1, 2. Lón ewe Tesin Ipru, met ewe kapas ‘lenien puun peche’ a tongeni wewe ngeni?

 JIOWA KOT a apasa: “Läng ai lenien mot, nge fanüfan lenien puun pechei.” (Ais. 66:1) Kot a pwal erá: “Upwe elingaaló leenien puun pechei.” (Ais. 60:13, NW) Ifa usun Jiowa epwe elingaaló leenien puun pechen we? Met ena mettóch epwe wewe ngeni fán iten chókkewe mi nónnóm wóón leenien puun pechen Kot we, ei fénúfan?

² Lón ewe Tesin Ipru, ewe kapas ‘lenien puun peche’ a pwal wewe ngeni ewe imwenfel lóóm lón Israel. (1 Kron. 28:2; Kölf. 132:7) Me ren Jiowa, ewe imwenfel a fókkun ling, pokiten ina leenien ewe fel mi enlet. Me aramas ra áeá ena imwenfel le elingaaló Jiowa wóón fénúfan.

3. Ifa leenien ewe fel mi enlet lón ei fansoun, me ineet a poputá ena kókkót?

³ Ifa leenien ewe fel mi enlet lón ei fansoun? Esap eú wesewesen imw usun ewe imwenfel lóóm. Nge ina án Kot we imwenfel lón pekin lúkú, me a elingaaló Jiowa lap seni imw meinisin. Nge met weween ena imwenfel lón pekin lúkú? Ina án Kot kókkót pwe aramas repwe tongeni fel ngeni me wiliti  chiechian. A chék tufich ei kókkót ren án Jesus we méén kepich. Ei kókkót a poputá lón ewe ier 29 lupwen Jesus a papatais me a kefilitá usun ewe Souasor mi Lap lón án Jiowa we imwenfel lón pekin lúkú.​—Ipru 9:11, 12.

4, 5. (a) Me ren Kölfel 99, met ekkewe chón fel mi enlet ngeni Jiowa ra mochen féri? (b) Ifa ewe kapas eis mi lamot sipwe pwisin eisinikich?

⁴ Sia fókkun kilisou ren án Kot ei kókkótun fel mi enlet. Nge sia pwáraatá ach kilisou ren ach afalafala ngeni aramas iten Jiowa we me an we liffang mi amwarar, ewe méén kepich. Sia pwapwa pwe mi wor lap seni walu million Chón Kraist mi enlet mi mwareiti Jiowa iteiten rán! Chómmóng aramas mi achocho lón lamalam ra eáni ekiek mi mwáál pwe repwe mwareiti Kot lón láng mwirin ar máló. Nge néún Jiowa aramas ra silei lamoten ar repwe mwareiti Kot iei wóón fénúfan.

⁵ Lupwen sia mwareiti Jiowa, sia áppirú án ekkewe mi tuppwél ngeni Kot leenien áppirú, ekkewe a mak lón Kölfel 99:1-3, 5. (Álleani.) Ekkewe mwán mi tuppwél áwewe chék ren Moses, Aaron, me Samuel ra unusen álisatá án Kot kókkótun fel mi enlet lón ena fansoun. (Kölf. 99:6, 7) Ikenái, ekkewe mi kepit wóón fénúfan ra tuppwél le angang ngeni Jiowa lón kinikinin ewe imwenfel lón pekin lúkú wóón fénúfan. Nge lón mwach repwe fiti Jesus lón láng me wiseni ewe wis souasor. Ekkewe fite million ‘ekoch sip’ ra álisiir fán tuppwél. (Joh. 10:16) Ekkena ruu kúmi ra fel ngeni Jiowa fán tipeeú. Iwe nge, mi lamot sipwe pwisin eisinikich: ‘Ngang ua unusen álisatá án Jiowa kókkótun fel mi enlet?’

6, 7. Menni osukosuk a ppiitá lón ewe popun mwichefelin Chón Kraist, iwe met a fis lón ewe ier 1919?

⁶ Kis seni 100 ier mwirin fférútáán ewe mwichefelin Chón Kraist, ewe angangen rikiló a poputá, usun met Paipel a fen oesini. (Föf. 20:28-30; 2 Tes. 2:3, 4) Mwirin ena, a weiresiló án aramas repwe esilla ié néún Kot kewe chón fel mi enlet. Mwirin fitepúkú ier, Jiowa a néúnéú Jesus le affata ika ié kewe ra wesewesen angang ngeni Kot lón An we imwenfel lón pekin lúkú.

⁷ Lón ewe ier 1919, a fen ffatéchúló ié kewe Kot a pwapwaitiir me ra angang ngeni lón an we imwenfel lón pekin lúkú. Ra féri ekkewe ekkesiwil pwe epwe lapóló án Jiowa pwapwaiti ar fel ngeni. (Ais. 4:2, 3; Mal. 3:1-4) Iwe, a poputá le pwénúetá ewe lángipwi ewe aposel Paulus a kúna fitepúkú ier lóóm.

