1, 2. Sa anong paagi ginagamit sa Hebreong Kasuratan an terminong ‘tungtungan’?

SINABI kan Diyos na Jehova: ‘An langit iyo an sakuyang tukawan, asin an daga tungtungan nin sakuyang mga bitis.’ (Isa. 66:1) Kun dapit sa saiyang ‘tungtungan,’ sinabi pa niya: ‘An lugar kan sakong mga bitis papamurawayon ko.’ (Isa. 60:13, An Banal na Biblia) Paano niya ginigibo iyan? Asin mantang nakaistar kita sa ‘tungtungan’ nin Diyos, ano an kahulugan kaini para sa sato?

² Apuwera sa paggamit kan terminong ‘tungtungan’ tanganing ipanungod sa daga, ginagamit man iyan sa piguratibong paagi sa Hebreong Kasuratan para magrepresentar sa suanoy na templo sa Israel. (1 Cron. 28:2; Sal. 132:7) An templo nagserbing sentro kan tunay na pagsamba sa daga. Iyan an dahilan kun taano ta magayon na marhay iyan sa paghiling ni Jehova asin napapamuraway kaiyan an lugar kan saiyang mga bitis.

3. Ano an dakulang espirituwal na templo nin Diyos, asin kasuarin iyan nag-eksister?

³ Sa ngunyan, bako nang literal na templo sa daga an sentro kan tunay na pagsamba. Pero may sarong espirituwal na templo na mas nagpapamuraway ki Jehova kisa sa ano pa man na edipisyo. Saro ining areglo na nagpagin posible na makipag-ulian kita sa Diyos paagi sa pagkasaserdote asin atang na pantubos ni Jesu-Cristo. Nag-eksister iyan  kan 29 C.E., kan bawtismuhan si Jesus asin nombrahan bilang Halangkaw na Saserdote kan dakulang espirituwal na templo ni Jehova.—Heb. 9:11, 12.

4, 5. (a) Paano ilinadawan sa Salmo 99 an gustong-gustong gibuhon kan tunay na mga parasamba ni Jehova? (b) Ano an dapat niyatong ihapot sa sadiri?

⁴ Bilang pagpapahalaga sa areglo kan espirituwal na templo, inuumaw niyato si Jehova paagi sa pagpamidbid ta kan saiyang pangaran asin pinapamuraway ta siya huli sa pagtao niya sa sato kan pantubos. Nakakaugma nanggad na maaraman na labi nang walong milyon an tunay na mga Kristiyano na aktibong nagpapamuraway ngunyan ki Jehova! Iniisip kan ibang relihiyosong tawo na uumawon ninda an Diyos pagsakat ninda sa langit. Pero naaaraman kan gabos na Mga Saksi ni Jehova na kaipuhan ninda siyang umawon ngunyan digdi sa daga.

⁵ Sa paggibo kaiyan, inaarog ta an halimbawa kan maimbod na mga lingkod ni Jehova na nasambitan sa Salmo 99:1-3, 5-7. (Basahon.) Arog kan sinabi kan salmista, lubos na sinuportaran ni Moises, Aaron, asin Samuel an areglo para sa tunay na pagsamba kan panahon ninda. Bago makaibanan ni Jesus sa langit bilang mga saserdote, an natatada kan linahidan na mga tugang ni Jesus maimbod na naglilingkod ngunyan sa daganon na patyo kan espirituwal na templo. Maimbod man sindang sinusuportaran kan minilyon na “ibang mga karnero.” (Juan 10:16, NW) Dawa magkalain an paglaom kan duwang grupong ini, sararo nindang sinasamba si Jehova digdi sa saiyang tungtungan. Pero bilang indibidwal, dapat tang ihapot sa satong sadiri, ‘Lubos ko daw na sinusuportaran an areglo ni Jehova para sa dalisay na pagsamba?’

6, 7. Ano an nagin problema pagkaestablisar kan Kristiyanong kongregasyon, asin ano an nagin malinaw pakalihis nin pirang siglo?

⁶ Mayo pang sarong siglo pagkatapos na maestablisar an Kristiyanong kongregasyon, nagpuon nang magkaigwa nin mga apostata arog kan ihinula. (Gui. 20:28-30; 2 Tes. 2:3, 4) Pagkatapos kaiyan, nagin dipisil nang mamidbid kun siisay talaga an naglilingkod sa espirituwal na templo nin Diyos. Luminihis pa an pirang siglo bago lininaw ni Jehova an mga bagay-bagay paagi kan saiyang bagong patukawon na Hadi, si Jesu-Cristo.

⁷ Kan 1919, malinaw nang namidbid kun siisay an mga inuuyunan ni Jehova asin an mga naglilingkod sa saiyang espirituwal na templo. Dinalisay sinda sa espirituwal tanganing magin mas kaako-ako sa Diyos an saindang paglilingkod. (Isa. 4:2, 3; Mal. 3:1-4) Kaya kan taon na iyan, nagpuon nang mautob sa limitadong paagi an bisyon na nahiling ni apostol Pablo mga pirang siglo na an nakaagi.

