1, 2. Mu Malembo ya ciHebere, amashiwi ya kuti “icipuna ca makasa” ya kwa Lesa yalosha kuli cinshi?

YEHOVA LESA umwine alandile ukuti: “Umuulu e cipuna candi ica bufumu, ne calo e cipuna ca makasa yandi.” (Esa. 66:1) Kabili alandile pa ‘cipuna ca makasa yakwe’ ati: “Nkacindamika icifulo ca makasa yandi.” (Esa. 60:13) Bushe Yehova acindamika shani ‘icipuna ca makasa yakwe’? Kabili finshi twingasambililako fwe bekela pano calo, ‘icipuna ca makasa yakwe’?

² Mu Malembo ya ciHebere, amashiwi ya kuti “icipuna ca makasa” ya kwa Lesa, yalosha na kwi tempele ilyo abena Israele balepepelamo Lesa. (1 Imila. 28:2; Amalu. 132:7) Itempele e lyali icifulo icikalamba ico balepepelapo Yehova, kanshi lyalicindeme sana kuli Yehova, kabili lyalelenga ishina lyakwe ukucindikwa.

3. Bushe itempele lya kwa Lesa ilya mampalanya ni cinshi, kabili ni lilali lyatendeke ukubako?

³ Muno nshiku, takwaba itempele ilikalamba apo tupepela Lesa. Lelo kwaba fye itempele lya mampalanya, umo abantu balumbanya Yehova ukucila ne fyo balemulumbanya mwi tempele ilyaliko kale. Ili tempele, fintu Yehova ateyanya pa kuti tube ifibusa fyakwe ukupitila muli bushimapepo bwa kwa Kristu e lyo  ne lambo lyakwe. Ili tempele lyaliko ukutula mu 29 C.E. ilyo Yesu abatishiwe no kusubwa ukuba Shimapepo Mukalamba uwe tempele lya mampalanya.—Heb. 9:11, 12.

4, 5. (a) Bushe Amalumbo 99 yalanga kuti ababomfi ba kwa Yehova bafwaisha ukucita cinshi? (b) Cipusho nshi tulingile ukuyipusha?

⁴ Kuti twalanga ukuti tulatasha Yehova pa kututeyanishisha itempele lya mampalanya nga ca kuti tulesambilisha abantu ishina lyakwe, kabili tulemutasha na pa kutupeela icilubula. Muno nshiku twalitemwa nga nshi pantu Abena Kristu ba cine abalumbanya Yehova, balicila pa mamilioni 8! Inte sha kwa Yehova tabaaba nga ba mu mipepele imbi abatila bakalumbanya fye Yehova ilyo bakaya ku muulu, lelo bena balalumbanya Yehova na ino ine inshita, pantu balishiba ukuti ukucita ifi kwalicindama.

⁵ Tupashanya ababomfi ba kwa Yehova aba cishinka abalembwa mu Amalumbo 99:1-3, 5 (Belengeni.) Ifyalembwa muli ili ilumbo filangilila ifyo Mose, Aarone, na Samwele babombeshe mu kwafwilisha ukupepa kwa cine ukwaliko mu nshiku shabo. (Amalu. 99:6, 7) Muno nshiku, ilyo abasubwa bashilaya ku muulu ku kubomba umulimo wa bushimapepo pamo na Yesu, babombela mu lubansa lwe tempele lya mampalanya ilya pano calo. Aba mwi bumba lya “mpaanga shimbi” abengi nga nshi balabombela pamo na basubwa. (Yoh. 10:16) Nangu ca kuti impaanga shimbi bakekala pe sonde, e lyo abasubwa ku muulu, bonse balalumbanya Yehova pano calo apaba cipuna ca makasa ya kwa Lesa. Kanshi bonse tufwile ukuyipusha ukuti, ‘Bushe ndatungilila sana ukupepa kwasanguluka ukwa kwa Yehova?’

6, 7. Bwafya nshi bwaishilebako mu cilonganino ca Bena Kristu bakubalilapo, kabili cinshi balingile ukucita pa kuti bapwishe ubu bwafya?

⁶ Ilyo icilonganino ca Bena Kristu capangilwe, tapapitile ne myaka 100, ubusangu bwalitampile nge fyo casobelwe. (Imil. 20:28-30; 2 Tes. 2:3, 4) Ubu ubusangu bwalengele cafye ukwishiba abalebombela Lesa mu cine cine pe tempele lyakwe ilya mampalanya. Lelo pa numa ya myaka iingi, Yehova abomfeshe Imfumu Yesu Kristu ukwafwa abantu ukwishiba abalebombela Lesa wa cine.

⁷ Mu 1919, abo Yehova asuminishe ukulabombela pe tempele lya mampalanya balishibikwe bwino bwino. Yehova alibasangulwile pa kuti balebomba ukulingana ne fyo umwine afwaya. (Esa. 4:2, 3; Mal. 3:1-4) Ifyo umutumwa Paulo amwene mu cimonwa fyalitampile ukufikilishiwa panono panono.

