1, 2. Sa Hebreong Kasulatan, sa ano mapatuhoy ang termino nga “palatungan sang tiil”?

NAGAKAIGO gid nga nagsiling si Jehova nga Dios: “Ang langit amo ang akon trono, kag ang duta amo ang palatungan sang akon mga tiil.” (Isa. 66:1) Parte sa ‘palatungan sang iya mga tiil,’ nagsiling man sia: “Himayaon ko ang duog sang akon tiilan.” (Isa. 60:13) Paano niya ini ginahimo? Kag ano ang buot silingon sini sa aton, kay nagakabuhi kita sa ‘palatungan sang mga tiil’ sang Dios?

² Sa Hebreong Kasulatan, ang termino nga “palatungan sang tiil” wala lamang nagapatuhoy sa duta kundi nagalaragway man sa templo sang una nga ginagamit anay sang mga Israelinhon. (1 Cron. 28:2; Sal. 132:7) Ini nga templo sa duta amo ang nangin sentro sang matuod nga pagsimba. Amo kon ngaa matahom gid ini sa panulok ni Jehova kag ginahimaya sini mismo ang duog sang tiilan ni Jehova.

3. Ano ang dakung espirituwal nga templo sang Dios, kag san-o ini nagsugod?

³ Subong, wala na sa literal nga templo sa duta ang sentro sang matuod nga pagsimba. Pero, may espirituwal nga templo, nga nagahimaya kay Jehova labaw sa bisan ano nga bilding. Isa ini ka kahimusan, nga nagpaposible nga makapasag-uli sa Dios  paagi sa pagkasaserdote kag halad ni Jesucristo. Nagsugod ini sang 29 C.E. sang ginbawtismuhan si Jesus kag ginhaplasan subong Mataas nga Saserdote sang dakung espirituwal nga templo ni Jehova.—Heb. 9:11, 12.

4, 5. (a) Paano ginalaragway sang Salmo 99 ang hanuot nga handum sang matuod nga mga sumilimba ni Jehova? (b) Ano nga pamangkot ang dapat naton ipamangkot sa aton kaugalingon?

⁴ Bilang pag-apresyar sa kahimusan sang espirituwal nga templo, ginadayaw naton si Jehova paagi sa pagpakilala sang iya ngalan kag ginadayaw man naton sia bangod sang iya maluluy-on nga aman nga gawad. Makalilipay gid mahibaluan nga sobra sa walo ka milyon ka matuod nga Cristiano ang nagahimaya kay Jehova! Indi pareho sang pila ka relihioso nga tawo nga sayop nga nagahunahuna nga madayaw nila ang Dios kon makapalangit na sila, ang tanan nga Saksi ni Jehova nakahibalo nga dapat nila sia dayawon subong diri sa duta.

⁵ Gani ginasunod naton ang halimbawa sang matutom nga mga alagad ni Jehova nga ginlaragway sa Salmo 99:1-3, 5. (Basaha.) Subong sang ginapakita sini, sanday Moises, Aaron, kag Samuel nagsakdag gid sa kahimusan sang matuod nga pagsimba sang ila tion. (Sal. 99:6, 7) Antes mangin mga saserdote upod kay Jesus sa langit ang nabilin niya nga hinaplas nga mga utod, matutom sila nga nagaalagad subong sa dutan-on nga luwang sang espirituwal nga templo. Matutom sila nga ginasakdag sang minilyon ka “iban nga mga karnero.” (Juan 10:16) Bisan tuhay ang ila paglaum, nahiusa ining duha ka grupo sa pagsimba kay Jehova diri sa palatungan sang tiil sang Dios. Pero subong mga indibiduwal, dapat naton pamangkuton ang aton kaugalingon, ‘Ginasakdag ko gid bala ang kahimusan ni Jehova para sa putli nga pagsimba?’

6, 7. Ano nga problema ang nag-utwas sa mga Cristiano sang una, kag ano ang dapat himuon mga siniglo sang ulihi?

⁶ Wala pa isa ka gatos ka tuig pagkatapos matukod ang Cristianong kongregasyon, nagsugod na ang gintagna nga apostasya. (Binu. 20:28-30; 2 Tes. 2:3,4) Pagkatapos sini, mabudlay na gid makilala kon sin-o ang matuod nga nagaalagad sa Dios sa iya espirituwal nga templo. Mga siniglo pa sang ulihi nga ginpakilala sila ni Jehova paagi sa iya bag-o gintangdo nga Hari, si Jesucristo.

⁷ Sang 1919, nakilala gid kon sin-o ang ginbaton ni Jehova kag ang nagaalagad sa iya espirituwal nga templo. Gintinluan sila sa espirituwal para labi pa gid nga kahamut-an sang Dios ang ila pag-alagad. (Isa. 4:2, 3; Mal. 3:1-4) Natuman sa pila ka paagi ang nakita ni apostol Pablo sa palanan-awon mga siniglo na ang nagligad.

