1, 2. O yaula maHibuluilaŋ o Baabuiyo niŋ, yɛɛ naa kɛsiaa ŋpeluaa sim yɛ lewundu?

CHƐHOWA MƐLƐKA dimi aa, “Choo choo kpeŋgbei ni lemasaa cho ni. Chieeŋndo ndu cho machuaa naa niaa kɛsiaa ŋpeluaa.” (Ais. 66:1, NW) Mi Mɛlɛka dimi vɛlɛ a naa nduaa ‘kɛsiaa ŋpeluaa’ haa okɔɔ aa, “I tosa niŋ mi fondaa hoo sɔla bɛɛleŋ tau tau.” (Ais. 60:13, NW) Vɛɛ o cho yɛ hei tosaa? Nduyɛ, yɛɛ hoo cho yɛ naa dimullo mɛɛ naŋ cho achal o naa nduaa ‘kɛsiaa ŋpeluaa’ yɛ?

² O fulawɔ ko bɛɛ o chieeŋndo veeloo aa naa kɛsiaa ŋpeluaa kɔɔli, Baabuiyo soliŋ vɛlɛ diomndo hoo kpeku o yaula maHibuluilaŋ niŋ le maaŋ Isɔluɛiya ndaa piɛi Mɛlɛka sindɛ wo. (Chon. 132:7, NW; 1 Kolo. 28:2) O chieeŋndo choo maando hoo wa ni. Nduyɛ, o ndu niŋ waŋnda kpou ndaa piɛi Mɛlɛka o tonyaa choo ni. Le saboo hoo, ndoo naŋ bɔɔ Chɛhowa o hɔl. O dimi niŋ, maando hoo tosa ni mi naa kɛsiaa ŋpeluaa Chɛhowaa sɔla bɛɛleŋ tau tau.

3. Yɛɛ Cho yɛ maaŋ bɛndu Mɛlɛkaa, o wana chi hoo a lehɔl te wo? Nduyɛ, lɔɔ kuɛɛ o kanduŋ yɛ?

³ O hau niŋ, o cho o maaŋ taŋgulaa niŋ te waŋnda o chieeŋndo choo kpou huŋ le Chɛhowa piɛiyo o tonyaa choo le. Wana chi maando hoo hau a lehɔl te kani, o cho chiɛi yɔŋaa hoo le o cho  le. Kɛ, o cho hau Chɛhowa bɛɛleŋ kioo tau tau mbo hiau taŋgul suu o suu. Maando hoo sim le kɛɛsiaa tosaŋ le mi naaŋaŋndo miiŋgu Chɛhowa tɛɛŋ nda ŋwaŋnda chiee wo. O tosa hei sanaa o sala Chiisu huŋ soliŋ ndo niŋ, vɛlɛ a mɛɛ o siiŋguu ndu wana soliaa sala yɛ. Hei kanduŋ o wɔsi 29 ve niŋ. O wɔsi pilɔɔ hoo niŋ kpe Chiisu yiŋ ni, okoŋ, mi Mɛlɛka pɔya ndu maa Masa Wanaa Soliaa Salaa le maaŋ bɛndu Mɛlɛkaa, o wana chi hoo a lehɔl te wo.—Hibu. 9:11, 12.

4, 5. (a) Vɛɛ Chondei bolle 99 chɔɔmuu yɛ yeemɛi buɛiyaa Mɛlɛkaa? (b) Nyuna suu kuɛɛ naŋ nɔ yɛ miŋ nyunaŋ naapila?

