1, 2. ?Long Hibru haf blong Baebol, oli yusum tok ya ‘ples blong putum leg’ blong tokbaot wanem?

JEHOVA GOD i talem se: “Heven i olsem bigfala jea blong mi, we mi mi King, mi sidaon long hem blong rul, mo wol i olsem ples blong mi, blong mi putum leg blong mi antap long hem.” (Aesea 66:1) Mo tu, God i tokbaot ‘ples blong putum leg blong hem’ taem hem i talem se: ‘Bambae mi mekem taon ya i nambawan.’ (Aesea 60:13) ?Olsem wanem bambae hem i mekem ples blong putum leg blong hem i nambawan, no i kam naes? ?Mo samting ya i minim wanem long olgeta we oli stap long wol, we i olsem ples blong putum leg blong God?

² Long Hibru haf blong Baebol, oli yusum tok ya ‘ples blong putum leg’ blong tokbaot haos tempol blong God, long taem blong ol man Isrel bifo. (1 Kronikel 28:2; Ol Sam 132:7) Haos tempol ya i naes tumas, from we hem i olsem stamba ples we ol man Isrel oli kam long hem blong mekem tru wosip. Mo oli yusum haos ya blong leftemap nem blong Jehova long wol.

3. ?Tede stamba ples blong mekem tru wosip hem i wanem? ?Wetaem plan ya i stat?

 ³ ?Tede stamba ples blong mekem tru wosip hem i wanem? Hem i no wan haos, olsem haos tempol long taem bifo. Be hem i wan tempol long spirit, mo tempol ya i leftemap nem blong Jehova moa long ol narafala haos. ?Wanem ya tempol long spirit? Hem i plan we God i stanemap blong mekem ol man oli fren gud wetem hem, mo oli wosipim hem. Ransom sakrefaes blong Jisas i mekem plan ya i stanap. Mo plan ya i stat taem Jisas i baptaes long yia 29, mo Jehova i putumap hem olsem Hae Pris long tempol blong Jehova long spirit.—Hibrus 9:11, 12.

4, 5. (1) ?Ol man blong Jehova oli wantem mekem wanem, folem Ol Sam 99? (2) ?Wanem kwestin we yumi wanwan i save askem?

⁴ Yumi glad tumas from plan ya we Jehova i stanemap blong mekem tru wosip. Yumi soemaot se yumi glad long plan ya, taem yumi talemaot nem blong Jehova long ol narafala man, mo nambawan presen ya ransom. !Yumi glad tumas se evri dei, i gat bitim eit milian Kristin we oli stap presem nem blong Jehova! Plante man long ol narafala skul, oli gat rong tingting se bambae oli presem God long heven, afta we oli ded. Be ol man blong Jehova oli save se i impoten blong oli presem nem blong Jehova tede long wol.

⁵ Yumi stap folem fasin blong ol gudfala man blong God long taem bifo, taem yumi presem Jehova. Yumi save luk eksampol blong olgeta long Ol Sam 99:1-3, 5. (Ridim.) Ol gudfala man olsem Moses, Eron, mo Samuel we oli sapotemgud plan blong God long tru wosip. (Ol Sam 99:6, 7) Tede, bifo we ol tabu Kristin oli go mekem wok blong pris wetem Jisas long heven, olgeta oli wok strong long tempol blong Jehova long spirit we i stap long wol. Mo i gat plante milian “narafala sipsip” we oli wok wetem olgeta blong givhan long olgeta. (Jon 10:16) Tufala grup ya, oli joen gud blong wosipim Jehova. Taswe, i gud yumi askem se: ‘?Mi mi sapotemgud plan blong tru wosip we Jehova i stanemap?’

6, 7. ?Wanem trabol i kamaot long taem we Kristin kongregesen i stat? ?Wanem i hapen long yia 1919?

⁶ Klosap 100 yia afta we Kristin kongregesen i stat, wok blong apostasi i stat blong kam bigwan, olsem we Baebol i talem. (Ol Wok 20:28-30; 2 Tesalonaeka 2:3, 4) Afta long taem ya, i had blong luksave ol man blong God we oli stap mekem tru wosip. Plante handred yia biaen, Jehova i yusum Jisas blong soemaot ol man we oli stap wok long tempol blong Jehova long spirit.

