Umi hénte ningo ndoipotái jepi oñepensa hese iñaña térã ijapuha. ¿Mbaʼére piko upéicharõ oĩ hetaite hénte iñañáva, ivioléntova ha ojapóva inhustísia? Ñambyasýramo jepe koʼág̃arupi jahecha umi notísia ivaipa jepéva ha ni ndajagueroviaséiva. ¿Mávapa omomýi umi héntepe ojapo hag̃ua koʼã mbaʼe? (Elee 1 Juan 5:19.)

¿Ñandejára voi piko ñandeapo jajapose hag̃uáicha umi mbaʼe vai? Nahániri. Haʼe ningo ñandeapo vaʼekue perfékto ha ijoguaháramo. Upévare ikatu japorohayhu haʼe ñanderayhuháicha (Génesis 1:27; Job 34:10). Péro Ñandejára omeʼẽ avei ñandéve liverta jadesidi hag̃ua jajapótapa iporãva térã ivaíva. Adán ha Eva odesidi vai vaʼekue ha upéicha rupi ndahaʼevéi vaʼekue perfékto. Ha ñande haʼe rupi ifamiliare ñanaséma avei pekadór. (Elee Deuteronomio 32:4, 5.)

Ñandejára ningo ndoipotái jajapo umi mbaʼe vai (Proverbios 27:11). Upévare ñanemboʼe jajapo hag̃ua umi mbaʼe iporãva ha ohechauka ñandéve mbaʼéichapa ikatu javyʼa. Péro, ñañehaʼãvéramo jepe, ndaikatúi jaiko Ñandejára oipotahaichaite. (Elee Salmo 32:8.)

¿Ohejátapa Ñandejára osegi oiko umi mbaʼe vai? Nahániri, haʼe koʼág̃a opermiti oiko umi mbaʼe vai jahechakuaa hag̃ua ndaikatuiha jaiko heseʼỹ (2 Pedro 3:7-9). Péro koʼẽrõite ndaiporimoʼãvéima umi hénte iñañáva. Opytáta ko yvy ape ári umi persóna oñehaʼãva oiko Ñandejára oipotaháicha ha ikatúta ovyʼa para siémpre. (Elee Salmo 37:9-11.)