1, 2. Heberu Toretoredia ai, “aena atoa gauna” be dahaka ia laulaulaia?

IEHOVA DIRAVA ia gwau: “Guba be lauegu terona, bona tanobada be lauegu aena atoa gauna.” (Isa. 66:1) Iena “aena atoa gauna” ia herevalaia neganai, ia gwau: “Bona egu aena gabuna ena hairai do lau habadaia.” (Isa. 60:13, BHḡ) Unai be edena bamona ia karaia? Bona ita be iena “aena atoa gauna” dekenai ita noho dainai, unai ena anina be dahaka?

² Danu, Heberu Toretoredia ai inai hereva ‘aena atoa gabuna’ be idaunegai Israela taudia ese idia gaukaralaia dubu helaga ia laulaulaia. (1 Siv. 28:2; Sal. 132:7, BHḡ) Unai dubu be tanobada ai ia noho bona tomadiho momokani idia karaia gabuna. Unai dainai Iehova ena matanai ia be hairai momokani. Unai dubu dainai, Iehova be ena aena atoa gabuna ia hahairaia.

3. Hari tomadiho momokani anina be dahaka? Bona edena negai ia matamaia?

³ To, hari tomadiho momokani be tanobada ai ia noho dubu korikorina ta ia herevalaia lasi. To ia be lauma dubuna, badina unai ese Iehova ia hanamoa. Unai lauma dubu be Dirava ese hahelaga tauna Iesu Keriso bona ia bouboulaia gauna amo ia hegaegaelaia tomadiho dalana. Bona lagani 29 C.E. ai, Iesu  ia bapatiso negana ai Dirava ese ia hegaegaelaia, unai nega ai lauma dubuna lalonai Dirava ese Iesu ia horoa bona Hahelaga Tauna Badana ai ia halaoa.—Heb. 9:11, 12.

4, 5. (a) Edena dala ai Salamo 99 ese Iehova ena tomadiho momokani idia durua taudia ia herevalaia? (b) Ita ta ta dekenai, dahaka henanadai ita henia diba?

⁴ Dirava ese ia hegaegaelaia lauma dubuna ita laloa bada dainai, taunimanima dekenai Dirava ena ladana ita hadibaia. Bona ita ia hebogahisi henia bona mauri davalaia boubouna ia henia dainai ia ita hanamoa. Ita moale badina hari Iehova ena Witnes taudia 8 milioni mai kahana bamona be Iehova ena ladana idia hanamoa noho! Dubu taudia haida idia laloa guba dekenai idia lao neganai, Dirava do idia hanamoa. To, Iehova ena Witnes taudia ibounai idia diba inai tanobada ai bona hari Iehova idia hanamoa be namo.

⁵ Salamo 99:1-3, 5-7 (duahia) be Iehova ena kamonai hesiai taudia ia herevalaia, namona be edia haheitalai ita tohotohoa. Salamo torea tauna ia hahedinaraia, Mose, Arona, bona Samuela be edia negai Iehova ese ia hegaegaelaia tomadiho momokani dalana idia durua. Hari, horoa taudia be Iesu ida guba ai hahelagaia gaukara idia do karaia lasi neganai, idia be tanobada ai Iehova ena lauma dubu helagana dekenai hesiai gaukara helagana idia karaia noho. Bona “mamoe idaudia” taudia milioni momo be idia durua noho. (Ioa. 10:16) Ena be unai orea rua edia helaro be idau, to tanobada, Dirava ena aena atoa gabuna, ai mai lalotamona ida idia gaukara hebou. To, sibona ita nanadaia, ‘Lau be Iehova ese ia hegaegaelaia tomadiho goeva dalana lau durua noho, a?’

6, 7. Keristani taudia ginigunana dekenai dahaka hekwakwanai ia vara? Bona lagani momo murinai dahaka ia vara?

⁶ Keristani kongrigeisen ia matamaia, bena lagani handred ia do abia lasi neganai, idia perovetalaia hegeregerena aposteit karana ia vara matamaia. (Kara 20:28-30; 2 Tes. 2:3, 4) Unai murinai, idia diba lasi daidia be Dirava ena lauma dubuna ai do idia gaukara. Lagani handred momo murinai, Iehova be ena abia hidi King Matamata, Iesu Keriso amo ia hahedinaraia unai taudia be daidia.

⁷ Lagani 1919 ai, Iehova ese iena lauma dubuna ai do idia gaukara taudia ia abia hidi. Edia tomadiho dalanai gau haida idia haidaua, unai amo Iehova ese do ia abia dae. (Isa. 4:2, 3; Mal. 3:1-4) Lagani handred momo gunanai aposetolo Paulo ese ena matahanai ai ia itaia gauna be hari ia guguru noho.

