1, 2. ¿Imapajtaj “chakisniypa sarukunan” nisqa palabra oqharikun?

JEHOVÁ DIOS nerqa: “Janaj pachaqa noqaj kamachina tiyanay, kay pachataj chakisniypa sarukunan”, nispa (Isa. 66:1). Chantapis ‘chakisninpa sarukunanta’ “aswan sumajman” tukuchinanta nillarqataj (Isa. 60:13). ¿Imaynatá aswan sumajman tukuchin? Chantá, ¿imaynatá noqanchejpis yanapakusunman?

² Bibliaqa, “chakisniypa sarukunan” nisqa palabrata oqharillantaj, Israelpi Diospa templon kasqanmanta parlananpaj (1 Cró. 28:2; Sal. 132:7). Chay temploqa Jehovapaj may kʼachitu karqa, imaraykuchus kay Jallpʼapi Jehová Diospa kamachisninta Payta yupaychanankupaj, jatunchanankupaj ima yanaparqa.

3. 1) ¿Imaynamantataj Jehová Diosta yupaychanchej? 2) ¿Maykʼajtaj mana rikukoj templo rikhurerqa?

³ ¿Imaynamantataj Jehová Diosta yupaychanchej? Mana israelitas jinachu uj templopi yupaychanchej, manaqa Diospa mana rikukoj templonpi. ¿Imataj chay templo? Jehová chay templota rikhuricherqa Payta yupaychananchejpaj, amigosnin kananchejpaj ima. Chaytataj Jesús kausayninta qosqanrayku  ruwayta atinchej. ¿Maykʼajtaj mana rikukoj templo rikhurerqa? Jesús 29 watapi bautizakushajtin, Diospa mana rikukoj templonpi Kuraj kaj sacerdote kananpaj ajllasqa kashajtin ima (Heb. 9:11, 12).

4, 5. 1) Salmo 99 nisqanman jina, ¿imatá Diospa kamachisnin ruwananchej tiyan? 2) ¿Imatataj tapurikunanchej tiyan?

⁴ Jehovaman may agradecesqas kashanchej, mana rikukoj templota rikhurichisqanmanta. ¿Imaynatá agradecesqas kashasqanchejta rikuchinchej? Diospa sutin Jehová kasqanta, Dios noqanchejrayku Jesusta kausayninta qonanpaj kachamusqanta ima, runasman sutʼinchaspa. Chantapis mayta kusikunchej Jallpʼantinpi 8 millones kurajña sapa pʼunchay Diosta yupaychashasqanchejmanta. Ashkha runas yuyanku, wañupuytawan cieloman rispa Diosta jatunchanankuta. Noqanchejtajrí mana ajinatachu yuyanchej, yachanchejtaj kausashaspa Diosta yupaychananchej may allin kasqanta.

⁵ Diosta jatunchaspaqa, ñaupa tiempomanta Diospa cheqa sonqo kamachisnin jina ruwashanchej (Salmo 99:1-3, 5 leey). Paykunamanta wakenqa Moisés, Aarón, Samuel ima karqanku. Paykunaqa Diosta yupaycharqanku, Dios nisqanman jina (Sal. 99:6, 7). Kunanpis Diosta iskay qotus may ujchasqa yupaychanku. Ñaupaj kaj qotoqa ajllasqa cristianos kanku, paykunaqa Jesuswan khuska sacerdotes kanankupaj niraj cieloman rishaspa, kay Jallpʼapi Diospa mana rikukoj templonpi sirvishanku. Iskay kaj qotutaj “waj ovejas[manta]” may chhika runas kanku, paykunaqa ajllasqa cristianosta tukuy sonqo yanapashanku (Juan 10:16). Chaywanpis sapa ujninchej tapurikunachej: “¿Diospa mana rikukoj templonpi yanapakushanichu?”, nispa.

6, 7. 1) ¿Imataj karqa cristiana qotuchakuy rikhurisqanmanta qhepaman? 2) ¿Imataj ashkha watasninman sutʼinchakorqa?

⁶ Apóstol Pabloqa qotuchakuy ukhullamantataj wakinkuna cheqa kajta qʼewispa llullasta yachachinankuta nerqa (Hech. 20:28-30; 2 Tes. 2:3, 4). Chaytaj juntʼakuyta qallarerqa cristiana qotuchakuy rikhurisqanmanta niraj pachaj watas kashajtin. Chayrayku mana yachakorqachu pikunachus cheqa cristianos kasqankuta. Chaywanpis ashkha watasninmanraj Jehová Diosqa Jesusnejta pikunachus mana rikukoj templonpi Payta sirvishasqankuta sutʼincharqa.

⁷ Kay 1919 watapajqa mana rikukoj templopi, pikunachus Diosta sirvishasqanku sutʼi karqa. Imaraykuchus paykunaqa Diosta munasqanman jina yupaychanankupaj chay watapi llimphuchasqa karqanku (Isa. 4:2, 3; Mal. 3:1-4). Chay tiempopi Pablo imatachus mosqoypi jina rikusqan juntʼakuyta qallarerqa. Chaytataj qhawarinachej.

