Molengeseu el Meleketek er a Ungil el Blekeradel er a Klengar

“[Ak] mo . . . rullii a beluak el mo kebkall.”​—ISA. 60:13.

CHELITAKL: 28, 48

NGSEBECHEM EL MESAOD?

Ngkmal sorir el mekerang a remengull er a Jehovah?

Ngerang a “Baradis” el Paulus a milsang er a ues?

Ngmekerang a dolengeseu el meleketek er a ungil el blekeradel er a klengar?

1, 2. Ngerang a omesodel a tekoi el “deruchellel ochik”?

 A JEHOVAH EL DIOS a bleketakl el dmu el kmo: “A eanged a kingellek er omerreder, ma chutem a deruchellel ochik.” (Isa. 66:1) Ngdirrek el mesaod er a chutem el kmo: “[Ak] mo . . . rullii a beluak el mo kebkall.” (Isa. 60:13) Me ngmekerang a loruul er tiang? E ngera belkul tia el tekoi el kired e le kid el kiei er tia el chutem?

² A tekoi el “deruchellel ochik” a dirrek el sebechel el melutk er sel templo el luluusbech er ngii a rechad er a Israel er a irechar. (1 Kr. 28:2; Psa. 132:7) Tia el templo a mle blil a mera el omengull el ngar er a chutem a uchul me ngmle klebokel er a osengel a Jehovah. Me a rechad a mlo er ngii el mengull e oldanges er Ngii.

3. Ngerang a kloul templo, e tiang ngmlo er ngii er oingerang?

³ Engdi chelechang e ngdikea dongull er a Dios el ngar er a rruul el templo. Kede bai mengull er ngii er a chelsel a okesiu el templo, el ngii a kuk ngaruchei er a ngii di el rruul el blai. Tia el kloul templo a omtechei er sel rolel a omengull el uchul me ngsebechel el mo er ngii a deleuill er kid me a Dios el okiu a olubet el tengetengel a Jesus Kristus me a kleprist er ngii. E tiang a ulemuchel er a rak er a 29 er a bo lemetecholb a Jesus e lemechilt el Ngarbab  el Prist er a Jehovah el ngar er a kloul templo er ngii.​—Heb. 9:11, 12.

4, 5. (a) A doltirakl er a Psalm 99 e ngsorir el mekerang a remengull er a Jehovah? (b) Ngera el ker a kired el di kid el oker?

⁴ Me kede ochotii a omereng el saul er kid el mo er a Jehovah el okiu sel douchais el kirel a ngklel me sel olubet el tenget el olechotel a klou el klechubechub er ngii. Ngmera el dmeu a rengud el mo medengei el kmo te ngar er ngii a kuk betok er a 8 el miliol el mera el Kristiano el mengebkall er a ngklel a Jehovah! Me ngdiak deua tirke el chad er a bebil el klechelid el omdasu el kmo te mo omuchel el oldanges er a Dios er sel taem el lebo er a eanged. Kede bai ungil el medengei el kmo a temed el oldanges er ngii a chelechang el ngar tia el chutem.

⁵ Me kede oltirakl er a kerebai er a reblak a rengrir el mesiungel a Jehovah el losaod er ngii a Psalm 99:1-3, 5. (Monguiu.) Tia el psalm a mesaod el kirel a Moses me a Aron me a Samuel el mle blak a rengrir el mengull er a Dios. (Psa. 99:6, 7) Me chelechang el mo lmuut er a bo leprist el ngar er a eanged, e a rengellitel el odam er a Jesus el dirk ngar er a chutem a blak a rengrir el mesiou er a Jehovah el ngar er a mekesekesel a kloul templo er ngii. Me a rebetok el miliol el ‘kuk bebil el sib’ a blak a rengrir el olengeseu er tir. (Jn. 10:16) Me alta e ngkakerous el omelatk a lolab, engdi ngii el eru el cheldebechel a dmak el mengull er a Jehovah el ngar tia el chutem. Me ngkired el di kid el oker el kmo, ‘Ngak ngblak a renguk el olengeseu er a mera el omengull?’

TE RUA TECHANG A MESIOU EL NGAR ER A KLOUL TEMPLO?

6, 7. Ngera el mondai a dilubech er a delongelir a Rekristiano er a irechar? E ngera el tekoi a mlo kirel el semechekill er a uriul?

⁶ Telkib el taem er a uriul er a lemeteketek a ongdibel er a Rekristiano, e a rebebil a ulemuchel el omtok er a mera el osisechakl el ua meldung er a ulaoch. (Rel. 20:28-30; 2 Th. 2:3, 4) Me seikid e ngmlo meringel er a rechad el dongcheterir a remera el mesiou er a Dios el ngar er a kloul templo. Engdi betok el rak er a uriul e ngmlo er ngii a taem el Jehovah a mlo meketakl a klemerang el kirel tia el tekoi el okiu a King el Jesus Kristus.