8, 9. Bushe “paradaise” iyo Paulo amwene mu cimonwa ilosha kuli finshi?

⁸ Ilembo lya 2 Abena Korinti 12:1-4 (Belengeni.) lyalilondolola icimonwa ico Paulo amwene. Ici cimonwa amwene calelanga paradaise iyali ku ntanshi. Ni “paradaise” nshi iyo Paulo amwene ilyo ‘asendelwe ku muulu walenga itatu’? Paradaise Paulo amwene kuti yalosha ku fintu fitatu, ica kubalilapo, kuti yalosha kuli paradaise iikabako ku ntanshi pano pene pe sonde. (Luka 23:43) Kabili kuti yalosha na kuli paradaise ya ku mupashi, e lyo na ku bwikalo ubusuma ubwa ku muulu ubo Baibolo ita ati “ibala lya kwa Lesa.”—Ukus. 2:7.

⁹ Nomba mulandu nshi Paulo alandiile ukuti ‘alyumfwile amashiwi ayashingasoswa ayashasuminishiwa ku muntu ukulanda’?  Pantu iyi tayali ni nshita ya kuti Paulo alondolole ifyo amwene mu cimonwa. Lelo muno nshiku calisuminishawa ukulanda pa mapaalo ayo abantu ba kwa Lesa bakwata!

10. Bushe itempele lya mampalanya na paradaise ya ku mupashi fimo fine? Londololeni.

¹⁰ Amashiwi ya kuti “paradaise ya ku mupashi” tulayabomfya sana mu cilonganino ca kwa Lesa. Aya mashiwi yalanda pa mutende uo abantu ba kwa Lesa bakwata. Lelo tatufwile ukulamona ukuti “paradaise ya ku mupashi” ne tempele lya mampalanya fimo fine. Itempele lya mampalanya, fintu Lesa ateyanya ukupepa kwa cine, e lyo paradaise ya ku mupashi mutende ou abantu ba kwa Lesa ababombela mwi tempele lyakwe ilya mampalanya bakwata.—Mal. 3:18.

11. Mulimo nshi twakwata uwakuma paradaise ya ku mupashi?

¹¹ Twaliba ne nsansa nga nshi pantu ukutula mu 1919, Yehova alisuminisha abantunse abashapwililika ukulabombela pamo nankwe mu mulimo wa kukosha no kukusha paradaise ya ku mupashi pano isonde! Bushe na imwe mulabombako uyu mulimo uwacindama nga nshi? Bushe mumona ukuti lishuko ukutwalilila ukubombela pamo na Yehova mu mulimo wa kulenga ‘icifulo ca makasa yakwe’ ukuba icacindama?

12. Cinshi twashininkishisha ukuti ifyaba pali Esaya 60:17 fyalifikilishiwa? (Moneni icikope pa ntendekelo ya cino cipande.)

¹² Ukusesema kwaba pali Esaya 60:17. (Belengeni.) kulanda pa kwaluka ukwakuma icilonganino ca kwa Yehova ica pe sonde. Abena Kristu bacaice nelyo abakalamba abasambilile nomba line icine, balabelenga atemwa balomfwa fimo ifyayaluka mu cilonganino ca kwa Lesa. Lelo bamunyinefwe bamo balikwete ishuko lya kumona uko ifintu fimo fyayalwike. E mulandu wine bashininkishisha ukuti Imfumu iileteka Kristu Yesu, e o Yehova abomfya ku kutungulula icilonganino cakwe! Aba aba bwananyina balicetekela ubutungulushi bwa kwa Yesu, nge ifi fine na ifwe twabucetekela. Nga tulekutika ilyo baletushimikila pa fyo ifintu fyawaminako mu cilonganino ca kwa Lesa kuti icitetekelo cesu cakoselako kabili kuti twacetekela sana Yehova.

13. Mulimo nshi twakwata uwalandwapo mu Amalumbo 48:12-14?

¹³ Nangu ca kuti napapita imyaka iingi sana ukutula apo twabela mu cine, tufwile ukutwalilila ukwebako abantu pa cilonganino ca kwa Yehova. Muno nshiku, abantu abengi bacita fye ifyabipa, kabili tababa no kutemwa, kanshi ifi twaba muli paradaise ya ku mupashi cipesha mano icine cine! Ifi twaishiba ukuti “Sione,” imininako ifintu fya ku muulu, e lyo ne fyo twaishiba pali paradaise ya ku mupashi iya pano isonde, filingile ukulenga twatwalilila ukulondolwelako na ba “nkulo ya ku ntanshi.”—Belengeni Amalumbo 48:12-14.

14, 15. Finshi bayalwileko mu cilonganino ca kwa Lesa mu myaka ya ba 1970, kabili fyalenga shani icilonganino ukuwaminako?

