‵kai amio ma‵sei konā kae tuku atu se avanoaga ki a Lota ke ‵sao fakatasi mo tena kāiga. Kāti e fakaataata ne koe me i a Lota telā ne logo‵mae malosi, ko te tino muamua ka tele atu keatea. Kae i te ‵toe taimi tāua tenei, ne fakatuatuai tou tagata. Ne puke ‵mau atu a agelu kolā ne uga atu ke faka‵sao tou tagata mo tena kāiga ki olotou lima kae ‵taki atu ki tua mo te fa‵kai ko te mea ke ‵sao latou.—Kenese 19:15, 16.

Kae ko Tavita, ne fakaasi atu ne ia a te sē lava o tena loto pulea kae ne mulilua a ia mo te avaga a te suā tagata. Se mea fakapoi me ne fai ne Tavita ke tamate te avaga a tou fafine, i tena taumafaiga ke ‵funa aka tena agasala. (2 Samuelu, mataupu e 11) E fai mai te Tusi Tapu me i “te Aliki e se fiafia” ki te mea ne fai ne Tavita.—2 Samuelu 11:27.

A Iopu, Lota, mo Tavita, ne fai ne latou katoa a mea ‵se, kae ko nisi ne fai ne latou a agasala matagā. Kae e pelā mo mea ka lavea ne tatou, ne katoatoa te lotou manakoga ke tavini atu ki te Atua mo te faka‵logo. Ne loto fia‵fia latou ke fakaasi atu me ko sala‵mo latou kae ‵fuli olotou auala i feitu kolā e manakogina. Tela la, ne kilo atu a te Atua ki a latou mo te fiafia, kae e fakasino atu a te Tusi Tapu kātoa ki a latou e pelā me ne tāgata fakamaoni.

E pelā me ne tino sē ‵lei katoatoa, e se mafai o ‵kalo keatea tatou mai i te faiga o mea ‵se. (Loma 3:23) Kafai e fai ne tatou, e ‵tau o fakaasi atu me ko sala‵mo tatou kae mai tua ifo i ei, ko fai ei te ‵toe mea e mafai o fai ke faka‵tonu aka a mea konā.

 Ne faka‵tonu aka pefea ne Iopu, Lota, mo Tavita olotou mea ‵se? Ne manako tonu eiloa a Iopu ke fai mo fai se tino fakamaoni. Mai tua o te sau‵talaga mo te Atua, ne faka‵tonu aka ne Iopu ana mafaufauga ‵se kae salamo ki ana pati ko oti ne fai. (Iopu 42:6) A te kilokiloga a Lota ki amioga ma‵sei a tino i Sotoma mo Komolo ne fetaui ‵lei katoatoa mo tulaga o te Atua. A te fakalavelave ko te sē lava o tena matapulapula. Ne tele fakamuli atu a ia keatea mai i fa‵kai kolā ne fakamasei kae ne sao atu ei a ia i te fakasalaga a te Atua. Ne fakalogo eiloa a ia ke mo a ma toe kilo atu ki tua i mea ne tiakina ne ia. E tiga eiloa ne fai ne Tavita se agasala matagā i te ofaga o te tulafono a te Atua, ne fakaasi atu ne ia a mea ‵tonu i tena loto, mai te salamo tonu kae fakalagolago katoatoa ki te alofa fakamagalo o te Atua.—Salamo 51.

Ne fetaui tonu eiloa te kilokiloga ‵lei a te Atua ki tāgata konā, mo mea ‵lei kolā e manako a ia ke fai ne tino sē ‵lei katoatoa. E iloa ne te Atua “a te mea ne faite ki ei tatou, e manatua foki ne ia i a tatou ne ‵pefu.” (Salamo 103:14) Tela la, kafai e iloa ne te Atua me e se mafai ne tatou o ‵kalo keatea mai te faiga o mea ‵se, se a te mea e manako a ia ke fai ne tatou?

E tuku mai ne pati fakatonutonu a Tavita ki tena tama ko Solomona a te auala e mafai ei ne tatou o fakafiafia atu ki te Atua. “Taku tama, au e fai atu ki a koe, ke talitonu koe ki te Atua o tou tamana, kae tavini atu ki a ia mo tou loto kātoa.” (1 Nofoaiga Tupu 28:9) Se a te loto kātoa? Ko te loto telā e alofa ki te Atua kae fakaiku aka ke ‵sala atu faeloa ki tena loto mo mea e manako a ia ke fai. E se ko te loto telā e ‵lei katoatoa, kae ko te loto telā e manako malosi ke tavini atu mo te fakalogo ki te Atua kae e loto fiafia foki ke fakatonutonugina. Ona ko te alofa ki te Atua mo te manako o fakalogo, ne kilo atu ei te Atua ki a Iopu e pelā me se tino “fakamaoni,” ko Lota e pelā me “se tino amiotonu,” kae ko Tavita e pelā me ne fai ne ia “a mea kolā e ‵tonu” i te kilokiloga a te Atua. E tiga eiloa ne fai ne latou a mea ‵se, ne mafai ne latou o fakafiafia te Atua.

Tela la, kafai ne maua ne tatou a mafaufauga ma‵sei kolā ne seki ma‵nako tatou ki ei, io me fai atu se mea ne ‵ma ei tatou, io me ko te faiga o se mea telā ne iloa fakamuli aka ne tatou me e ‵se, ke na maua ne tatou a te loto malosi mai i fakaakoakoga konei ne fatoa sau‵tala ki ei. E iloa ne te Atua me e se tāitāi o ‵lei katoatoa tatou i te taimi tenei. Kae e fakamoemoe a ia ke a‵lofa tatou ki a ia kae taumafai o faka‵logo. Kafai e maua ne tatou a te loto kātoa i te feitu tenei, e mafai o tali‵tonu tatou me e mafai foki ne tatou o fakafiafia atu ki te Atua.