⁷ Me ngar er a rak er a 1919 e tirke el ngiluu a kengei er a Jehovah e mesiou el ngar er a kloul templo a mlo chemolt. Te milekikiid me bo el sebechir el nguu a kengei er a Dios e mesiou er ngii. (Isa. 4:2, 3; Mal. 3:1-4) Me a ues el lilsang a apostol el Paulus a ulemuchel a otutel.

8, 9. Mosaod a edei el telengtengil a “Baradis” el lilsang a Paulus er a ues.

⁸ Ngsebeched el metik er a omesodel a ues el lilsang a Paulus er a 2 Korinth 12:1-4. (Monguiu.) A Paulus a mla er ngii a techellel el omes a tekoi el mo duubech er a ngar medal el klebesei. Me sel taem er a lemengai “el mor ongedel eanged” e ngera el “Baradis” a lilsang? A Baradis el lilsang a melutk er a edei el kakerous el tekoi el mo duubech er a osisiu el taem er a ngar medal el klebesei. Ngsebechel el melutk er a Baradis el chutem el mo er ngii. (Lk. 23:43) Ngdirrek el sebechel el melutk er a cherrungel el blekeradel er a klengar er a chelsel a beches el beluulechad. Me a lmuut el tang, ngsebechel el melutk er sel cherrungel el blekeradel er a eanged el ngii a “Baradis ra Dios.”​—Och. 2:7, BT.

⁹ Ngera uchul me a Paulus a dilu el kmo, ng “rirenges a tekoi el diak el sebechel el medung, ma re chad a diak le kirir el melekoi”? E le ngdirkak bo el temel el mesaod a komakai el tekoi el ngar tia el ues. Engdi chelechang e ngmla mo sebeched el mesaod aika el klengeltengat  el mla mo er ngii er a delongelir a rechedal a Dios!

10. Msodii a klekakerous er a ungil el blekeradel er a klengar me a kloul templo.

¹⁰ Me a tekoi el “ungil el blekeradel er a klengar” a mesaod el kirel a kmes el deleuill er kid me a Dios me a budech er a delongeled kid el mesiungel a Dios. Me nguaisei, engdi a tekoi el “ungil el blekeradel er a klengar” a kuk ngodech er a “kloul templo.” A kloul templo a rolel a omengull el bla leketmeklii a Dios. E a ungil el blekeradel er a klengar a meketeklii el kmo te rua techang tirke el oba kengei er a Dios e mesiou er ngii er chelechang el ngar er a kloul templo.​—Mal. 3:18.

11. Ngera el techall a dobang er chelechang?

¹¹ Ngkmal dmeu a rengud el mo medengei el kmo ngulemuchel er a rak er a 1919, e a Jehovah a mechititerir a rediak el mecherrungel el chad me te olengeseu el melisiich e menglou er a ungil el blekeradel er a klengar er a delongelir a rechedal a Dios! Me kau, ke olengeseu er tia el kmal ungil el ureor? Ngsebechem el mesang a klungiolel a omolemolem el oureor el obengkel a Jehovah el oldanges er ngii?

A CHELDEBECHELEL A JEHOVAH A LMUUT EL MO KLEBOKEL

12. Ngera kede oumerang el kirel a otutel a bades er a Isaia 60:17? (Momes er a siasing er a uchelel a suobel.)

¹² A Isaia 60:17 a ulemlaoch el kirel a omelodech el mo er ngii er a tedebechel a cheldebechelel a Jehovah el ngar er a chutem. (Monguiu.) Tirke el mekekerei me a lechub e te dirk mlo medengelii a klemerang a mla menguiu el kirel a olechotel tia el tekoi me a lechub e te mla rongesterir a rebebil el mesaod er ngii. Engdi ngmera el ungil el techall el mo er tirke el rudam me a rudos el mla chormii tia el tekoi! Ngkmal ulterekokl a rengrir el kmo a Jehovah a ousbech er a Jesus el omekrael er a cheldebechelel! Me kid a di uai tir el oumerang er ngika el King er kid el Jesus. Me sel dorrenges a ungil el cheldechedecherir e ngdirrek el smisichii a klaumerang er kid er a Jehovah.

13. A doltirakl er a Psalm 48:12-14, e ngera kired el meruul?

¹³ Me ngkmal kired el ouchais er a rechad el kirel a cheldebechelel a Jehovah el diak lultuil er a klemengetel a taem el dengar er a klemerang. E le tia el ungil el blekeradel er a klengar el meteketek er a chelsel tia el mekngit el beluulechad a kmal mengasireng el tekoi! Ngkmal mo dmeu a rengud el ouchais er tirke el “merael el mei el cheroll” el kirel a Rengedel a Dios el ngar er a eanged me a ungil el blekeradel er a klengar er a rechedal a Dios.​—Monguiu er a Psalm 48:12-14.

14, 15. Ngera el omelodech a mlo er ngii er aike el rak er a 1970, e ngmlo uchul a ngera el klungiaol?