8, 9. Paulo ese ena matahanai lalonai ia itaia Paradaiso ena kahana toi be dahaka?

⁸ Paulo ena matahanai be 2 Korinto 12:1-4 (duahia) ai ita itaia. Paulo be ena matahanai amo hadibaia herevadia ia abia. Bona unai be ena negai do ia vara gauna lasi, to nega vaira ai do ia vara. Dirava ese Paulo be “guba ihatoina dekenai ia abia lao” neganai, ia itaia “paradaiso” be dahaka? Ia be: (1) Tanobada paradaisona, gabeai do ia vara gauna. (Luka 23:43) (2) Dirava ena taunimanima edia noho dalana, unai be nega matamata ai do ia guguru momokani gauna. Bona (3) “Dirava ena paradaiso,” guba ai do ia vara hahenamo ia herevalaia.—Apok. 2:7.

⁹ Dahaka dainai Paulo ia gwau “taunimanima ese idia gwauraia diba lasi herevadia ia kamonai, tau ta be maoro lasi unai hereva  ia gwauraia totona”? Badina unai be nega maorona lasi matahanai ai ia itaia gaudia ia herevalaia totona. To, hari Dirava ena taunimanima ese idia abia hahenamo ita herevalaia diba!

10. Dirava ena taunimanima edia noho be edena bamona, bona lauma dubuna be dahaka?

¹⁰ Nega momo iseda herevahereva lalonai ita gwau ita be Dirava ena taunimanima huanai ita noho dainai, ita be paradaiso ai ita noho bamona. Badina Iehova ese ita ia hadibaia namonamo bona Iehova bona iseda tadikaka huanai maino ia noho. To, lauma dubuna be Dirava ese ia hegaegaelaia tomadiho momokani dalana. Dirava ena lalonamo idia abia taudia sibona be lauma dubuna ai Iehova Dirava idia tomadiho henia noho.—Mal. 3:18.

11. Dirava ena taunimanima huanai ita noho ena hahenamo be dahaka?

¹¹ Lagani 1919 amo Iehova ese goevadae lasi taudia ia abia hidi ia ida idia gaukara totona, unai amo tanobada ai Dirava ena taunimanima edia noho dalana do idia hanamoa bona hagoadaia! Oi be unai gaukara namona oi durua noho, a? Unai ese oi ia hagoadaia, Iehova ida oi gaukara noho bona ena ‘aena gabuna’ oi hahairaia totona, a?

12. Isaia 60:17 ena hereva ia guguru dalana ese edena dala ai oi ia hagoadaia? (Laulau ginigunana herevalaia.)

¹² Iehova ena tanobada oreana ai gau haida idia idau noho karana be Isaia 60:17 (duahia) ese ia perovetalaia. Matamata taudia eiava hari sibona orea lalonai idia vareai taudia be Iehova ena orea ese ia haidaua gaudia be magasin ai idia duahia eiava ma haida amo idia kamonai vadaeni. Tadikaka taihu haida be unai idia itaia, bona ia be hahenamo ta. Unai dainai idia diba momokani Iehova be ia abia hidi King amo Iena orea ia hakaua noho! Idia abia dae, edia abidadama be mai ena badina. Bema edia ekspiriens oi kamonai, unai ese emu abidadama Iehova dekenai ia hagoadaia.

13. Salamo 48:12-14 ena hereva hegeregerena, dahaka ita karaia be namo?

¹³ Keristani taudia momokanidia ibounai ese ma haida dekenai Iehova ena orea idia herevalaia be namo. Ena be ita be Satani ena tanobada lalonai ita noho, to tadikaka oreana lalonai mai maino bona lalotamona ai ita noho be moale gauna! “Siona,” eiava Iehova ena orea ese ia karaia gaudia bona Dirava ena taunimanima edia noho dalana be “gabeai idia vara uru taudia” dekenai mai moale ida do ita herevalaia.—Salamo 48:12-14 duahia.

14, 15. Lagani 1970 lalonai, Iehova ena orea lalonai dahaka gaudia haida idia haidaua?

