Muene ovanthu vahanda okukala nombembwa na vakuavo, nokukala ovakuatyili, nokukala noluembia. Naina, omokonda yatyi ovikando ovinyingi tumonena oungangala, nonya, noukalavi? Hono molaliu, no mo televisau mupopiwa ovipuka vitilisa unene owoma. Okuti kuna omunthu umwe ukahi nokuhongiliya ovanthu okulinga ovipuka ovivi?—Tanga 1 João 5:19.

Okuti Huku watunga ovanthu neyembelo liokulinga ovivi? Au. Jeova Huku watunga ovanthu otyifuika tyae, nehando liokukala noluembia ngae. (Gênesis 1:27; Jó 34:10) Tupu, Huku watunga ovanthu nepondolo liokuliholovonena. Etyi ovo tate yetu vo tete vakoya okulinga etyi tyapenga, vaanya okuhetekela Huku, avakala ovakuankhali. Onthue tuapiñgana kuvo eyembelo liokulinga onkhali.—Tanga Deuteronômio 32:4, 5.

Huku uhanda tuhatokele meyembelo lietu liokulinga etyi tyapenga. (Provérbios 27:11) Moluotyo, utulongesa oñgeni tupondola okulityilika okulinga etyi tyapenga, no ñgeni matuvasi ehambu liotyotyili. No ngotyo, nkhele katutyivili okuhetekela nawa, oluembia Huku ena.—Tanga Salmo 32:8.

Namphila ovivi vikahi nokuliyawisa unene hono, Huku nkhele weviyekela-ko opo ovanthu aveho vamone ovitateka vituka-ko. (2 Pedro 3:7-9) Mahi, apa katutu, ohi maikeyula ovanthu vena ehambu, vetavela ku Huku.—Tanga Salmo 37:9-11.