1, 2. Төвратда «кәтил» сөзү нәләрә аид ишләнир?

ЈЕҺОВА АЛЛАҺ нида етмишди: «Ҝөјләр Мәним тахтымдыр, јер ајағым алтындакы кәтилдир» (Әшј. 66:1). Өз «кәтили» һагда Јеһова һәмчинин билдирмишди: «Ајағымчүн олан јери еһтишамлы едәҹәјәм» (Әшј. 60:13). Јеһова буну неҹә едир? Аллаһын «кәтилиндә» јашајан бизләр үчүн бу, һансы мәнаны кәсб едир?

² Төвратда кәтил сөзү јерә аид ишләнмәклә јанашы, һәм дә мәҹази мәнада гәдим Исраилдәки мәбәди билдирир (1 Салн. 28:2; Зәб. 132:7). Јердә јерләшән бу мәбәд һәгиги ибадәтин мәркәзи иди. Бу сәбәбдән бу мәбәд Јеһованын ҝөзүндә сөзүн әсил мәнасында ҝөзәл иди вә онун мөвҹудлуғу Јеһованын ајағы үчүн олан јери еһтишамлы едирди.

3. Јеһованын бөјүк руһани мәбәди нәдир вә о, нә вахт пејда олду?

³ Бәс бу ҝүн һәгиги ибадәтин мәркәзи һарадыр? Бу, јер үзүндә тикилмиш һансыса бир мәбәд јох, руһани мәбәддир. Бу мәбәд исә Јеһованы истәнилән тикилидән гат-гат артыг шәрәфләндирир. Руһани мәбәд Иса Мәсиһин каһинлији вә гурбанлығы васитәсилә бәшәријјәти Аллаһла барышдыран тәдбирдир. Бу мәбәд ерамызын 29-ҹу илиндә Иса вәфтиз олунуб Јеһованын бөјүк руһани мәбәдинин Баш каһини кими мәсһ олунан заман пејда олду (Ибр. 9:11, 12).

4, 5. а)  Јеһованын хидмәтчиләринин ән үмдә арзусу 99-ҹу мәзмурда неҹә тәсвир олунур? б) Биз өзүмүзә һансы суалы вермәлијик?

 ⁴ Биз руһани мәбәдә ҝөрә Јеһоваја сон дәрәҹә миннәтдарыг. Буна ҝөрә дә Јеһованын адыны, мәрһәмәтлә вердији фидјәни аләмә ҹар чәкәрәк Ону мәдһ едирик. Бәли, бу ҝүн дүнјада сәккиз милјондан чох һәгиги мәсиһи ҝеҹә-ҝүндүз Јеһованын еһтишамыны бәјан едир! Башга динләрин үзвләри јанлыш олараг дүшүнүрләр ки, онлар Аллаһы ҝөјә ҝедәндә мәдһ едәҹәкләр. Анҹаг онлардан фәргли олараг, Јеһованын Шаһидләри дәрк едирләр ки, Аллаһы инди вә бурада, јер үзүндә мәдһ етмәк лазымдыр.

⁵ Она ҝөрә дә биз Зәбур 99:1—3, 5—7 ајәләриндә һаггында бәһс едилән мөмин инсанларын нүмунәсини изләјирик. (Ајәләри охујун.) Һәмин мәзмурда ҝөстәрилдији кими, Муса, Һарун вә Ишмуил өз дөврләриндә Аллаһын һәгиги ибадәт үчүн ҝөрдүјү тәдбири там дәстәкләјирдиләр. Мүасир дөврдә исә мәсһ олунмуш мәсиһиләр Иса илә бирликдә каһин олмаг үчүн ҝөјә ҝетмәздән әввәл руһани мәбәдин јердәки һәјәтиндә сәдагәтлә хидмәт едирләр. Милјонларла «башга гојунлар» онлара дајаг олурлар (Јәһ. 10:16). Бу ики групдан олан инсанларын үмиди мүхтәлиф олса да, онлар вәһдәт ичиндә бурада, Јеһованын кәтилиндә Она ибадәт едирләр. Анҹаг јахшы олар ки, һәр биримиз өзүмүздән сорушаг: «Мән Јеһованын һәгиги ибадәт үчүн олан тәдбирини там дәстәкләјирәм?»