8, 9. Ipaliwanag an tulong pinanunungdan kan “paraiso” na nahiling ni Pablo sa sarong bisyon.

⁸ Mababasa ta an bisyon ni Pablo sa 2 Corinto 12:1-4. (Basahon.) An mga nahiling ni Pablo sa makangangalas na bisyon na iyan inaapod na sarong kapahayagan. Kaiba diyan an sarong pangyayari sa maabot na dai pa nangyari kan panahon niya. Ano an “paraiso” na nahiling ni Pablo kan siya ‘agawon asin darahon sagkod sa ikatulong langit’? An paraiso na sinambit ni Pablo magkakaigwa nin pisikal, espirituwal, asin langitnon na kautuban, na gabos parehong mangyayari sa maabot. Inot, nanunungod iyan sa pisikal na Paraiso na mangyayari digdi sa daga. (Luc. 23:43) Ikaduwa, nanunungod iyan sa espirituwal na paraiso na lubos na makakamtan sa bagong kinaban. Asin ikatulo, nanunungod iyan sa marahayon na kamugtakan sa ‘paraiso nin Diyos’ sa langit.—Kap. 2:7.

⁹ Pero taano ta sinabi ni Pablo na ‘nakadangog siya nin mga tataramon na dai masabi, na bakong suno sa katugunan na ipagtaram nin tawo’? Huli ta bako pa idto an panahon para ipaliwanag niya nin detalyado an manungod sa pambihirang mga bagay na nahiling niya sa bisyon na iyan. Pero  ngunyan, tinutugutan na kita ni Jehova na sabihon sa iba an mga bendisyon na nakakamtan na kan banwaan nin Diyos!

10. Ano an pagkakalain kan terminong “espirituwal na paraiso” sa “espirituwal na templo”?

¹⁰ Nagin parte na kan satong teokratikong mga termino an “espirituwal na paraiso.” Ilinaladawan kaiyan an satong daing kaagid na kamugtakan na mayaman sa espirituwal na nagpagin posible na magkaigwa kita nin matuninong na relasyon sa Diyos asin sa satong mga tugang. Siyempre, dai kita dapat magkongklusyon na an terminong “espirituwal na paraiso” iyo man sana an “espirituwal na templo.” An espirituwal na templo iyo an areglo nin Diyos para sa tunay na pagsamba. An espirituwal na paraiso iyo an nagpapamidbid kun siisay an talagang inuuyunan nin Diyos asin an mga naglilingkod ngunyan sa saiya sa espirituwal na templo niya.—Mal. 3:18.

11. Anong pribilehiyo an igwa kita ngunyan kun dapit sa espirituwal na paraiso?

¹¹ Nakakaugma nanggad na maaraman na puon kan 1919, tinugutan ni Jehova na makaibanan niya an bakong perpektong mga tawo sa pagkultibar, pagpakusog, asin pagpahiwas kan espirituwal na paraiso digdi sa daga! Nahihiling mo daw na kaiba ka sa mga nakikikabtang sa makangangalas na gibuhon na ini? Napapahiro ka daw kaiyan na padagos na gumibo kaiba ni Jehova sa pagpapamuraway sa ‘lugar kan saiyang bitis’?

12. Igwa kita gabos nin anong pagtitiwala kun dapit sa kautuban kan Isaias 60:17? (Hilingon an ritrato sa kapinunan kan artikulo.)

¹² Ihinula sa libro ni Isaias na magkakaigwa nin makangangalas na mga pagbabago sa daganon na kabtang kan organisasyon ni Jehova. (Basahon an Isaias 60:17.) Tibaad nabasa o nadangog na kan mga hoben asin mga bago pa sana sa katotoohan an manungod sa mga ebidensiya kan mga pagbabagong ini sa organisasyon. Pero, pribilehiyo nanggad para sa ibang mga tugang ta na personal na maeksperyensiyahan an mga iyan! Kaya, nagtitiwala nanggad sinda na ginigiyahan ni Jehova an saiyang organisasyon paagi kan saiyang pinatukaw na Hadi! Aram ninda—asin niyato gabos—na may matibay na basehan an pagtitiwalang iyan. Pag nadadangog ta an saindang mga eksperyensiya, napapakusog an satong pagtubod asin pagtitiwala ki Jehova.

13. Ano an obligasyon niyato uyon sa Salmo 48:12-14?

¹³ Baguhan man kita o haloy na sa katotoohan, dapat niyatong ipakipag-ulay sa iba an manungod sa organisasyon ni Jehova. Sarong milagro nanggad an pagkaigwa nin espirituwal na paraiso sa maraot, korapto, asin daing pagkamuot na kinaban na ini! Kaya, dapat na sabihon niyato sa ‘maabot na kapag-arakian’ an kahanga-hangang mga bagay dapit sa organisasyon ni Jehova, o an “Sion,” asin an katotoohan dapit sa espirituwal na paraiso digdi sa daga.—Basahon an Salmo 48:12-14.

14, 15. Nagkaigwa nin anong mga pagbabago sa organisasyon kan dekada nin 1970, asin taano ta nagin kapaki-pakinabang iyan?

