Kõm̦m̦an bwe Pedetaij eo ilo Kõkkar En L̦apl̦o̦k Wõt an Em̦m̦an im Aiboojoj

“Inaaj kõm̦m̦an jikin neõ bwe ren aiboojoj.”—AISEIA 60:13.

AL: 28, 48

KWÕMAROÑ KE KÕMEL̦EL̦E?

Ta eo aolep rũkarejar ro rem̦ool an Jeova rekõn̦aan kõm̦m̦ane?

Ta “pedetaij” eo me rijjilõk Paul ear loe ilo juon pijen?

Ewi wãween ad maroñ kõm̦m̦an bwe en l̦apl̦o̦k wõt an aiboojoj pedetaij eo ilo kõkkar?

1, 2. Ilo Jeje ko ilo kajin Hibru, naan in “eran neen” Anij emaroñ bar jitõñl̦o̦k ñan ta?

 JEOVA ANIJ ear ba: “Lañ ej Aõ tũroon, im lal̦ eran neõ.” (Aiseia 66:1) Anij ear bar kwal̦o̦k kõn ijin ‘eran neen’ ke ear ba: “Inaaj kõm̦m̦an jikin neõ bwe ren aiboojoj.” (Aiseia 60:13) Ewi wãween an kaiboojoj eran neen? Im ta mel̦el̦ein men in ñan ro rej mour ilo lal̦ in me ej eran neen Anij?

² Ilo Jeje ko ilo kajin Hibru, naan in “eran neen” Anij ej bar jitõñl̦o̦k ñan tampel̦ eo ilo Israel ilo iien ko etto. (1 Kronikel 28:2; Sam 132:7) Tampel̦ eo ear lukkuun aiboojoj ñan Jeova kõnke eñin kar jikin kabuñ eo em̦ool. Kar kõjerbale ñan kaiboojoj im nõbar Jeova ilo lal̦ in.

3. Jikin kabuñ eo em̦ool ej pãd ia rainin, im ñããt eo ear jino wal̦o̦k?

³ Rainin, jikin kabuñ eo em̦ool ejjab pãd ilo juon lukkuun tampel̦ ãinwõt kar ilo iien ko etto. Ej pãd ilo juon tampel̦ ilo kõkkar, im el̦apl̦o̦k an kaiboojoj Jeova jãn kar tampel̦ ko ilo iien ko etto. Ta tampel̦ in ilo kõkkar? Ej laajrak eo an Anij me ej kamaroñ armej ro bwe ren epaake e im kabuñ ñane. Laajrak in ear maroñ wal̦o̦k ikijjeen katok in mour eo an Jijej. Ear jino wal̦o̦k ilo iiõ eo 29 ke Jijej ear peptaij im kar kapiti bwe en Bũrij L̦apl̦ap ilo tampel̦ eo ilo kõkkar an Jeova.​—Hibru 9:11, 12, UBS.

4, 5. (1) Ta eo rũkarejar ro rem̦ool an Jeova rekõn̦aan kõm̦m̦ane ekkar ñan bokin Sam 99 jebta? (2) Ta kajjitõk eo jej aikuj kajjitõk ippãd make kake?

 ⁴ Jelukkuun m̦õn̦õn̦õ kõn laajrak in an Anij kõn kabuñ eo em̦ool. Jej kwal̦o̦k ad kam̦m̦oolol ilo ad kwal̦o̦k ñan ro jet kõn etan Jeova im kõn menin letok eo an ikijjeen katok in mour eo an Jijej. Jem̦õn̦õn̦õ bwe elõñl̦o̦k jãn 8 milien Kũrjin ro rem̦ool me rej kaiboojoj im nõbar Jeova aolep raan! Elõñ armej in kabuñ ko jet rej l̦õmn̦ak bwe renaaj kaiboojoj im nõbar Anij ñe renaaj wanlõñl̦o̦k ñan lañ ãlikin aer mej. Bõtab, kõj armej ro an Jeova jejel̦ã aorõkin ad aikuj nõbar im kaiboojoj Jeova kiiõ, ijin ioon lal̦.

