1, 2. Ondaka “otyiliatelo” Movihonekwa vio Hebreu ihangununa tyi?

 JEOVA HUKU wati: “Eulu otyipundi tyange tyoutumini, ohi otyiliatelo tyange.” (Isaías 66:1) Huku tupu ankho ukahi nokupopia o “otyiliatelo” tyae etyi apopia okuti: “Ame mandyinkhimaneka omphangu yonomphai mbange.” (Isaías 60:13) Oñgeni Huku ankhimaneka otyiliatelo tyae, ine okutyihiwiswa? Iya otyo tyihangununa-tyi ku vana vakala kotyiliatelo tyae, ine pano pohi?

² Movihonekwa vio Hebreu, ondaka “otyiliatelo” ipopia ondyuo ya Huku mo Isilayeli yokohale. (1 Crônicas 28:2; Salmo 132:7) Ondyuo ya Huku ankho ongwa unene ku Jeova, mokonda ankho oyo vala omphangu yefendelo liotyotyili. Ankho yundapeswa pala okunkhimaneka Jeova pano pohi.

3. Oipi omphangu yefendelo liotyotyili hono, iya onalupi yahimbika?

³ Hono omphangu yefendelo liotyotyili oipi? Hamphangu  ngondyuo ya Huku kohale. Ondyuo ya Huku yopaspilitu, inkhimaneka Jeova tyipona onondyuo ambuho mbupondola okutungwa. Ondyuo ya Huku yopaspilitu oityi? Epongiyo Huku alinga liavela ovanthu omphitilo yokukala omapanga ae nokumufenda. Epongiyo olio, lieyako vala mokonda yotyilikutila tya Jesus. Epongiyo olio, liahimbika menima 29 etyi Jesus ambatisalwa nokulembulwa Ngomunene-nakwa wondyuo yopaspilitu ya Jeova.​—Hebreus 9:11, 12.

4, 5. (a) Oityi ovafendi va Jeova votyotyili vahanda okulinga ngetyi tyipopia o Salmo 99? (b) Epulo patyi tupondola okulilinga?

⁴ Onthue tupandula unene epongiyo olio Huku alinga liefendelo liotyotyili. Tulekesa okuti tuapandula tyina tupopila vakuetu enyina lia Jeova notyiawa tyofeto yeyovo. Tyituhambukiswa unene okunoñgonoka okuti Ovakristau votyotyili, valamba ponomiliau etyinana vahilivika Jeova ononthiki ambuho! Namphila ovanthu ovanyingi vonongeleya vasoka okuti mavakahivilika Huku keulu tyina vamankhi, ovanthu va Jeova vetyii okuti tyakolela okumuhivilika pahetyino pano pohi.

⁵ Tyina tuhivilika Jeova, tuhetekela ongeleka yovaumbili va Huku vapopiwa mo Salmo 99:1-3, 5. (Tanga.) Ovalume vekolelo nga Moisesi na Arau na Samuele, noukuatyili vakuatesileko epongiyo lia Huku liefendelo liotyotyili kohale. (Salmo 99:6, 7) Hono, tyina nkhele ovalembulwa veheneende okukaundapa ngovanakwa na Jesus keulu, noukuatyili vaumbila Jeova mondyuo yopaspilitu pano pohi. Ovanyingi “vonongi ononkhuavo” navo vevekuatesako. (João 10:16) Ovalembulwa nonongi ononkhuavo, vafenda Jeova. Mahi, tupondola okulipula okuti: ‘Ndyikuatesako epongiyo lia Jeova liefendelo liotyotyili?’

6, 7. Otyitateka patyi tyamonekelele ewaneno Liovakristau votete, iya oityi tyamonekele menima lio 1919?

⁶ Etyi pehenelambe omanima 100 etyi ewaneno Liovakristau liahimbika, ovanthu vokuatyitukilapo otyili avehimbika okuliyawisa ngetyi tyaulilwe. (Atos 20:28-30; 2 Tessalonicenses 2:3, 4) Etyi omuvo oo walamba atyipuiya okuimbuka ovafendi votyotyili va Huku. Apalambe omanima omanyingi puetyi Jeova aundapesa Jesus opo ahololole ovalie tyilityili vaumbila Huku Mondyuo yae yopaspilitu.