8, 9. Pablo mosqoypi jina paraisota rikusqan, ¿imataj karqa?

⁸ Imatachus mosqoypi jina Pablo rikusqanqa, kay 2 Corintios 12:1-4 (leey) versiculospi kashan. Chay mosqoypi jina Pabloman Jehová rikuchisqanqa, imachus aswan qhepaman kananta rikuchin. Pabloj rikusqan paraíso, ¿imataj karqa? Ñaupajtaqa, kay Jallpʼa uj paraíso kananmanta ichapis parlasharqa, mayqenchus tumpamantawan kanqa (Luc. 23:43). Iskay kaj, mosoj pachapi runas ujchasqas sonqo tiyasqas ima kausakunankumanta ichapis parlashallarqataj. Kinsa kaj, “Diospa [...] huerta[n]” nisunman janaj pachapi kusiy kausay kananmanta ichapis parlasharqa (Apo. 2:7).

 ⁹ ¿Imaraykutaj Pablo, imatachus uyarisqanta mana parlayta atisqanta nerqa? Imaraykuchus mana tiemporajchu karqa imastachus rikusqanta sutʼinchananpaj. Chaywanpis kunanqa runasman sutʼinchayta atinchej Diospa llajtan ashkha bendicionesta japʼispa may kusisqa kashasqanmanta.

10. ¿Imaraykutaj ninchej Diospa llajtan uj paraisopi jina kausashasqanta, chantá imawantaj Diospa mana rikukoj templon ninakun?

¹⁰ Publicacionesninchejqa, Diospa llajtanpi kajkuna uj paraisopi jina kausakushasqankuta sutʼinchayta yachan. ¿Imaraykú? Imaraykuchus Jehová llajtanman sonqo tiyaykuyta qon. Chaytaj sutʼita rikuchin paykunalla Jehová Diosta yupaychashasqankuta mana rikukoj templonpi (Mal. 3:18). ¿Imawantaj chay templon ninakun? Jesuspa wañuyninnejta Jehová Diosta yupaychayta atisqanchejwan.

11. ¿Imatataj kay pʼunchaypi ruwayta atinchej?

¹¹ May kusiypuni Jehová 1919 watamantapacha juchasapa runasta, ujchasqas, sonqo tiyasqas ima kanankuta saqesqanqa. Jinallataj ashkhayanankuta, sinchʼiyanankuta ima saqesqanpis. Qan chay ruwaypi, ¿yanapaysikushankichu? Jehovata jatunchanapaj, paywan khuska trabajayta, ¿jatunpajchu qhawanki?

12. ¿Imaraykutaj yachanchej Isaías 60:17 versiculoj nisqan juntʼakushasqanta? (7 paginapi dibujota qhawariy.)

¹² Profeta Isaiasqa Diospa llajtanpi ashkha imas waj jinasmanta ruwakunanta, allinchakunanta ima nerqa (Isaías 60:17 leey). Diosta yupaychaj waynas, kunallanraj bautizakojkuna ima, ichapis wajkuna willarisqankurayku chayri publicacionespi leesqankurayku Diospa llajtanpi ashkha imas waj jinasmanta ruwakusqanta, allinchakusqanta ima yachanku. Ashkha watastaña Diosta yupaychaj wakin hermanostaj Diospa llajtanpi chay ruwaykunata paykuna kikin rikorqanku. Chayrayku chay hermanosqa rey Jesucristonejta Dios llajtanta yanapashasqanta yachanku. Chay hermanos imatachus Diospa llajtanpi ruwakusqanmanta willariwajtinchejqa creeyninchej kallpachakonqa, Diospitaj astawan atienekusunchej.

13. Salmo 48:12-14 nisqanman jina, ¿imatataj ruwananchej tiyan?

¹³ Tukuypis Diospa llajtanmanta wajkunaman willarinanchej tiyan. Kay sajra pachapeqa, Jallpʼantinmanta tukuy hermanos ujchasqa, sonqo tiyasqa kasqanchejqa uj milagro. Chayrayku Diospa Reinonmanta, ujchasqa, sonqo tiyaykusqa kasqanchejmanta ima, “qhepata jamojkunaman” nisunman waynasman, kunallanraj bautizakojkunaman ima kusiywan willarinanchej tiyan (Salmo 48:12-14 leey).

14, 15. ¿Imastaj Diospa llajtanpi 1970 watamanta qhepaman ruwakorqa? ¿Imaynatataj Diospa llajtanta chay yanaparqa?