⁴ Le miŋ chɔm maa ŋ nɔ balika melaa le maaŋ bɛndoo hoo, mɛɛ miŋ tosa mi waŋnda sina a diola Mɛlɛkalaŋ okɔɔ, nduyɛ, miŋ saŋgala ndu le mɛɛ o yɔŋ po ndɔɔ le naa baŋaa yɛ. Ŋ cho a kɔl kɛndɛ le sinaa maa Seiyaa Chɛhowaa le miiliɔŋndaŋ la ŋɔmaa a cho hau Chɛhowa saŋgalaa ni! Kaŋii cheleŋnde ipum dimi maa te a faŋaŋ pɛ o lɛŋndeŋ choo ma hel o choo choo niŋ, loŋ nda cho lakɔ Mɛlɛka saŋgala ni. A bendu! Seiyaa Chɛhowaa nda che ndi kɛsɛ maa o lɛŋndeŋ choo naŋ suŋ suŋ nda nɔ ni ma saŋgala Mɛlɛka.

⁵ Tamasi buɛiyaa Mɛlɛkaa naŋ cho tolɔɔ kɔɔli ni. Tamasi ndaa hoo cho o Chondei 99:1-3, 5, NW. (Nuawɔ.) A mɛɛ yau iChondoo hoo chɔm yɛ, mi Muuse, Elɔŋ, a Samuɛl yɔŋgu toolu ndaa kpou le piɛile tonyaleŋ hivioo lachi o boondii ndɛi niŋ. (Chon. 99:6, 7, NW) Hau, tuupa mi pɔmbuaa Chiisuaa kuɛ choo choo le waa wanaa soliaa sala a Chiisu latulu, a tuaa lo o lɛŋndeŋ choo wa cho Mɛlɛka piɛiyo o sandei choo o bɛɛ maaŋ ndɔ wana chi hoo a lehɔl te wo. “Saa cheleŋ” nda bɛɛ cho nda tooloo o miiliɔŋndaŋ niŋ. (Chɔŋ 10:16) Mi che bɛɛ naa kundala tiɔɔŋ ndaŋ la nɔ tiindaŋ ndaŋ yɛ yɛ, kɛ nda kpou cho Chɛhowa saŋgalaa diompilɛ o naa nduaa kɛsiaa ŋpeluaa haa. Numpila nyunaŋndɔ aa, ‘I cho pa toolu nuu kpou yɔŋgoo le tosaa mɛɛ Chɛhowa kɔɔna sɔɔŋ le ndu piɛiyo o tonyaa choo yɛ?’

6, 7. Bahawɛi suu kuɛɛ ndoo kanduŋ yɛ Kilisiɔŋaa tasiaa tɛɛŋ? Nduyɛ yɛɛ ndoo yɔŋnuŋ yɛ, mɛɛ wɔsioŋ hiou o kɛmɛlaŋ niŋ?

⁶ Baabuiyo dimi maa mɛɛ kunda leKilisiɔŋndo kilaŋ, o fuuluu wɔsioŋ kɛmɛ le mi waŋnda siiŋguu tonyaa suɛi lachoowa. (Walta Wa. 20:28-30; 2 Tɛs. 2:3, 4) O hei niŋ, mii kiandu kpoke le sinaa wanaa kpeekpei cho Mɛlɛka piɛiyo o maaŋ ndɔɔ niŋnda. Mɛɛ wɔsioŋ hiou o kɛmɛlaŋ niŋ, mi boondei fuuluu le mi Chɛhowa bɛɛndiaa sɔɔŋ. O tosa hei sanaa o masa sɛnɛi o kɛsi o kpeŋgbei lemasaa choo wo. Masa koŋ cho Chiisu Kiliti ni.

⁷ A wɔsi 1919, mi Chɛhowa chɔm kpendekele wanaa o hini kɔl, nduyɛ, ma wa ndu piɛiyo o maaŋ ndɔɔ niŋnda. Mi Chɛhowa lovi nda lɛgbɛ, halikpeŋ ma piɛi ndu o nɛi bɛnda wo choo. (Ais. 4:2, 3; Mal. 3:1-4, NW) Mi nyɛ kiilanɔɔ Pɔɔl che wɔsila bɔɔbɔɔ o yilaŋnde niŋndo kandu yɔŋnɔŋndo o pɔmpɔmbɔ.

8, 9. Tɛɛsiaa wɔ kpele hɛnɛkɛ Pɔɔl che o yilaŋnde niŋnde o nɛilaŋ la yaa niŋ?

