Ko e anga-mahení, ʻoku loto ʻa e kakaí ke nau melino, faitotonu mo anga-lelei. Ko e hā leva ʻoku tau faʻa sio ai ʻi he fakamālohi, fakamaau taʻetotonu mo e anga-fakamamahí? ʻOku hoko ʻa e ngaahi ongoongo fakalilifú ko e meʻa anga-maheni. ʻOku ʻi ai ha taha ʻokú ne feinga ke ʻai ʻa e kakaí ke nau faikovi?—Lau ʻa e 1 Sione 5:19.

Naʻe ngaohi ʻe he ʻOtuá ʻa e faʻahinga ʻo e tangatá mo ha hehema ki he koví? ʻIkai, naʻe fakatupu ʻe Sihova ko e ʻOtuá ʻa e faʻahinga ʻo e tangatá ʻi hono ʻīmisí, fakataha mo ha hehema ke faʻifaʻitaki ki he ʻofa ʻa e ʻOtuá. (Sēnesi 1:27; Siope 34:10) Ka naʻe toe fakangeingeiaʻi ʻe he ʻOtuá ʻa e faʻahinga ʻo e tangatá ʻaki ʻa e tauʻatāina ke filí. ʻI he taimi naʻe fili ai ʻetau ʻuluaki ongo mātuʻá ke faikoví, naʻá na talitekeʻi ʻa e faʻifaʻitakiʻanga ʻa e ʻOtuá pea hoko ʻo taʻehaohaoa. Naʻa tau maʻu tukufakaholo meia kinaua ʻa e hehema ki he angahalá.—Lau ʻa e Teutalōnome 32:4, 5.

ʻOku fiemaʻu ʻe he ʻOtuá ke tau talitekeʻi ʻetau ngaahi hehema ki he koví. (Palōveepi 27:11) Ko ia ʻokú ne akoʻi mai ʻa e founga ke tau fakaʻehiʻehi ai mei hono fai ha fehālaaki mo e founga ke maʻu ai ʻa e fiefia moʻoní. Ka ʻi he taimi ní, ʻoku ʻikai lava ke tau faʻifaʻitaki haohaoa ki he ʻofa ʻa e ʻOtuá.—Lau ʻa e Saame 32:8.

Neongo ʻoku lahi fau ʻa e koví he taimí ni, ʻoku fakaʻatā ia ʻe he ʻOtuá ʻi ha vahaʻa taimi ke lava ʻo sio ʻa e tokotaha kotoa ki hono ngaahi nunuʻa fakamamahí. (2 Pita 3:7-9) Kae kehe, ʻoku vavé ni ke fonu ʻa e māmaní ʻi he kakai fiefia ʻoku nau talangofua ki he ʻOtuá.—Lau ʻa e Saame 37:9-11.