⁷ Long yia 1919, ol man oli luksave olgeta we God i jusumaot olgeta blong oli wok long tempol blong hem long spirit. Olgeta ya oli mekem sam jenis long laef blong olgeta, blong mekem se Jehova i glad long wosip we oli mekem. (Aesea 4:2, 3; Malakae 3:1-4) Taswe, vison we aposol Pol i luk plante handred yia finis, i stat blong kamtru.

8, 9. ?Wanem ya “Paradaes” we Pol i luk long wan vison?

 ⁸ Vison we Pol i luk i stap long buk blong 2 Korin 12:1-4. (Ridim.) Long vison ya, Jehova i soemaot long Pol, ol samting we bambae oli kamtru long fiuja. ?Wanem ya “Paradaes” we Pol i luk long vison ya? Fastaem, hem i save minim paradaes we bambae i kamtru long wol i no longtaem. (Luk 23:43) Nambatu, hem i save minim paradaes long spirit, we bambae i kamtru fulwan long niufala wol. Mo nambatri, hem i save minim gudfala laef long paradaes no “garen blong God” long heven.—Revelesen 2:7.

⁹ ?From wanem Pol i talem se hem i “harem ol samting we oli tabu blong tokbaot, we ol tok blong yumi tu oli no naf blong talem”? Hemia from we i no stret taem yet blong hem i talemaot mining blong ol gudfala samting we hem i luk. !Be tede, Jehova i letem we yumi talemaot long narafala, ol blesing we ol man blong hem oli stap harem gud long hem naoia!

10. ?Olsem wanem paradaes long spirit, i defren long tempol blong God long spirit?

¹⁰ Plante taem yumi tokbaot paradaes long spirit, ?be hem i minim wanem? Hem i minim wan pis we i spesel we Jehova i givim long ol man blong hem. Taswe, paradaes long spirit, mo tempol blong God long spirit, tufala i no sem mak. Tempol blong God long spirit, hem i minim ol plan we God i stanemap blong mekem tru wosip. Paradaes long spirit, i soemaot klia ol man we God i jusumaot olgeta, mo oli stap mekem wosip long tempol blong God long spirit.—Malakae 3:18.

11. ?Wanem nambawan janis we yumi gat tede?

¹¹ Yumi glad tumas blong save se stat long yia 1919, Jehova i letem yumi ol sinman blong yumi mekem paradaes long spirit i kam strong moa mo i kam bigwan. ?Yu yu givhan blong mekem gudfala wok ya? ?Yu yu glad long nambawan janis blong wok wetem Jehova, blong leftemap nem blong hem long wol?

12. ?Olsem wanem yumi save se Aesea 60:17 i stap kamtru? (Yu luk pija long stat blong stadi.)

¹² Profet Aesea i talemaot se bambae i gat plante gudgudfala jenis oli kamaot long ogenaesesen blong God we i stap long wol. (Ridim Aesea 60:17.) Ol yangfala no samfala we oli jes kam long trutok, maet oli ridim no oli harem nomo ol jenis we oli kamaot. !Be i gat plante brata mo sista we oli gat janis blong luk mo folem ol nambawan jenis we oli kamaot! !Olgeta ya oli gat strong tingting se God i yusum King blong yumi, Jisas, blong i lidim ogenaesesen blong Hem! Taem yumi harem ekspiriens blong ol Kristin ya, bilif blong yumi i kam strong moa, mo yumi trastem Jehova moa.

13. ?Yumi mas mekem wanem, folem Ol Sam 48:12-14?

¹³ Ol tru Kristin oli mas talemaot  ogenaesesen blong Jehova long ol narafala. !Hemia wan merikel, from we nating se yumi laef long wol we Setan i rul long hem, be yumi gat pis mo yumi joen gud wetem ol brata mo sista, long olgeta ples long wol! !Yumi mas glad blong tokbaot ogenaesesen blong Jehova, mo paradaes long spirit long ‘ol pikinini we bambae oli kamaot biaen long yumi’!—Ridim Ol Sam 48:12-14.

14, 15. ?Wanem ol jenis we oli kamaot biaen long yia 1970? ?Olsem wanem ol jenis ya oli givhan long ogenaesesen?