8, 9. Menni ewe “Paratis” Paulus a kúna lón eú lángipwi?

⁸ Ewe lángipwi Paulus a kúna, a mak lón 2 Korint 12:1-4. (Álleani.) Lón ena lángipwi, Jiowa a ékúna ngeni Paulus och mettóch epwe fis lón mwachkkan. Menni ewe “Paratis” Paulus a kúna? Áeúin, a tongeni weneiti ewe wesewesen Paratis epwele fis wóón fénúfan. (Luk. 23:43) Oruuan, a tongeni weneiti ewe paratis lón pekin lúkú epwe unusen pwénúetá lón ewe ótót sefé. Me aúlúngátin, a tongeni weneiti amwararen ekkewe mettóch lón láng lón “an God we Paradise.”​—Pwär. 2:7, Kapasen God.

⁹ Nge, pwata Paulus a apasa pwe a “rongorong sokun kapas esap wor eman a tongeni apasatä, esap mwümwü ngeni  eman an epwe kapas usun”? Pokiten esaamwo tori ewe fansoun an epwe tichikin áweweei ekkewe mettóch mi amwarar a fen kúna lón ena lángipwi. Nge lón ei fansoun, Jiowa a mut ngenikich ach sipwe esilei ngeni aramas usun ekkewe feiéch néún kewe aramas ra pwapwaiti iei!

10. Pwata ewe paratis lón pekin lúkú me ewe imwenfel lón pekin lúkú rese lélléfengen?

¹⁰ Fán chómmóng sia fós usun ewe paratis lón pekin lúkú, nge met weween ena? Ina nónnómun néún Kot kewe aramas mi kkóló aúchean, ikewe ie ra pwapwaiti ewe kinamwe i a fang ngeniir. Ina minne, ewe paratis lón pekin lúkú me ewe imwenfel lón pekin lúkú rese wewefengen. Ewe imwenfel lón pekin lúkú, ina án Kot kókkótun fel mi enlet. Nge ewe paratis lón pekin lúkú a affataéchú ekkewe aramas Kot a pwapwaitiir, iir kewe ra fel ngeni i lón an we imwenfel lón pekin lúkú.​—Mal. 3:18.

11. Ifa ewe feiéch a nóm rech ikenái?

¹¹ A mmen apwapwa ach silei pwe seni ewe ier 1919 Jiowa a fen mut ngeni aramas rese unuséch ar repwe túmúnú, apéchékkúla, me awatteeló ewe paratis lón pekin lúkú. Ka kan álillis lón ei angang mi amwarar? Ka aúcheani ewe feiéch óm fiti Jiowa lón ewe angang mi elingaaló i wóón fénúfan?

12. Ifa usun sia silei pwe Aisea 60:17 a fen pwénúetá? (Ppii ewe sasing lepoputáán ei lesen.)

¹² Ewe soufós Aisea a oesini usun chómmóng ekkesiwil mi amwarar epwe fis lón án Kot we mwicheich wóón fénúfan. (Álleani Aisea 60:17.) Ekkewe kúkkún me sáráfé are mineféén Chón Kraist ra chék álleani are rongorong pwóróusen ewe fansoun a fis ekkena siwil. Nge mi wor chómmóng pwiich kewe ra feiéch pún ra pwisin nóm lupwen a fis ekkena siwil mi amwarar! Chókkana ra fókkun lúkú pwe Kot a kan néúnéú ach we King, Jesus, le emmweni An we mwicheich! Lupwen sipwe rongorong pwóróusen pwiich keei Chón Kraist, ach lúkúlúk wóón Jiowa epwe péchékkúleló.

13. Met mi lamot sipwe féri me ren Kölfel 48:12-14?

¹³ Mi lamot ngeni meinisin Chón Kraist mi enlet ar repwe apwóróusa ngeni aramas usun án Jiowa we mwicheich. A mmen amwarar pún inaamwo ika sia nónnóm lón án Satan ei fénúfan mi ngaw, nge sia kinamwefengen me tipeeúfengen lón ach ei mwicheichen pwipwi! Mi lamot sipwe pwapwa le apwóróusa ngeni “ekewe pilon aramas repwe feito” usun án Jiowa we mwicheich me ewe paratis lón pekin lúkú!​—Álleani Kölfel 48:12-14.

14, 15. Ikkefa ekkewe siwil a fis mwirin ewe ier 1970, me ifa usun ewe mwicheich a kúna feiéch seni?

