1, 2. Mu Binembelo bya Kihebelu, byambo bya kuba’mba ‘jitebe po anyanta maulu’ bilumbulula ka?

YEHOBA LESA waamba’mba: “Mwiulu jo jitanda jami ne ntanda jo jitebe po nyanta maulu ami.” (Isa. 66:1) Kabiji waambile ne pa jonka jino ‘jitebe po anyanta maulu’ anji, amba: “Nkatumbijika mpunzha pa kunyanta maulu ami.” (Isa. 60:13) Pano utumbijika byepi ino mpunzha? Nanchi kino kilumbulula ka ku bekala pa ‘jitebe po anyanta maulu’ anji, ko kuba’mba pano pa ntanda?

² Byambo bya kuba’mba ‘jitebe pa kunyanta maulu’ bilumbulula ntanda, kabiji mu Binembelo bya Kihebelu bebingijisha ne pa kulumbulula nzubo ya Lesa mwapopwelanga bena Isalela ba kala. (1 Moba 28:2; Sala. 132:7) Ino nzubo ya Lesa yo yajinga mpunzha ya mpopwelo ya kine pano pa ntanda. Onkao mambo, Yehoba wiinemekele bingi. Kabiji na mambo a kuba yajinga pano pa ntanda, yatumbijikanga panyanta Yehoba maulu anji.

3. Nga nzubo ya Lesa ya ku mupashi ilumbulula ka, kabiji yatendekele ñanyi kimye?

³ Pano nga mpunzha ya mpopwelo ya kine lelo jino yo yepi? Kechi kishimikwa kiji byonka byajinga nzubo ya Lesa pano pa ntanda ne. Bino ke nzubo ya Lesa ya ku mupashi, kabiji itumbijika Yehoba kukila byakonsha kumutumbijika kishimikwa kiji kyonse. Pano ino nzubo ya Lesa ya ku mupashi ilumbulula ka?  Ke lunengezho lwa Lesa lulengela bantu kwikala balunda nanji ne kumupopwela. Luno lunengezho lwaikeleko na mambo a bukuzhi bwa kwa Yesu. Kabiji lwatendekele mu mwaka wa 29 C.E., kimye Yesu kyo abatizhiwe ne kushingwa ne kwikala ke Ñanga Mukatampe wa nzubo ya Yehoba ya ku mupashi.—Hebe. 9:11, 12.

4, 5. (a) Kwesakana na byaamba Salamo 99, bapopweshi ba Yehoba bakebesha kuba ka? (b) Ñanyi bwipuzho bo twafwainwa kwiipuzha atweba bene?

⁴ Pa kumwesha kuba’mba tusanta pa lunengezho lwa nzubo ya Lesa ya ku mupashi, tutumbijika Yehoba kupichila mu kuyukisha jizhina janji ku bantu ne kumutakaika pa lunengezho lwa bukuzhi mumwekela lusa lwanji. Kituletela bingi lusekelo pa kuyuka kuba’mba bena Kilishitu ba kine kukila pa 8 milyonyi babena kutumbijika Yehoba lelo jino. Bapusanako na bapopweshi bamo balanguluka kuba’mba bakatumbijika Lesa inge baya mwiulu. Bakamonyi ba kwa Yehoba bonse bayuka’mba bafwainwa kumutumbijika lonka luno kabiji ponka pano pa ntanda.

⁵ Onkao mambo, tulondela byaubanga bakalume ba Yehoba bakishinka baambiwapo mu Salamo 99:1-3, 5. (Tangai.) Byonka byaamba uno salamo, Mosesa, Alona ne Samwela batundaikile bingi mpopwelo ya kine. (Sala. 99:6, 7) Saka bakyangye kuya mwiulu na kwingila mwingilo wa buñanga pamo ne Yesu, bashingwa bashalapo bengila mu kipango kya pano pa ntanda kya nzubo ya Lesa ya ku mupashi mu bukishinka. “Mikooko ikwabo” nayo ibatundaika mu bukishinka. (Yoa. 10:16) Nangwa kya kuba baji na luketekelo lwapusana, bonse bakwatankena pamo mu kupopwela Yehoba pano pa ntanda, ko kuba’mba pa jitebe po anyanta maulu Lesa. Pano bino, atweba bonse pa muntu pa muntu twafwainwa kwiipuzha amba, ‘Nanchi ntundaika lunengezho lwa Yehoba lwa mpopwelo ya kine nyi?’

6, 7. Ñanyi lukatazho lwajinga na bena Kilishitu batanshi? Kabiji ñanyi kintu kyaubiwe pakachi ka mwaka wa 1914 ne 1919?

⁶ Saka pakyangye kupita myaka 100 kufuma palengejilwe kipwilo kya bwina Kilishitu, busantuki bo baambijile jimo bwatendekele kumweka. (Byu. 20:28-30; 2 Tesa. 2:3, 4) Mu kuya kwa kimye, kyakatezhe bingi kuyuka bapopweshi ba Lesa bakine. Panyuma ya kupitapo myaka yavula, Yehoba kupichila mwi Mfumu Yesu Kilishitu po po ayukanyikishe bantu bamwingijila mu nzubo ya Lesa ya ku mupashi.