⁵ Ñe jej nõbar im lel̦o̦k aiboojoj ñan Jeova, jej anõke joñak ko an rũkarejar ro an retiljek me bokin Sam 99:1-3, 5-7 (riit) ej kõmel̦el̦e kake er. Ro rar tiljek ãinwõt Moses, Aron, im Samuel rar lukkuun rejetake laajrak eo an Anij kõn kabuñ eo em̦ool ilo iien ko etto. Ilo raan kein, m̦okta jãn an rũkkapit ro ilo lal̦ in jino jerbalin bũrij ippãn Jijej ilañ, rej jerbal ñan Jeova ilo tiljek ilo lal̦ in me ej m̦õttan tampel̦ eo ilo kõkkar. Elõñ milien ‘jiip ro jet’ rej tiljek ilo aer jipañ rein. (Jon 10:16) Kumi kein ruo rej bõrokuk ilo aer kabuñ ñan Jeova. Bõtab, jej aikuj kajjitõk ippãd make im ba, ‘Ij ke lukkuun rejetake laajrak eo an Jeova kõn kabuñ eo em̦ool?’

KILE WÕN RO REJ JERBAL ILO TAMPEL̦ EO ILO KÕKKAR AN ANIJ

6, 7. Ta apañ eo ear wal̦o̦k ilo eklejia ko an Kũrjin ro jinoin, im ta eo ear wal̦o̦k elõñ bukwi iiõ ko tokãlik?

⁶ Enañin 100 iiõ ãlikin an kar eklejia ko an Kũrjin ro jutak, ear wal̦o̦k jet rijum̦ae ro ãinwõt kar kanaan kake. (Jerbal 20:28- 30; 2 Tessalonika 2:3, 4) Ãlikin iien in, ear jino penl̦o̦k an armej ro kile wõn ro rej Kũrjin ro rem̦ool. Elõñ bukwi iiõ ko tokãlik, Jeova ear kõjerbal Jijej ñan kaalikkar wõn ro rej m̦oolin karejar ñane ak jerbal ilo tampel̦ eo an ilo kõkkar.

⁷ Ilo kar iiõ eo 1919, ear lukkuun alikkar wõn ro me Anij ear m̦õn̦õn̦õ kake er im rej jerbal ilo tampel̦ eo an ilo kõkkar. Rar kõm̦m̦an oktak ko ilo wãween aer kabuñ bwe Jeova en buñbũruon ippãer. (Aiseia 4:2, 3; Malakai 3:1-4, UBS) Kõn men in, pijen eo me rijjilõk Paul ear loe elõñ bukwi iiõ ko m̦oktal̦o̦k ear jino jejjet kitien.

8, 9. Ta “pedetaij” eo me Paul ear loe ilo juon pijen?

⁸ Bokin 2 Korint 12:1-4 (riit) ej kwal̦o̦k kõn pijen eo Paul ear loe. Ilo pijen eo, Jeova ear kwal̦o̦k ñan Paul juon men me enaaj kar wal̦o̦k ilju im jekl̦aj. Ta “pedetaij” eo Paul ear loe? M̦oktata, emaroñ jitõñl̦o̦k ñan lal̦ in ñe enaaj oktak im juon Pedetaij. (Luk 23:43, NW) Kein karuo, emaroñ jitõñl̦o̦k ñan pedetaij eo ilo kõkkar me enaaj lukkuun jejjet kitien ilo jukjukun pãd eo ekããl. Im kein kajilu, emaroñ jitõñl̦o̦k ñan “Pedetaij an Anij,” ak men ko rem̦m̦an rej wal̦o̦k ilañ.​—Revelesõn 2:7.