¹⁴ Ashkha watastaña Diosta yupaychaj hermanosqa, Diospa llajtan aswan sumajman tukusqanta rikorqanku. Sutʼincharinapaj, ñaupaj wataspeqa sapa qotuchakuypi uj ancianolla qotuchakuyta ñaupajman apaj, sapa sucursalpitaj uj hermanolla kamachej, Jehovaj testigosninpa centralninkupipis uj hermanolla kamachej. Chay hermanosta waj hermanos yanapajtinkupis, qotuchakuypi uj ancianolla, sucursalpitaj uj hermanolla, Jehovaj testigosninpa centralninkupipis uj hermanolla ima ruwaytapis ajllaj. Chaywanpis 1970 watamanta qhepaman, waj jinamanta ruwakorqa. Sapa qotuchakuypi uj qotu ancianos imatapis ajllananku karqa, jinallataj sucursalpipis.  Jehovaj testigosninpa centralninkupipis uj qotu ajllasqa ancianos kamachinanku karqa, chay qotu ajllasqa ancianostataj Diospa Llajtanta Kamachejkuna sutiwan rejsinchej.

¹⁵ ¿Imaraykutaj Diospa llajtanpi ashkha imas waj jinasmanta ruwakusqan, allinchakusqan ima may sumaj? Imaraykuchus Bibliaj nisqanman jina tukuy chay imas ruwakorqa. Uj hermanolla ima ruwaytapis ajllananmantaqa, Diospa llajtan ñaupajman rinanpaj tukuy ancianos yanapanku. Chay ancianostaqa Jehová qotuchakuykunaman churan (Pro. 24:6; Efe. 4:8).

16, 17. Kay qhepa wataspi, Diospa llajtanpi waj jinamanta ruwakusqanmanta, ¿mayqentaj astawan yanapasunki, imaraykutaj?

¹⁶ Kay qhepa wataspi imaschus waj jinasmanta ruwakusqanta qhawarinachej. Sutʼincharinapaj, kunan tiempopi publicacionesninchejqa runasta astawan yanapananpaj jina, aswan kʼachitustaj kanku, chaykunawan willamuspataj mayta kusikunchej. Chantapis imastachus runas rikhurichinku chaykunanejta Diosmanta runasman willallanchejtaj. Internetpi jw.org nisqanejta ashkha runasta Diosmanta yachakunankupaj yanapashallanchejtaj. Tukuy kaytaj Jehová runasta munakusqanta, paykunamanta khuyakusqanta ima rikuchin.

¹⁷ Familianchejwan chayri sapallanchejpi Bibliata ukhunchanapaj tiemponchej kananpaj, tantakuykuna waj jinamanta ruwakusqanta may jatunpaj qhawanchej. Chantapis mayta agradecekunchej jatuchaj tantakuykuna waj jinamanta ruwakusqanmanta. Sapa wata chay jatuchaj tantakuykuna aswan sumaj wakichisqa kashan. Chantapis Diospa llajtanpi imaymana escuelaspi yachachiwasqanchejmanta mayta agradecekullanchejtaj. Tukuy kaykunataj rikuchiwanchej, Jehová llajtanta  ñaupajman apashasqanta, aswan sumajta ujchaykushasqanta, sonqo tiyasqa kanankupaj yachachishasqanta ima.

18, 19. ¿Imaynatataj yanapakusunman Diospa llajtan ujchasqa, sonqo tiyasqa kananpaj?

¹⁸ Jehová Diosqa llajtan ujchasqa kananpaj, sonqo tiyasqa kananpaj ima yanapakunanchejta saqewanchej. ¿Imaynatá yanapakusunman? Sonqo kʼajaywan runasman Bibliamanta willamuspa, yachachispa ima. Runasta Jehovaj testigosnin kanankupaj yanapaspaqa, Diospa llajtan ashkhayananpaj yanapakushanchej (Isa. 26:15; 54:2).

¹⁹ Diospa llajtan ujchasqa, sonqo tiyasqa kananpaj ima, sumaj cristianos kanapaj sapa pʼunchay kallpachakuspa yanapallasunmantaj. Ajinata ruwajtinchejqa, Diospa llajtanman runas yaykuyta munanqanku. Imaraykuchus runasqa Diospa llajtanman yaykuyta, Diosmanta, Jesusmanta ima yachakuyta munanku, mana Bibliamanta sumajta yachakusqanchejraykuchu, manaqa Bibliaj nisqanman jina kausakusqanchejta rikusqankurayku.

20. Proverbios 14:35 nisqanman jina, ¿imatataj ruwananchej tiyan?

²⁰ Jesuswan, Jehovawanqa maytachá kusikunku ujchasqas, sonqo tiyasqas kausakusqanchejmanta. Noqanchejpis kusikullanchejtaj Diospa llajtan ujchasqa, sonqo tiyasqa kananpaj yanapakusqanchejmanta. Astawantaj kusikusunchej kay Jallpʼata uj paraisoman tukuchispa. Proverbios 14:35 versículo nin: “Sumaj yuyayniyoj kamacheqa reyninwan munachikun”, nispa. Chayrayku sumaj yuyayniyoj kanachej, kallpachakunataj yanapakunapaj Diospa llajtan ujchasqa, sonqo tiyasqa kananpaj.