⁸ Nyɛ Pɔɔl che o yilaŋnde niŋndo cho o tɛɛsiaa o Kɔliŋtiaŋ Diiŋ Ndɔɔ 12:1-4, NW. (Nuawɔ.) Nyɛ Pɔɔl che o yilaŋnde hei niŋndo cho machuaa sɔɔŋ chɔɔmaŋndoŋ. Nyɛ ndoo nɔ le yɔŋnɔŋndo o chilaŋ niŋndo, o cho nyɛ yɔŋnuŋ teleŋ o wa achallo le. Mɛɛ nda chua Pɔɔl chɔ ma hel a ndu o fondaŋ Mɛlɛkaa leniŋ di di, “kpele hɛnɛkɛ” (NW) kuɛɛ o che yɛ? Kpele hɛnɛkɛ Pɔɔl wa suɛi a ndu okɔɔ wo sim le kpele hɛnɛkɛ cho wa o chieeŋndo choo wo, hoo o kɔɔna Chɛhowaa niŋ, a nyɛ cho yɔŋnɔŋ o choo choo niŋndo. Muŋ kpou o chilaŋ niŋ ŋ cho yɔŋnɔŋ ni. Kpele hɛnɛkiɔɔ hoo sim vɛlɛ le chieeŋ sɛnɛi cho hunɔɔ o chilaŋ niŋndo. (Luku 23:43, NW) O sim vɛlɛ lewundu le chaŋyɛi kɛndɛi wa niŋ  waŋchieeya tɛɛŋ a Mɛlɛka o chieeŋ sɛnɛiyo niŋndo. Le handɔɔ lechoo, kpele hɛnɛkiɔɔ hoo sim vɛlɛ lewundu sɔɔŋ kɛndɔŋ wa niŋ choo choo o “kpele Mɛlɛkaa” niŋ ndoŋ.—Sɔɔŋ Chɔɔmaŋndoŋ 2:7.

⁹ Le yɛɛ Pɔɔl dimi yɛ niŋ maa mbo “tuɛi sɔɔŋ kɔndɔfili ŋ pum wana nɔla bɛɛ ma chaa muŋ chɔm te,” nduyɛ maa “ŋ cho bɛɛ sɔɔŋ wana chiee soo a muŋ okɔɔ le”? O cho teleŋ te wa koŋ le mi ndoo chɔm nyɛ o che o yilaŋnde niŋndo le. Kɛ hau, wana suaa a sɔɔŋ kɛndɛŋ cho yɔŋnɔŋndo wanaa Mɛlɛkaa tɛɛŋ ndoŋ.

10. Le yɛɛ kpele hɛnɛkɛ Mɛlɛka ke naa o kɔɔna ndɔɔ niŋndo, a maaŋ ndɔ wana chi hoo a lehɔl te wo cho nyɛ pilɛ le?

¹⁰ Dimioo hoo “kpele hɛnɛkɛ Chɛhowaa,” o cho naa o sondo lɔɔlɔɔ. Hoo chɔm maa fonda o fonda cho maa kɔɔnaa hoo le. Mɛlɛka cho kɔɔnaa hoo salaa dɔuwɔɔ tau tau. Nduyɛ, hei mala naa le chaŋyɛi kɛndɛi nɔɔ a Mɛlɛka vɛlɛ a chaaŋaa naa laalaŋnda. O kpeekpei niŋ, kpele hɛnɛkɛ Chɛhowa ke wanaa nduaa o kɔɔna ndɔɔ niŋndo cho teŋgeŋ a maaŋ Mɛlɛkaa, o wana chi hoo a lehɔl te wo. Kɛɛsiaa Mɛlɛka tosa le ndu piɛiyo o tonyaa choo wo, maaŋ Mɛlɛkaa, o wana chi hoo a lehɔl te wo cho ni. Kpele hɛnɛkɛ cho wanaa Mɛlɛkaa tɛɛŋndo chɔm kpendekele wanaa Mɛlɛka hini kɔl le ndu piɛiyo o maaŋ bɛndoo niŋnda.—Mal. 3:18, NW.