⁷ Byo kyafikilenga mu 1919, bonse baitabijilwe kwi Yehoba kabiji bamwingijilenga mu nzubo ya Lesa ya ku mupashi bayukanyikilwe. Bebatokesheshe pa kuba’mba mwingilo wabo etabilwe kwi Lesa. (Isa. 4:2, 3; Mala. 3:1-4) Kimwesho kyamwene mutumwa Paulo kala kyatendekele kufika pachepache.

8, 9. Nga “paladisa” wamwene Paulo mu kimwesho ulumbulula ka?

⁸ Kimwesho kyamwene Paulo bekilumbulula mu 2 Kolinda 12:1-4. (Tangai.) Mu kino kimwesho Yehoba wamwesheshe Paulo bintu bikamweka kulutwe. Nga “paladisa” wamwene Paulo ulumbulula ka? Kitanshi, uno paladisa wakonsha kulumbulula Paladisa ukekalako pano pa ntanda. (Luka 23:43) Kya bubiji, wakonsha kulumbulula paladisa walumbuluka wa ku mupashi mu ntanda ipya. Kabiji kya busatu, wakonsha kulumbulula bwikalo bwawama buji mwiulu mu “paladisa wa Lesa.”—Lum. 2:7.

⁹ Pano mambo ka Paulo o aambijile kuba’mba “waumvwine byambo byo bakonsha kubula kwamba kabiji byo babula kuswisha  muntu kwamba”? Kimye kechi kyafikile kya kuba’mba alumbulule byo amwene mu kyo kya kimwesho ne. Pano luno kijitu bulongo kwamba bintu byawama bibena kwiyowa bantu ba Lesa.

10. Nanchi paladisa wa ku mupashi ne nzubo ya Lesa ya ku mupashi byaesakana nyi? Lumbululai.

¹⁰ Byambo bya kuba’mba “paladisa wa ku mupashi” twibingijisha bingi. Paladisa wa ku mupashi ulumbulula bwikalo bwa mutende Lesa bo apa bantu banji bwibalengela kwikala mutende na Lesa ne na bakwabo ba mu lwitabilo. Pano bino, “paladisa wa ku mupashi” ne “nzubo ya Lesa ya ku mupashi” byapusana. Nzubo ya Lesa ya ku mupashi ke lunengezho lwa Lesa lwa mpopwelo ya kine. Paladisa wa ku mupashi witukwasha kuyuka boba baitabilwa kwi Lesa bamupopwela pa nzubo ya Lesa ya ku mupashi.—Mala. 3:18.

11. Ñanyi jishuko jo tuji najo na mambo a paladisa wa ku mupashi?

¹¹ Kileta bingi lusekelo pa kuyuka kuba’mba kufumatu mu 1919, Yehoba waswisha bantu bambulwakulumbuluka kwingijila pamo ne aye mu kulenga paladisa wa ku mupashi pano pa ntanda, kumukosesha ne kumubaisha. Nanchi ne anweba mubena kwingilako uno mwingilo wanema nyi? Nanchi mwanemeka jishuko ja kwingijila pamo ne Yehoba mu kutumbijika ‘mpunzha po anyanta maulu anji’ nyi?

12. Twayuka byepi amba kinembelo kya Isaya 60:17 kyafika? (Monai kipikichala kitanshi.)

¹² Ngauzhi Isaya waambijile jimo kuba’mba kukobiwa lupimpu mu lubaji lwa pano pa ntanda lwa jibumba ja Yehoba. (Tangai Isaya 60:17.) Aba bakiji banyike nangwa bakatataka mu bukine batanga pa luno lupimpi nangwa kumvwa ku bantu. Pano bino, balongo ne banyenga bemwena luno lupimpu batokwa bingi. Bashiinwa kuba’mba Yehoba ubena kutangijila jibumba janji kupichila mu Mfumu waikajikwa pa jitanda. Bayuka kuba’mba bintu byo baketekelamo bya kine, byonka byo twaketekelamo ne atweba. Kuteleka ku bintu byo bapitamo bano balongo, kwakonsha kukosesha lwitabilo lwetu ne kwitulengela kuketekela mwi Yehoba.

13. Kwesakana na Salamo 48:12-14, ñanyi mwingilo ye tuji nanji?

¹³ Nangwa twaikala moba avula mu bukine nangwa ne, twafwainwa kubulangako bakwetu biji jibumba ja Yehoba. Ke kintu kya kukumya pa kwikala mu mutende na balongo ba mu lwitabilo mu ino ntanda ibi ya kwa Satana. Kikawama bingi kubuulako “bisemi bikeya kulutwe” pa jibumba ja Yehoba, nangwa’mba “Ziona,” ne pa paladisa wa ku mupashi.—Tangai Salamo 48:12-14.

14, 15. Ñanyi lupimpu lwaubiwe mu jibumba jetu mu myaka ya mu ma 1970, kabiji ñanyi bintu byawama byafumamo?

