Serbisu atu hafurak liután paraízu espirituál nian
“Haʼu sei hanaʼi haʼu-nia tula ain fatin.”—ISAÍAS (YESAYA) 60:13.
KNANANUK: 28, 19
1, 2. Iha Eskritura lia-Ebraiku, liafuan “tula ain fatin” bele refere ba saida?
MAROMAK JEOVÁ hatete: “Lalehan mak haʼu-nia kadunan, no rai mak haʼu-nia tula ain fatin.” (Isaías [Yesaya] 66:1) No kona-ba “tula ain fatin” nia dehan: “Haʼu sei hanaʼi haʼu-nia tula ain fatin.” (Isaías [Yesaya] 60:13) Oinsá mak nia atu hanaʼi ka hafurak ninia tula ain fatin? No tanbasá mak ida-neʼe importante mai ita neʼebé hela iha ninia “tula ain fatin” ka mundu neʼe?
2 Eskritura lia-Ebraiku mós uza liafuan “tula ain fatin” hodi refere ba templu iha ema Izraél antigu sira-nia tempu. (1 Crônicas [Tawarikh] 28:2; Salmo [Mazmur] 132:7) Ba Jeová, templu mak fatin neʼebé furak tebes, tanba fatin neʼe mak sentru ba adorasaun neʼebé loos. Husi fatin neʼe mak ema iha rai bele hasaʼe glória ba Jeová.
3. Saida mak Maromak nia templu espirituál, no horibainhira mak arranju neʼe komesa laʼo?
3 Maibé ohin loron, templu laʼós tan uma neʼebé uza ba atu sai sentru ba adorasaun neʼebé loos. Tanbasá? Tanba iha dalan foun neʼebé diʼak liu fali templu atu hasaʼe glória ba Jeová, dalan neʼe mak liuhusi templu espirituál nian. Ida-neʼe mak arranju neʼebé ema bele hadame malu ho Maromak. Arranju foun neʼe harii liuhusi Jesus Kristu nia sakrifísiu, no komesa laʼo husi tempu neʼebé Jesus hetan batizmu no sai nuʼudar Amlulik Boot ba Jeová nia templu espirituál nian iha tinan 29.—Ebreu 9:11, 12.
4, 5. (a) Tuir Salmo (Mazmur) 99, ema neʼebé adora Jeová iha dalan neʼebé loos hakarak halo saida? (b) Ita tenke husu ba ita-nia an pergunta saida?
4 Ita bele hatudu ita-nia agradese ba Maromak nia arranju templu espirituál nian hodi fó sai Jeová nia naran no fó-hatene ema seluk kona-ba Jesus nia sakrifísiu. Ita kontente tebes atu haree katak ohin loron, iha ema kristaun loos naʼin-8.000.000 liu mak hahiʼi Jeová liuhusi arranju neʼe. Ema iha relijiaun seluk hanoin sala katak bainhira ema mate no saʼe ba lalehan mak foin bele hahiʼi Maromak. Maibé Testemuña ba Jeová la hanoin hanesan neʼe, tanba agora iha rai mós ita presiza hahiʼi Jeová.
5 Ita halo tuir duni ezemplu husi Jeová nia atan sira iha tempu uluk atu hahiʼi nia hanesan hakerek iha Salmo (Mazmur) 99:1-3, 5. * (Lee.) Tuirmai, Salmo neʼe hatete katak Moisés, Aarão, no Samuel fó apoia tomak ba Maromak nia arranju atu halaʼo adorasaun neʼebé loos. (Salmo [Mazmur] 99:6, 7) Ohin loron mós hanesan. Antes ema kose-mina saʼe ba lalehan atu sai amlulik hamutuk ho Jesus, sira fó apoia ho laran tomak hodi serbí Jeová iha templu espirituál nian iha rai. “Bibi-seluk” rihun ba rihun mós apoia ema kose-mina sira ho laran tomak. (João 10:16) Maski iha esperansa neʼebé la hanesan, maibé grupu rua neʼe fó glória ba Jeová husi ninia tula ain fatin ho laran ida deʼit. Tan neʼe, diʼak atu husu ba ita-nia an pergunta neʼe, ‘Haʼu apoia Jeová nia arranju ba adorasaun neʼebé loos ho laran tomak ka lae?’
