E ma‵nako sāle a tino ke uiga filemu, fakamaoni kae atafai. Kaia la e masani o lavea ne tatou a amioga fakasaua, faifaiga sē fakamaoni, mo amioga matagā? E masani o lagona atu a tala fakama‵taku. E mata, e isi se tino e taumafai o fai ne ia a tino ke fai ne latou a mea ma‵sei?—Faitau te 1 Ioane 5:19.

E mata, ne faite ne te Atua a tino ke fai ne latou a mea ma‵sei? Ikai, ne faite ne Ieova te Atua a tino ki ana foliga, mo te manakoga ke fakaakoako atu ki tena alofa. (Kenese 1:27; Iopu 34:10) Kae ne fakaaloalo foki ne te Atua a tino mai te tuku atu a te saolotoga ke fai a filifiliga. I te taimi ne filifili aka ei ‵tou mātua muamua ke fai a mea ma‵sei, ne ‵teke atu lāua ki te fakaakoakoga ‵lei a te Atua kae ne fai ei lāua ke se ‵lei katoatoa. Ne togi mai eiloa ne lāua ki a tatou a te manakoga agasala.—Faitau te Teutelonome 32:4, 5.

E manako te Atua ke ‵teke atu tatou ki ‵tou manakoga ma‵sei. (Faataoto 27:11) Tela la, ne akoako ne ia tatou ke iloa o ‵teke atu ki te faiga o mea ma‵sei mo te auala ke maua ei te fiafia tonu. Kae i te vaitaimi tenei, e se mafai ne tatou o fakaakoako katoatoa atu ki te alofa o te Atua.—Faitau te Salamo 32:8.

E tiga eiloa ko malaku nei a mea ma‵sei, ne talia ne te Atua ke ‵tupu mō se vaitaimi ko te mea ke lavea ne tino katoa a ikuga fakafanoa‵noa mai i ei. (2 Petelu 3:7-9) E se leva, kae ka ‵fonu te lalolagi i tino fia‵fia kolā e faka‵logo ki te Atua.—Faitau te Salamo 37:9-11.