1, 2. Nemene la aliene la hnaewekë, “tane la lue ca” ngöne la Itre Hna Cinyihane Qene Heberu?

ÖNI Iehova Akötresie: “Theronenge la hnengödrai, nge ta ne lue cange la fen.” (Isaia 66:1) Hnei Akötresieti fe hna ithanatane la ta ne la lue ca i Nyidrë lo Nyidrëti a qaja ka hape: “Tro ni a alolone la hne ne la lue wacang.” (Isaia 60:13) Hnei Nyidrëti hna atrune maine alolone tune kaa la ta ne lue ca i Nyidrë? Nemene la aliene la ewekë cili kowe la itre ka mele ngöne la tane lue ca i Nyidrë, ene la ihnadro?

² Ame ngöne la Itre Hna Cinyihane Qene Heberu, hna xome fe la hnaewekë, “ta ne lue ca” göi troa qaja la ēnē ekö e Isaraela. (1 Aqane lapa ite Joxu 28:2; Salamo 132:7) Mingöminge catre xajawa i Iehova la ēnē cili, ke, celë hi hnë atrunyi Iehova.

3. Ekaa la hnë atrunyi Iehova enehila, nge hna acile eu?

³ Ekaa la hnë atrunyi Iehova enehila? Tha ngöne ketre uma kö hna xup tune lo ēnē ekö; kolo pe a qaja la ēnē ne la u. Nge  sisitria catre kö la aqane atrunyi Iehova hnene eje hune la aqane troa atrunyi Nyidrë jëne la ketre iuma hna xup. Nemene la ēnē ne la u? Ketre ewekë hna hnëkëne hnei Iehova nyine aijijëne la itre atr troa nyihlue i Nyidrë me nyi enehmu i Nyidrë. Ewekë lai hna nyitrepen hnene la mele hna huujën hnei Iesu. Nge hnene eje hna nyiqaane cile lo macatre 29, hmekune lo kola bapataiso Iesu me ië nyidrë troa nyi Atre huje ka sisitria hnine la ēnē i Iehova ngöne la götrane u.—Heberu 9:11, 12.

4, 5. (a) Tune la hna qaja ngöne la Salamo 99, nemene la aja ka catre thene la itre hlue i Iehova? (b) Nemene la hnyinge nyine tro sa isa mekune hnyawa?

⁴ Tru la ole së kowe la hna hnëkëne hnei Iehova thatraqane la hmi ka wië. Easa amamane la ole së hnene la hne së hna qaja la ëje i Iehova kowe la itre atr. Easë mina fe a olene koi Iehova pine la thupene mel, ketre ahnahna ka sisitria qaathei Nyidrë. Tru la madrine së laka, ase hë enehila sasaithe la 8 milio lao Keresiano ka atrunyi Iehova o drai! Maine nyipici laka, itre atr a mekune ka hape, atrunyi Iehova jë kö angatre elanyi e elë jë angatre hnengödrai eë thupene la hna mec, ngo ame la itre hlue i Iehova, atre hnyawa hi angatr ka hape, enehila hi la ijine troa atrunyi Iehova e celë fen, tha elanyi kö.

⁵ Ame la easa atrunyi Iehova, easë hi lai a nyitipune la itre hlue i Nyidrëti ekö hna qaja ngöne Salamo 99:1-3, 5. (E jë.) Hnene la itre hlue i Akötresieti ekö, tui Mose, me Arona, me Samuela hna sajuëne la ewekë hna acile hnei Akötresie thatraqane la hmi ka wië ekö. (Salamo 99:6, 7) Ame enehila, qëmekene tro la itre hna iën a ce huliwa me Iesu e hnengödrai ceitu me itretre huuj, angatr a pane nyihlue i Iehova e celë fen, ketre igötranene la ēnē ne la u. Kola xatua angatre hnene la itre xa hlue i Iehova, ene la “ite xa mamoe,” laka itre milio la etrun. (Ioane 10:16) Kola ce atrunyi Iehova hnene la lue lapa cili. Ngo loi e tro sa isa waipengö së me hape, ‘Hnenge kö hna hane catre sajuëne asë la itre hna amekötine hnei Iehova thatraqane la hmi?’

6, 7. Nemene la jole ka kökötr ekö ngöne la pane ekalesia, nge nemene la ewekë ka traqa lo 1919?

⁶ Tha traqa ju kö kowe la 100 lao macatre thupene la hna acile la pane ekalesia ekö, nge kökötre hë la iamenumenu tune lo aqane ahnithe amë. (Ite Huliwa 20:29,30; 2 Thesalonika 2:3, 4) Thupene lai, jole hë troa atrehmekune la itre ka nyihlue i Akötresie hnine la ēnē ne la u. Itre hadredre hë lao macatre thupen, traqa ha la ijine koi Iehova troa amekötine la itre ewekë, jëne Iesu Keriso, Joxu hna hnyipi acil.