6, 7. Биринҹи әсрдә мәсиһи јығынҹағында һансы проблем баш галдырды вә әсрләр сонра нәјә лүзум јаранды?

⁶ Мәсиһи јығынҹағынын тәсис едилмәсинин үстүндән һеч бир әср кечмәмишди ки, габагҹадан дејилмиш дөнүклүк јајылмаға башлады (Һәв. 20:28—30; 2 Салон. 2:3, 4). Беләҹә, руһани мәбәддә Аллаһа һәгигәтән хидмәт едәнләри мүәјјәнләшдирмәк ҝет-ҝедә чәтинләшди. Әсрләр сонра Јеһова тахта чыхмыш Иса Мәсиһ васитәсилә кимин ким олдуғуна ајдынлыг ҝәтирди.

⁷ 1919-ҹу илдә кимләрин Јеһованы разы салдығы вә Онун руһани мәбәдиндә хидмәт етдији артыг там мүәјјәнләшмишди. Онлар руһани ҹәһәтдән тәмизләнмишдиләр ки, Аллаһа даһа мәгбул шәкилдә хидмәт едә билсинләр (Әшј. 4:2, 3; Мәл. 3:1—4). Әсрләр өнҹә һәвари Булусун ҝөрдүјү ҝөрүнтү кичик мигјасда һәјата кечмәјә башлады.

8, 9. Һәвари Булусун ҝөрүнтүдә ҝөрдүјү ҹәннәти нәләрә аид етмәк олар?

⁸ Һәвари Булусун ҝөрдүјү ҝөрүнтү 2 Коринфлиләрә 12:1—4 ајәләриндә тәсвир олунуб. (Ајәләри охујун.) Булус ҝөрдүјү фөвгәлбәшәр ҝөрүнтүнү вәһј адландырмышды. Бу вәһј онун ҝүнләринә јох, ҝәләҹәјә аид иди. Һәвари Булус «үчүнҹү ҝөјә» апарыларкән орада «ҹәннәт» ҝөрмүшдү. Бәс бу, һансы ҹәннәт иди? Булусун бәһс етдији ҹәннәт јердәки ҹәннәти, руһани ҹәннәти вә ҝөјдәки ҹәннәти билдирирди. Ҝәләҹәкдә бунларын үчү дә ејни вахтда мөвҹуд олаҹаг. Булусун ҝөрдүјү ҹәннәти ҝәләҹәкдә јер үзүндә олаҹаг ҹәннәтә аид етмәк олар (Лука 23:43). Буну һәмчинин јени дүнјада там мәнада јашанаҹаг руһани ҹәннәтә дә шамил етмәк олар. Бундан әлавә, бу ҹәннәти «Аллаһын ҹәннәти»нә, јәни сәмави аләмдә Јеһованын дәрҝаһындакы мүбарәк мүһитә аид етмәк олар (Вәһј 2:7).

 ⁹ Бәс нәјә ҝөрә һәвари Булус «дилә ҝәтирилмәси, дејилмәси јасаг олан сөзләр» ешитдијини демишди? Чүнки һәмин вахт онун вәһјдә ҝөрдүјү һејрәтамиз шејләри тәфәррүаты илә изаһ етмәјин вахты дејилди. Лакин бу ҝүн Аллаһын халгынын саһиб олдуғу немәтләрдән данышмаг олар.

10. Нәјә ҝөрә руһани ҹәннәт вә руһани мәбәд ејни мәнаны дашымыр?

¹⁰ Биз «руһани ҹәннәт» ифадәсини тез-тез ишләдирик. Бу ифадә Аллаһла вә диндашларымызла сүлһдә олмаға јол ачан надир, руһани немәтләрлә зәнҝин вәзијјәтимизи тәсвир едир. Амма елә нәтиҹәјә ҝәлмәмәлијик ки, руһани ҹәннәт вә руһани мәбәд ејни шејдир. Руһани мәбәд Аллаһын һәгиги ибадәт үчүн ҝөрдүјү тәдбирдир. Руһани ҹәннәтин сајәсиндә исә кимләрин Аллаһы разы салдығы вә кимләрин бу ҝүн Онун руһани мәбәдиндә хидмәт етдији мүәјјәнләшир (Мәл. 3:18).

