KAJJITÕK KO BAIBÕL̦ EJ UWAAKI

Etke armej rej kõm̦m̦ani men ko renana?

Ekkã an armej ro kõn̦aan bwe ren aenõm̦m̦an, m̦ool, im jouj ñan doon. Innem, etke ekkã ad lo an wal̦o̦k kowadoñ, kalijekl̦o̦k, im nana? Aolep iien jej roñ nuuj ko rejjab em̦m̦an. Ewõr ke juon ej kõm̦m̦an bwe armej ro ren kõm̦m̦ani men ko renana?​—Riit 1 Jon 5:19, UBS.

Anij ear ke kõm̦anm̦an armej ro bwe ren kõm̦m̦ani men ko renana? Jaab. Jeova Anij ear kõm̦anm̦an armej ro ilo wãween wõt e. Mel̦el̦ein men in bwe ewõr an armej ro maroñ ñan anõke yokwe eo an Anij. (Jenesis 1:27; Job 34:10) Bõtab, ke Anij ear kõm̦anm̦an kõj ear bar letok ñan kõj maroñ eo ñan kããlõt. Kõn men in, ke armej ro m̦oktata rar kããlõt ñan kõm̦m̦ani men ko renana, rar jab l̦oore joñak ko rem̦m̦an an Anij im rar oktak im jab weeppãn. Jej bõdañe er, im eñin unin eitok wõt bwe jen kõm̦m̦ani men ko rejjab em̦m̦an.​—Riit Duteronomi 32:4, 5, UBS.

Armej renaaj ke wõnm̦aanl̦o̦k wõt im kõm̦m̦ani men ko renana?

Anij ejjab kõn̦aan bwe jen kõm̦m̦ani men ko renana. (Jabõn Kõnnaan 27:11) Eniñ unin ej katakin kõj bwe jen jab kõm̦m̦ani men ko renana im wãween bwe jen lo m̦õn̦õn̦õ eo em̦ool. Ilo tõre in, ejjab maroñ lukkuun jim̦we im jejjet wãween ad anõke yokwe eo an Anij kõnke jejjab weeppãn.​—Riit Sam 32:8, UBS.

Meñe el̦ap nana ilo raan kein, ak Anij ej kõtl̦o̦k an men kein wõnm̦aanl̦o̦k ium̦win jidik iien. Etke? Kõnke aolep armej ren kile men ko rekabũrom̦õjm̦õj rej wal̦o̦k jãn kõm̦m̦an ko aer renana. (2 Piter 3:7-9) Bõtab ejjabto jãn kiiõ, lal̦ in enaaj obrak kõn armej ro rem̦õn̦õn̦õ me rej pokake Anij.​—Riit Sam 37:9-11.

Ñan kal̦apl̦o̦k am̦ mel̦el̦e, jouj im lale katak 3 ilo bok in me Ri Kõnnaan ro an Jeova rar kõm̦m̦ane

Ebar pãd ilo www.pr418.com/mh