¹⁴ Plante brata mo sista we oli olfala long trutok, oli luk ol jenis we oli mekem ogenaesesen blong Jehova long wol i kam naes moa. Oli tingbaot se fastaem i gat wan jeaman blong kampani blong ol elda, be naoia i gat kampani blong ol elda nomo. Fastaem i gat wan brata we i lukaot long Betel, be naoia hem i Branj Komiti we i mekem ol desisen. Fastaem i gat wan presiden blong Wajtaoa Sosaeti we hem nao i mekem ol desisen, be naoia hem i Hed Kampani blong ol Witnes blong Jehova we i mekem ol desisen. Nating se ol brata ya oli mekem ol gudfala wok, be i gat wan man nomo we i mekem desisen long kongregesen, long branj ofis, mo long hedkwota. Taswe, biaen long yia 1970, i gat ol jenis oli kamaot we i mekem se i mas gat wan grup blong ol elda we oli mekem desisen, i bitim we wan brata nomo i mekem.

¹⁵ ?From wanem ol jenis ya oli givhan long ogenaesesen? From we ol jenis ya oli  stanap long ol stret save blong Baebol we oli stap kam klia moa. Bitim we wan man i mekem evri desisen, ogenaesesen blong Jehova i kasem ol gudfala save we oli kam long evri elda, no “ol man we oli olsem presen,” we Jehova i givim long yumi.—Efesas 4:8, NW; Ol Proveb 24:6.

16, 17. ?Wanem ol niufala jenis we yu glad long hem mo from wanem?

¹⁶ Yu traem tingbaot ol niufala jenis long ol buk blong yumi. Yumi glad blong seremaot ol naesfala magasin we oli save givhan long ol man we yumi prij long olgeta. Mo tu, yu traem tingbaot olsem wanem yumi yusum ol niufala teknoloji blong talemaot gud nius. Eksampol, Websaet ya jw.org i kasem plante moa man, mo hemia i mekem se olgeta tu oli kasem ol save we oli rili nidim. Taswe, folem ol jenis ya, yumi luksave we Jehova i gat bigfala intres long ol man, mo hem i lavem olgeta tumas.

¹⁷ Yumi glad tu from ol niufala jenis long miting blong yumi, we oli mekem se yumi gat taem blong mekem famle wosip no prapa stadi blong yumi. Mo yumi glad long ol jenis we oli kamaot long program blong ol asembli blong yumi. !I luk olsem se evri yia, ol jenis ya oli stap kam gud moa! Yumi glad tu from ol nambawan trening we yumi kasem long ol skul blong yumi we oli tijim Baebol. !Long evri jenis ya, i klia nomo se Jehova i stap lidim ogenaesesen blong hem, mo hem i gohed blong mekem se paradaes ya long spirit, i stap kam naes moa!

18, 19. ?Olsem wanem yumi save mekem paradaes long spirit i kam naes moa?

¹⁸ Jehova i givim nambawan janis ya long yumi, blong yumi wok wetem hem blong mekem paradaes ya long spirit, i kam naes moa. Be, ?olsem wanem yumi save mekem samting ya? Yumi save mekem olsem, taem yumi gohed blong talemaot gud nius blong Kingdom mo pulum ol man oli kam disaepol. Evritaem we yumi givhan long wan man, blong i kam man blong God, yumi stap givhan blong mekem paradaes long spirit i kam bigwan moa.—Aesea 26:15; 54:2.

¹⁹ Mo tu, yumi stap mekem paradaes long spirit i kam naes moa, taem yumi wok had blong gat ol Kristin fasin. Hemia i save pulum ol narafala blong oli luksave paradaes ya, long spirit. Blong talem stret, i no save blong yumi nomo long Baebol we i mekem ol man oli luksave paradaes ya, be ol gudfala fasin blong yumi mo pis we yumi gat wetem ol brata mo sista blong yumi. Hemia nao samting we i pulum ol man blong oli kam long ogenaesesen, mo blong oli save Jehova mo Jisas.

20. ?I gud yumi mekem wanem, folem Ol Proveb 14:35?

²⁰ I sua se Jehova mo Jisas tufala i glad taem tufala i luk naesfala paradaes long spirit we yumi gat tede. Glad we yumi gat naoia blong mekem paradaes ya i kam naes moa, hem i wan smol haf nomo blong bigfala glad we bambae yumi kasem long fiuja, taem yumi wok blong mekem wol ya i kam wan paradaes. Oltaem yumi mas tingbaot vas blong Ol Proveb 14:35, we i talem se: “King i stap glad long ol haeman blong hem we oli gat save, mo we oli stap wok gud.” !I gud yumi waes, taem yumi wok had blong mekem paradaes ya long spirit, i kam naes moa!