11. Бу ҝүн руһани ҹәннәтлә бағлы һансы шәрәфә лајиг ҝөрүлмүшүк?

¹¹ Јеһованын 1919-ҹу илдән гејри-камил бәндәләринә јер үзүндә руһани ҹәннәти беҹәрмәк, мөһкәмләндирмәк вә ҝенишләндирмәк ишиндә Онунла бирҝә чалышмаға изин вермәси бөјүк шәрәфдир. Бу ҝөзәл ишдә сән дә иштирак едирсән? Мәҝәр бу шәрәф сәни тәшвиг етмир ки, Јеһованын ајағы үчүн олан јери еһтишамлы етмәк ишиндә бундан сонра да Онунла бирҝә чалышасан?

12. Әшија 60:17 ајәсиндәки пејғәмбәрлијин јеринә јетмәсини нә сүбут едир? (Мәгаләнин әввәлиндәки шәклә бахын.)

¹² Јеһованын тәшкилатынын јердәки һиссәсиндә баш верән мөһтәшәм дәјишикликләр барәдә Әшија 60:17 ајәсиндә габагҹадан хәбәр верилмишди. (Ајәни охујун.) Ҝәнҹләр, јахуд һәгигәтә тәзәликҹә ҝәләнләр бу дәјишикликләр барәдә ја охујублар, ја да башгаларындан ешидибләр. Амма бунларын шәхсән шаһиди олан баҹы-гардашларымыз да аз дејил. Онлар әминдирләр ки, Јеһова тахтда отуран Падшаһ Иса васитәсилә Өз тәшкилатына рәһбәрлик едир. Онларын бу әминлијинин там әсасы вар. Бу ҹүр әминлик биздә дә вар. Бу баҹы-гардашларын руһландырыҹы сөһбәтләри сәнин иманыны мөһкәмләндирә вә Јеһоваја етибарыны артыра биләр.

13. Зәбур 48:12—14 ајәләри үзәримизә һансы мәсулијјәти гојур?

¹³ Һәгигәтдә олдуғумуз мүддәтдән асылы олмајараг, һәр биримиз Јеһованын тәшкилаты барәдә башгаларына данышмалыјыг. Белә бир шәр, мурдар, залым дүнјада руһани ҹәннәтин мөвҹудлуғу әсил мөҹүзәдир. Јеһованын тәшкилатында, јәни «Сион»да баш верән мөһтәшәм ишләри вә руһани ҹәннәтлә бағлы һәгигәти ҹанла-башла ҝәләҹәк нәсилләрә өтүрмәлијик. (Зәбур 48:12—14 ајәләрини охујун.)

14, 15. Тәшкилатда 1970-ҹи илләрдә һансы дәјишиклик едилди вә бу, нәјә ҝөрә фајдалы олду?

¹⁴ Арамызда олан јашлылар Јеһованын тәшкилатынын јердәки һиссәсини даһа да ҝөзәлләшдирән дәјишикликләрин бәзиләринин шаһиди олмушлар. Онларын јадындадыр ки, бир вахтлар јығынҹагда ағсаггаллар шурасы јох, јығынҹаг хидмәтчиси, өлкәләрдә филиал комитәси јох, филиал хидмәтчиси олурду. Ҝөстәришләри Јеһованын Шаһидләринин јахшы танынан Рәһбәрлик Шурасы јох, Ҝөзәтчи Гүлләси Ҹәмијјәтинин президенти верирди. Дүздүр, бу садиг гардашларын һәмишә көмәкчиләри олурду, амма јенә дә јығынҹагларда, филиалда вә  баш идарәдә гәрарлары, әсасән, бир нәфәр верирди. 1970-ҹи илләрдә едилән дәјишикликләрдән сонра нәзарәт иши артыг бир нәфәрин јох, ағсаггаллардан ибарәт комитәләрин өһдәсинә дүшүр.