¹⁴ Pa myaka yapitapo, bakikulumpe bo tuji nabo mu bipwilo bemwena bintu byo byapimpulwa mu jibumba jetu byalengela jibumba ja Yehoba pano pa ntanda kuwaminako. Bavuluka kimye bipwilo kyo byatangijilwanga na kalama wa kipwilo, pano luno bibena kutangijilwa na jibumba ja bakulumpe mu kipwilo. Kabiji kala musampi watangijilwanga na kalama wa musampi, pano luno ubena kutangijilwa na Kavoto ka Musampi. Kabiji mu kifulo kya kutangijilwa na Jibumba Jitangijila ja Bakamonyi ba kwa Yehoba, president wa Watch Tower Society ye watangijilanga jibumba ja Bakamonyi bonse. Nangwa kya kuba bano balongo bebakwashangako ku balongo bakwabo bakishinka, bino muntu umo ye wafuukulanga bintu byonse mu kipwilo, pa maofweshi a misampi ne pa ofweshi mukatampe wa ntanda  yonse. Byo kyafikile mu ma 1970, bapimpwile bintu kuba’mba mabumba a bakulumpe mu bipwilo o afwainwa kutangijila mwingilo, kechi muntu uno ne.

¹⁵ Nanchi kuji bintu byawama byafuma mu luno lupimpu nyi? Ee, mwafuma byawama bingi. Twaambila ka bino? Mambo luno lupimpu lwaimenejile pa Binembelo. Kubula kulekela muntu umo kuba’mba atangijilenga, kwalengela jibumba ja Lesa kumwenamo bingi mu byubilo byawama biji na bakulumpe bonse mu bipwilo, Yehoba bo ‘apana kwikala bya bupe.’—Efi. 4:8; Maana 24:6.

16, 17. Ñanyi lupimpu lwaubiwa katataka lo mwatemwa, kabiji mambo ka?

¹⁶ Akilangulukai ne pa lupimpu lwaubiwa katataka, nabiji mwekelo ya mabuku, byambo bijimo, ne mashinda a kusampenyamo mabuku etu. Nanchi mabuku etu awama, amweka bulongo, kabiji amba pa makatazho aji mu ntanda ano moba kechi emuletela lusekelo kimye kyo mupa bantu mu mwingilo nenyi? Kabiji inge twaingijisha bya kulengalenga bya ano moba, nabiji keyala wa jw.org pa kusampanya bukine, tumwesha butemwe Yehoba bo atemwa bantu pa kwibanengezhezha lutangijilo lo bakeba.

¹⁷ Tusanta bingi pa lupimpu lwaubiwe ku kupwila kwetu pa kuba’mba twikalenga na kimye kya Kupopwela kwa Kisemi ne lufunjisho lwa pa bunke. Kabiji tusanta bingi pa lupimpu lwaubiwa mu mitanchi ya kubuñana kwa mwanzo ne kushonkena kwa kijiiji. Kimye kyonse twamba’mba kubuñana ne kushonkena kubena kuyatu na kuwaminako pa mwaka pa mwaka. Kabiji tusanta bingi pa masukulu avula aji mu jibumba jetu. Luno lupimpu lonse lwaubiwa lubena kumwesha’mba Yehoba ye ubena kutangijila  jibumba janji. Kabiji watwajijila kuwamisha jibumba janji ne paladisa wa ku mupashi kabiji tubena kumwenamo bingi.

18, 19. Twakonsha kulengela byepi paladisa wa ku mupashi kuwama?

¹⁸ Yehoba witunemeka bingi pa kwitupa mwingilo wa kuwamisha paladisa wetu wa ku mupashi. Tuba bino kupichila mu kusapwila mambo awama a Bufumu na mukoyo ne kulenga baana ba bwanga. Kimye kyonse kyo twakwasha muntu kwikala mwina Kilishitu wipana, ko kuba’mba tubena kubayisha paladisa wa ku mupashi.—Isa. 26:15; 54:2.

¹⁹ Kabiji twakonsha kuwamisha paladisa wa ku mupashi kupichila mu kuwamisha byubilo byetu byo tuji bena Kilishitu. Inge twauba bino, ko kuba’mba tubena kulengela uno paladisa kuwama ku bantu. Javula kilengela bantu kwiya mu jibumba jetu ne kufwenya kwipi ne Yehoba ne Yesu, ke kumona byubilo byawama mwi atweba, kechi na mambotu a kuba’mba twafunda Baibolo ne.

20. Byonka byaamba Byambo bya Maana 14:35, ñanyi kintu kyo tukebesha kuba?

²⁰ Yehoba ne Yesu bomvwa bingi bulongo inge bamona paladisa wetu wa ku mupashi byo awama. Lusekelo lo tuji nalo pa kuwamisha uno paladisa, lumwesha lusekelo lukatampe lo tukekala nalo byo tukawamishanga ino ntanda kwikala paladisa. Twayai tulangulukenga pa byambo biji mu Byambo bya Maana 14:35 bya kuba’mba: “Mfumu utemwa kalume uba bintu na maana.” Twayai atweba bonse tubenga bintu na maana byo tubena kwingila na ngovu kuwamisha paladisa wa ku mupashi.