Normal a kayat dagiti tattao ti agbalin a mannakikappia, napudno, ken nasingpet. Ngem apay nga adu ti makitkitatayo a kinaranggas, kinaawan hustisia, ken kinaulpit? Adu itan dagiti nakabutbuteng a damdamag. Adda kadi mangim-impluensia kadagiti tattao nga agaramid iti dakes?—Basaem ti 1 Juan 5:19.

Dinisenio kadi ti Dios ti tao nga addaan tendensia nga agaramid iti dakes? Saan, inaramid ni Jehova a Dios ti tao a kaladladawanna isu a kayatayo a tuladen ti ayat nga ipakpakitana. (Genesis 1:27; Job 34:10) Ngem inikkan met ti Dios ti tao iti wayawaya nga agpili. Idi pinili dagiti immuna a nagannaktayo ti agaramid iti dakes, impakitada a saanda a kayat a tuladen ti Dios isu a nagbalinda nga imperpekto. Ket natawidtayo kadakuada ti tendensia nga agbasol.—Basaem ti Deuteronomio 32:4, 5.

Kayat ti Dios a labanantayo ti tendensiatayo nga agaramid iti dakes. (Proverbio 27:11) Isu nga isursuronatayo no kasanotayo a maliklikan ti agaramid iti dakes ken no kasanotayo nga agbalin a pudpudno a naragsak. Ngem iti agdama, saantayo a siento porsiento a matulad ti ayat ti Dios.—Basaem ti Salmo 32:8.

Nagadu ita ti kinadakes, ngem ipalpalubos pay laeng ti Dios dagita tapno makita ti amin ti dakes nga ibungada. (2 Pedro 3:7-9) Ngem din agbayag, awanton ti kinadakes ket mapnonton ti daga kadagiti naragsak a tattao nga agtultulnog iti Dios.—Basaem ti Salmo 37:9-11.