BUKA-HATENE SIRA NEʼEBÉ SERBÍ IHA MAROMAK NIA TEMPLU ESPIRITUÁL MAK SÉ
6, 7. Saida mak akontese ba kongregasaun kristaun iha apóstolu sira-nia tempu, no saida mak akontese entre tinan 1914 no 1919?
6 Kongregasaun kristaun foin forma la toʼo tinan 100, ema soe-fiar neʼebé kontra fali lia-loos komesa mosu hanesan eskritura fó-hatene nanis. (Apóstolu 20:28-30; 2 Tesalónika 2:3, 4) Tan neʼe, susar tebes atu bele buka-hatene sé loos mak adora Maromak iha dalan neʼebé loos iha ninia templu espirituál nian. Maibé, tinan atus hirak liutiha, Jeová uza Jesus, Liurai neʼebé nia hili, hodi halo ema koñese fali sé mak serbí Maromak iha templu espirituál nian.
7 Iha tinan 1919, ema bele haree ho momoos sé loos mak Maromak simu atu adora nia iha ninia templu espirituál nian. Ema sira-neʼe halo ona mudansa boot hodi Maromak hakarak simu sira-nia adorasaun. (Isaías [Yesaya] 4:2, 3; Malaquias [Maleakhi] 3:1-4) Neʼe mak buat neʼebé apóstolu Paulo haree iha vizaun ida iha tinan atus hirak liubá, no vizaun neʼe komesa sai loos iha tinan 1919.
8, 9. Paraízu neʼebé Paulo haree iha ninia vizaun mak saida?
8 Eskritura iha 2 Korinto 12:1-4 (Lee.) koʼalia kona-ba Paulo nia vizaun neʼe. Iha vizaun neʼe, Jeová hatudu ba Paulo kona-ba buat neʼebé mak atu mosu iha futuru. Naʼi lori nia ba “lalehan terseiru nian” no nia haree paraízu ida. Paraízu neʼebé Paulo haree mak saida? Primeiru, paraízu neʼe bele refere ba mundu foun iha futuru. (Lucas 23:43) Segundu, paraízu neʼe bele refere ba kondisaun espirituál nian iha mundu foun. No terseiru, paraízu neʼe mós bele refere ba kondisaun furak iha lalehan, iha “paraízu Maromak nian”.—Apokalipse 2:7.
9 Maibé tanbasá mak Paulo hatete katak “nia rona liafuan neʼebé la bele temi no sala ba ema ida atu dehan sai”? Tanba seidauk toʼo tempu atu nia bele esplika kona-ba buat furak sira neʼebé nia haree husi ninia vizaun neʼe. Maibé iha ita-nia tempu, Jeová fó ona lisensa mai ita atu bele koʼalia ba ema seluk kona-ba bensaun neʼebé ninia povu goza daudauk neʼe!
10. Tanbasá mak paraízu espirituál la hanesan ho templu espirituál?
10 Iha lia-loos, dala ruma ita uza liafuan “paraízu espirituál nian”. Neʼe mak kondisaun neʼebé úniku tebes iha Maromak nia povu nia leet neʼebé halo ita bele iha dame ho Maromak no ho ita-nia irmaun-irmán sira. Maibé “paraízu espirituál nian” la hanesan ho “templu espirituál nian”. Tanba templu espirituál mak Maromak nia arranju atu halaʼo adorasaun neʼebé loos. Maibé paraízu espirituál mak Maromak nia povu nia kondisaun neʼebé ajuda ema atu buka-hatene sé mak adora daudauk Maromak ohin loron iha ninia templu espirituál nian.—Malaquias (Maleakhi) 3:18.
11. Ita ohin loron iha priviléjiu furak saida?
11 Tinan 1919 mak tinan neʼebé haksolok tebes, tanba komesa husi tinan neʼe mak Jeová fó lisensa mai ita ema sala-naʼin atu hafurak, hametin, no haluan ninia paraízu espirituál nian iha rai! Ita-Boot apoia daudaun serbisu neʼe ka lae? Ita hafolin priviléjiu furak hodi bele serbisu hamutuk ho Jeová atu hafurak ninia ‘tula ain fatin neʼe’ ka lae?