⁷ Mo 1919, vana vapandwa na Huku nokuundapa mondyuo yae yopaspilitu, avaimbukwa. Valingile omapiluluko opo efendelo liavo litavelwe na Jeova. (Isaías 4:2, 3; Malaquias 3:1-4) Ngotyo, emonekelo apostolu Paulu amuene, omanima omanyingi konyima alihimbika okufuisuapo.

8, 9. “Omphangu yombembwa” Paulu amuene oityi?

 ⁸ Emonekelo lia Paulu liapopiwa mu 2 Coríntios 12:1-4. (Tanga.) Memonekelo olio, Jeova walekesa Paulu ovipuka mavikamoneka komutwe. “Omphangu yombembwa” Paulu amuene oityi? Tete, tyipondola okulekesa omphangu yombembwa maiya okumoneka pano pohi apa katutu. (Lucas 23:43) Vali, tyipondola okupopia ombembwa yotyotyili maikakala mouye omupe. Tatu, tyipondola okulekesa onkhalelo ongwa keulu “momphangu yombembwa ya Huku.”​—Revelação 2:7.

⁹ Omokonda yatyi Paulu apopila okuti weiva onondaka “mbehetavela okupopia, tupu mbahaviukile okupopiwa nomunthu”? Omokonda ankho hamuvo opo ahangunune ovipuka vihuvisa amona memonekelo. Mahi, hono Jeova utuyeka tupopile vakuetu konthele yovipuka oviwa tukahi nokumona!

10. Omokonda yatyi omphangu yombembwa yopaspilitu nondyuo ya Huku yopaspilitu ovipuka vielikalela?

¹⁰ Omphangu yombembwa tuhole okupopia, oityi? Otyo haunene tyilekesa ombembwa Huku aavela ovanthu vae. Omphangu yombembwa yopaspilitu nondyuo ya Huku yopaspilitu ovipuka vivali vielikalela. Ondyuo ya Huku yopaspilitu ilekesa epongiyo lia Huku liefendelo liotyotyili. Omphangu yombembwa yopaspilitu iimbukilwa kovanthu vapandwa na Huku vemufenda mondyuo yae yopaspilitu.​—Malaquias 3:18.

11. Elao patyi onthue tuna hono?

¹¹ Tyihambukiswa okunoñgonoka okuti tunde mo 1919, Jeova uyeka ovanthu ovakuankhali vakune, nokupameka, nokuyawisa omphangu yopaspilitu. Okuti ove wafuapo pala okuundapa movilinga ovio? Okuti upanda elao liokuundapa na Jeova pala okumuetela omunkhima pano pohi?

12. Oñgeni tutyii okuti Isaías 60:17 ikahi nokufuisuapo? (Tala olutalatu pefo pahimbikila onthele.)

¹² Omuuli Isaia waulile omapiluluko omanyingi mamoneka meongano lia Huku pano pohi. (Tanga Isaías 60:17.) Ovakuendye ine Ovakristau ovape vehole vala okutanga ine okutehelela omapiluluko oo. Mahi ovakuatate ovanyingi no nomphange vena elao liokumona omapiluluko oo omawa! Ovaumbili ovo vekolelo vena onthumbi yokuti Huku ukahi nokuundapesa Ohamba yetu, Jesus, opo ahongolele nokuviukisa eongano Liae! Tyina tuiva onongeleka mbo Vakristau ovo, ekolelo lietu nonthumbi mu Jeova lipama vali.

13. Ngetyi tyipopia o Salmo 48:12-14 oityi tuna okulinga?

 ¹³ Ovakristau aveho votyotyili vena okupopila vakuavo konthele yeongano lia Jeova. Tyihuvisa unene okunoñgonoka okuti namphila tuli mouye utuminwa na Satanasi, tuna ombembwa newaneko novakuatate ouye auho! Tuna okupopila nehambu “ovanthu ovape” eongano lia Jeova, nomphangu yombembwa yopaspilitu!​—Tanga Salmo 48:12-14.

14, 15. Omapiluluko patyi alingwa konyima yo 1970, iya ouwa patyi eongano liapolako?

