1, 2. Omu Byahandiikirwe eby’Oruheburaayo, ebigambo “akatebe k’ebigyere” nibimanyisa ki?

YEHOVA RUHANGA akagira ati: “Eiguru nikyo kitebe kyangye ky’obukama, n’ensi n’akatebe k’ebigyere byangye.” (Isa. 66:1) Aha bikwatiraine “n’akatebe k’ebigyere” bye, akagira ati: “Omwanya ogu ntamu ebigyere byangye ndyagugira ogw’ekitiinisa.” (Isa. 60:13) Ekyo naakikora ata? Kandi eki kitwiniire makuru ki, obu turikutuura omu nsi nari shi “akatebe” ky’ebigyere bya Ruhanga?

² Oyihireho okumanyisa nsi, ebigambo “akatebe k’ebigyere” nibikoresibwa omu muringo gw’akamanyiso omu byahandiikirwe by’Oruheburaayo, kumanyisa hekalu eya ira eyaabaire neekoresibwa Abaisraeli. (1 Bus. 28:2; Zab. 132:7) Hekalu egyo nigwo gwabaire guri omwanya mukuru gw’okuramya okw’amazima omu nsi. N’ahabw’ekyo, gukaba guri omwanya murungi omu maisho ga Yehova. Ekaba neekoresibwa kuhimbisa Yehova omu nsi.

3. Hekalu ya Ruhanga ey’eby’omwoyo niki, kandi ekatandika ryari?

³ Obunaku obu, omwanya mukuru gw’okuramya okw’amazima ti hekalu eyombekirwe omu nsi. Kwonka hariho hekalu y’eby’omwoyo, erikuhaisa Yehova ekitiinisa kukira ekyombeko kyona  omu nsi. Egi n’entebeekanisa erikubaasisa abantu kugarukana na Ruhanga kurabira omu bunyamurwa n’ekitambo kya Yesu Kristo. Ekatandika omuri 29 obu Yesu yaabatizibwa akashukwaho amajuta nk’Omunyamurwa Mukuru wa hekalu ya Yehova ey’eby’omwoyo.—Heb. 9:11, 12.

4, 5. (a) Zaaburi 99 neeshoboorora eta aha kyetengo kikuru ky’abaheereza ba Yehova ab’amazima? (b) Ni kibuuzo ki eki twine kwebuuza?

⁴ Kubaasa kworeka ngu nitusiima entebeekanisa ya hekalu ey’eby’omwoyo, twine kuhimbisa Yehova turikumanyisa abandi eiziina rye kandi nitumuhaisa ekitiinisa ahabw’okutugirira embabazi akatuha ekitambo. Ka nikishemeza kumanya ngu abantu barikurenga aha bukaikuru munaana hati nibahimbisa Yehova! Obutashushana n’abantu b’amadiini agandi abarikuteekateeka ngu nibaija kuhimbisa Ruhanga ku bararugye omu nsi bakaza omu iguru, Abajurizi ba Yehova boona nibamanya ngu baine kumuhimbisa hati omu nsi.

⁵ Omu muringo ogwo nituba nitutooreza abaheereza ba Yehova abarikugambwaho omu Zaaburi 99:1-3, 5-7. (Kishome.) Nk’oku Zaaburi egi erikworeka, Musa, Arooni, na Samueli bakashagikira kimwe entebeekanisa y’okuramya okw’amazima omu bunaku bwabo. Obunaku obu, abashukirweho amajuta abatsigaireho omu nsi batakaheereize nk’abanyamurwa omu iguru na Yesu, nibaheereza omu mbuga ya hekalu ya Ruhanga ey’eby’omwoyo. Obukaikuru ‘bw’ab’entaama ezindi’ nibashagika abashukirweho amajuta omu bwesigwa. (Yoh. 10:16) Abashukirweho amajuta n’ab’entaama ezindi n’obu baraabe baine amatsiko gatarikushushana, boona hamwe nibaramya Yehova bari omu nsi, nari shi akatebe k’ebigyere bye. Buri omwe aine kwebuuza ati: ‘Ninshagikira kimwe entebeekanisa ya Yehova y’okuramya okurikwera?’

6, 7. Ni bureemezi ki obwahikire aha Bakristaayo aba ira, kandi hakabaho kyetengo ki bwanyima y’emyaka mingi?

⁶ Bwanyima y’obwire obutarikuhika kyasha ekibiina Ekikristaayo kiherize kutandika, abarikwegyesa ebishuba bakatandika kureebeka. (Byak. 20:28-30; 2 Tes. 2:3, 4) N’ahabw’ekyo, kikaba kitoorobi kumanya owaabaire naaheereza omu hekalu ya Ruhanga ey’eby’omwoyo. Bwanyima y’ebyasha, Yehova akashoboorora gye enshonga arikurabira omu Mugabe musya ou yaabaire ataireho, Yesu Kristo.

