Aramas kin men mehlel, kasalehda kadek oh popohl. Eri, dahme kahrehda kitail kin kalapw kilang tiahk lemei, kopwung sapahrek oh mwersuwed? Rohng suwed kan kin kalapw wiawi. Ia duwe, mie emen me kin songosong en kahrehiong aramas akan ren wia me suwed?​—Wadek 1 Sohn 5:19.

Ia duwe, Koht ketin kapikada aramas en wia dahme suwed? Soh, Siohwa Koht ketin wiahda aramas rasehng ih, me kak kahlemengih sapwellime irair en limpoak. (Senesis 1:27; Sohp 34:12) E ketin kawauwihala aramas ni eh ketikihong irail saledek en wiahda pilipil kan. Ni tepin atail pahpa oh nohno ara pilada en wia dahme suwed, ira soikala kahlemengih Koht oh ira sohla unsek. Kitail sohsohki sang rehra irair en wia dihp.​—Wadek Deuderonomi 32:4, 5.

Koht kin ketin kupwurki kitail en pelianda atail ineng en wia dahme suwed. (Lepin Padahk 27:11) Eri e kin ketin padahkihong kitail ia duwen atail en soikala wia dahme sapwung oh ia duwen atail en diar nsenamwahu mehlel. Ahpw ahnsou wet, kitail sohte kak kahlemengih ni unsek sapwellimen Koht limpoak.​—Wadek Melkahka 32:8.

Mendahki me suwed inenen rek ahnsou wet, Koht ketin mweidohng met en wiawi erein ahnsou ehu pwe koaros en kak kilang dahme wiewia suwed kin kahrehda. (2 Piter 3:7-9) Ahpw ahnsou keren, sampah wet pahn direkihla aramas peren me kin peikiong Koht.​—Wadek Melkahka 37:9-11.