11. Dikeŋnaŋ kuɛɛ naŋ nɔ yɛ hau a kpele cho wanaa Chɛhowaa tɛɛŋndo okɔɔ?

¹¹ Nuawɔ suɛi kɛndɛ bɛndu se le sinaa maa Chɛhowa chɛl le wallo tosaa latulu a waŋchieeyaa lahakiaa chɔŋ a wɔsi 1919! A cho kpele hɛnɛkɛ cho wanaa nduaa tɛɛŋ o chieeŋndo choo wo mandaa, ma wa ndu tosaa o kala poŋ, nduyɛ ma wa ndu pɛŋgɛlaa. A cho pa numpila chɔɔ wali sɔviɔɔ hoo tosaa? Hei cho num pa nyindɔɔ le wallo tosaa a Chɛhowa latulu le ‘fondaŋ ndɔ kɛsiaa ŋpeloo bɛɛleŋ kioo’?

12. Tiindaŋ kuɛɛ naa kpou nɔ yɛ, a mɛɛ Aisaya 60:17 dimi yɛ? (Tofa fotueiyo o peele naŋ kandu leŋ choo.)

¹² Wali sɔvɛ bɛndoo cho tosaŋndo le siŋgaa kumbui kɔɔna Chɛhowaa o chieeŋndo choo. Aisaya 60:17 (NW) soo a wallo hoo okɔɔ. (Nuawɔ.) Feleŋguaa, ɔɔ wanaa cho hunɔɔ sɛnɛi o tonyaa niŋnda pɛɛku niŋ a siŋgaŋndo hoo okɔɔ. Ɔɔ a tuei niŋ wanaa cheleŋnda dimioo a ndu okɔɔ. Kɛ, puaapiliaa a ndepiliaa cho siŋgaŋndo hoo tueiyɔɔ yeela wa nɔ ke sɔviɔɔ tau! A tonya, puaapiliaa haa laalaŋ kpeekpei maa Chiisu simnuŋ Masaa, nduyɛ maa ndu Chɛhowa cho soliŋndo kpeku ni le kɔɔna Ndɔɔ nɛiyo chɔmndo! Wanaa Mɛlɛkaa sina maa o ŋgemila sɔviɔɔ choo laalaŋ ndaa sim ni, nduyɛ mi naa kpou dɔu baltaŋ a hei okɔɔ. Te ŋ tuei pɛ nyɛ chaaŋaa naa laalaŋnda dimi wo, o mala naa miŋ chɔɔlu laalaŋndo nɔ. Nduyɛ mbo chɔɔlu tiindaŋ naa kindi o Chɛhowa niŋ.

13. Yɛɛ Chondei 48:12-14 dimi yɛ maa ŋ nɔ kuee miŋ tosa?

¹³ Mɛɛmɛɛ naŋ viou o tonyaa niŋ, ŋ nɔ miŋ dimul acheleŋnda a kɔɔna Chɛhowaa okɔɔ. Kaamaa icho hau ni le kpele hɛnɛkiɔɔ tueiyɔɔ yeela o kɔɔna Chɛhowaa niŋ, o chieeŋ dɛnɛ wɔɔŋ, lakafa nɔ hoo kaala le wo niŋ! Ŋ nɔ miŋ dimul ‘chuauwaa naa mamaa’ a sɔɔŋ kɔndɔfilloŋ a kɔɔna Chɛhowaa ɔɔ “Saayɔŋ” okɔɔ, vɛlɛ a tonya cho a kpele hɛnɛkɛ naŋ cho tueiyɔɔ yeela o kɔɔna ndɔɔ niŋndo okɔɔ.—Nuawɔ Chondei 48:12-14, NW.

14, 15. Siŋgaŋnda suu kuɛɛ yɔŋnuŋ yɛ o wɔsi 1970 ve niŋ, nduyɛ vɛɛ siŋgaŋndaŋ ndaŋ la hiŋ yɛ a tɔnɔɔ?

