Imibuto YeliBhayibheli Iyaphendvulwa
Ngubani lobangela bubi?
Bantfu batsandza kuthula, kwetsembeka nemusa. Pho kubangelwa yini kutsi emhlabeni kugcwale budlova, lunya nekungalungi? Siva tindzaba letinyenti letisetfusako. Ukhona yini umuntfu lobangela bantfu kutsi bente tinfo letimbi?—Fundza 1 Johane 5:19.
Ngesikhatsi Nkulunkulu adala bantfu, bekafuna kutsi bente tintfo letimbi yini? Cha, Jehova wadala bantfu ngemfanekiso wakhe, bekafuna kutsi bafane naye babe nelutsandvo. (Genesisi 1:27; Jobe 34:10) Nkulunkulu waphindze waniketa bantfu inkhululeko yekutikhetsela. Ngesikhatsi batali betfu bekucala bakhetsa kwenta lokubi, bekufana nekutsi batsi abafuni kufana naNkulunkulu, ngako baba nesono. Natsi sifute bona, sinesono—Fundza Dutheronomi 32:4, 5.
Butake buphele yini bubi?
Nkulunkulu akafuni sente lokubi. (Taga 27:11) Ngiko nje asifundzisa kutsi singakwenti lokubi nekutsi singahlala njani sijabulile. Lokubuhlungu kutsi sinesono, ngeke sikhone kumlingisa ncamashi Nkulunkulu.—Fundza Tihlabelelo 32:8.
Nanobe bubi bukhona lamuhla, Nkulunkulu ubuvumele sikhashana kuze sonkhe siyibone imiphumela yekungamlaleli. (2 Phetro 3:7-9) Kodvwa madvutane nje umhlaba utawugcwala bantfu labajabulako nalabalalela Nkulunkulu.—Fundza Tihlabelelo 37:9-11.