8, 9. Ipaathag ang tatlo ka aspekto sang “paraiso” nga nakita ni Pablo sa palanan-awon.

⁸ Ginlaragway ang palanan-awon ni Pablo sa 2 Corinto 12:1-4. (Basaha.) Ang iya labaw sa kinaugali nga palanan-awon gintawag nga bugna. Nagalakip ini sang isa ka hitabo sa palaabuton, indi sa iya tion. Sang “ginsabnit [si Pablo] pakadto sa ikatlo nga langit,” ano nga “paraiso” ang iya nakita? Ang paraiso nga ginsambit niya may pisikal, espirituwal, kag langitnon nga katumanan, nga dungan nga magaluntad sa palaabuton. Mahimo ini magpatuhoy sa pisikal nga Paraiso sa duta nga magaabot pa. (Luc. 23:43) Mahimo man ini magpatuhoy sa espirituwal nga paraiso nga maeksperiensiahan sing bug-os sa bag-ong kalibutan. Dugang pa, mahimo ini magpatuhoy sa matahom nga kahimtangan sa langit “sa paraiso sang Dios.”—Bug. 2:7.

⁹ Pero ngaa nagsiling si Pablo nga “nakabati sia sang mga pulong nga indi tugot nga  ihambal sang tawo”? Indi pa sadto ang tion nga ipaathag niya ang dalayawon nga mga butang nga nakita niya sa palanan-awon. Pero tugot na subong ihambal ang mga pagpakamaayo nga naeksperiensiahan sang katawhan sang Dios!

10. Ngaa indi pareho ang mga termino nga “espirituwal nga paraiso” kag “espirituwal nga templo”?

¹⁰ Ang ekspresyon nga “espirituwal nga paraiso” nangin bahin na sang aton teokratiko nga bokabularyo. Ginalaragway sini ang aton pinasahi nga espirituwal nga kahimtangan nga nagatugot sa aton nga matigayon ang paghidait upod sa Dios kag sa aton mga kauturan. Siempre, indi kita dapat maghinakop nga pareho lang ang “espirituwal nga paraiso” kag “espirituwal nga templo.” Ang espirituwal nga templo amo ang kahimusan sang Dios para sa matuod nga pagsimba. Ang espirituwal nga paraiso maathag nga nagapakilala kon sin-o ang ginabaton sang Dios kag ang nagaalagad sa iya espirituwal nga templo subong.—Mal. 3:18.

11. Ano ang aton pribilehiyo subong parte sa espirituwal nga paraiso?

¹¹ Makalilipay gid mahibaluan nga sugod sang 1919, gintugutan ni Jehova nga magpangabudlay upod sa iya ang indi himpit nga mga tawo sa pagpalambo, pagpalig-on, kag pagpasangkad sang espirituwal nga paraiso sa duta! Nagapakigbahin ka bala sa sining dalayawon nga hilikuton? Napahulag ka bala nga magpadayon sa pagpangabudlay upod kay Jehova para himayaon ‘ang duog sang iya tiilan’?

12. Ngaa nagasalig kita nga natuman ang Isaias 60:17? (Tan-awa ang piktyur sa umpisa sini nga artikulo.)

¹² Ang isa ka dalayawon nga pagbag-o may kaangtanan sa dutan-on nga bahin sang organisasyon ni Jehova gintagna sa Isaias 60:17. (Basaha.) Ang mga lamharon ukon bag-o pa lang sa kamatuoran nakabasa sang mga pamatuod sining pagbag-o ukon nakabati sini sa iban. Pero pribilehiyo gid sang mga kauturan nga nakaeksperiensia sini! Indi katingalahan nga kumbinsido sila nga ginatuytuyan ni Jehova ang Iya organisasyon paagi sa iya gintangdo nga Hari! Nahibaluan nila nga may basihan ang ila pagsalig, pareho man sang aton pagsalig. Magabakod ang imo pagtuo kag pagsalig kay Jehova kon mabatian mo ang ila mga eksperiensia.

13. Ano ang aton obligasyon suno sa Salmo 48:12-14?

¹³ Bisan ano na kita kadugay sa kamatuoran, dapat naton isugid sa iban ang parte sa organisasyon ni Jehova. Isa gid ka moderno nga milagro ang espirituwal nga paraiso sa sining malaut, mahigko, kag wala sing gugma nga kalibutan! Ang pagkadalayawon sang organisasyon ni Jehova, ukon sang “Sion,” kag ang kamatuoran parte sa espirituwal nga paraiso dapat malipayon nga isugid “sa palaabuton nga kaliwatan.”—Basaha ang Salmo 48:12-14.

14, 15. Ano nga mga pagbag-o sa organisasyon ang natabo sang katuigan 1970, kag paano ini nangin mapuslanon?

