1, 2. Nan Palien Paipel ni Lokaiahn Ipru, dahme lepin lokaia pwukat ‘utupen aluweluwe’ kin dokedoke?

 SIOHWA KOHT ketin mahsanih: “Nanleng iei mwoalei, oh sampah iei utupen aluweluwei kat.” (Ais. 66:1) Me pid ‘utupen aluweluwe ko,’ e pil ketin mahsanih: “I pahn kalinganahla dewen aluweluwei kat.” (Ais. 60:13, NW) Ia duwen eh ketin wia met? Oh ia wehwehn met ong kitail me wie koukousoan pohn ‘utupen aluweluwe’ ko, me iei sampah?

² Nan Palien Paipel ni Lokaiahn Ipru, lepin lokaia pwukat ‘utupen aluweluwe’ pil kin dokedoke tehnpas sarawi en mahs me mehn Israel ko kin doadoahngki. (1 Kron. 28:2; Mel. 132:7, NW) Tehnpas sarawio wia mehkot inenen kaselel mwohn silangin Siohwa pwehki e wia poahsoan en kaudok mehlel. Oh Tehnpas sarawi wet kin kalinganahla Siohwa nin sampah.

3. Dahkot poahsoan en kaudok mehlel rahnwet, oh iahd me e miehla?

³ Dahkot poahsoan en kaudok mehlel rahnwet? Met kaidehn ihmw ehu me duwehte tehnpas sarawio. Ahpw e wia tehnpas sarawi ehu ni karasaras me kin kalinganahla Siohwa laudsang imwen sarawi koaros. Dahkot met? Met iei sapwellimen Koht koasoandi me mweidada aramas akan en kak ahneki nanpwungmwahu reh oh kaudokiong ih. Koasoandi wet kak mie pwehki  sapwellimen Sises meirong. Koasoandi wet miehla nan pahr 29 ni Sises eh ketin papidaisla oh keidi nin duwen Samworo Lapalap en sapwellimen Siohwa tehnpas sarawi wet.​—Ipru 9:11, 12.

4, 5. (a) Nin duwen me Melkahka 99 kasalehda, dahme sapwellimen Siohwa tohnkaudok mehlel kan men wia? (b) Peidek dahieu me kitail anahne pein idek rehtail?

⁴ Kitail kin uhdahn kalahnganki sapwellimen Koht koasoandi ong kaudok mehlel. Kitail kin kasalehda atail kalahngan sang ni atail padahkihong meteikan duwen mwaren Siohwa oh sapwellime kisakis kaselel en meirongo. Kitail kin perenki me mie Kristian mehlel tohtohsang meh welirar me kin kapikapinga Koht rahn koaros! Aramas tohto me kin poadidiong arail sarawi ahneki madamadau sapwung me dene re pahn kapinga Koht nanleng mwurin arail mehla. Ahpw sapwellimen Siohwa aramas akan ese ia uwen kesempwal en kapinga ih nin sampah ahnsou wet.

⁵ Ni atail kin kapinga Siohwa, kitail kin alasang mehn kahlemeng en sapwellime ladu kan me kileldi nan Melkahka 99:1-3, 5. (Wadek.) Ohl lelepek kan duwehte Moses, Aaron, oh Samuel kin utungada ni unsek sapwellimen Koht koasoandi ong kaudok mehlel mahso. (Mel. 99:6, 7) Rahnwet, me keidi kan nin sampah kin papah Siohwa ni lelepek nan sapwellime koasoandi ong kaudok mehlel me rasehng tehnpas sarawi ehu mwohn re pahn tepida iang Sises ketin papah nin duwen samworo kei nanleng. “Sihpw teikan,” meh rar rar kei, kin ni lelepek utung irail. (Sohn 10:16, NW) Pwihn riau pwukat koaros kin miniminpene kaudokiong Siohwa. Ahpw kitail anahne pein idek rehtail, ‘Ia duwe, I kin utungada ni unsek sapwellimen Siohwa koasoandi ong kaudok mehlel?’

6, 7. Kahpwal dahieu me tepida wiawi nan mwomwohdisohn tepin Kristian ko, oh dahme wiawi nan pahr 1919?

⁶ Pahnangin sounpar 100 mwurin mwomwohdiso en Kristian wiawihda, mwekid en kesehla oh uhwongada kaudok mehlel tepida wiawi nin duwen eh kokohpdahr. (Wiewia 20:28-30; 2 Des. 2:3, 4) Mwurin ahnsowo, e kin wie apwahpwalla en kasawihada sapwellimen Koht tohnkaudok mehlel kan. Sounpar epwiki kei mwuri, Siohwa ketin doadoahngki Sises en kasalehda ihs me kin uhdahn papah Koht nan sapwellime tehnpas sarawi ni karasaras.