⁷ Ame lo macatre 1919, mama ha la itre ka nyipi nyihlue i Akötresie hnine la ēnē i Nyidrë. Hetre itre ewekë hnei angatre hna amekötine matre ihmeku hnyawa la aqane hmi angatr, memine la aja i Iehova. (Isaia 4:2, 3; Malaki 3:1-4) Celë hi aqane eatre lo hna meköle goeëne hnei Paulo.

8, 9. Nemene la aliene la “paradaiso” hna meköle goeëne hnei Paulo?

 ⁸ Hna qejepengöne la hna meköle goeëne hnei Paulo ngöne 2 Korinito 12:1-4. (E jë.) Ame ngöne la hna meköle goeëne cili, hnei Iehova hna amamane koi Paulo la ketre ewekë ka troa traqa elany. Nemene “paradaiso” la hna meköle goeëne hnei Paulo? Kola qaja la paradraiso ka troa ej e celë fen. (Luka 23:43) Kolo fe a qaja la paradraiso ne la u elanyi ngöne la fen ka hnyipixe. Nge kola qaja mina fe la pengöne mel ka mingöming e hnengödrai, ngöne “la paradaiso i Akötesie.”—Hna Amamane 2:7.

⁹ Nga pine nemene kö laka Paulo a qaja ka hape, “denge hë angeice la ite tenge ewekë ka tha nyine qaja, lo ka tha ijiji ate troa qaja”? Pine laka, ame ngöne la ijine cili, thatreine kö angeice qejepengöne la itre ewekë ka mingöming hnei angeice hna meköle goeën. Ngo Iehova hë a aijijë së enehila troa qaja kowe la nöjei atr la itre manathithi ka eje thene la nöje i Nyidrë!

10. Pine nemene matre tha ceitu kö la ēnē ne la u memine la paradraiso ne la u?

¹⁰ Hne së hë hna ithanatane lapane la paradraiso ne la u, ngo nemene la aliene ej? Kola qaja la tingetinge me cas hnei Akötresie hna hamë së e hnine la organizasio i Nyidrë. Haawe, tha ceitu kö la paradraiso ne la u memine la ēnē ne la u. Ame la ēnē ne la u, tre, ewekë hna acil hnei Akötresie thatraqane la hmi ka wië. Ame la paradraiso ne la u, ej a amamane hnyawa la itre nyipi hlue i Akötresie hnine la ēnē ne la u.—Malaki 3:18.

11. Nemene la hnei Iehova hna aijijë së troa hane kuca enehila?

¹¹ Nyine haine laka, qaane lo 1919, hnei Iehova hna aijijëne la itre atr ka tha pexeje kö troa huliwane la paradraiso ne la u, me acatrene me akökötren ej. Epuni kö a hane ixatua ngöne la huliwa celë? Madrine kö epuni troa ce huliwa me Iehova matre troa atrunyi Nyidrë e celë fen?

12. Easa atre tune kaa ka hape, eatre hnyawa ha la hna qaja ngöne Isaia 60:17? (Wange ju la pane iatr.)

¹² Hna ahnithe amë hnei Isaia perofeta la itre ewekë ka lolo hna troa saze ngöne la igötranen ne la organizasio i Iehova ka ej e celë fen. (E jë la Isaia 60:17.) Ame la itre thöth, me itre ka xötrei lö ngöne la hmi, tre, angatre hi a hane e maine drenge la itre aqane saze ekö la itre ewekë. Ngo, nyimutre catre kö la itre trejin, trahmanyi me föe ka melëne hnyawa ekö la itre ewekë cili. Xecie hnyawa kowe la itre hlue cili laka, Akötresieti a xometrongëne la organizasio i Nyidrë jëne Iesu lo Joxu së! Ame la easa drenge la angatr a qaja la hnei angatre hna melën, kola acatrene la lapaune së memine la mejiune së koi Iehova.

13. Tune la hna qaja ngöne Salamo 48:12-14, nemene la nyine tro sa kuca?

¹³ Nyipi ewekë tro asë hi la itre hlue i Iehova a hane qaja kowe la itre xan la  pengöne la organizasio i Nyidrë. Ketre iamamanyikeu ka tru la hne së hna melën enehila ngöne la fene i Satana! Cas nge tingetinge la itre hlue i Akötresieti e cailo fen. Nyipi ewekë tro sa qaja cememine la madrine “kowe la xöte hnapin [maine thupe së]” la pengöne la organizasio i Iehova, memine la paradraiso ne la u!—E jë la Salamo 48:12-14.

14, 15. Nemene la itre hna xome amekötine thupene lo 1970, nge nemene la aqane kepe thangane hnene la organizasio?