¹⁴ Sa pagligad sang mga tinuig, ang mga tigulang sa tunga naton nakaeksperiensia mismo sang pila ka pagbag-o sa organisasyon nga nagpatahom pa gid sang dutan-on nga bahin sang organisasyon ni Jehova. Nadumduman nila nga ang mga kongregasyon sadto may congregation servant sa baylo sang hubon sang mga gulang, ang mga pungsod may branch servant sa baylo sang Branch Committee, kag ang panuytoy ginahatag anay sang presidente sang Watch Tower Society sa baylo sang Nagadumala nga Hubon sang mga Saksi ni Jehova. Bisan pa ang tanan sining dedikado nga mga utod ginsakdag sang matutom nga mga kabulig, isa lang ka tawo  sadto ang responsable sa paghimo sing mga desisyon sa mga kongregasyon, sa mga sanga talatapan, kag sa ulong talatapan. Sang katuigan 1970, ginhimo ang mga pagbag-o para ang mga grupo sang mga gulang ang may responsibilidad sa pagdumala sa baylo nga mga indibiduwal.

¹⁵ Nangin mapuslanon bala ini nga mga pagbag-o? Huo, kag makatarunganon ini. Ngaa? Bangod nabase ini nga mga pagbag-o sa nag-uswag nga ihibalo sa Kasulatan. Sa baylo nga isa lang ang nagadumala, nakabenepisyo ang organisasyon sa gintingob nga maayong mga kinaiya sang tanan nga “dulot nga mga lalaki” nga gin-aman ni Jehova.—Efe. 4:8; Hulu. 24:6.

16, 17. Ano nga mga pagbag-o sining karon lang ang nanamian mo gid, kag ngaa?

¹⁶ Hunahunaa man ang mga pagbag-o sining karon lang, subong sang pagbag-o sa hitsura, kaundan, kag mga pamaagi sa pagpanagtag sang aton mga publikasyon. Nalipay gid kita nga itanyag ang praktikal, makagalanyat, kag matahom nga literatura sa ministeryo! Kag kon gamiton naton ang pinakabag-o nga teknolohiya sa pagpalapnag sang kamatuoran, pareho sang jw.org nga website, ginapakita man naton ang interes ni Jehova sa pag-aman sa tanan nga tawo sang panuytoy nga kinahanglanon gid nila.

¹⁷ Makita man ang kaalam sa pagbag-o nga may ara na kita Pangpamilya nga Pagsimba ukon dugang nga tion sa personal nga pagtuon. Ginaapresyar man naton ang pag-uswag sang mga programa sang mga asembleya kag kombension. Pirme kita nagasiling nga naganami pa gid ini kada tuig! Kag pat-od gid nga nalipay kita sa dugang nga paghanas halin sa madamo nga teokratikong eskwelahan. Maathag gid ang pagtuytoy ni Jehova sa sining tanan nga pagbag-o. Amat-amat niya nga gina patahom pa gid ang iya organisasyon kag ang aton espirituwal nga paraiso subong!

18, 19. Paano kita makabulig sa pagpatahom sa espirituwal nga paraiso?

¹⁸ Isa ka kadungganan nga gintugutan kita ni Jehova nga makabulig sa pagpatahom sa aton espirituwal nga paraiso. Ginahimo naton ini paagi sa makugi nga pagbantala sang maayong balita sang Ginharian kag sa pagtudlo sa madamo pa agod mangin disipulo. Sa kada tion nga may mabuligan kita nga magdedikar bilang Cristiano, napasangkad naton ang espirituwal nga paraiso.—Isa. 26:15; 54:2.

¹⁹ Mapatahom pa gid naton ang aton espirituwal nga paraiso paagi sa padayon nga pagpauswag sang aton Cristianong personalidad. Sa sini nga paagi, mangin makagalanyat pa gid ini nga paraiso sa mga tumalan-aw. Sa masami, indi lang ang aton nahibaluan sa Biblia kundi ang aton matinlo kag mahidaiton nga paggawi ang makaganyat sa mga tawo sa organisasyon kag dayon sa Dios kag sa Cristo.

20. Suno sa Hulubaton 14:35, ano dapat ang aton handum?

²⁰ Nalipay gid si Jehova kag si Jesus sa pagtan-aw sa aton matahom nga espirituwal nga paraiso subong! Ang kalipay naton sa pagbulig sa pagpatahom sini halimbawa lamang sang kalipay naton sa ulihi sa pagbulig nga himuon nga literal nga paraiso ang duta. Dumdumon naton ang ginasiling sa Hulubaton 14:35: “Nagakalipay ang hari sa suluguon nga nagagawi sing maalamon.” Kabay nga mangin maalamon kita pirme samtang nagapanikasog sa pagpatahom sa espirituwal nga paraiso!