1, 2. ‘Kawkharutejj taktʼaskta’ siski uka arojj ¿kunatakis Hebreo Arut Qollan Qellqatanakan apnaqasi?

JEHOVÁ DIOSAJJ akham siwa: “Alajjpachajj nayan qonuñajjawa, oraqesti kayunakajjan taktʼasiñaparakiwa” sasa (Isa. 66:1). Ukatsti sarakiwa: ‘Kawkharutejj taktʼaskta uka cheqjja jachʼañchäwa’ sasa (Isa. 60:13). ¿Kunjamsa Diosajj kawkharutejj taktʼaski uka cheq jachʼañchi? Aka Oraqenkirinakatakejj ¿kun sañsa ukajj muni?

² Hebreo Arut Qollan Qellqatanakanjja, ‘kawkharutejj taktʼaskta’ siski uka arojja, nayra tiempon templojj Israel markan utjkäna ukat parlañatakiw apnaqasi (1 Cró. 28:2, NM; Sal. 132:7). Uka templonwa jaqenakajj Jehová Diosar yupaychapjjerïna ukhamarak jachʼañchapjjerïna, ukatwa Jehová Diosajj uka templorojj wali askit uñjäna.

3. 1) ¿Kunas Diosan uttʼayat templopajja? 2) ¿Kuna maransa uttʼayasïna?

³ Jichhürunakanjja, Jehová Diosarojj janiw jaqen lurat mä templon yupaychasjjeti, jan ukasti Diosajj uttʼayki uka templonwa yupaychasjje. Uka templojja, jaqenakan lurat utanakat sipansa, jukʼampwa Jehová Diosarojj jachʼañchi. ¿Kunas uka  templojja? Kuntï Diosajj jupampi sumankañataki ukat yupaychayasiñatak uttʼayki ukawa, ukasti Jesusan loqtasitapjjar uttʼayatawa. Khä 29 maran Jesusajj bautisaskäna ukhamarak Jilïr Sacerdotëñapatakis ajllitakäna ukhaw uka templojj uttʼayasïna (Heb. 9:11, 12).

4, 5. 1) Salmo 99 qellqatarjamajja, ¿kunsa Jehová Diosan servirinakapajj lurañ muntanjja? 2) ¿Kunsa sapa maynejj jisktʼasiñasa?

⁴ Jehová Diosarojj templop uttʼayatapat walpun yuspärtanjja. ¿Kunjamsa Diosar yuspäratas uñachtʼaysnajja? Sutipata ukhamarak Jesusan loqtasitapat jaqenakar yatiyasa. Aka Oraqenjja, kimsaqallq millón jila jaqenakaw Jehová Diosarojj jachʼañchasipki, ukajj wali kusiskañapuniwa. Yaqha religionankir yaqhep jaqenakajja, akham sapjjewa: ‘Alajjpachar sarasaw Diosarojj yupaychapjjäjja’ sasa. Ukampis Jehová Diosan Testigonakapajj janiw ukham amuyktanti, jichhaw Diosarojj yupaychañasa.

⁵ Jehová Diosar yupaychasajja, nayra tiempon Diosar servirinakatwa yateqasisktanjja (Salmo 99:1-3, 5 liytʼañataki). Khä nayra tiempon jakasir Moisés, Aarón, Samuel jupanakajj taqe chuymaw cheqa yupaychäwi toqet saytʼasipjjäna (Sal. 99:6, 7). Jichhürunakanjja, Jesusamp chika alajjpachat sacerdotenakjam janïr apnaqankasinjja, ajllit cristianonakajj Diosan templopan patiojj utjki ukanwa, mä arunjja, aka Oraqenwa servisipki. Jupanakampi chikasti ‘yaqha uwijanakjam’ uñtʼatäpki uka walja jaqenakaw Diosar servipjjaraki (Juan 10:16). Alajjpachar sarañataki ajllit cristianonakasa, aka Oraqen wiñay jakañ suyapki ukanakasa, mä wawakiw Diosar servipjje. Ukampis sapa mayniw akham jisktʼasiñasa: “¿Taqe chuymati cheqa yupaychäwir yanaptʼasktjja?” sasa.