⁷ Omwaka 1919 gurikuza kuhika, abo abu Yehova yaabaire naasiima kandi abaabaire nibaheereza omu hekalu ye y’eby’omwoyo bakamanywa gye. Bakashemezibwa omu by’omwoyo, obuheereza bwabo kubaasa kwikirizibwa Ruhanga. (Isa. 4:2, 3; Mal. 3:1-4) Ebi entumwa Paulo yaareebire omu kworekwa emyaka mingi enyima, bikatandika kuhikiirira mporampora.

8, 9. Shoboorora “paradiso” z’emiringo eshatu ezi Paulo yaareebire omu kworekwa.

⁸ Okworekwa kwa Paulo nikushoboororwaho omu 2 Abakorinso 12:1-4. (Kishome.) Ebi Paulo yaareebire omu kworekwa nibyetwa okushuuruurwa. Bikaba nibikwata aha bintu ebyabaire nibaija kubaho omu biro by’omumaisho, beitu bitari ebyabaire biriho omu bwire bwe. Obu Paulo yaayorekwa “iguru rya kashatu,” akareeba “paradiso” ya muringo ki? Paradiso ei Paulo yaagambireho ekaba neija kubaho omu nsi, omu by’omwoyo, n’omu iguru, kandi zoona zikaabaireho omu biro by’omumaisho. Ey’okubanza, naabaasa kuba yaabaire naamanyisa paradiso ey’omu nsi eri haihi kubaho. (Luk. 23:43) Eya kabiri, naabaasa kuba yaabaire naamanyisa paradiso y’eby’omwoyo ei turikwija kutunga omu nsi ensya. Eya kashatu,  naabaasa kuba yaabaire naamanyisa embeera nungi eri omu iguru “omuri paradiso ya Ruhanga.”—Kush. 2:7.

⁹ Kwonka shi ahabw’enki Paulo yaagizire ngu akahurira “ebigambo ebitagambwa, ebi omuntu atashemereire kushohoza”? Bukaba butari bwire bwe kushoboorora omu bwijwire ebintu birungi ebi yaareebire omu kworekwa okwo. Kwonka hati kihikire kugamba aha migisha ei abaheereza ba Ruhanga baine!

10. Ahabw’enki paradiso y’eby’omwoyo na hekalu y’eby’omwoyo bitarikushushana?

¹⁰ Ebigambo “paradiso y’eby’omwoyo” nitukira kubikoresa. Nibyoreka embeera yaitu y’omutaano erikutubaasisa kugira obusingye na Ruhanga n’ab’eishe-emwe bagyenzi baitu. Kwonka, titushemereire kuteekateeka ngu ebigambo “paradiso y’eby’omwoyo” na “hekalu y’eby’omwoyo” nibishushana. Hekalu y’eby’omwoyo n’entebeekanisa ya Ruhanga ey’okuramya okw’amazima. Paradiso y’eby’omwoyo neetuhwera kumanya abo abarikusiimwa Ruhanga kandi abarikumuheereza omu hekalu ye ey’eby’omwoyo hati.—Mal. 3:18.

11. Aha bikwatiraine na paradiso y’eby’omwoyo twine mugisha ki obunaku obu?

¹¹ Ka ni kishemeza kumanya ngu kuruga 1919, Yehova aikiriize abantu abatahikiriire kukora nawe omu kutaho paradiso y’eby’omwoyo omu nsi, okugihamya, n’okugihangusya! Nooyejumba omu murimo ogu ogw’omutaano? Noohurira oine omuhimbo kugumizamu nookora na Yehova kureetera ‘omwanya gw’ebigyere bye’ kuba ogw’ekitiinisa?

12. Twena twine buhame ki aha bikwatiraine n’okuhikiirira kw’ebiri omu Isaaya 60:17? (Reeba ekishushani aha kutandika.)

¹² Nabi Isaaya akagira ngu hakaba nihaija kubaho empindahinduka nyingi omu kicweka eky’omu nsi eky’ekibiina kya Yehova nk’oku kirikworekwa omuri Isaaya 60:17. (Kishome.) Abato omu myaka nari abasya omu mazima bashomire aha mpindahinduka ezi nari baazihurira kuruga aha bandi. Kwonka ab’eishe-emwe na banyaanyazi-itwe baingi batungire omugisha gw’okureeba empindahinduka ezi nizibaho! Niyo nshonga ahabw’enki batarikubanganisa ngu Yehova naayebembera ekibiina kye arikukoresa Omugabe ou ataireho! Nibahamiza kimwe, kandi naitwe twine obuhame nk’obwo. Waahurira ebigambo byabo kuruga omu mutima, nikiija kuhamya okwikiriza kwawe kandi oyeyongyere kwesiga Yehova.

13. Twine bujunaanizibwa ki kurugiirira ahari Zaaburi 48:12-14?

¹³ Tutarikwihirira aha bwire obu tumazire omu mazima, twena twine kugambira abandi ebirikukwata aha kibiina kya Yehova. Buzima nikitangaaza kureeba ngu hariho paradiso y’eby’omwoyo omu nsi egi embi! Ebirikutangaaza ebirikukwata aha kibiina kya Yehova, nari “Saayuuni,” n’amazima agarikukwata ahari paradiso y’eby’omwoyo biine kumanyisibwa “ab’obusingye oburiija.”—Shoma Zaaburi 48:12-14.

