1, 2. Laho manggombarhon aha do hata ”ojahan ni pat” di hata Heber?

DEBATA JAHOWA mandok: ”Angka langit do habangsangku jala tano on sidegedegean [ojahan] ni pathu.” (Jesaya 66:1) Dipaboa Debata do muse taringot ”ojahan ni pat” tingki didok Ibana: ”Ojahan ni pathu marmulia bahenonku.” (Jesaya 60:13) Songon dia do bahenon ni Debata asa marmulia ojahan ni patNa? Jala aha do lapatan ni i tu angka na mangolu di ojahan ni patNa, i ma tano on?

² Di hata Heber, hata ”ojahan ni pat” dipangke laho manggombarhon bagas joro ni halak Israel najolo. (1 Kronika 28:2; Psalmen 132:7) Marmulia situtu do bagas joro di adopan ni Jahowa alana holan i do inganan laho manomba jala pabadiahon Ibana.

3. Didia do saonari panombaon na sintong i?

³ Didia do saonari panombaon na sintong i? Ndang songon bagas joro na di Israel on. Alai bagas joro ni partondion do, na pasangaphon Jahowa. Aha do bagas joro ni partondion i? I ma ruhut ni Debata na mangurupi jolma asa boi gabe alealeNa jala manomba Ibana. Adong pe ruhut on alani pelean tobusan ni Jesus do. Ruhut on  dipungka taon 29 D.M dung tardidi Jesus jala dung dimiahi gabe sintua ni malim di bagas joro ni partondion.—Heber 9:11, 12.

4, 5. (a) Hombar tu Psalmen 99, aha do na ingkon ulahonon ni naposo ni Jahowa? (b) Aha do na ingkon tasungkun tu dirinta ganup marsadasada?

⁴ Mandok mauliate do hita ala adong ruhut ni Debata laho manomba Ibana. Tapatudu ma hamuliateonta marhite paboahon goar ni Debata dohot silehonlehonNa i ma tobusan. Las do rohanta ala adong lobi sian ualu juta halak Kristen na sintong na mamuji Jahowa ganup ari! Nang pe dirimpu godang halak boi do nasida mamuji Debata molo dung di surgo nasida, alai naposo ni Jahowa mamboto ringkot ni mamuji Ibana di tano on saonari.

⁵ Molo tapuji Jahowa, na maniru naposoNa na marsihohot ma hita na disurat di Psalmen 99:1-3, 5. (Jaha.) Angka na togu partondionna songon si Musa, si Aron dohot si Samuel mangihuthon ruhut ni Debata laho manomba Ibana najolo. (Psalmen 99:6, 7) Andorang so rap dope angka na nimiahan dohot Jesus gabe malim di surgo, ingkon marsihohot do nasida manomba Jahowa di bagas joro ni partondion di tano on saonari. Marjuta halak na digoari ”birubiru na asing” marsihohot mangurupi nasida. (Johannes 10:16) Angka na nimiahan dohot birubiru na asing marsada ni roha manomba Jahowa. Alai, ingkon tasungkun do dirinta ganup marsadasada, ’Marsitutu do ahu mangihuthon ruhut ni Debata laho manomba Ibana?’

6, 7. Aha do na masa di huria Kristen na parjolo dohot di taon 1919?

⁶ Ndang sahat 100 taon dung dipajongjong huria Kristen, nunga disurirangkon torop do na laho manimbil jala mangajarhon na so sintong. (Ulaon 20:28-30; 2 Tessalonik 2:3, 4) Dungkon i, lam maol ma mananda panomba ni Debata na sintong. Marratus taon dung salpu, marhite Jesus dipapatar Jahowa ma ise do na manomba Ibana di bagas joro ni partondion.

⁷ Sian taon 1919, lam ditanda ma ise na manomba Debata di bagas joro ni partondion. Nasida rade mambahen hamajuon asa olo Jahowa manjalo panombaon ni nasida. (Jesaya 4:2, 3; Maleaki 3:1-4) Alani i, digohi ma pangungkapon na niida ni apostel Paulus marratus taon naung salpu.

8, 9. Tingki mandapot pangungkapon, ”paradeiso” aha do na niida ni si Paulus?

⁸ Pangungkapon na niida ni si Paulus dipatorang di 2 Korint 12:1-4. (Jaha.) Disi, dipatudu Jahowa ma tu si Paulus aha na laho masa tu ari na naeng ro. ”Paradeiso” aha do na niida ni si Paulus? Parjolo, on manggombarhon Paradeiso na laho saut di tano on. (Lukas 23:43) Paduahon, on manggombarhon paradeiso ni partondion na tahilala saonari dohot haduan di tano na imbaru. Jala na patoluhon, on manggombarhon situasi na palongang roha di surgo na digoari ”paradeiso ni Debata!”—Pangungkapon 2:7.

⁹ Boasa didok si Paulus ”dibege do hata na so tarhatahon, na so jadi dohonon  ni jolma manisia?” Alana ndang tingkina dope on dipatorang ibana. Alai saonari, dipaloas Jahowa do hita mamaritahon pasupasu na boi hilalaon ni halak partigor saonari.

10. Sarupa do paradeiso ni partondion tu bagas joro ni partondion? Patorang ma.

¹⁰ Jotjot do tahatahon taringot paradeiso ni partondion. Alai aha do i? On ma hadameon na dilehon Debata tu jolma. Alani i, ndang sarupa paradeiso ni partondion tu bagas joro ni partondion. Bagas joro ni partondion, i ma ruhut na dilehon Debata laho manomba Ibana. Paradeiso ni partondion, i ma parange na patar na dipataridahon angka halak na manomba Debata di bagas joro ni partondion.—Maleaki 3:18.