⁹ Ak etke Paul ear ba bwe ej “roñ naan ko jejjab maroñ in kõnono, ko ejjab mãlim bwe armej en ba”? Kõnke ear jab iien ñan an kõmel̦el̦eik tipdikin aolep men ko rem̦m̦an ear loi ilo pijen eo. Bõtab ilo raan kein, Jeova ej kõtl̦o̦k ad kõnnaanek ro jet kõn jeraam̦m̦an ko me armej ro an rej m̦õn̦õn̦õ kaki kiiõ!

10. Etke pedetaij eo ilo kõkkar im tampel̦ eo ilo kõkkar rejjab juon wõt?

¹⁰ Ekkã ad kõnnaan kõn pedetaij eo ilo kõkkar, ak ta mel̦el̦ein men in? Pedetaij eo  ilo kõkkar ej aenõm̦m̦an im bõrokuk eo me ej wal̦o̦k ibwiljin armej ro an Anij. Kõn men in, pedetaij eo ilo kõkkar im tampel̦ eo ilo kõkkar rejjab juon wõt. Tampel̦ eo ilo kõkkar an Anij ej laajrak eo an kõn kabuñ eo em̦ool. Im pedetaij eo ilo kõkkar ej kaalikkar wõn ro Anij ej m̦õn̦õn̦õ kake er im rej kabuñ ñane ilo tampel̦ eo an ilo kõkkar.​—Malakai 3:18.

11. Ta jeraam̦m̦an eo epãd ippãd rainin?

¹¹ Jem̦õn̦õn̦õ bwe jãn kar iiõ eo 1919, Jeova ear kõtl̦o̦k bwe kõj armej ro rejjab weeppãn jen jipañ kõm̦m̦an bwe pedetaij eo ilo kõkkar en l̦apl̦o̦k im em̦m̦anl̦o̦k wõt. Kwõj ke jipañ ilo jerbal in el̦ap an em̦m̦an? Kwõj ke wõnm̦aanl̦o̦k wõt im kate eok ñan jerbal ippãn Jeova ñan nõbar im kaiboojoje ilo lal̦ in?

JEOVA EJ KÕM̦M̦AN BWE EN AIBOOJOJL̦O̦K WÕT DOULUL IN AN

12. Etke jejel̦ã bwe em̦õj an jejjet kitien kanaan eo ilo bokin Aiseia 60:17? (Lale pija eo ilo jinoin katak in.)

¹² Rũkanaan Aiseia ear kanaan bwe elõñ oktak ko rem̦m̦an renaaj kar wal̦o̦k ñan m̦õttan doulul in an Anij ilo lal̦ in. (Riit Aiseia 60:17, UBS.) Unin an Kũrjin ro rekããl jel̦ã kõn oktak kein ej kõnke rar riiti ak roñ kaki. Bõtab, elõñ ro jeid im jatid me ear wõr ippãer jeraam̦m̦an eo ñan loe an wal̦o̦k oktak kein rekanooj em̦m̦an! Eñin unin rũkarejar rein retiljek rar lukkuun tõmak bwe Anij ej kõjerbal Kiiñ eo ad, Jijej, ñan tõl doulul in An! Ad roñ kõn bwebwenatoun an Kũrjin rein jeid im jatid kwal̦o̦k kõn oktak kein rar loi ej kõm̦m̦an bwe en l̦apl̦o̦k wõt ad tõmak im lõke Jeova.

13. Ekkar ñan Sam 48:12-14, ta eo jej aikuj kõm̦m̦ane?

¹³ Aolep Kũrjin ro rem̦ool rej aikuj kõnnaanek ro jet kõn doulul in an Jeova. Ekabwilõñlõñ bwe meñe jej mour ilo jukjukun pãd in enana an Setan, ak jej aenõm̦m̦an im bõrokuk wõt ippãn aolep rũttõmak ro jeid im jatid ipel̦aakin lal̦ in! Jelukkuun m̦õn̦õn̦õ in kõnnaanek ro jet ak “epepen eo tokãlik” kõn men ko rem̦m̦an kõn doulul eo an Jeova ak “Zaion” im kõn m̦ool eo kõn pedetaij eo ilo kõkkar.​—Riit Sam 48:12-14.