14 Cherengel a rak e a remechudelang el ngar er a delongeled a mla mes a bebil el omelodech el ngii a mla lmuut el menglebokel er tia el cheldebecheled. Te dirk melatk er a taem el mla er ngii a di ta el odam el oungerachel a derta el ongdibel er a bai chelechad er a remechuodel. Me sel taem el kakerous el beluu a mla er ngii a di ta el odam el oungerachel er a bai loungerachel a Branch Committee. Me a dirrek el sel taem el ulekrael a mei el okiu a president er a Watch Tower Society er a bai Chelechad er a Ruungerachel. Me alta e te mla er ngii a rullengeseu er tirka el blak a rengrir el odam, engdi ngdi ngii el tang a mle ngerechelel el melilt a tekoi el ketmekill er a chelsel a ongdibel me a branch office me a dirrek el klou el obis er kid. Me ngar er aike el rak er a 1970 e ngmlo er ngii a omelodech el olterekokl a ngerachel el mo er a chelechad er a remechuodel me ngmlo diak di lengerechelel a ta el chad.

 ¹⁵ Me aika el omelodech ngmlo uchul a klungiaol? Ochoi. E ngera uchul? E le aika el omelodech a mileketmokl el oltirakl er a mukeroul el klemedengei er kid er a Bades. Me a omeruul el di millai er a uldesuel a ta el odam a mlo diak, e bai mlo sebechir el odak a ungil el uldesuir a rokui el chad, el tir a “sengk” er a Jehovah el mo uchul a klungiolel a cheldebechelel.​—Efe. 4:8, 11; Osi. 24:6.

16, 17. Ngera el omelodech el dirk mlo er ngii a kmal soam, e ngera uchul?

16 Ka di molatk a lmuut el bebil er a omelodech el dirk mlo er ngii. El ua tiang, a babilenged a kmal mla mo klebokel. Ngdirrek el blechoel el mesaod a semecheklel a mondai el lechelebangel a rechad er chelechang. Kede dirrek el merous el okiu a betok el rolel. Me a chouaika el tekoi a mla rullid me kede semeriar el merous a babilenged. Me sel dousbech a beches el technology el ua sel website er kid el jw.org el ngar er a omesiunged, e kede oukerebai er a Jehovah el ngii a soal a rokui el chad a bo lengai a ulekrael el tir a kmal ousbech.

¹⁷ A ta er a klou a ultutelel el omelodech el mlo er ngii a mlo sebechel el mo er ngii a temel a Omengull el Telungalek me a lechub e ngtechelled el mesuub el di kid el tang. Kede dirrek el oba omereng el saul e le prokuram er aika el meklou el ongdibel er kid a kmal mla lmuut el mo ungil! Ngdirrek el kmal ungil a rengud el kirel a lmuut el betok el osisechakl el mei el okiu aike el skuul el oltobed a cheldebecheled. Me ngkmal bleketakl a chimal a Jehovah el oureor el okiu aika el omelodech. Ngkmal blak a rengul el menglebokel er a cheldebechelel me tia el ungil el blekeradel er a klengar el kid a dmeu a rengud el ngar er a chelsel!

 A TECHELLEM EL MELISIICH ER A UNGIL EL BLEKERADEL ER A KLENGAR

18, 19. Ngmekerang e mo sebeched el melisiich er a ungil el blekeradel er a klengar?

¹⁸ Ngkmal chetengakl el tekoi el mo sebechel a Jehovah el meskid a techelled el mo melisiich er tia el ungil el blekeradel er a klengar. Kede meruul er tiang sel leblak a rengud el omerk er a ungil chais el kirel a Renged e dirrek el meruul er a remo disaiplo. Me a bek el taem el dengesuir a chad el olengeriakl e mo tibir er a rengul el mo er a Jehovah, e kede olengeseu el menglou er tia el ungil el blekeradel er a klengar.​—Isa. 26:15; 54:2.

¹⁹ Ngdirrek el sebeched el melisiich er tia el ungil el blekeradel er a klengar el okiu sel domekeroul a ungil el blekerdeled. E le tiang a omeksemeriar er a rebebil el mo sorir el me teloi er kid. Me ngblechoel el ungil el blekerdeled a olechau er a rechad el mo er a Dios me a Kristus e me soiseb er a cheldebecheled el diak el sel klemedengei er kid er a Biblia.

20. A doltirakl er a Osisechakl 14:35, e ngkired el mekerang?

²⁰ Ngkmal dmeu a rengul a Jehovah me a Jesus sel lomes er a ungil el blekeradel er a klengar er a rechedal a Dios! Me a deurreng er kid el melisiich er ngii a di olechotel sel deurreng el bo denguu er a taem el bo doureor el meruul er tia el chutem el mo baradis. Me lak dobes er a Osisechakl 14:35 el kmo: “A mesiou el ungil omerellel a soal a king.” Mada me dolemolem el meruul a ungil e leblak a rengud el melisiich er tia el ungil el blekeradel er a klengar!

[Aike el Ker er a Suobel]