1, 2. San a wortu „futubangi” wani taki son tron na ini den Hebrew Buku fu Bijbel?

YEHOVAH GADO taki: „Hemel na mi kownusturu èn grontapu na mi futubangi” (Yes. 66:1). Na fu a srefi „futubangi” disi a taki tu: „Mi o moi a presi pe mi e poti mi futu” (Yes. 60:13). Fa a e du dati? San disi wani taki gi den sma di e libi na grontapu di de a futubangi fu Gado?

² Den Hebrew Buku fu Bijbel e gebroiki a wortu „futubangi” tu fu sori go na a tempel di ben de na ini Israel fosi (1 Kron. 28:2; Ps. 132:7). A tempel disi ben moi trutru gi Yehovah èn na drape sma ben musu go fu anbegi en. A ben meki fu gi Yehovah glori na grontapu.

3. San na a agersi tempel èn o ten a seti disi bigin?

³ Ma san na a presi pe sma na ini a ten disi musu go fu anbegi Yehovah? Den no musu go na wan spesrutu oso leki a tempel. Ma den musu go na wan agersi tempel di e gi Yehovah grani moro leki iniwan oso di oiti meki fu gi en glori. Na agersi tempel disi na den sani di Gado seti fu gi libisma na okasi fu tron en mati èn fu anbegi en. Disi den kan du nomo nanga yepi fu a lusu-paiman di Yesus pai. A seti disi  bigin na ini a yari 29 di Yesus dopu èn di Yehovah salfu en leki Granpriester fu na agersi tempel fu En.—Hebr. 9:11, 12.

4, 5. (a) San den tru anbegiman fu Yehovah wani du soleki fa skrifi na ini Psalm 99? (b) Sortu sani wi musu aksi wisrefi?

⁴ Wi e warderi a seti fu Yehovah di meki taki wi man anbegi en. Fu dati ede wi e gi en grani, wi e meki en nen bekènti èn wi e prèise en taki a gi Yesus leki a lusu-paiman fu di a abi sari-ati. A moi fu sabi taki moro leki aiti milyun tru Kresten e meki muiti fu gi Yehovah glori na ini a ten disi. Den no de leki son kerkisma di e denki taki den o prèise Gado te den go na hemel baka te den dede. Ala Kotoigi fu Yehovah e frustan taki den musu prèise Gado dyaso na grontapu èn taki den musu du disi nownow.

⁵ Te wi e prèise Yehovah, wi e poti prakseri na san skrifi na Psalm 99:1-3, 5. (Leisi en.) Soleki fa a psalm disi e sori, dan sma leki Moses, Aron nanga Samuel ben e horibaka gi den sani di Yehovah ben seti, so taki sma na ini a ten fu den ben kan anbegi a tru Gado. Na ini a ten disi, fosi den salfu brada fu Krestes o dini makandra nanga en leki priester na ini hemel, den e dini Yehovah dyaso na grontapu na ini a fesidyari fu na agersi tempel. Milyunmilyun „tra skapu” e horibaka gi den salfu Kresten disi nanga den heri ati (Yoh. 10:16). Ala tu grupu abi wan tra howpu. Toku den e anbegi Yehovah makandra dyaso na grontapu. Ma ibriwan fu wi musu aksi ensrefi: ’Mi e du ala san mi man fu horibaka gi den sani di Gado seti, so taki wi kan anbegi en na wan krin fasi?’

6, 7. Sortu problema opo kon na ini a fosi Kresten gemeente èn san Yesus ben musu du hondrohondro yari baka dati?

⁶ Bijbel ben taki dati sma ben o drai baka gi a tru bribi. Sowan wán hondro yari baka di a fosi Kresten gemeente seti, a sani disi bigin pasa (Tori 20:28-30; 2 Tes. 2:3, 4). Baka dati a no ben makriki fu sabi suma ben de den tru anbegiman fu Gado. Hondrohondro yari pasa, fosi Yehovah meki a nyun Kownu Yesus Krestes sori suma ben e dini Gado trutru na ini na agersi tempel.

⁷ Na ini 1919, a ben de krin suma na den sma di Yehovah feni bun èn di ben e dini na ini en agersi tempel. Den sma disi kenki den libi na so wan fasi taki den ben kan dini Yehovah moro bun (Yes. 4:2, 3; Mal. 3:1-4). A fisyun di na apostel Paulus si hondrohondro yari na fesi, ben e bigin kon tru now.

