Mulilaŋ le Nyunala Baabuiyo
Kuɛɛ dɛnɛ wɔɔŋndo fula yɛ?
Nɛɛ ndoo tɔɔŋndaŋ yɛ chiisu le yɔŋ wɔɔŋndo tosaa?—Maatiu 4:8-10
O kpeekpei niŋ, waŋnda yeema ma wa a kɔl nyulu, ma sandu, nduyɛ, ma nɔ kɛndɛi. Kɛ, le yɛɛ naŋ cho yɛ niŋ chɔɔ niilu latandaa, kafalaŋ, a dɛnɛ wɔɔŋndo? Yooŋgula wɔɔŋ wɔɔŋndaŋ la cho hau puɛɛ. Waŋndo cho pa, o cho waŋchieeya nyindɔɔ le dɛnɛ wɔɔŋndo tosaa wo?—Nuawɔ Chɔŋ Tasoo 5:19.
Baa a kaa dɛnɛ wɔɔŋndo Mɛlɛka toosiaa waŋchieeya ni? Sako. Chɛhowa Mɛlɛka toosiaa waŋchieeya o velaŋ ndɔɔ niŋ, a yeemɛi le kaala ndɔɔ tuulaa. (Choobu 34:10, NW; Kandɔŋ Chieeŋndo 1:27) Mɛlɛka toosiaa waŋchieeya a dioo le sɔɔŋ tosaa a ba nda. Mɛɛ Adama nda Ifi hɛli le iwɔɔŋnde tosaa, ma kɛɛ tamasi Mɛlɛkaa tolɔɔ kɔɔli, okoŋ, ma simnuŋ wanaa lahakiaa. O nda niŋ naŋ sɔla yeemɛi le hakioo tosaa ni.—Nuawɔ Ditɔnɔmii 32:4, 5, NW.
Baa ŋ cho pa nɔ dɛnɛ wɔɔŋndo lɔɔlɔɔ?
Mɛlɛka yeema naa miŋ soliŋ dɛnɛ wɔɔŋndo o kɔl po. (Talelaŋ 27:11, NW) O cho naa pɛɛkoo mɛɛ naŋ nuuviaa kɔl nyuloo, okoŋ, miŋ kpeeŋaŋ dɛnɛ wɔɔŋndo yɛ. Kɛ o hau niŋ, ŋ nɔla miŋ tol tamasi Mɛlɛkaa kɔɔli nyɛ kɛndɛi le kaalaa chɔmndo le.—Nuawɔ Chondei 32:8, NW.
Dɛnɛ wɔɔŋndo cho hau ba o ba fee. Sabu Mɛlɛka chɛl mi dɛnɛ wɔɔŋndo wa le teleŋ biŋgi wo cho ni, le mi wana o wana sina mɛɛ dɛnɛ wɔɔŋndo wɔu yɛ. (Pitɛ Diiŋ Ndɔɔ 3:7-9) O lo lɛ hau teleŋ vilɛi le mi Mɛlɛka huŋ faŋa wanaa dɛnɛ wɔɔŋnda kpou o chieeŋndo choo. Wanaa diikuŋ Mɛlɛka wa kinɛi cho wa o chieeŋndo choo a kɔl kɛndɛ ni.—Nuawɔ Chondei 37:9-11, NW.
