Travay pour fer nou paradi spirityel vin pli zoli
“Mon pou glorifye sa landrwa kot mon met mon lipye.”
KANTIK: 102, 75
1, 2. Dan Lekritir Ebre avek ki sa term ‘kot i met son lipye’ i refer avek?
ZEOVA ti dir: “Lesyel i mon tronn e later i kot mon met mon lipye.” (Iza. 66:1) Bondye ti osi dir: “Mon pou glorifye sa landrwa kot mon met mon lipye.” (Iza. 60:13) Ki mannyer i fer sa? Ki sinifikasyon sa i annan pour nou, vi ki nou reste ‘kot i met son lipye’?
2 Apard later, sa term ‘kot i met son lipye’ i osi ganny servi dan Lekritir Ebre pour dekrir sa tanp ki ti ganny servi par bann Izraelit. (1 Kron. 28:2; Ps. 132:7) Pour Zeova sa tanp ti vreman zoli akoz i ti sa landrwa pour ador li lo later. I ti ganny servi pour glorifye Zeova lo later.
3. Kisisa gran tanp spirityel Bondye e kan ki i ti vin an egzistans?
3 Ozordi sa landrwa pour ador Bondye pa en batiman parey tanp. Par kont, i annan en tanp spirityel ki glorifye Zeova plis ki okenn batiman. I en laranzman ki permet nou rekonsilye avek Bondye atraver sakrifis Zezi Kri. Sa ti vin an egzistans lannen 29 N.L. kan Zezi ti batize e ganny swazir konman Gran Pret dan gran tanp spirityel Zeova.
4, 5. (a) Ki bann vre adorater Zeova i anvi fer dapre Psonm 99? (b) Ki kestyon nou devret demann nou lekor?
4 Pour montre nou lapresyasyon pour sa tanp spirityel, nou loue Zeova par fer konnen son non ek sa ranson ki demontre son mizerikord. Pa i gou pour konnen ki i annan plis ki wit milyon vre Kretyen ki pe glorifye Zeova ozordi! Konpare avek serten dimoun relizye ki krwar zot pou loue Bondye ler zot mor e al dan lesyel, tou bann Temwen Zeova i konnen ki i enportan pour loue li isi lo later la konmela.
5 Alor, nou swiv legzanp bann serviter fidel Zeova ki ganny dekrir dan Psonm 99:1-3, 5. * (Lir.) Parey sa psonm i montre, Moiz, Aaron ek Samyel ti donn tou zot sipor sa laranzman pour vre ladorasyon dan zot letan. (Ps. 99:6, 7) Ozordi, avan ki bann Kretyen swazir ki lo later i al dan lesyel pour servi konman pret avek Zezi, zot fidelman servi Zeova dan lakour tanp spirityel lo later. Plizyer milyon “lezot mouton” i siport zot fidelman. (Zan 10:16, NW) Menm si zot annan diferan lespwar, tou le de group i ador Zeova dan linite isi kot Bondye i met son lipye. I ti a byen nou demann nou lekor personnelman, ‘Eski mon pe donn tou mon sipor sa laranzman Zeova pour vre ladorasyon?’
IDANTIFYE BANN KI SERVI KOT TANP SPIRITYEL BONDYE
6, 7. Ki problenm ti arive parmi bann Kretyen dan premye syek e kwa ki ti neseser plizyer syek pli tar?
6 Mwens ki en syek apre ki kongregasyon Kretyen ti ganny etablir, en lapostazi ki ti’n ganny predir ti konmans devlope. (Akt 20:28-30; 2 Tesa. 2:3, 4) Apre sa, i ti vin deplizanpli difisil pour idantifye lekel ki ti pe vreman servi Bondye kot son tanp spirityel. I ti nek plizyer syek pli tar ki Zeova ti servi son nouvo Lerwa Zezi Kri pour idantifye lekel ki ti pe vreman servi li kot Son tanp spirityel.
7 Ver 1919, bann ki Zeova ti’n aprouve e pe servi dan son tanp spirityel ti klerman ganny idantifye. Zot ti’n ganny rafinen spirityelman pour zot kapab servi Bondye dan en fason ki pli akseptab pour li. (Iza. 4:2, 3; Mal. 3:1-4) Sa ki zapot Pol ti’n vwar dan en vizyon plizyer syek oparavan ti konmans ganny akonplir.
8, 9. Eksplik sa trwa laspe sa “paradi” ki Pol ti vwar dan en vizyon.
