Di Baybul in Ansa to Sɔm Kwɛstyɔn Dɛn
Wetin mek wi de du bad?
Udat bin want fɔ mek Jizɔs du sɔntin we bad?—Matyu 4:8-10
Pipul dɛn want kolat, dɛn want fɔ tɔk tru, ɛn dɛn want fɔ du gud.Bɔt wetin mek naw wi de si fɛt-fɛt, wi de si pipul dɛn de tek advantej pan dɛn kɔmpin dɛn ɛn wi de si pipul dɛn de du bad bad tin dɛn to dɛn kɔmpin? Bad bad nyus dɛn de ɔlsay. Fɔ se sɔmbɔdi de we de tray fɔ mek pipul dɛn du bad tin?—Rid Jɔn In Fɔs Lɛta 5:19.
Fɔ se Gɔd mek mɔtalman wit di abit fɔ du wetin bad? Nɔ, nɔto so i bi. Jiova Gɔd mek mɔtalman lɛk aw i tan. I mek wi fɔ falamakata am fɔ sho lɔv. (Jɛnɛsis 1:27; Job 34:10) Fɔ sho se Gɔd valyu mɔtalman, i gi dɛn di rayt fɔ disayd fɔ dɛnsɛf wetin dɛn want fɔ du. We wi fɔs mama ɛn papa disayd fɔ du wetin bad, dɛn sho se dɛn nɔ want fɔ falamakata Gɔd ɛn dis bin mek dɛn nɔ pafɛkt igen. Na frɔm dɛn wi gɛt di abit fɔ sin.—Rid Dyutɔrɔnɔmi 32:4, 5.
Wi go kɔntinyu fɔ du wetin bad ɔltɛm?
Gɔd nɔ want lɛ wi du di bad tin dɛn we wi kin want fɔ du. (Prɔvabs 27:11) So i de tich wi aw fɔ avɔyd fɔ du wetin bad ɛn aw fɔ gɛt tru tru gladi at. Naw wi nɔ go ebul fɔ falamakata Gɔd fɔ sho lɔv gud gud wan.—Rid Sam 32:8.
Na fɔ shɔt tɛm nɔmɔ Gɔd de alaw di bad bad tin dɛn we de apin na di wɔl. I du dis so dat ɔlman go si di bad tin dɛn we kin apin to wi we wi du bad. (Pita In Sɛkɔn Lɛta 3:7-9) I nɔ go te igen, di wɔl go ful-ɔp wit pipul dɛn we gladi ɛn we de du wetin Gɔd want.—Rid Sam 37:9-11.
