Mix máak u kʼáat u beet u kʼasaʼanil, u tuus wa u yookol. ¿Baʼaxten túun yaʼab u beetaʼal injusticia, loob yéetel kʼasaʼanil? Sáamsamal teʼ noticiaʼoboʼ puro baʼaloʼob kʼaastak ku máansaʼaliʼ. ¿Máax péeksik máak u beet u kʼasaʼanil? (Xok 1 Juan 5:19.)

Le ka tu beetoʼon Dioseʼ, ¿tu tsʼáaj wa kʼasaʼanil ichil k-puksiʼikʼal? Maʼ. Dioseʼ tu beetoʼon jeʼex letiʼeʼ. Tu tsʼáajtoʼon u tsʼíibolal k-eʼesik yaabilaj (Génesis 1:27; Job 34:10). Baʼaleʼ Dioseʼ tu tsʼáajtoʼon xan u páajtalil k-yéeyik baʼax ken k-beete. K-yáax taataʼobeʼ maʼ tu yóotaj u yeʼesoʼob u jatsʼuts modos Diosiʼ. Tu chʼaʼtuklaj u beetkoʼob baʼax kʼaas, ka pʼáat imperfectoʼob. U paalaloʼobeʼ bey xan jóokʼikoʼoboʼ: yéetel u tuukulil u beetkoʼob baʼax kʼaas. (Xok Deuteronomio 32:4, 5.)

Dioseʼ maʼ u kʼáat ka k-beet le baʼaxoʼob kʼaastak k-tsʼíiboltikoʼ (Proverbios 27:11). Le oʼolaleʼ ku yáantkoʼon utiaʼal k-eʼesik jatsʼuts modos bey xan utiaʼal u yantaltoʼon kiʼimak óolal. Kex k-kʼáateʼ bejlaʼeʼ maʼ tu páajtal k-beetik tuláakal baʼal maʼalob. (Xok Salmo 32:8.)

Bejlaʼeʼ Dioseʼ ku chaʼik u yantal kʼasaʼanil utiaʼal k-ilik bukaʼaj muʼyajil ku taasik (2 Pedro 3:7-9). Baʼaleʼ maʼ tun xáantaleʼ yaan u beetik u chuʼupul yóokʼol kaab yéetel máakoʼob kiʼimak u yóoloʼob yéetel uts u modosoʼob jeʼex Dioseʼ. (Xok Salmo 37:9-11.)