14, 15. Ta oktak ko rar wal̦o̦k ãlikin iiõ eo 1970, im ewi wãween an doulul in bõk tokjãn jãn oktak kein?

¹⁴ Elõñ ro rerũtto ilo eklejia ko rar loe an wal̦o̦k oktak ko me rar kõm̦m̦an bwe en l̦apl̦o̦k wõt an aiboojoj m̦õttan doulul in an Jeova ilo lal̦ in. Rej keememej iien ko me ear wõr juon wõt em̦m̦aan ej loloorjake juon eklejia, ijello̦kun an wõr juon kumi in em̦m̦aan ro rej loloorjake. Rej bar keememej iien ko me ear wõr juon wõt em̦m̦aan ej loloorjake juon ra, ijello̦kun an wõr juon kumi in em̦m̦aan ro rej loloorjake. Bareinwõt rej keememej iien ko me naanin tõl ko rej itok jãn bũrejtõn eo an doulul in, ijello̦kun aer itok jãn Kumi eo Ej Lale Aolep Eklejia ko an Ri Kõnnaan ro an Jeova. Meñe ear wõr an em̦m̦aan rein rijjipañ ro me retiljek, ak er make eo rar aikuj kõm̦m̦an pepe ñan eklejia ko ak ra ko rej loloorjaki. Ãlikin iiõ eo 1970, ear oktak wãween in. Kar karõk bwe en kiiõ wõr juon kumi in em̦m̦aan ro rej lale eklejia me rej kõm̦m̦an pepe ko, ijello̦kun an juon wõt em̦m̦aan kõm̦m̦ani.

¹⁵ Etke elõñ tokjãn ko rem̦m̦an rej wal̦o̦k ilo doulul in kõn oktak kein? Kõnke rej itok jãn an l̦apl̦o̦k im alikkarl̦o̦k ad mel̦el̦e kõn Baibõl̦. Doulul in ej bõk tokjãn ko rem̦m̦an ñe aolep em̦m̦aan ro rej lale eklejia me rej “menin letok” jãn Jeova rej  kõjerbal kapeel im wãween ko rem̦m̦an ippãer ñan kõm̦m̦ani pepe ko, ijello̦kun an juon make iaan im kõm̦m̦an pepe.​—Epesõs 4:8, UBS; Jabõn Kõnnaan 24:6.

16, 17. Ta oktak ko rekããl kar kõm̦m̦ani me rem̦m̦an ippam̦, im etke?

¹⁶ L̦õmn̦ak m̦õk kõn jet iaan oktak ko me jej loi ilo bok ko ad. Jem̦õn̦õn̦õ in leto letak bok ko ad kõnke rekãitoktoklimo im rej kwal̦o̦k kõn wãween kõm̦adm̦õdi apañ ko rej wal̦o̦k! Bar l̦õmn̦ak m̦õk kõn wãween ad kõjerbal internet, kampiutõr, im men ko ãierl̦o̦kwõt ñan kwal̦o̦k naan kõn ennaan eo em̦m̦an. Ñan waanjoñak, weep jait eo ad, jw.org, el̦ap an jipañ elõñ armej ro kõn naanin tõl ko relukkuun aikuji ñan mour ko aer. Oktak kein aolep rej kaalikkar joñan an Jeova yokwe armej ro im kea kake er.