6, 7. 1) Cristiano tamajj uttʼayasjjäna uka qhepatjja, ¿kunas pasäna? 2) ¿Kunsa walja maranak qhepat Jehová Diosajj luräna?

⁶ Cristiano taman uttʼayasitapatjja, janïraw ni patak maranakas paskänti ukhaw waljanejj Diosan markap contra saytʼapjjäna (Hech. 20:28-30; 2 Tes. 2:3, 4). Ukatsti khitinakas Diosan cheqpach servirinakapajja uk amuyañajj chʼamäjjänwa. Walja maranak qhepatjja, Jehová Diosajj Jesús toqew khitinakas templopan servisipki uk qhanstayäna.

⁷ Khä 1919 maranjja, khitinakas Diosan templopan servisipkäna ukajj qhanaw amuyasjjäna. Jupanakajja, Diosatakjam sarnaqañatakiw chʼamachasipjjatayna (Isa. 4:2, 3; Mal. 3:1-4). Ukhaw kuntï apóstol Pablojj mä visionan uñjkäna ukajj phoqasiñ qalltäna. Kunsa Pablojj uka visionan uñjpachäna uk jichhajj yatjjatapjjañäni.

8, 9. Pablojj visionan uñjkäna uka paraisojj ¿kunasa?

⁸ Jehová Diosajja, kunatï jutïrin phoqasiñapäkäna ukwa apóstol Pablorojj mä visionan uñjayäna (2 Corintios 12:1-4 liytʼañataki). Uka visionanjja Pablojj mä ‘paraíso’ uñjäna. ¿Kunäpachänsa uka paraisojja? Inas akanakächïna. Maya, aka Oraqen utjkani uka paraíso (Luc. 23:43). Paya, Jehová Diosampi ukhamarak Jupar servirinakapampi sum apasiñajj paraisoptayat aka Oraqen utjkani ukäspawa. Kimsa, “Diosan paraisopan”, mä arunjja, alajjpachan suma bendicionanak katoqapki ukarakïspawa (Apo. 2:7, Aymar Biblia).

⁹ ‘Kuntï istʼkta uka arunaksti janiw khitirus “arsum” satäkiti’ sasaw Pablojj säna ¿kunatsa ukham sispachäna? Kunanaktï Pablojj visionan uñjkäna ukajj janiw ukapachan qhanañchasiñapajj wakiskänti. Ukampis jichha  tiemponjja, kuna bendicionanakatï Diosan markapan utjki ukajj qhanañchasjjaspawa.

10. Diosan templopan khitinakas servipjje ukajj ¿kunjamatsa amuyasi?

¹⁰ Bibliat apstʼat qellqatanakasanjja, Jehová Diosampisa jilat kullakanakasampis wali sumaw apastanjja sasaw niya sapa kuti parlasi. Ukampis Jehová Diosajj markapan sumankañ utjayki ukampi Diosan templopampejj janiw pachpäkiti. Jan ukasti Diosan templopajj kuntï Diosajj jupampi sumankañataki ukat yupaychayasiñatak uttʼayki ukawa. Ukhamajj Diosan markapan sumankañ utjatapatwa khitinakas Diosamp suma uñjatäpjje, ukhamarak khitinakas Diosan templopan servipjje ukajj amuyasi (Mal. 3:18).

11. ¿Kunsa cristianonakajj jichhürunakan lurañasa?

¹¹ Jehová Diosajja, 1919 marat aksarojja markapan sumankañ utjañapatakisa, jaqenakajj Jupamp sum apasipjjañapatakisa, ukhamarak jukʼamp jaqenak markapar mantapjjañapatakisa, pantjasir jaqenak toqew yanaptʼaski. ¿Taqe chuymat jiwasajj uk lurasiñapatak yanaptʼasktanjja? ¿Aka Oraqen Jehová Diosan sutip jachʼañchasiñapatak chʼamachasisktanti?