¹⁴ Chómmóng mi mwukóló lón ach kewe mwichefel ra fen kúna ekkewe siwil mi fen elingaaló án Jiowa we mwicheich wóón fénúfan. Ra chechchemeni ewe fansoun lón ekkewe mwichefel a wor emén chék mwán mi ásimaw mi wisen emmweni nge esap fen eú kúmi, lupwen lón ekkewe fénú a wor emén chék chón emmweni keangen ofesilap nge esap ewe Kúmiin Chón Túmúnú Keangen Ofesilap, are ewe fansoun presetenin ewe Watch Tower Society a wisen emmweni ewe mwicheich nge esap ewe Mwichen Soupwúngúpwúng án Chón Pwáraatá Jiowa. Inaamwo ika pwiich kana mi wor chón álisiir mi tuppwél,  nge ren enletin a wor emén chék a wisen apwúngaló mettóch lón ekkewe mwichefel, keangen ofesilap, me lón ewe ofesilap. Mwirin ewe ier 1970, a fis ekkewe ekkesiwil an esap chúen emén chék epwe wisen apwúngaló mettóch nge fen ekkewe kúmiin mwán mi ásimaw.

¹⁵ Pwata ekkena siwil a atoto feiéch ngeni ach mwicheich? Pún ra lóngólóng wóón ach weweéchúti masouen án Kot we Kapas. Lap seni án emén chék aramas epwe wisen apwúngaló mettóch meinisin, ewe mwicheich a fen kon kúna feiéch seni lipwákéchún meinisin ekkewe mwán mi ásimaw, ekkewe mi usun ‘liffang,’ me ren Jiowa.​—Ef. 4:8, 11; SalF. 24:6.

16, 17. Menni siwil mi fis kukkuto chék ka fókkun ingeló ren, me pwata?

¹⁶ Ekieki usun ekkewe ekkóch siwil a fis kukkuto chék fán iten néúch kewe puk. Sia pwapwaiti le anéúnéú ekkewe puk mi álilliséch, napanapéch me ling lón ach angangen afalafal. Pwal ekieki ifa usun sia néúnéú ekkewe minen computer le afalafala ewe kapas allim. Áwewe chék, ewe Web site jw.org a chéúfetál ekis meinisin pwe aramas repwe kúna ewe álillis mi wesewesen lamot ngeniir. Ren ekkeei siwil, sia kúna úkúkún alóllóólun án Jiowa tongei me áfánni aramas.

¹⁷ Sia pwal kilisou ren ewe siwil mi fis fán iten ach kewe mwich pwe epwe wor ach fansoun famili fel are pwisin káé ewe Paipel. Me sia pwapwaiti ekkewe siwil lón ekkewe prokram lón ach kewe mwichelap. Usun iteiten ier a kan chék ékkéchúló! Sia pwal kilisou ren ewe káit sia angei seni ach kewe sókkópaten sukulen Paipel. Ren ekkeei siwil meinisin, a ffat pwe Jiowa a ekkemmweni an we  mwicheich me a ekkelingaaló ewe paratis lón pekin lúkú!

18, 19. Ifa usun sia tongeni álisatá lingelóón ewe paratis lón pekin lúkú?

¹⁸ Jiowa a fen ngenikich ewe wis ach sipwe ákkálisatá lingelóón ewe paratis lón pekin lúkú. Nge ifa usun sia féri ena? Ren ach tinikken le afalafala ewe kapas allim usun ewe Mwú me álisi aramas le wiliti néún Jesus chón káé. Iteiten fansoun sia álisi emén le wiliti néún Kot chón angang, sia álisatá watteelóón ewe paratis lón pekin lúkú.​—Ais. 26:15; 54:2.

¹⁹ Sia pwal álisatá lingelóón ewe paratis lón pekin lúkú ren ach akkachocho le ámúrinnééló napanapach kewe napanapen Chón Kraist. Ei mettóch epwe lukeato aramas ngeni ewe paratis lón pekin lúkú. Fán chómmóng, féfféréchúch me napanapéchúch ikkena met ra akkomw luki letipen aramas ngeni ewe mwicheich me pwal ngeni Jiowa me Jesus, nge esap chék ach sile lón Paipel.

20. Me ren Än Salomon Fos 14:35, met sipwe mochen féri?

²⁰ Ese mwáál Jiowa me Jesus ra fókkun pwapwa ar kúna lingen ach ei paratis lón pekin lúkú lón ei fansoun. Ewe pwapwa sia meefi iei lón ach álisatá lingelóón ena paratis, ese akkarap ngeni ewe pwapwa sipwe meefi lupwen sia álisatá wililóón ei fénúfan ngeni eú wesewesen paratis. Sipwe chechchemeni iteitan met a mak lón Än Salomon Fos 14:35, a erá: “Eman king a pwapwa ren eman chon angang mi tipachem.” Fán tipachem, sipwe achocho le ekkelingaaló ewe paratis lón pekin lúkú!