Ŵanthu anandi akhumba kuchita vinthu mwachimangu, mwauneneska ndipuso mwalisungu. Kweni nchifukwa wuli pacharu chosi pachitika nkhaza, ndipuso vinthu vambula urunji? Kanandi tituvwa nkhani zakupasa chitima. Kumbi pe munthu munyaki yo wachitiska kuti ŵanthu achitengi vinthu viheni?​—Ŵerengani 1 Yohane 5:19.

Kumbi Chiuta wangulenga ŵanthu ndi maŵanaŵanu ngaheni? Awa! Yehova Chiuta wangulenga ŵanthu muchikozgu chaki, kuti atoliyeku jalidu laki lachanju. (Chiyambo 1:27; Jobu 34:10) Kweniso wanguŵalenga ndi wanangwa wakusankha ŵija vakuchita. Apapi ŵidu akwamba ŵati asankha kuchita vinthu viheni, angulongo kuti akana kutole mijalidu yaku Chiuta ndipu anguja ambula kufikapu. Ndipu tosi tikutoliyaku kwananga kwawu.​—Ŵerengani Marangu 32:4, 5.

Chiuta wakhumba kuti tiyesesengi kukana maŵanaŵanu ngaheni. (Nthanthi 27:11) Mwaviyo, iyu watitisambiza mo tingakaniya vinthu viheni ndipuso vo tingachita kuti tikondwengi. Panyengu yinu yasonu vakusuzga kuti tiyezgi chanju chaku Chiuta mwakufikapu.​—Ŵerengani Sumu 32:8.

Chinanga kuti vinthu viheni vawanda ukongwa sonu, Chiuta wavizomereza kuti vichitiki kwakanyengu kamanavi kuti ŵanthu awoni masuzgu ngo ngatuza chifukwa cha kuchita vinthu viheni. (2 Petro 3:7-9) Kweni pambula kuswera yapa pacharu chosi pazamuja ŵanthu akuvwiya Chiuta ndipu azamuja ndi umoyu walikondwa.​—Ŵerengani Sumu 37:9-11.