11. Aha do hak na sumurung di hita saonari?

¹¹ Las roha mamboto molo sian taon 1919, dipaloas Jahowa do halak na so tipak mangaradoti jala patoguhon paradeiso ni partondion. Parsidohot do hamu mangurupi ulaon on? Diargai hamu do hak na sumurung gabe pangula ni Debata laho pabadiahon goarNa di tano on?

12. Sian dia do taboto naung digohi surirang na disurat di Jesaya 60:17? (Ida gombar di mula ni parsiajaran.)

¹² Si Jesaya manurirangkon taringot godang hamajuon na masa di organisasi ni Debata na adong di portibi on. (Jaha Jesaya 60:17.) Angka na poso manang na baru dope gabe Sitindangi holan na manjaha manang na mambege taringot pigapiga hamajuon i. Alai godang do angka donganta naung mangkilala hamajuon i! Pos do roha ni angka donganta on na dipangke Debata do Jesus laho manogunogu jala manguluhon organisasiNa! Molo tatangihon pengalaman ni nasida, gabe lam togu ma haporseaonta tu Jahowa.

13. Aha do na ingkon taulahon hombar tu Psalmen 48:12-14?

¹³ Ingkon baritahonon ni saluhut halak Kristen do taringot organisasi ni Jahowa. Sada halongangan do boi mardame jala marsada ni roha dohot angka donganta di portibi na dirajai Sibolis! Ingkon hiras do rohanta paboahon taringot Harajaon ni Debata dohot paradeiso ni partondion tu ”pinomparmu sogot”!—Jaha Psalmen 48:12-14.

14, 15. Hamajuon aha do na dibahen dungkon taon 1970, jala aha do laba ni i tu organisasi?

¹⁴ Godang donganta naung matua na mangkilala hamajuon na binahen ni organisasi ni Debata di tano on. Diingot nasida, najolo sada huria diradoti holan sahalak sintua ndang punguan ni sintua. Najolo, sada negara holan diradoti sahalak sintua cabang ndang Punguan na Mangaradoti Kantor Cabang. Jala najolo, organisasi diradoti presiden lembaga Joujou Paboahon, ndang Punguan na Mangaradoti Organisasi. Najolo, nang pe adong na mangurupi angka donganta baoa on, alai holan sahalak sintua do na mambahen haputusan di huria, di kantor cabang, dohot di liat portibi on. Dungkon taon 1970, dibahen ma hamajuon ndang be sahalak sintua na  mambahen haputusan alai sada punguan ni sintua do.

¹⁵ Boasa dapotan laba organisasi sian hamajuon on? Alana hamajuon on marojahan sian pangantusion ni nasida na lam denggan tu Bibel. Umgodang do laba na didapot ni organisasi molo punguan ni sintua, ”silehonlehon” sian Jahowa na mambahen haputusan.—Epesus 4:8; Poda 24:6.

16, 17. Angka hamajuon dia do na mambahen las rohanta, jala boasa?

¹⁶ Pingkirhon ma pigapiga hamajuon na dibahen tu angka bukunta. Las do rohanta mangurupi angka jolma marhite angka buku tingki marbarita. Pingkirhon ma muse alat na baru laho pasarhon barita na uli. Songon, situs web jw.org na mangurupi gumodangan halak asa boi mandapot pangurupion na dihaporluhon. Sude hamajuon on, patuduhon na disarihon jala dihaholongi Jahowa do angka jolma.

¹⁷ Las do muse rohanta mangida hamajuon na dibahen di parpunguan, alana gabe adong ma tingkinta laho mambahen panombaon na sasaripe manang marsiajar Bibel sahalakta. Jala las do muse rohanta mangida hamajuon na dibahen tu parpunguan bolon. Sian taon tu taon, lam tu dengganna do parpunguan i! Mandok mauliate ma hita di sude pangajarion na tadapot sian singkola na marojahan tu Bibel. Sude hamajuon on, patuduhon Jahowa do na manguluhon organisasiNa jala dibahen Ibana do asa  lam tu dengganna paradeiso ni partondion!

18, 19. Aha do na ingkon tabahen asa lam tu dengganna paradeiso ni partondion?

¹⁸ Dilehon Jahowa do tu hita hak na sumurung laho mambahen asa lam tu dengganna paradeiso ni partondion. Alai songon dia do hita boi mangulahon on? Marhiras ni roha ma hita mamaritahon barita na uli taringot Harajaon jala mangurupi halak mananda hasintongan.—Jesaya 26:15; 54:2.

¹⁹ Lam tu dengganna ma paradeiso ni partondion molo marsitutu hita padengganhon parangenta. Molo taulahon i, gabe sada panindangion ma i tu angka halak. Somalna, ndang holan parbinotoanta taringot Bibel na hona tu roha ni halak, alai parangenta na denggan do na mambahen halak olo marsaor tu Jesus, tu Jahowa, dohot tu organisasiNa.

20. Aha do na ingkon taulahon hombar tu Poda 14:35?

²⁰ Las situtu do roha ni Jahowa dohot Jesus molo diida nasida lam tu dengganna paradeiso ni partondion. Ndang sadia las ni roha na tahilala saonari on martimbangkon las ni rohanta haduan tingki saut Paradeiso di tano on. Sai taingot ma hata di Poda 14:35 na mandok: ”Lomo do roha ni raja mida naposo na pantas marroha.” Marbisuk ma hita tingki marsitutu mambahen lam tu dengganna paradeiso ni partondion!