¹⁵ Бу дәјишикликләрин бөјүк фајдасы олуб. Әслиндә бу, белә дә олмалы иди. Белә ки, Мүгәддәс Китабда гојулан әнәнә ҝетдикҹә даһа јахшы баша дүшүлүрдү вә буна ујғун олараг да дәјишикликләр едилирди. Артыг әсас ролу бир нәфәр ојнамыр. Јеһованын тәгдим етдији «инсан тимсалында һәдијјәләр»ин һамысынын ҝөзәл кејфијјәтләри бир јердә тәшкилата фајда ҝәтирир (Ефес. 4:8; Мәс. 24:6).

16, 17. Сон дәјишикликләрдән һансы сәнә хүсусилә хош тәсир бағышлајыр вә нә үчүн?

¹⁶ Јахуд ҝөтүрәк бу јахынларда едилән дәјишикликләри. Мәсәлән, нәшрләримизин ҝөрүнүшүндә, мәзмунунда вә ја пајланма үсулларында дәјишикликләр едилиб. Практики, ҝөзохшајан нәшрләри тәблиғ вахты инсанлара тәклиф етмәк бизә бөјүк мәмнунлуг ҝәтирир. Һабелә, биз Јеһова кими, инсанларын гајғысына галдығымызы ҝөстәрәрәк һәгигәти јајмаг үчүн сон технолоҝијадан, мәсәлән, jw.org сајтындан истифадә едирик. Беләҹә, дүнјанын һәр јериндә јашајан инсанлара мөһтаҹ олдуглары илаһи рәһбәрлији тәгдим едирик.

¹⁷ Һәмчинин аиләви ибадәт ахшамы кечирмәјә вә ја даһа чох мүталиә етмәјә имкан верән дәјишиклијин дә нә гәдәр јеринә дүшдүјүнү унутмамалыјыг. Бундан башга, бөјүк топлантыларын програмы да мүкәммәлләшир. Биз тез-тез дејирик ки, илдән-илә топлантыларымыз даһа да мараглы олур. Тәшкилатымыздакы чохсајлы мәктәбләрдә даһа чох илаһи тәлим верилмәси  дә, сөзсүз ки, бизи севиндирир. Бүтүн бу дәјишикликләрдә Јеһованын әли ајдын ҝөрүнүр. Бәли, Јеһова Аллаһ Өз тәшкилатыны вә руһани ҹәннәти ҝүнү-ҝүндән ҝөзәлләшдирир.

18, 19. Руһани ҹәннәтин ҝөзәлләшмәсинә неҹә төһфә верә биләрик?

¹⁸ Јеһованын бизә руһани ҹәннәтимизи ҝөзәлләшдирмәјә изин вермәси бөјүк шәрәфдир. Биз буну Падшаһлыг һагда мүждәни ҹанла-башла тәблиғ етмәклә вә даһа чох шаҝирд һазырламагла едирик. Һәр дәфә кимәсә һәјатыны Јеһоваја һәср етмәјә көмәк едәндә руһани ҹәннәтин сәрһәдләрини ҝенишләндиририк (Әшј. 26:15; 54:2).

¹⁹ Биз өз хасијјәтимизи дурмадан јахшылашдырмагла да руһани ҹәннәтин ҝөзәлләшмәсинә төһфә веририк. Бунунла, бу ҹәннәти кәнардан баханлар үчүн даһа да ҹәлбедиҹи едирик. Чох вахт елә олур ки, инсанлары Аллаһын тәшкилатына, Аллаһа вә Мәсиһә Мүгәддәс Китаб хәбәриндән чох, бизим тәмизлијимиз, сүлһпәрвәрлијимиз ҹәлб едир.

20. Мәсәлләр 14:35 ајәсини нәзәрә алсаг, арзумуз нә олмалыдыр?

²⁰ Ҝөзәл руһани ҹәннәтимизи ҝөрмәк Јеһованы вә Исаны чох севиндирир. Бу ҝүн ону ҝөзәлләшдирмәкдән дујдуғумуз севинҹ ҝәләҹәкдә јери ҹәннәтә чевирәркән дујаҹағымыз севинҹин јанында, санки, бир дамладыр. Ҝәлин Мәсәлләр 14:35 ајәсиндәки сөзләри һеч вахт јадымыздан чыхармајаг: «Падшаһ ағыллы гулундан разы галар». Руһани ҹәннәтин ҝөзәлләшмәсинә төһфә верәркән ҝәлин һәмишә ағылла давранаг.