12. ¿Kunjamatsa Isaías 60:17 qellqatan phoqasitap amuytanjja? (7 janankir foto uñjjattʼam.)

¹² (Isaías 60:17 liytʼañataki.) Jehová Diosan markapajj jukʼamp sumäñapatakejja, kunayman mayjtʼäwinakaw utjawayi. Diosan markapar jichhak mantanipki uka jilat kullakanakasa wayn tawaqonakasa, uka mayjtʼäwinakatjja qellqatanakan liytʼasakiw yatipjje, jan ukajj uka toqenakat parlirikwa istʼawayapjje. Ukampis walja maranaka Diosar servir cristianonakajja, Diosan markapan kuna mayjtʼäwinakatï utjawayki ukanakjja uñjawayapjjewa. Ukanak uñjasajja, kunjamsa Jehová Diosajj markaparu Yoqap toqe pʼeqtʼaski ukwa amuyawayapjje. Ukhamajj Diosan markapan mayjtʼäwinak uñjawayapki uka jilat kullakanakaru uka toqenakat jisktʼapjjañäni, ukaw Diosar jukʼamp confiyañatak yanaptʼistani.

13. ¿Kunsa Salmo 48:12-14 qellqatarjamajj lurañasa?

¹³ Diosarojj jukʼa maranakas jan ukajj walja maranakas serviskstanjja, Diosan markapajj kunjamasa uka toqet taqeniw mayninakar parlañasa. Aka Oraqpachankir jilat kullakanakasampi sumana mayaki jakasiñajj mä milagrowa. Ukatwa Diosan markapatsa, sumankaña ukhamarak mayachtʼata jakasiñ utjatapatsa ‘jutir mita jaqenakaru’, mä arunjja, wayn tawaqonakaru ukhamarak Diosan markapar jichhak mantanipki ukanakar parlañasa (Salmo 48:12-14 liytʼañataki).

14, 15. 1) ¿Kuna mayjtʼäwinakas 1970 marat aksarojj utjawayi? 2) ¿Kunatsa uka mayjtʼäwinakajj Diosan markapatak wali askejja?

¹⁴ Walja maranaka Diosar servir jilat kullakanakajja, Diosan markapan walja mayjtʼäwinakwa uñjawayapjje. Uka mayjtʼäwinakaw Diosan markaparojj jukʼamp sumaptayawayi. Kuna mayjtʼäwinakatï utjawayki ukanakajj akanakawa: nayrajja, sapa taman mä jilatakiw pʼeqtʼäna, jichhajj taman taqpach irpir chuymaninakaw pʼeqtʼjjapjje. Nayrajja, sapa markan sucursalajj utjki ukanjja, mä jilatakiw sarayirïna, ukampis jichhajj walja jilatanakaw sarayjjapjje. Ukatjja nayrajj mä jilatakiw Jehová Diosan markapar pʼeqtʼäna, jichhasti janiw ukhamäjjeti, mä qawqha ajllit jilatanakaw pʼeqtʼjjapjje, jupanakajj Oraqpachan Jilïr Irpirinaka sasin uñtʼatäpjjewa. Nayrajja, uka sarayiri jilatanakarojj yaqha jilatanakas yanapapjjchïnjja, sarayir jilatäkäna ukakiw kunsa amtjjerïna. Khä 1970 marat aksarojj janiw ukhamäjjeti, tamanakansa sucursalanakansa ukhamarak Jehová Diosan markapansa janiw  mä jilatakejj pʼeqtʼjjeti, jan ukasti walja irpir chuymaninakaw pʼeqtʼjjapjje.

¹⁵ Diosan markapanjja, Bibliarjamaw mayjtʼäwinakajj lurasiwayi, ukajj wali askipuniwa. Mä sarayir jilatat sipansa jichhajj walja irpir chuymaninakaw Diosan markapan sarayjjapjje, taqe uka jilatanakajj Jehová Diosan mä suma regalopawa. Uka jilatanakajj sapa mayniw mayj mayja chuymanïpjje, ukhamatwa Diosan markaparojj nayraru sartañapatak yanaptʼapjje (Efe. 4:8; Pro. 24:6).