JEOVÁ HAFURAK LIUTÁN NINIA ORGANIZASAUN
12. Tanbasá mak ita bele fiar katak Isaías (Yesaya) 60:17 sai loos ona? (Haree foto iha pájina 7.)
12 Eskritura iha Isaías (Yesaya) 60:17 * (Lee.) fó sai nanis katak mudansa furak sei akontese ba Jeová nia organizasaun parte rai nian. Karik ba joven ka sira neʼebé foin simu lia-loos, sira lee ka rona deʼit kona-ba mudansa sira-neʼe. Maibé ba irmaun-irmán balu neʼebé kleur ona iha lia-loos, sira haree duni mudansa sira-neʼe ho sira-nia matan rasik. Neʼe halo sira fiar duni katak Jeová mak uza ninia Liurai foun Jesus Kristu hodi dirije hela ninia organizasaun neʼe! Bainhira ita rona ba irmaun-irmán sira konta kona-ba mudansa sira neʼebé sira haree ona, neʼe hametin liután ita-nia fiar ba Jeová.
13. Salmo (Mazmur) 48:12-14 hatete katak ita iha responsabilidade saida?
13 Maski foun ka kleur ona iha lia-loos, ita tenke fó sai ba ema seluk kona-ba Jeová nia organizasaun. Ita bele moris iha dame no unidade ho irmaun-irmán sira iha Satanás nia mundu aat neʼe neʼebé la iha domin, neʼe hanesan milagre ida! Ita tenke fó sai duni buat sira-neʼe ba “jerasaun neʼebé atu mai” kona-ba “Siaun”, ka Maromak nia organizasaun, no lia-loos kona-ba paraízu espirituál nian.—Lee Salmo (Mazmur) 48:12-14. *
14, 15. Maizumenus husi tinan 1970, organizasaun halo mudansa saida deʼit, no neʼe lori rezultadu diʼak saida?
14 Irmaun-irmán ho idade boot barak mak haree ona mudansa sira neʼebé akontese iha Jeová nia organizasaun parte rai nian. Balu sei hanoin-hetan katak uluk iha kongregasaun iha atan ida deʼit mak tau matan ba kongregasaun tomak, laʼós grupu katuas nian. Iha nasaun ida-idak, atan ba sukursál ida mak tau matan, laʼós Grupu Koordenadór. Uluk prezidente ba Watch Tower Society mak fó matadalan, laʼós Grupu Administradór husi Testemuña ba Jeová. Maski iha irmaun seluk neʼebé asiste sira, maibé iha kongregasaun ema ida mak halo desizaun. Hanesan neʼe mós iha sukursál sira no iha sede jerál. Maibé maizumenus husi tinan 1970, atu halo desizaun ruma, katuas sira iha grupu ida-idak mak halo, laʼós tan ema ida deʼit ona.
15 Tanbasá mak mudansa hanesan neʼe diʼak ba Maromak nia organizasaun? Tanba ita-nia komprende kona-ba eskritura sira sai klaru liután, tan neʼe mak halo mudansa sira-neʼe. Duké ema ida deʼit mak domina ka halo desizaun, agora organizasaun bele simu ideia husi grupu katuas sira, no neʼe lori rezultadu diʼak liu ba organizasaun tomak.—Éfeso 4:8; Provérbios (Amsal) 24:6.
Jeová fó ba ema hotu iha mundu tomak matadalan neʼebé sira presiza iha sira-nia moris (Haree parágrafu 16, 17)
16, 17. Iha ita-nia tempu, ita gosta liu atu haree mudansa saida, no tanbasá?
16 Iha ita-nia tempu, ita mós haree ona mudansa balu iha ita-nia livru sira no dalan neʼebé ita fahe livru sira-neʼe. Ita gosta tebes fahe livru sira neʼebé haree kapás no bele ajuda ema neʼebé ita hasoru iha serbisu haklaken. Ita mós uza teknolojia atu fahe Bíblia nia mensajen ba ema seluk. Porezemplu, ita agora uza daudaun ita-nia sítiu jw.org, dalan haklaken neʼe haleno duni Jeová nia hanoin, tanba nia hakarak fó oportunidade ba ema hotu atu hatene lia-loos.