8 Sa vizyon ki Pol ti gannyen i ganny dekrir dan 2 Korentyen 12:1-4. (Lir.) Sa ki Pol ti vwar dan sa vizyon ti ganny refer avek konman en revelasyon. I ti konsernan en levennman ki ti pou arive a lavenir, pa en keksoz ki ti egziste dan son letan. Kan Pol ti “monte ziska trwazyenm lesyel,” ki “paradi” i ti vwar? Sa paradi ki Pol ti koz lo la ti pou annan en lakonplisman fizik, spirityel e en lakonplisman dan lesyel, tousala pou egziste an menm tan a lavenir. I kapab refer avek sa Paradi fizik lo later ki pou vini byento. (Lik 23:43) I kapab osi refer avek sa paradi spirityel ki nou pou profit plennman dan nouvo lemonn. An plis, i kapab refer avek bann bon kondisyon dan lesyel dan “paradi Bondye.”
9 Me akoz Pol ti dir ki i ti’n “tann parol ki pa kapab ganny eksprimen, e ki zonm napa drwa repete”? Parski i pa ti sa letan pour li eksplik an detay bann keksoz merveye ki i ti’n vwar dan sa vizyon. Me ozordi nou annan drwa koz lo bann benediksyon ki i annan parmi pep Bondye.
10. Akoz sa term “paradi spirityel” ek “tanp spirityel” pa vedir menm zafer?
10 Souvan nou koz konsernan sa paradi spirityel, me ki sa i vedir? I dekrir nou lanvironnman ouswa sa kondisyon spirityel ki inik, ki permet nou anpe avek Bondye ek nou bann frer ek ser. Byensir, nou pa devret krwar ki sa term “paradi spirityel” ek “tanp spirityel” i menm zafer. Sa tanp spirityel i laranzman Bondye pour vre ladorasyon. Sa paradi spirityel i idantifye klerman bann ki annan laprouvasyon Bondye e ki ozordi pe servi li kot son tanp spirityel.
11. Ki privilez nou annan ozordi?
11 Pa i eksitan pour konnen ki depi 1919 Zeova in permet bann imen enparfe travay avek li pour devlop, ranforsi e agrandi sa paradi spirityel lo later! Eski ou pe fer ou par dan sa travay merveye? Eski ou motive pour kontinyen travay avek Zeova pour glorifye ‘sa landrwa kot i met son lipye’?
ZEOVA PE FER SON LORGANIZASYON VIN PLI ZOLI
12. Ki konfyans nou tou nou annan konsernan lakonplisman Izai 60:17? (Vwar portre lo paz 7.)
12 Profet Izai ti predir ki i ti pou annan bokou sanzman e azisteman dan parti lorganizasyon Zeova lo later. (Lir Izai 60:17. *) Bann ki zenn oubyen nouvo dan laverite in lir konsernan sa bann sanzman oubyen zot in tann lezot koz lo la. Me pa i en privilez pour bann frer ek ser ki’n eksperyans sa personnelman! Alor i fer sans ki zot konvenki ki Zeova pe servi son Lerwa pour gid e diriz Son lorganizasyon! Zot konnen ki zot annan rezon annan konfyans, sa menm konfyans ki nou tou nou annan. Kan ou ekout zot eksprim zot lapresyasyon, sa pou fortifye ou lafwa ek konfyans dan Zeova.
13. Ki nou oblize fer dapre Psonm 48:12-14?
13 Nenport ki kantite letan ki nou dan laverite, nou bezwen koz avek lezot konsernan lorganizasyon Zeova. Pa i en mirak pour annan en paradi spirityel dan en move lemonn koronpi kot dimoun napa lanmour! I devret en lazwa pour nou koz “avek fitir zenerasyon” konsernan ki kantite lorganizasyon Zeova oubyen “Siyon” i merveye e konsernan laverite lo sa paradi spirityel.
14, 15. Ki bann azisteman ki ti ganny fer apre 1970 e ki mannyer lorganizasyon in benefisye?
14 Diran bann lannen, bann aze parmi nou in personnelman eksperyans serten azisteman ki’n fer parti lorganizasyon Zeova lo later vin pli zoli. Zot rapel ler bann kongregasyon ti annan en serviter kongregasyon dan plas en konsey ansyen, ler bann pei ti annan en serviter biro brans dan plas en Komite Biro Brans e ler prezidan Watch Tower Society ti pran bann desizyon dan plas en Konsey Direkter Temwen Zeova ki’n ganny byen etablir. Menm si sa bann frer devoue ti ganny led, zis en dimoun ki ti responsab pour fer bann desizyon dan kongregasyon, kot bann biro brans e kot biro prensipal. Apre 1970, bann azisteman ti ganny fer pour ki en group ansyen ti ganny sa responsabilite pour fer bann desizyon olye ki zis en dimoun.