16, 17. Diosan markapan mayjtʼäwinak utjawayki ukanakatjja, ¿kawkïris jumatak jukʼamp sumajja, ukat kunatsa?

¹⁶ Qhepatjja, mayjtʼäwinakajj Diosan markapan utjasiwaykakiwa. Jichhürunakanjja, Bibliat apstʼat qellqatanakasajj nayrat sipansa jukʼamp suma luratäjjewa. Kuna jan walinakantï jichha tiempon uñjasktan ukanakatsa parlarakiwa. Ukham qellqatanakampi yatiyañajj wali sumapuniwa. Ukhamarusa, yaqha toqes yatiyaraktanwa, ukanakat maynïrejj Internetan jw.org cheqawa. Ukham yatiyasajja, Jehová Diosjam jaqenakat llakisitaswa uñachtʼaytanjja.

¹⁷ Ukatsti, taman tantachäwinakas mayjtʼawayarakiwa, ukhamatwa Familiana Diosar Yupaychañataki Arumatakisa, Bibliat sapaki yatjjatañatakis tiempojj jukʼamp utjistu. Jachʼa tantachäwinakas marat maratjamaw jukʼamp sumäjjaraki. Uka tantachäwinakatjja jilat kullakanakajj akham sapjjewa: “¡Jichha maran apasiwayki uka jachʼa tantachäwejj wali sumapunïnwa!” sasa. Maysa toqetjja, Diosan markapajj walja escuelanakwa wakichawayaraki, ukanakaw jilat kullakanakarojj Diosar jukʼamp sum serviñatakejj yanaptʼawayi. Taqe uka mayjtʼäwinakajja, Jehová  Diosajj markaparu sum irpaskatapa, ukhamarak markaparu jukʼamp sumaptayaskatapwa uñachtʼayistu.

18, 19. Jehová Diosan markapajj jukʼamp sumäñapatakejja, ¿kunjamsa yanaptʼsnajja?

¹⁸ Jehová Diosan markapajj jukʼamp sumäñapatak sapa mayniw yanaptʼsna. ¿Kunjamsa yanaptʼsnajja? Jaqenakaru Diosan Reinopat taqe chuyma yatiyasa, ukatsti Bibliat yatichasa. Jaqenakaru Jehová Diosan serviriparu tukupjjañapatak yanaptʼasajja, Diosan markap jukʼamp jiltañapatakiw yanaptʼasktanjja (Isa. 26:15; 54:2).

¹⁹ ¿Kunjamsa Jehová Diosan markaparu jukʼamp sumäñapatak yanaptʼaraksna? Cristianjam sarnaqañatak chʼamachasisaw yanaptʼaraksna. Suma sarnaqatas uñjasinjja, walja jaqenakaw Jehová Diosampiru Jesusampiru uñtʼañ munapjje, ukhamatwa Jehová Diosan markapar mantanipjje. Cheqas janiw Bibliat sum yatitas uñjasakejj Diosan markaparu mantanipkiti, jan ukasti suma sarnaqatas uñjasaw mantanipjjaraki.

20. ¿Kun lurañatakis Proverbios 14:35 qellqatajj chʼamañchistu?

²⁰ Jehová Diosasa Jesusasa, markapan jukʼamp sumätap uñjasajj ¡wali kusisitapuniw jikjjatasipjjpacha! Jiwasas ukham kusisitaw jikjjatasiraktanjja. Ukampis kunapachatï aka Oraqe mä suma paraisor tukuñapatak yanaptʼkañäni ukhaw jukʼamp kusisiñäni. Proverbios 14:35 qellqatajj akham siwa: “Chʼikhi uywatajj reyirojj kusisiyiwa” sasa. Ukhamasti chʼikhi jaqëpjjañäni, Diosan markapar jukʼamp sumäñapatak yanaptʼasipkakiñäni.