¹⁴ Pa myaka iingi, bamunyinefwe abakokola mu cine balimona ifintu ifingi ifyayaluka mu cilonganino ca kwa Yehova ifyalenga ukuti ciwamineko. Balebukisha ukuti kale umubomfi wa cilonganino e waleyangalila imilimo yonse mu cilonganino, lelo muno nshiku, mabumba ya baleuda yangalila, kale kwali umubomfi wa musambo, lelo muno nshiku, kwaba Komiti ya Musambo. Kale presidenti wa Watch Tower Society e waleyangalila fyonse mu cilonganino ca kwa Lesa, lelo muno nshiku, Ibumba Litungulula e lyangalila. Nangu ca kuti aba bamunyinefwe balebombela pamo  na bamunyina bambi, umuntu fye umo maka maka e walepingula ifyo ifintu fifwile ukuba mu filonganino, pa maofeshi ya misambo, e lyo na pa maofeshi yakalamba. Mu myaka ya ba 1970, amabumba ya baeluda e yatendeke ukwangalila imilimo mu filonganino te umuntu umo iyo.

¹⁵ Bushe ifintu fyaliwaminako mu cilonganino ifi kwaba uku kwaluka? Ee, sana fye. Mulandu nshi? Pantu ilyo baleyalula ifintu, balekonka ifyo Baibolo yalanda. Ifi baeluda ababa “ifya bupe ku bantu,” kabili ababa ne mibele iyalekanalekana iisuma babombela pamo, cilenga ababa mu cilonganino ca kwa Yehova balenonkelamo nga nshi.—Efes. 4:8; Amapi. 24:6.

16, 17. Kwaluka nshi ukwacitika uko mwatemwapo sana, kabili mulandu nshi?

¹⁶ Tontonkanyeni na kwaluka kwaliko nomba line pa fyo impapulo shesu shilembwa, ifyo shimoneka, e lyo ne nshila sha kushisabankanishishamo. Bushe ifi balemba mu mpapulo shesu ifikuma sana amafya tukwata, e lyo ne fyo shimoneka bwino, tafilenga muletemwa sana ukushipeela ku bantu ilyo muleshimikila? Kabili nga tulelanga abantu ifyaba pali Webu saiti yesu iya jw.org ilyo tuleshimikila, ninshi tulepashanya Yehova uufwaya ukwafwa abantu bonse fye te mulandu no ko bekala.

¹⁷ Kabili tulatasha na pa fyo bayalulako ukulongana kwa cilonganino pa kuti tulekwata Amapepo ya Lupwa, nelyo inshita ya kulaisambilisha fwe bene. Tulatasha na pa fyo bayalulako ukulongana kwa citungu no kwa muputule, kabili tulamona ukuti cila mwaka kulawaminako fye! Kabili twalitemwa nga nshi pa fyo babikako amasukulu ayengi umo tusambilila ifya kwa Lesa. Twalishininkisha ukuti Yehova e ulenga ukuti  ifintu fileyaluka mu cilonganino, ne ci calenga paradaise ya ku mupashi ne cilonganino cakwe ukulawaminako fye!

18, 19. Finshi tufwile ukulacita pa kuti paradaise ya ku mupashi ilewaminako?

¹⁸ Twalipaalwa nga nshi pali ifi tubombela pamo na Yehova ku kulenga paradaise ya ku mupashi ukulawaminako. Tulalenga paradaise ya ku mupashi ukuwaminako nga tuleshimikila sana imbila nsuma ya Bufumu no kupanga abasambi. Nga twayafwa umuntu ukulunduluka ica kuti aipeela na kuli Yehova, ninshi twalenga paradaise ya ku mupashi ukukulilako.—Esa. 26:15; 54:2.

¹⁹ Na kabili kuti twalenga iyi paradaise ukuwaminako nga tulewamyako ubuntu bwesu. Ici kuti calenga na bantu ukulafwaisha ukuba muli iyi paradaise ya ku mupashi. Nangu ca kuti ukubasambilisha abantu Baibolo kwalicindama, nga twaliba ne mibele iisuma, kabili twaliba aba mutende, abantu kuti baisa mu cilonganino no kuba ifibusa fya kwa Lesa na Kristu.

20. Ukulingana ne lembo lya Amapinda 14:35, cinshi tulingile ukulacita?

²⁰ Yehova na Yesu balatemwa sana nga bamona ifyo twaba aba mutende! Umutende ne nsansa tuipakisha ilyo tulelenga paradaise ya ku mupashi ukuwaminako, cilangililo ca fyo tukaba no mutende ilyo tukalenga isonde lyonse ukuba paradaise. Tuleibukisha amashiwi yaba pa Amapinda 14:35 ayatila: “Imfumu yatemwa umubomfi uwashilimuka.” Kanshi lyonse natuleba abashilimuka ilyo tulecita ifingalenga paradaise ya ku mupashi ukuwaminako!