¹⁴ O wɔsiŋ hiou woŋ niŋ, bɛnduaa yuuwaa cho naa tɛɛŋnda che niŋ siŋgaŋnda yɔŋnuŋ ndaŋ lapum o kɔɔna Chɛhowaa niŋ. Nduyɛ, siŋgaŋndaŋ ndaŋ la tosa mi kɔɔna Chɛhowaa le kumbui chieeŋndo hiau lachi a naŋɔɔ. Waŋnda haa loonuŋ maa o wɔsiŋ hiou woŋ  niŋ, kundalaŋ laa nɔ bɛnduaa kunda le, kɛ waŋndo opilɛ ndoo mala kundaa ni. Lɛuve ndii nɔ Kunda cho Lɛuve chilaŋndo le, kɛ sim lehɔllo opilɛ kpe wa ni. Nduyɛ, waŋndo opilɛ kpe wa chilaŋ chuaa le “Watch Tower Society” ni, kɛ o cho Dialii Kuumbaŋ Choo Seiyaa Chɛhowaa le. Mi che bɛɛ naa puaapiliaa haa ndaa nɔ wanaa laalaŋaa wa nda malaa wa, kɛ waŋndo opilɛ koni ndoo tosa kɛɛsiaa o kundalaŋ, lɛuwoŋ, a fondaŋnda lebolta Seiyaa Chɛhowaa ni. O wɔsi 1970 ve niŋ, mi siŋgaŋndo tosaŋ maa, o cho lɛ waŋndo opilɛ le nɔ mbo chua chilaŋ o kundalaŋ niŋ te, kɛ bɛnduaa kundaa.

¹⁵ Baa mi siŋgaŋndaŋ ndaŋ la huŋ a tɔnɔɔ? Ei, mi la huŋ a tɔnɔɔ o nɛi bɛnda wo niŋ. Le yɛɛ naŋ dimi yɛ lende? Kanifuule, sinapɛŋgu chɔɔlu sɔlaŋ o Baabuiyo niŋndo hiŋ a siŋgaŋndaŋ ndaŋ ni. Tuupa mi waŋndo opilɛ hiou lachi a kɔlkalu ndɔɔ soliŋndo kpeku le chilaŋ chuaa, puaapiliaa kundaa nɔ suiliŋnda kɛndɛlaŋ nda kpou, a Chɛhowa ke naa wa, cho hunɔɔ a tɔnɔɔ o kɔɔnaa niŋ.—Tal. 24:6, NW; Ɛfi. 4:8.

16, 17. Siŋgaŋnda sɛnɛila kuɛɛ yɔŋnuŋ yɛ mi la nɛŋi num kɔl, nduyɛ le yɛɛ?

¹⁶ Yiyaŋndɔ vɛlɛ a siŋgaŋnda laŋga yɔŋnuŋ ndaŋ okɔɔ. Siŋgaŋndaŋ la tosaŋ a mɛɛ nda toosiaa yaula naalaŋ yɛ, vɛlɛ a mɛɛ naŋ yɔŋgu laŋ waŋnda o bɛɛ yɛ. Yaula naala kɛndɛlaŋ la soo a bahawɛila cho hau laŋ. Icho bɔɔ suɛi kɔlkɛndɛ le yaula sɔvɛlaŋ ndaŋ, la pilaŋ waŋnda kɔllo laŋ yɔŋgoo o wali pollo niŋ. Ŋ soliŋ nyɛm mapuuluŋ cho hau woŋ kpeku le tonyaa pɛŋgɛlaa, mɛɛ tɛɛŋgii nɛi jw.org cho naa yɛ. Te ŋ tosa hei pɛ, mɛɛ yeemɛi Chɛhowɛi naŋ cho keŋ peeloo ni, le waŋnda ba o ba fee nɛi chɔmaa nda yeema kpeekpeiyo kioo.