¹⁴ Orea lalonai idia noho daudau tadikaka taihu momo idia itaia, idia hanaia laganidia lalonai Iehova ena tanobada oreana ese gau haida idia haidaua, unai dala amo ena hairai ia habadaia. Idia laloatao, guna be congregation servant, unai be tadikaka tamona ese kongrigeisen ia naria. Danu, guna branch servant, unai be tadikaka tamona ese brens ia naria. Ma danu, guna Watch Tower Society ena presiden sibona ese disisen ibounai ia karaia. Ena be kongrigeisen bona brens ofesi idia naria tadikaka, bona hedikwota ena presiden be tadikaka haida ese idia durua, to tadikaka tamona sibona ese disisen ibounai ia karaia. Unai dainai lagani 1970 lalonai, unai idia haidaua bona kongrigeisen ai elda oreana idia haginia, brens komiti idia haginia, bona hakaua oreana ese orea ia hakaua matamaia.

¹⁵ Idia haidaua gaudia ese namo ia  havaraia, a? Oibe. Dahaka dainai? Badina Baibel amo idia abia diba hegeregerena unai gaudia idia haidaua. Unai dainai hari tadikaka tamona sibona ese unai maduna ia huaia lasi, to tadikaka ibounai. Idia be Iehova amo ia mai “harihari gaudia bamona,” hari idia ese orea idia gunalaia noho.—Efe. 4:8; Aon. 24:6.

16, 17. Iehova ena orea ese ia haidaua gaudia haida dekenai edena oi moalelaia bada, bona dahaka dainai?

¹⁶ Mani oi laloa, hari iseda buka bona magasin edia toana, idia torea herevadia, bona ita hariharilaia daladia be namo herea. Iseda magasin be taunimanima durua dalana ai idia torea bona ena toana be namo herea, unai dainai haroro gaukara ai ita hariharilaia be moale gauna. Bona hari ita be kompiuta ita gaukaralaia diba sivarai namona ita harorolaia totona. Hegeregere, hereva momokani ita halasia totona jw.org websait ita gaukaralaia, unai amo ita hahedinaraia ita ura Iehova ena ura ita karaia bona taunimanima ita durua Baibel ena hakaua herevadia idia dibaia totona.

¹⁷ Ma danu iseda hebou daladia haida idia haidaua, unai amo nega ia noho ruma bese ena tomadiho o sibona emu stadi oi karaia totona. Danu iseda hebouhebou maragidia bona badadia dekenai gau haida idia haidaua karana ita moalelaia. Nega momo ita gwau, lagani ta ta ai iseda hebouhebou be idia namo idia lao noho! Bona ita moale bada badina iseda orea ese sikuli momo idia hegaegaelaia ita idia durua totona. Idia haidaua gaudia ese idia hahedinaraia, Iehova be iena orea ia hanamoa noho. Hanaihanai Ia ese iena orea ena hairai ia habadaia noho bona iseda tadikaka huanai ia noho maino ia hanamoa noho!

18, 19. Edena dala ai Dirava ena taunimanima edia noho dalana ita hahairaia diba?

¹⁸ Iehova ese ita ia gaukaralaia ena taunimanima edia noho dalana ita hahairaia totona be hahenamo badana ta. Unai ita karaia dalana be Basileia ena sivarai namona ita harorolaia bona taunimanima be hahediba taudia ai ita halaoa. Bema ta ita durua ela bona Dirava dekenai ena mauri ia gwauhamatalaia, ita be Dirava ena taunimanima huanai ia noho maino ita durua unai.—Isa. 26:15; 54:2.

¹⁹ Ma danu, bema iseda Keristani kara namodia ita hanamoa noho, ita be Dirava ena taunimanima huanai ia noho maino ita durua noho. Unai amo taunimanima do idia itaia Dirava ena taunimanima edia noho dalana be namo herea. Iseda diba Baibel dekenai ese taunimanima edia lalona ia veria lasi, to nega momo iseda manau bona kara namodia dainai taunimanima be orea lalonai idia vareai bena Dirava bona Keriso idia abia dae.

20. Aonega Herevadia 14:35 hegeregerena, iseda ura gauna be dahaka?

²⁰ Iehova bona Iesu be idia moale bada badina hari Dirava ena taunimanima edia noho dalana ena hairai ia bada ia lao! Hari, Dirava ena taunimanima edia noho dalana ena hairai ita itaia neganai, ita moale, unai ese ia hahedinaraia vaira negana ai tanobada be paradaiso ai ia lao neganai, do ita moale bada herea. Aonega Herevadia 14:35 ena hereva ita laloa, ia gwau: “Iena hesiai tauna be mai ena aonega neganai, king ese ia do ia laloa namo henia.” Unai dainai Dirava ena taunimanima edia noho dalana ita hahairaia totona, namona be mai aonega ida ita gaukara!