⁷ Nan pahr 1919, irail kan me Koht ketin kupwurki oh me kin papah ih nan sapwellime tehnpas sarawi wet uhdahn sansalda. Irail wiahdahr wekidekla kan pwe Siohwa en ketin kupwurperenki arail kaudok. (Ais. 4:2, 3; Mal. 3:1-4) Eri kaudiahl ehu me wahnpoaron Pohl kilangada sounpar epwiki kei samwalahro tepida pweida.

8, 9. “Paradais” dahieu me Pohl kilangada nan kaudiahlo?

⁸ Kaudiahl me Pohl kilangada iei me kileldi nan 2 Korint 12:1-4. (Wadek.) Nan kaudiahlo, Siohwa ketin kasalehiong Pohl mehkot me pahn wiawi ni ahnsou kohkohdo. “Paradais” dahieu me Pohl kilangada? Keieu, e kak wehwehki uhdahn Paradaiso me pahn miehla nin sampah ahnsou keren. (Luk 23:43) Keriau, e kak wehwehki paradais ni karasaras me pahn pweida ni unsek nan sampah kapwo. Oh kesiluh, e kak wehwehki irair kaselel en nanleng nan “sapwellimen Koht Mwetuwel,” de paradais en Koht.​—Kaud. 2:7.

⁹ Ahpw dahme kahrehda Pohl nda me e “rongada soahng kei me sohte aramas emen kak kawehwehda”? Pwehki kaidehn  ih ahnsowo me e pahn kawehwehda ni oaritik soahng kaselel kan me e kilangada nan kaudiahlo. Ahpw rahnwet Siohwa ketin mweidohng kitail en padahkihong meteikan duwen kapai kan me sapwellime aramas akan ahneki ahnsou wet!

10. Dahme kahrehda “paradais” oh “tehnpas sarawio” ni lokaiahn karasaras sohte duwepenehte?

¹⁰ Kitail kin kalapw koasoia duwen paradais ehu ni lokaiahn karasaras. Ahpw dahkot me? Met iei irair en popohl tohrohr ehu me Koht ketikihong sapwellime aramas akan. Eri paradais wet oh tehnpas sarawio ni lokaiahn karasaras sohte duwepenehte. Tehnpas sarawio ni karasaras kin wehwehki sapwellimen Koht koasoandi ong kaudok mehlel. Irair en popohl me karasaraskihong paradais ehu kin kasalehda ni sansal ihs irail kan me Koht ketin kupwurperenki oh me kin kaudokiong ih nan sapwellime koasoandi me duwehte tehnpas sarawi ehu.​—Mal. 3:18.

11. Pwais kaselel dahieu me kitail ahneki rahnwet?

¹¹ E kaperen en ese me sangete pahr 1919, Siohwa ketin mweidada aramas soh unsek kan ren kakairada, kakehlaka oh kalaudehla irair en popohl oh minimin wet. Ia duwe, ke kin iang sewese doadoahk kaselel wet? Ke kin mwekidki en pousehlahte iang Siohwa doadoahk pwehn kalinganahla ih nin sampah?

12. Ia duwen atail ese me Aiseia 60:17 pweidahr? (Menlau kilang tepin kilel.)

¹² Soukohp Aiseia kohpada me wekidekla kaselel tohto pahn wiawi nan sapwellimen Koht pwihn nin sampah. (Wadek Aiseia 60:17.) Kristian pwulopwul de me kapw kan kin ihte wadek de rong duwen wekidekla pwukat. Ahpw mie riatail Kristian tohto me ahneki pai kaselel en iang kilang wekidekla pwukat! Irail ladu lelepek pwukat uhdahn kamehlele me Koht kin ketin doadoahngki atail Nanmwarki, Sises, pwehn kaweid oh kahluwa Sapwellime pwihn! Ni atail rong duwen dahme Kristian pwukat kin lelohng, atail pwoson oh likih Siohwa pahn kehlailla.

13. Nin duwen me Melkahka 48:12-14 kasalehda, dahme kitail anahne wia?

¹³ Kristian mehlel koaros anahne padahkihong meteikan duwen sapwellimen Siohwa pwihn. E kapwuriamwei me mendahki kitail mi nan ahn Sehdan sampah suwed wet, kitail ahneki irair en popohl oh minimin rehn riatail kan koaros nin sampah! Kitail anahne perenki padahkihong “dih en mwuhr kan” duwen sapwellimen Siohwa pwihn oh mehlelpen irair en popohl oh minimin me rasehng paradais me kitail ahneki!​—Wadek Melkahka 48:12-14.

14, 15. Wekidekla dah kan me wiawihda mwurin pahr 1970, oh ia duwen sapwellimen Siohwa pwihn eh paiekihda?