¹⁷ Siŋgaŋ tosaŋ le teleŋndo sɔlaa le Pɛɛku leYuŋgoo, ɔɔ pɛɛkɔŋ ipilayaa wo bɛɛ, ŋ nɔ miŋ chua ndu maa nyɛ baabaa le. Ŋ sɔla vɛlɛ kɔl hiniaa le siŋgaŋnda kɛndɛla tosaŋ a bɔŋaŋnda naala bɛndaŋ okɔɔ laŋ. Bɔŋaŋ o  bɔŋaŋ naŋ bii pɛ, miŋ dimi maa hoo hiou ba a naŋɔɔ! Nduyɛ, miŋ naŋ vɛlɛ kɔl tau a pɛɛku sɔvɛ naŋ sɔla o sukuula cho o kɔɔna Chɛhowaa niŋndaŋ. Miŋ che kpendekele maa Chɛhowa cho siŋgaŋndaŋ kpou tosaa ni. Chɛhowa cho kɔɔna ndɔɔ nɛŋioo o pɔm pɔmbɔ, vɛlɛ a kpele hɛnɛkɛ naŋ cho tueiyɔɔ yeela suŋ suŋ ndo!

18, 19. Vɛɛ naŋ nɛŋi yɛ kpele hɛnɛkɛ naŋ cho tueiyɔɔ yeela wo?

¹⁸ Bɛɛleŋ pila Chɛhowa ke naa ni le naa chɛlɔɔ miŋ nɛŋi kpele hɛnɛkɛ naŋ nɔ hoo o kɔɔna ndɔɔ niŋndo. Ŋ tosa hei te ŋ wa pɛ yooŋgu kɛndɔɔ dimioo a dialuŋ fulaa le waŋnda siiŋgoo buɛiyaa ndɔ. Teleŋ o teleŋ naŋ mala pɛ waŋndo le mbo simnuŋ Kilisiɔŋnɔ yɔŋguŋ o Chɛhowa lo wo, mɛɛ ŋ cho pɛŋgula kpele hɛnɛkiɔɔ hoo chɔɔloo.—Ais. 26:15; 54:2, NW.

¹⁹ Ŋ nɔla vɛlɛ miŋ nɛŋi kpele hɛnɛkɛ naŋ nɔ hoo wo, te ŋ wa pɛ hiouwɔɔ lachi a kaa leKilisiɔŋndo nɔɔ. O nɛiyo hoo choo wanaa cheleŋnda cho chɔ ni maa kpele hɛnɛkiɔɔ hoo naŋ. O cho kɔlkalu Baabui naa pɛŋ te huŋ a waŋnda o kɔɔna Mɛlɛkaa niŋ, nduyɛ ma sɔɔŋguu Kiliti ikɛi le. Kɛ kaa diandaa naŋ nɔ wo, a kɔl nyulu naa tosa hei ni.

20. Yɛɛ cho yɛ yeemɛi nɛi a mɛɛ Talelaŋ 14:35 dimi yɛ?

²⁰ Chɛhowa nda Chiisu naŋ bɔɔ kɔllo te a che pɛ kpele hɛnɛkɛ naŋ cho hau niŋndo! Ŋ cho hau kpele hɛnɛkiɔɔ tueiyɔɔ yeela, miŋ wa wallo tosaa le ndu nɛŋioo. Hoo chɔm mɛɛ naŋ wa niŋ a kɔlkɛndɛ le chieeŋndo siiŋgoo kpele hɛnɛkiɔɔ o chilaŋ niŋ yɛ. Ŋ kɛsiŋ o kɔl nyɛ Talelaŋ 14:35 (NW) dimi wo. Ndu cho ni, “Buɛi kɔlkalu wa hoo masa bɛndoo o ba wo, hinilaŋ masaa o hini kɔl a ndu ni.” Maa ŋ nɔŋnuŋ kɔlkaloo lɔɔlɔɔ le hiouwɔɔ lachi a wallo tosaa le kpele hɛnɛkɛ naŋ cho niŋndo nɛŋioo!