8, 9. San na a „paradijs” di Paulus si na ini wan fisyun?

⁸ A fisyun di Paulus kisi skrifi na 2 Korentesma 12:1-4. (Leisi en.) Na ini a fisyun dati, Yehovah sori Paulus wan sani di no ben o pasa na a ten dati, ma bakaten. San na a „paradijs” di Paulus si „di Masra teki en wantronso tyari go na a di fu dri hemel”? A paradijs disi kan abi fu du nanga dri sani. A fosi sani na a trutru paradijs di o kon dyonsro na grontapu (Luk. 23:43). A di fu tu sani na den blesi di Gado en pipel o kisi dorodoro na ini a nyun grontapu. A di fu dri sani na den moi blesi di de fu kisi na hemel na ini „a paradijs fu Gado”.—Openb. 2:7.

⁹ Ma fu san ede Paulus ben taki dati a „yere wortu di nowan sma musu taki èn  di nowan sma abi reti fu taki”? Fu di a no ben de a ten ete gi Paulus fu taki finifini fu ala den moi sani di a si na ini a fisyun. Ma na ini a ten disi, Yehovah no e tapu wi fu taki nanga sma fu den blesi di en pipel e kisi nownowde.

10. San na a agersi paradijs èn san na a agersi tempel?

¹⁰ Nofo tron den buku nanga den tijdschrift fu wi e taki fu na agersi paradijs. Ma san na a agersi paradijs disi? Na a spesrutu situwâsi pe wi leki Gado pipel de na ini fu di wi abi freide nanga Gado èn nanga wi brada nanga sisa. Sma e si krin taki wi na a wan-enkri pipel di e anbegi Yehovah na ini en agersi tempel. San na a agersi tempel disi? Na den sani di Yehovah seti fu wi anbegi en. A du disi fu di Yesus Krestes dede gi wi.—Mal. 3:18.

11. Sortu grani wi abi na ini a ten disi?

¹¹ A moi fu sabi taki sensi 1919, Yehovah gi sondu libisma na okasi fu yepi en fu seti na agersi paradijs, fu meki a kon moro bigi èn fu tranga a bribi fu den sma di de na ini. Yu e yepi tu nanga a moi wroko disi? Yu e warderi a grani di yu kisi fu wroko makandra nanga Yehovah fu gi en glori na grontapu?

12. Fa wi sabi taki Yesaya 60:17 kon tru? (Luku a prenki na a bigin fu na artikel.)

¹² Yesaya 60:17 (leisi en) ben taki dati furu bigi kenki ben o kon na ini a pisi fu Yehovah en organisâsi di de na grontapu. Sma di no e dini Yehovah so langa ete nanga yongu Kresten leisi fu den kenki disi nomo noso den yere fu den. Ma yu abi furu brada nanga sisa di ben abi a grani fu si den moi kenki disi nanga den eigi ai! Dati meki den de seiker taki na Yehovah e gebroiki wi Kownu Yesus Krestes fu tiri En organisâsi. Den sabi taki den no abi fu tweifri na dati èn na so a de nanga wi alamala. Te wi e yere den moi ondrofenitori fu den lobi brada nanga sisa disi, dan a bribi fu wi o kon moro tranga èn wi o frutrow moro na tapu Yehovah.

13. Soleki fa Psalm 48:12-14 e taki, dan san wi musu du?

¹³ Awinsi o langa wi e dini Gado kaba, wi alamala musu fruteri sma fu Yehovah en organisâsi. Wi e libi na ini wan ogri grontapu di lai kruktudu èn pe sma no abi lobi moro gi makandra. Ma toku wi e libi na ini freide nanga wi brada nanga sisa èn wi de wán nanga den. Disi na wan bigi wondru. Na ini a ten di e kon, a o de wan prisiri sani fu fruteri ’den bakapikin fu wi’ fu Gado en Kownukondre na hemel èn fu na agersi paradijs.—Leisi Psalm 48:12-14.

14, 15. Sortu sani na ini na organisâsi kenki baka 1970 èn fa dati tyari wini kon?