15 Eski sa bann azisteman in anmenn okenn byenfe? Wi, parski zot ti dapre sa pli bon konprenezon ki zot ti’n gannyen baze lo Labib. Dan plas zis en dimoun ki fer bann desizyon, lorganizasyon Zeova i benefisye avek kalite tou sa bann “kado zonm” ki Bondye in donnen.
Zeova pe donn dimoun partou sa gidans ki zot vreman bezwen (Vwar paragraf 16, 17)
16, 17. Ki azisteman ki’n ganny fer resaman ki’n enpresyonn ou e akoz?
16 Mazin osi bann azisteman ki’n ganny fer resaman avek nou bann piblikasyon. Pa nou kontan pour ofer bann zoli piblikasyon ki pratik e atiran dan predikasyon! Par egzanp, bokou dimoun i ganny akse avek nou sit Web jw.org ki ed zot ganny sa led ki zot vreman bezwen. Dan tou sa bann azisteman, nou vwar ki Zeova i vreman enterese avek bann dimoun e ki i kontan zot.
17 Nou osi apresye sa azisteman ki permet nou annan plis letan pour Ladorasyon Fanmir oubyen letid personnel ek bann azisteman ki’n ganny fer dan bann progranm lasanble. Souvan nou dir ki sa bann lasanble i vin deplizanpli zoli sak lannen. Nou sirman rekonesan osi pour bann diferan formasyon ki nou gannyen atraver bann lekol baze lo Labib. Nou vwar lanmen Zeova dan tou sa bann azisteman. Gradyelman i pe fer son lorganizasyon ek sa paradi spirityel ki nou annan la konmela vin pli zoli!
FER OU PAR POUR FER SA PARADI SPIRITYEL VIN PLI ZOLI
18, 19. Ki mannyer nou kapab ede fer sa paradi spirityel vin pli zoli?
18 I en loner pour Zeova permet nou ede fer nou paradi spirityel vin pli zoli. Nou fer sa kan nou devoue pour pres sa bon nouvel Rwayonm e fer plis disip. Sak fwa nou ed en dimoun pour progrese ziska ki i dedye son lavi avek Zeova, nou’n travay pour agrandi sa paradi spirityel.
19 Nou osi kapab fer sa paradi spirityel vin pli zoli par amelyor nou personnalite Kretyen. Dan sa fason, nou fer sa paradi pli atiran pour bann ki pe obzerve. Souvandfwa, sa ki atir dimoun anver Bondye ek Kris o konmansman, i pa zis konnesans ki dan Labib me nou kondwit pir e lefet ki nou viv anpe.
Ou kapab ede pour agrandi sa paradi spirityel (Vwar paragraf 18, 19)
20. An armoni avek Proverb 14:35 ki nou devret anvi fer?
20 Pa Zeova ek Zezi i bezwen vreman kontan ler zot vwar nou zoli paradi spirityel ozordi! Sa lazwa ki nou annan ozordi pour travay pour fer sa paradi spirityel vin pli zoli i en avangou sa lazwa ki nou pou gannyen pli tar ler nou travay pour fer later vin en paradi. Annou gard antet Proverb 14:35 ki dir: “Sa lerwa i apresye en serviter ki azir avek bon zizman.” Annou touzour azir avek bon zizman anmezir ki nou travay dir pour ede fer sa paradi spirityel vin pli zoli!
^ par. 5 Psonm 99:1-3, 5: “1 Zeova in vin Lerwa. Ki bann pep i tranble. I asiz lo son tronn par lao bann seriben. Ki later i tranble. 2 Zeova i gran dan Siyon e i par lao tou pep. 3 Ki zot loue ou gran non parski i enpresyonan e sen.” “5 Loue Zeova nou Bondye e azenou la kot i met son lipye. Bondye i sen.”
^ par. 12 Izai 60:17: “Olye kwiv mon pou anmenn lor, olye feray mon pou anmenn larzan, olye dibwa, kwiv e olye bann ros, feray. Mon pou fer lape vey lo ou e ladrwatir diriz ou.”
^ par. 13 Psonm 48:12-14: “12 Mars otour Siyon, fer li letour e kont son bann latour. 13 Fikse zot leker lo son baraz. Egzamin son bann latour for pour ki zot kapab rakont li avek fitir zenerasyon. 14 Parski sa Bondye i nou Bondye pour touzour, wi pour leternite. Li ki pou gid nou pour touzour.”