¹⁴ Ala nyimu la itre trejine ka qatre hë hnine la ekalesia ka hane melëne la itre ewekë hna saze ka alolone la igötranene la organizasio i Iehova ka ej e celë fen. Mekune pala kö angatr lo ijine kola xomiujine la ekalesia hnene hi la ca atre thupën, ngo tha ca lapa ne la itre qatre thup petre kö, maine pena kola xomiujine la nöje hnene la ca atre thupën, ngo tha Komite Ne Filial petre kö, maine kola xomiujine la huliwa e cailo fen hnene la ca perezida ne la sasaiatri, ngo tha Lapa Ne Xomi Meköt petre kö. Ngacama ame petre kö ekö, ke hetre itre trejin ka xatuane lai atre thupën, ngo ala casi hi la ka axecië mekun ngöne la itre ekalesia, maine ngöne la itre filial, maine ngöne la hnalapa ne xomi meköt. Thupene hë lo 1970, hetre itre hna saze hë, matre lapa ne la itre qatre thup pena ha la ka axecië mekun thatraqane la ekalesia, ngo tha ca atre thupën hmaca kö.

¹⁵ Pine nemene matre ka hetre thangane kowe la organizasio la itre hna xome  amekötine celë? Pine laka, hna nyitrepene itre ej hnene la hna trotrohnine hnyawa la Tusi Hmitrötr. Kola kepe eloine hnene la organizasio qa ngöne la itre thiina ka lolo ka mama thene la itre qatre thup asë, kolo “itre atr nyine ahnahna” hna hamën hnei Iehova. Celë hi matre, tha ala cas hmaca kö la ka amekötin.—Efeso 4:8, MN; Ite Edomë 24:6.

16, 17. Nemene la itre ewekë hna hnyipi saze ka ketri epun, nge pine nemen?

¹⁶ Pane mekune jë la itre ewekë hna hnyipi saze göi itre itusi së. Ame ngöne la hna cainöje trootro, tru la madrine së troa tro fë la itre itusi së ka ketre la hni ne la itre atr me xatua angatr. Mekune ju fe la aqane huliwane së la itre jia ne huliwa ka hnyipixe matre troa cainöjëne la maca ka loi. Ka tune la sit së jw.org ka ketr la itre atr ka ala nyimu matre tro angatr a hane kapa la ixatua ka ijij. Ame ngöne la nöjei hna saze ka hnyipixe cili, kola mama hnyawa la etrune la aqane nyipiewekëne Iehova la itre atr, me ejuine la ihnimi Nyidrë koi angatr.

¹⁷ Easa fe a madrine la itre ewekë hna saze göne la itre icasikeu së matre hetre traeme së troa kuca la hmi hnepe lapa, maine göi troa isa ini Tusi cas. Ketre, hetre madrine së fe qa ngöne la itre hna saze göi itre asabele së. Kösë kolo pala hi a lolo catr e nöjei macatre! Hetre ole së fe kowe la aqane hamë ini hne së hna kapa jëne la itre ini ka nyimutre hna hnëkëne hnene la organizasio. Ame ngöne la nöjei hna saze ka hnyipixe cili, kola mama hnyawa ka  hape, Iehova a xomiujine la organizasio i Nyidrë, nge Nyidrëti pala hi a nyidrawane matre lolo la paradraiso ne la u!

18, 19. Nemene la aqane tro sa ixatua matre lolo la paradraiso ne la u?

¹⁸ Iehova la Atre hamë së la hnëqa ne ixatua matre lolo la paradraiso ne la u. Ngo nemene la aqane tro së lai a ixatua? Ene la troa cainöjëne la maca ka loi ne la Baselaia, me inine la itre atr matre tro angatr a nyihlue i Iehova. Ame la easa xatuane la ketre atr troa nyihlue i Iehova, easë hi lai a ixatua göi troa kökötre la paradraiso ne la u.—Isaia 26:15; 54:2.

¹⁹ Ketre, ame la easa catre huliwa troa alolone la itre thiina së, ketre ixatua së hi lai matre troa alolone la paradraiso ne la u. Aqane tro hi së lai a ea la itre atr kowe la paradraiso ne la u. Eje hi laka, tha hnene kö la etrune la aqane atre së la Tusi Hmitrötr la ka troa ea la itre atr kowe la organizasio, me koi Iehova, me Iesu, ngo hnene la thiina së ka wië.

20. Tune la hna qaja ngöne Ite Edomë 14:35, nemene la aja ka troa catre e kuhu hni së?

²⁰ Eje hi laka, tru la madrine i Iehova me Iesu la nyidroti a goeëne la elolone la paradraiso ne la u enehila. Ame la madrine hne së hna melëne enehila qa ngöne la hne së hna ixatua alolone ej, tre, ka co catre hi lai hune la madrine nyine tro sa kapa elany e nyidrawane jë së la ihnadro matre paradraiso asë pi. Loi e tro sa mekune hmaca la hna qaja ngöne Ite Edomë 14:35, kola hape: “Ame la hlue ka inamacan, te, hna hnime hnei joxu.” Inamacane pi së me huliwa catre matre alolone la paradraiso ne la u!