¹⁴ Sa pag-agi nin mga taon, personal na naeksperyensiyahan kan satong may edad nang mga tugang an pira sa mga pagbabago sa organisasyon na mas nagpagayon sa daganon na kabtang kan organisasyon ni Jehova. Nagigirumduman pa ninda kan may congregation servant pa an mga kongregasyon imbes na grupo nin kamagurangan, kan may branch servant pa an mga sangang opisina imbes na Branch Committee, asin kan an mga instruksiyon naghahali pa sa presidente kan Watch Tower Society imbes na sa Namamahalang Grupo kan Mga Saksi ni Jehova. Dawa may maimbod na assistant an mga brother na ini, sinda pa man giraray an panginot na nagdedesisyon sa kongregasyon, sangang opisina, asin pambilog na kinaban na headquarters. Kan  dekada nin 1970, nagkaigwa nin mga pagbabago. Sarong grupo na nin mga elder an may responsabilidad sa pangangataman imbes na sarong indibidwal.

¹⁵ Nagin kapaki-pakinabang daw an mga pagbabagong ini? Iyo. Taano? Huling an mga pagbabagong iyan nakabasar sa dagdag tang kaaraman manungod sa arugan na itinatao kan Kasuratan. Imbes na mangibabaw an impluwensiya nin sarong indibidwal, nakikinabang an organisasyon sa lain-lain na mararahay na kuwalidad kan gabos na ‘balaog na lalaki’ na itinatao ni Jehova.—Efe. 4:8, NW; Tal. 24:6.

16, 17. Anong dai pa sana nahahaloy na pagbabago an pinakanagustuhan mo, asin taano?

¹⁶ Isipon man an dai pa sana nahahaloy na mga pagbabago, arog kan pagbabago sa itsura, mga laog, asin pamamaagi nin pagdistribwir kan satong mga publikasyon. Nakakaugma nanggad na ialok sa ministeryo an praktikal, nakakaakit, asin magagayon na literatura! Asin pag ginagamit ta an pinakabagong teknolohiya, arog kan website na jw.org, para ikapalakop an katotoohan, naipapahiling niyato na interesadong marhay si Jehova na maitao sa mga tawo, sain man na lugar, an paggiya na kaipuhan nindang marhay.

¹⁷ Dai man paglingawan an kapakinabangan kan ginibong pagbabago sa satong pagtiripon tanganing magkaigwa kita nin Pampamilyang Pagsamba o mas dakul na panahon para sa personal na pag-adal. Pinapahalagahan ta man an mga pagbabago sa mga programa sa satong asembleya asin kumbensiyon. Talagang masasabi tang pagayon nin pagayon an mga programa kada taon! Asin siguradong nauugma man kita sa dagdag na mga pagsasanay na itinatao sa satong manlain-lain na teokratikong mga paadalan. Malinaw na nahihiling sa gabos na pagbabagong ini an paggiya ni Jehova. Dagos-dagos niyang pinapagayon an saiyang organisasyon asin an espirituwal  na paraiso na nakakamtan na niyato ngunyan!

18, 19. Paano kita makakakontribwir sa pagpapagayon pa kan satong espirituwal na paraiso?

¹⁸ Sarong pribilehiyo na tinugutan kita ni Jehova na makakontribwir sa pagpapagayon pa kan satong espirituwal na paraiso. Ginigibo niyato iyan paagi sa maigot na paghuhulit kan maugmang bareta kan Kahadian asin paggibo nin dakul pang disipulo. Sa kada tawong natatabangan tang magin dusay na Kristiyano, napapahiwas ta an sakop kan satong espirituwal na paraiso.—Isa. 26:15; 54:2.

¹⁹ Mas mapapagayon ta man an satong espirituwal na paraiso paagi sa padagos na pagpauswag kan satong Kristiyanong personalidad. Sa paaging iyan, mas maaakit an mga nagmamasid sa paraisong ini. Sa parati, an inot na nakakaparani sa mga tawo sa organisasyon dangan sa Diyos asin ki Cristo iyo an satong kalinigan sa moral asin pagigin mapagpatuninong, kisa sa kaaraman niyato sa Bibliya.

20. Kauyon kan Talinhaga 14:35, ano an dapat na gibuhon ta?

²⁰ Siguradong nauugmang marhay si Jehova asin si Jesus mantang hinihiling ninda an satong magayon na espirituwal na paraiso ngunyan! An kaugmahan ta ngunyan sa pakikikabtang sa pagpapagayon pa kaiyan, panamit pa sana kan kaugmahan ta sa dai na mahahaloy pag nakikikabtang na kita sa paggibo kan daga na magin sarong literal na paraiso. Dapat tandaan niyato an sinasabi sa Talinhaga 14:35: “An kawilihan nin hadi yaon sa lingkod na naghihirong may pakarurop.” (NW) Padagos lugod kitang humiro na may pakarurop mantang nagmamaigot kita na makakontribwir sa pagpapagayon pa kan satong espirituwal na paraiso!