Kinaandan na nga gusto sang mga tawo nga mangin mahidaiton, bunayag, kag mabuot. Kon amo, ngaa pirme kita makakita sing kasingki, inhustisya, kag kapintas? Kinaandan na lang ang makakulugmat nga balita. May isa bala nga nagatulod sa mga tawo nga maghimo sing malain?—Basaha ang 1 Juan 5:19.

Gintuga bala sang Dios ang tawo nga may huyog sa paghimo sing malaut? Wala. Gintuga ni Jehova nga Dios ang mga tawo sa iya larawan, nga may huyog nga ilugon ang gugma sang Dios. (Genesis 1:27; Job 34:10) Pero ginhatagan sang Dios sing dignidad ang mga tawo paagi sa paghatag sa ila sing kahilwayan sa pagpili. Sang ginpili sang aton una nga mga ginikanan ang paghimo sing malain, ginsikway nila ukon wala gin-ilog ang halimbawa sang Dios kag nangin indi himpit sila. Napanubli naton sa ila ang huyog sa pagpakasala.—Basaha ang Deuteronomio 32:4, 5.

Gusto sang Dios nga pakigbatuan naton ang malain nga mga huyog. (Hulubaton 27:11) Gani ginatudluan niya kita kon paano malikawan ang paghimo sing sala kag kon paano makasapo sing matuod nga kalipay. Apang sa karon, indi naton mailog sing himpit ang gugma sang Dios.—Basaha ang Salmo 32:8.

Bisan pa lapnag karon ang malaut, ginatugutan ini sang Dios sa pila ka tion agod makita sang tanan ang masubo nga mga resulta sini. (2 Pedro 3:7-9) Apang sa indi madugay, ang duta mapuno sang malipayon nga katawhan nga nagatuman sa Dios.—Basaha ang Salmo 37:9-11.