¹⁴ Na ini den yari di pasa, den owruwan na wi mindri si wan tu fu den kenki di meki a pisi fu Yehovah organisâsi na grontapu kon moro moi. Den sabi ete di den gemeente ben abi wan gemeente dinari na presi fu wan grupu owruman di e teki fesi. Den sabi tu taki fosi, wan bijkantoro-opziener ben e teki fesi na ini wan kondre na presi fu wan Bijkantoro Komte. Den sabi ete taki a presidenti fu a Waktitoren Genootschap ben e tiri na organisâsi na presi fu a Tiri Skin fu Yehovah Kotoigi. A tru taki den brada disi ben abi sma di ben yepi den. Ma toku na wán sma nomo ben e teki ala bosroiti na  ini den gemeente, na den bijkantoro èn na a edekantoro. Ma baka 1970 sani kon kenki. Now a no wán sma nomo abi a frantwortu fu teki fesi, ma na wan grupu owruman.

¹⁵ Den kenki disi tyari wini kon? Iya, èn wi kan frustan fu san ede. Sani kenki fu di wi kon frustan Bijbel moro krin. Na presi fu meki wán sma nomo teki ala bosroiti, now na wan grupu „mansma di abi spesrutu koni” e du dati. Na so wi e kisi wini fu den moi fasi fu ala den owruman di Yehovah poti fu teki fesi na ini en organisâsi.—Ef. 4:8; Odo 24:6.

16, 17. Sortu nyun kenki naki yu ati èn fu san ede?

¹⁶ Denki wan tu fu den sani di kenki no so langa pasa. Now den buku nanga tijdschrift fu wi kon moro moi èn wi leri fu prati den na wan moro bun fasi. A switi fu prati den tijdschrift nanga buku fu wi di moi èn di e hari sma prakseri. Wi e gebroiki den moro nyun sani tu fu leri sma den tru tori fu Bijbel. Fu eksempre, wi e gebroiki a jw.org website fu wi fu yepi moro sma so taki den kan feni wan lusu gi den problema fu den. Ala den kenki disi e sori taki Yehovah lobi sma èn taki a wani yepi den trutru.

¹⁷ Wi breiti taki den kenki den konmakandra fu wi so taki wi kan abi ten fu hori na Osofamiri Anbegi noso fu studeri nanga wisrefi. Wi breiti tu taki den kenki den programa fu den kring konmakandra nanga den kongres. Ala yari wi feni taki den programa disi e kon moro moi! Wi e prisiri nanga a leri di wi e kisi na den furu Bijbelskoro fu wi. Nanga ala den kenki disi wi e si krin taki na Yehovah e tiri en organisâsi èn taki safrisafri  a e meki na agersi paradijs kon moro moi.

18, 19. Fa wi kan meki na agersi paradijs kon moro moi?

¹⁸ Na wan grani taki Yehovah e gebroiki wi fu yepi fu meki na agersi paradijs kon moro moi. Wi e du dati te wi e preiki a bun nyunsu fu a Kownukondre fayafaya èn te wi e yepi moro sma fu tron bakaman fu Yesus. Ibri leisi te wi e yepi wan sma fu gi ensrefi abra na Gado, wi e yepi fu meki na agersi paradijs kon moro bigi.—Yes. 26:15; 54:2.

¹⁹ Wi kan yepi fu meki na agersi paradijs kon moro moi tu te wi e meki muiti fu kon de wan moro bun Kresten. Na so a paradijs disi e kon moro moi tu gi tra sma. Ma nofo tron a no den sani di wi sabi fu Bijbel e hari sma. Furu sma di kon na ini na organisâsi èn di tron futuboi fu Yehovah nanga Yesus, du dati fu di den si a krin libi fu wi nanga a switifasi di wi abi.

20. Soleki fa Odo 14:35 e sori, dan fa wi musu du wi wroko?

²⁰ Yehovah nanga Yesus musu fu breiti te den e luku na agersi paradijs fu wi na ini a ten disi. Nownow kaba wi e prisiri fu meki en kon moro moi. Dan yu kan frustan fa wi o prisiri na ini a ten di e kon te wi o wroko makandra fu meki a grontapu disi tron wan paradijs trutru. No meki wi frigiti san skrifi na ini Odo 14:35. A tekst disi e taki: „Wan kownu e prisiri nanga wan futuboi di e du sani nanga koni.” Meki wi sori taki wi koni èn meki wi wroko tranga fu meki na agersi paradijs kon moro moi.