Mwacipagwa, ŵandu akusasaka kuŵa ŵamtendele, ŵacilungamo, soni ŵacanasa. Sambano ligongo cici pacilambopa patupile yakuwulasyana, yangali cilungamo soni yangalwe? Yindu yakusakala yiwandile mnope. Ana pana mundu jwine jwakwatendekasya ŵandu kuti atendeje yindu yakusakalayi?—Aŵalanje 1 Yohane 5:19.

Ana Mlungu ŵapanganyisye ŵandu m’litala lyakuti atendeje yakusakala? Iyayi. Yehofa Mlungu ŵapanganyisye ŵandu m’ciwanicisyo cakwe, soni ŵasakaga kuti ŵanduwo ajigalileje ndamo jakwe ja cinonyelo. (Genesis 1:27; Yobu 34:10) Mlungu ŵapelesoni ŵandu upile wakusagula jika yakutenda. Nambo acinangolo ŵetu ŵandanda ŵasagwile mwakulemweceka. Jemanjaji ŵakanile kuya cisyasyo ca Mlungu ni ŵaŵele ŵangali umlama. M’yoyo, ŵatupelele ulemwa.—Aŵalanje Deuteronomo 32:4, 5.

Mlungu akusasaka kuti tuŵambaleje kutenda yakusakala. (Miyambo 27:11) Jwalakwe akusatujiganya mwampaka tuŵambalile kutenda yakusakala soni yampaka tutende kuti tuŵe ŵakusangalala. Atamose yili m’yoyo, apanopano ngaŵa mkupakombola kumsyasya Mlungu mwangalemwesya cilicose.—Aŵalanje Salimo 32:8.

Mlungu akundile kuti yakusakala yitupe pacilambopa kwa kandaŵi kamnono kuti ŵandu wosope alole yakuyicisya yakwe, yayili yakutesya canasa. (2 Petulo 3:7-9) Nambo pacangakaŵapa cilambo cosope cicigumbale ni ŵandu ŵakusangalala soni ŵakupikanila Mlungu.—Aŵalanje Salimo 37:9-11.