¹⁴ Me mah tohto nan atail mwomwohdiso kan iang kilang wekidekla kan me wiawi me kalaudehla lingan en sapwellimen Koht pwihn nin sampah. Irail taman ahnsou me mwomwohdiso kan ahneki emente elder me wia sounepwelpen mwomwohdiso, ahpw kaidehn nin duwen pwihn en elder kan. Re pil taman ahnsowo me emente elder me kin wia sounepwelpen Ohpis en Sounkadehdehn Siohwa kan ahpw kaidehn nin duwen Pwihn me Kin Apwalih Ohpis en Sounkadehdehn Siohwa kan. De ni ahnsou me president en Watch Tower Society iei me kin kihda kaweid kan a kaidehn Pwihn me Kin Apwalih Mwomwohdiso en Sounkadehdehn Siohwa kan sampah pwon. Mendahki mie me lelepek kan me kin sewese brother pwukat koaros, emente me kin  pwukoahki wiahda pilipil kan nan mwomwohdiso, ni poasen kaun oh pil ohpis en Sounkadehdehn Siohwa kan. Mwurin pahr 1970, wekidekla kan wiawihda pwe pwihn en elder kan me pahn pwukoahki wiahda pilipil kan ahpw kaidehn emente.

¹⁵ Dahme kahrehda wekidekla pwukat wia kamwahu kei ong sapwellimen Siohwa pwihn? Pwehki wekidekla pwukat kin poahsoankihda laudlahn arail wehwehkihla Paipel. Pwihn wet kin paiekihda irair kaselel kan en elder kan koaros,  de “kisakis en aramas akan” me Siohwa ketikihda, ahpw kaidehn emente elder me pahn wiahda pilipil koaros.​—Ep. 4:8, NW; Lep. Pad. 24:6.

16, 17. Mehnia rehn wekidekla kan me wiawihda kerendo me ke kalahnganki, oh dahme kahrehda?

¹⁶ Medewehla ekei wekidekla kan me wiawi kerendo nan neitail sawaspen Paipel kan. Kitail kin perenki kihla pwuhk kaselel kan nan doadoahk en kalohk. Pil medewehla duwen atail kin doadoahngki soahng kapw kan nan doadoahk en kalohk. Karasepe, aramas tohto kin kilang website en jw.org pwe ren kak ale soangen sawas kan me re uhdahn anahne. Kitail kin kilang nan soangen wekidekla pwukat koaros duwen Siohwa eh kin ketin nsenohki oh pil poakohng aramas akan.

¹⁷ Kitail pil kalahnganki wekidekla kan me wiawihong atail mihting kan pwe kitail en kak ahneki ahnsou ong atail kaudok en peneinei de pein atail onop. Oh kitail kalahnganki wekidekla kan me wiawihong prokram en atail mihting tohrohr kan. E kin mwomwen me prokram pwukat kin mwamwahula sounpar koaros! Kitail pil kalahnganki kasukuhl kan me kitail kin ale sang atail sukuhl en Paipel tohto. E sansal sang wekidekla pwukat koaros me Siohwa kin ketin kaweid sapwellime pwihn oh kin ketin pousehlahte kalinganahla atail irair  en popohl oh minimin me rasehng paradais!

18, 19. Ia duwen atail kak sewese kalaudehla lingan en atail paradais?

¹⁸ Siohwa ketikihong kitail pai kaselel en sewese kalaudehla lingan en atail irair en popohl oh minimin me rasehng paradais. Ahpw ia duwen atail kin wia met? Sang ni atail kin ngoangki kalohki rongamwahu en Wehio oh katohnpadahk. Ahnsou koaros me kitail kin sewese aramas emen en wiahla sapwellimen Koht ladu, kitail kin sewese paradais wet en kekeirda.​—Ais. 26:15; 54:2.

¹⁹ Kitail pil kin sewese kalinganahla paradais wet ni atail kin doadoahk laud en kamwahwihala atail irair en Kristian kan. Met kin sewese kahrehiong aramas akan ren men iang mi nan paradais wet. Atail irair en meleilei oh tiahk mwakelekel iei me pil kin kalapw kainangihedo aramas akan ong atail pwihn oh pil ong Siohwa oh Sises, ahpw kaidehn ihte pwehki atail ese duwen Paipel.

20. Nin duwen me Lepin Padahk 14:35 kasalehda, dahme kitail en men wia?

²⁰ Siohwa oh Sises uhdahn kin ketin kupwurperenkihda ara mahsendihdo oh mahsanih paradais wet rahnwet. Peren me kitail ahneki ahnsouwet ni atail kalaudehla lingan en paradais wet kin ekiste karasahda soangen peren me kitail pahn ahneki ahnsou me kitail pahn doadoahk pwehn kawekila sampah wet ong uhdahn paradais ehu. Kitail en tamataman ahnsou koaros dahme Lepin Padahk 14:35 mahsanih: “Nanmwarki kan kin kupwurperenki sapwellimarail sounpapah koahiek kan.” Kitail en kin loalokong ni atail doadoahk laud pwehn kalinganahla atail irair en popohl oh minimin me rasehng paradais!