¹⁴ Ovakuatate ovanyingi vakulupa vamona omapiluluko omanyingi omawa alingwa meongano lia Jeova pano pohi. Vahinangela etyi ankho kuhena ovakulu vewaneno iya ankho ewaneno lihongolelwa nomukuatate wike, etyi movilongo muhena Okomisau Yofiliyale iya ankho ihongolelwa nomukuatate wike, ine etyi kuhena Ononkhalamutwe mbo Nombangi mba Jeova iya ankho o Sociedade Torre de Vigia ihongolelwa nomukuatate wike. Namphila ankho vakuateswako novakuatate ovakuatyili, mahi omukuatate waholovonwa mewaneno oe ulinga omatokolo, una waholovonwa mo Filiyale oe ulinga omatokolo, nou waholovonwa mombala yetu ankho oe ulinga omatokolo. Konyima yo 1970, akulingwa epiluluko opo ovakulu vewaneno valinge omatokolo ewaneno tyipona omukuatate wike.

¹⁵ Omokonda yatyi ankho kuesukisa okulingwa omapiluluko akuatesako eongano?  Omokonda omapiluluko oo apolwa menoñgonoko liaviuka Liovihonekwa. Eongano lipola ouwa komatokolo novituwa oviwa viovakulu aveho vewaneno, ine “ovalume” vapakuako na Jeova, tyipona omatokolo alingwa vala nomukuatate wike.​—Efésios 4:8; Provérbios 24:6.

16, 17. Omapiluluko patyi omape ekuhuvisa, iya omokonda yatyi?

¹⁶ Soka komapiluluko omape alingwa momikanda vietu. Onthwe nehambu tuava omikanda omiwa vikuatesako ovanthu movilinga vietu viokuivisa. Tupu soka oñgeni tuundapesa o Internete opo tuivise onondaka onongwa. Mongeleka, o site jw.org ikahi nokukuatesako ovanthu ovanyingi vena esuko. Omapiluluko oo aeho, alekesa okuti Jeova wesuka unene novanthu iya uvehole.

¹⁷ Atuho tupanda omapiluluko alingwa momaliongiyo etu mokonda pahe tuna vali omuvo wokulinga efendelo liombunga nefendelo lietu lioulike. Tupu tupanda omapiluluko alingwa movionge vietu. Ovionge ovio kese nima vikahi nokukala vali nawa! Tupu tupandula ondongeso tutambula monosikola ononyingi Mbombiliya. Omapiluluko oo aeho, alekesa nawa okuti Jeova ukahi nokuhongolela eongano liae iya ukahi nokuyawisa vali omphangu yetu yopaspilitu!

18, 19. Oityi tuna okulinga opo omphangu yombembwa yopaspilitu ikale vali ongwa?

¹⁸ Jeova utuavela elao liokuhiwiswa vali omphangu yetu yombembwa yopaspilitu. Mahi oñgeni matutyilingi? Omokuivisa nombili onondaka onongwa Mbouhamba nokulinga ovalongwa. Apeho tyina tukuatesako omunthu okukala omuumbili wa Huku, tukahi nokukuatesako omphangu yombembwa yopaspilitu opo ikule.​—Isaías 26:15; 54:2.

¹⁹ Atuho tukuatesako omphangu yopaspilitu tyina tulinga ononkhono opo tukale novituwa vio Vakristau. Otyo tyihiwiswa omphangu yombembwa yopaspilitu pala vakuetu. Tyikuatesako ovanthu okuya meongano, nokukala noupanga omuwa na Jeova na Jesus henoñgonoko lietu Liombimbiliya, mahi ovituwa vietu oviwa nombembwa tukala nayo.

20. Ngetyi tyipopia Provérbios 14:35, ehando lietu olipi?

²⁰ Jeova na Jesus vahambukua unene putyina vatala omphangu yetu yombembwa yopaspilitu hono. Ehambu tukala nalio hono pokuhiwiswa omphangu yombembwa yopaspilitu, kalihi okulieleka nehambu matukala nalio putyina matukaundapa opo ohi ikale Omphangu Yombembwa yotyotyili. Onthue apeho tuhinangela onondaka mba Provérbios 14:35 mbokuati: “Ohamba ihambukwa unene nomuundapi wonondunge.” Tukalei ovana-ndunge putyina tuundapa unene opo omphangu yombembwa yopaspilitu ikale vali ongwa!