17 Ita mós hafolin mudansa kona-ba reuniaun sira hodi ita bele halaʼo Adorasaun Família nian no estuda mesak. Iha mós mudansa kona-ba programa ba reuniaun boot sira. Ita sempre dehan katak programa tinan ida-idak nian diʼak liu fali tinan kotuk. Ita mós haksolok tebes tanba ita bele simu treinu oioin husi eskola sira neʼebé ita-nia organizasaun fó ba ita, loos ka lae? Ita bele haree ho momoos katak mudansa sira-neʼe mai duni husi Jeová. Nuʼudar tempu liu daudaun, nia hafurak liután ninia organizasaun no paraízu espirituál nian.
ITA-NIA KONTRIBUISAUN BA PARAÍZU ESPIRITUÁL NIAN
18, 19. Oinsá mak ita bele hafurak liután paraízu espirituál nian?
18 Oportunidade neʼebé Jeová fó ita atu hafurak ita-nia paraízu espirituál mak priviléjiu boot duni. Ita fó ita-nia kontribuisaun liuhusi haklaken ho badinas kona-ba ninia Ukun no ajuda ema sai Jesus nia dixípulu. Bainhira ita ajuda ema laʼo ba oin iha lia-loos toʼo sira dedika an ba Jeová, ita mós hola parte atu halo boot tan paraízu espirituál nian.—Isaías (Yesaya) 26:15; 54:2.
19 Ita mós bele halo paraízu espirituál nian sai furak liután hodi hadiʼa ita rasik nia hahalok sira. Hodi nuneʼe ita-nia paraízu espirituál nian bele sai furak liután ba ema seluk neʼebé haree ita. Baibain, laʼós tanba ita-nia matenek kona-ba Bíblia mak dada ema, maibé ita-nia hahalok neʼebé santu no dame mak dada ema seluk ba Jeová nia organizasaun no ikusmai dada sira ba Jeová no Jesus.
Ita mós bele kontribui atu halo luan paraízu espirituál nian (Haree parágrafu 18, 19)
20. Tuir Provérbios (Amsal) 14:35, ita hakarak atu halo saida?
20 Jeová no Jesus kontente tebes atu haree ita-nia paraízu espirituál nian neʼebé furak tebes ohin loron! Ita-nia kontribuisaun atu hafurak mak buat kiʼik deʼit se kompara ho tempu iha mundu foun neʼebé ita sei halo duni mundu atu sai paraízu ida. Ita tenkesér hanoin beibeik ba liafuan husi Provérbios (Amsal) 14:35 neʼebé hatete: “Atan neʼebé hatudu matenek, liurai sei gosta tebes nia.” Mai ita sempre hatudu hahalok neʼebé matenek hodi hakaʼas an atu ajuda hafurak liután ita-nia paraízu espirituál nian!
[Nota–rodapé]
^ par. 5 Salmo 99:1-3, 5: “1 Jeová sai ona Liurai. Husik povu sira nakdedar bá. Nia tuur iha ninia kadunan iha kerubín sira-nia leten. Husik mundu nakdoko bá. 2 Jeová mak boot iha Siaun. Nia mak aas liu ema hotu. 3 Husik sira fó glória ba Ita-nia naran boot, tanba naran neʼe iha forsa makaʼas no santu.” “5 Hanaʼi ita-nia Maromak Jeová no hakruʼuk ba nia husi ninia tula ain fatin; Nia mak santu.”
^ par. 12 Isaías 60:17: “Duké riti, haʼu sei lori mai osan-mean, no duké besi, haʼu sei lori mai osan-mutin, riti duké ai, besi duké fatuk; haʼu sei hili dame nuʼudar imi-nia xefe sira, no justisa nuʼudar imi-nia ulun-naʼin sira.”
^ par. 13 Salmo 48:12-14: “12 Imi marxa bá haleʼu Siaun, no laʼo haleʼu nia, sura ninia fatin aas sira. 13 Fó atensaun ho imi-nia laran ba ninia moru sira, haree didiʼak ba ninia uma aas sira, hodi nuneʼe imi bele konta fali ida-neʼe ba jerasaun neʼebé atu mai. 14 Tanba Maromak neʼe mak ita-nia Maromak ba nafatin no ba nafatin. Nia sei dirije ita toʼo ita mate.”