14, 15. Ni mpindahinduka ki ezaakozirwe omu myaka ya 1970, kandi zibaire zita ez’omugasho?

¹⁴ Kumara emyaka mingi, abakuzire abari omu kibiina bareebire empindahinduka ezireeteire ekicweka eky’omu nsi eky’ekibiina kya Yehova kwongyera kuba kirungi. Nibaijuka ngu ebibiina bikaba baine omuheereza w’ekibiina omu mwanya gw’akakiiko k’abareeberezi, amahanga gakaba gaine omuheereza w’eitaagi omu mwanya gw’Akakiiko k’Eitaagi, kandi obuhabuzi bukaba nibuheebwa omwebembezi wa Watch Tower Society omu mwanya gw’Akakiiko Akareeberezi ak’Abajurizi ba Yehova. N’obu ab’eishe-emwe aba baraabe baabaire baine abahwezi, kwonka omuntu omwe niwe yaabaire aine  obujunaanizibwa bw’okucwamu omu kibiina, aha itaagi, n’aha ofiisi enkuru. Omu myaka 1970 hakakorwa empindahinduka kugira ngu obukiiko bw’abareeberezi bube nibwo bwayebembera omu mwanya gw’omuntu omwe.

¹⁵ Empindahinduka ezi zibaire ez’omugasho? Eego, buzima. Ahabw’enki? Ahakuba empindahinduka ezi nizikorwa turikukuratira eby’okureeberaho ebiri omu Byahandiikirwe. Omu mwanya gw’okugyendera aha kwetegyereza kw’omuntu omwe, emitwarize mirungi y’abareeberezi boona abu Yehova ataireho neehwera ekibiina.—Efe. 4:8; Enf. 24:6.

16, 17. Ni mpindahinduka ki ezikushemeize, kandi n’ahabw’enki?

¹⁶ Kandi teekateeka aha mpindahinduka ezikozirwe omu ndeebeka y’ebitabo byaitu, ebirimu, n’oku bishemereire kugabwa. Ka nikishemeza munonga omu kubuurira kugaba ebitabo byaitu ebirikureebeka gye! Kandi okutunguuka omu by’obwengye nikutuhwera kujanjaaza amakuru marungi n’okworeka ngu nitufayo aha bantu nk’oku Yehova arikubafaho. Nk’eky’okureeberaho nitukoresa omukura gwaitu ogwa jw.org kuhika aha bantu baingi kugira ngu batungye obuhabuzi obu barikwetenga munonga.

¹⁷ Ekindi eki tushemereire kutwara nka kikuru n’empindahinduka eyaatubaasiise kutunga obwire bw’Okuramya kw’Eka nari obwire bw’okweshomesa. Kandi nitusiima empindahinduka ezibaireho omu nteerane zaitu empango. Nitukira kugira ngu buri mwaka nizeeyongyera kuba nungi! Kandi buzima nitusiima okutendekwa oku turikutunga omu mashomero gaitu. Omukono gwa Yehova nigureebwa omu mpindahinduka ezi zoona. Mporampora naaguma naayongyera  aha burungi bw’ekibiina kye na paradiso y’eby’omwoyo ei turimu na hati!

18, 19. Nitubaasa kwongyera tuta aha burungi bwa paradiso y’eby’omwoyo?

¹⁸ N’omugisha gw’amaani Yehova kutwikiriza kwejumba omu kwongyera aha burungi bwa paradiso ey’eby’omwoyo. Nitukora eki turikubuurira amakuru marungi g’Obukama tukahindura n’abantu abeegi. Buri murundi ogu turikuhwera omuntu kutunguuka kwehayo nk’Omukristaayo, nituba twayongyera aha nsharo za paradiso y’eby’omwoyo.—Isa. 26:15; 54:2.

¹⁹ Kandi nitubaasa kwongyera aha burungi bwa paradiso ey’eby’omwoyo turikugumizamu kushemeza emitwarize yaitu y’Ekikristaayo. Omu muringo ogwo, nitureetera abareebi kukunda paradiso egi. Emitwarize yaitu mirungi kandi ey’obusingye okukira okumanya Baibuli niyo erikubanza kureetera abantu kwija omu kibiina, bwanyima bakabona kukunda Yehova na Kristo.

20. Kuhikaana n’ebiri omu Enfumu 14:35, tushemereire kuba twine kyetengo ki?

²⁰ Yehova na Yesu ka baine kuba nibashemererwa munonga ku barikureeba paradiso yaitu nungi ey’eby’omwoyo ebiro ebi! Okushemererwa oku turikugira twaba nitwongyera aha burungi bwa paradiso egi, n’endozo y’okushemererwa oku turikwija kugira twaba nituhindura ensi yoona paradiso. Ka tugume nitwijuka Enfumu 14:35, erikugira eti: “Omugabe agirira embabazi omugaragwa orikukora n’obwengye.” Obutoosha ka tukorese obwengye twaba nitukora n’amaani kwongyera aha burungi bwa paradiso ey’eby’omwoyo!