¹⁷ Jej bareinwõt kam̦m̦oolol kõn oktak ko kar kõm̦m̦ani ñan kweilo̦k ko ad bwe en maroñ wõr iien ñan an baam̦le ko katak ippãn doon ak bwe kajjojo ren katak ippãer make. Im jej kam̦m̦oolol kõn oktak ko kar kõm̦m̦ani ñan bũrookraam̦ in kweilo̦k ko ad rel̦l̦ap. Aolep iiõ rej em̦m̦anl̦o̦k wõt! Jej bar kam̦m̦oolol kõn jikuul̦ in Baibõl̦ ko me el̦ap aer jipañ kõj. Aolep oktak kein rej lukkuun kaalikkar bwe Jeova ej tõl doulul in im bwe ej wõnm̦aanl̦o̦k im kõm̦m̦an bwe pedetaij eo ilo kõkkar en l̦apl̦o̦k wõt an em̦m̦an im aiboojoj!

WÃWEEN AD KÕM̦M̦AN BWE PEDETAIJ EO ILO KÕKKAR EN L̦APL̦O̦K WÕT AN AIBOOJOJ

18, 19. Ewi wãween ad maroñ jipañ kõm̦m̦an bwe pedetaij eo ilo kõkkar en l̦apl̦o̦k wõt an aiboojoj?

¹⁸ Jeova ej letok ñan kõj jeraam̦m̦an eo  ñan kõm̦m̦an bwe pedetaij eo ilo kõkkar en l̦apl̦o̦k wõt an aiboojoj. Ak ewi wãween ad kõm̦m̦ane men in? Ilo ad kijejeto in kwal̦o̦k kõn ennaan eo em̦m̦an kõn Aelõñ eo im kõm̦m̦an bwe en lõñl̦o̦k wõt rũkal̦oor. Aolep iien ñe jej jipañ juon armej bwe en erom rũkarejeran Anij, jej kõm̦m̦an bwe en l̦apl̦o̦k pedetaij eo ilo kõkkar.​—Aiseia 26:15, UBS; 54:2.

¹⁹ Jemaroñ bar jipañ bwe en l̦apl̦o̦k wõt an aiboojoj pedetaij eo ilo kõkkar ñe jej kate kõj ñan kakõm̦anm̦anl̦o̦k wãween ko ippãd ãinwõt yokwe, jouj, tũriam̦o, im ko ãierl̦o̦kwõt. Men in ej jipañ kõm̦m̦an bwe ro jet ren reel im kile an aiboojoj pedetaij eo ilo kõkkar. Enañin aolep iien, armej rej reel im kobatok ilo doulul in im karejar ñan Jeova im Jijej kõn wõt aer lo ad aenõm̦m̦an im em̦m̦an kõm̦m̦an ko ad. El̦apl̦o̦k an men in kareel er jãn jel̦ã eo ad kõn Baibõl̦.

20. Ekkar ñan Jabõn Kõnnaan 14:35, ta eo jej aikuj kõn̦aan kõm̦m̦ane?

²⁰ Ejjel̦o̦k pere bwe Jeova im Jijej rej lukkuun m̦õn̦õn̦õ ñe loe pedetaij eo ilo kõkkar rainin me el̦ap an aiboojoj. Jelukkuun m̦õn̦õn̦õ bwe jej kõm̦m̦an bwe en l̦apl̦o̦k wõt an aiboojoj pedetaij in ilo kõkkar. Bõtab, m̦õn̦õn̦õ eo jej bõke jãn ad kõm̦m̦ane men in ej dik wõt ñe jenaaj keidi ñan joñan m̦õn̦õn̦õ eo jenaaj bõke ñe jenaaj jipañ kõm̦m̦an bwe lal̦ in en oktak im juon Pedetaij. Jej aikuj keememej wõt bokin Jabõn Kõnnaan 14:35 me ej ba: “Kiiñ eo ejouj ñan rũkarejeran eo ej kõm̦m̦an ilo mãlõtlõt.” Jen kwal̦o̦k wõt mãlõtlõt ilo ad kate kõj ñan kõm̦m̦an bwe en l̦apl̦o̦k wõt an aiboojoj pedetaij eo ilo kõkkar!

[Kajjitõk ko]