1, 2. Ino mabala aakuti “cilyatilo camaulu” aamba nzi mu Magwalo aa Chihebrayo?

JEHOVA LEZA cakweelela wakaambilizya kuti: “Majulu ncuuno cangu cabwami, alimwi nyika ncilyatilo camaulu aangu.” (Is. 66:1) Alimwi kujatikizya “cilyatilo camaulu” aakwe wakati: “Ndiyoopa kuti busena bwamaulu aangu bulemekwe.” (Is. 60:13) Mbuti mbwacita oobo? Alimwi ino makani aaya ajisi bupanduluzi nzi kulindiswe mbwaanga tukkede ‘acilyatilo camaulu’ aa Leza?

² Kunze lyakwaamba nyika, mabala aakuti “cilyatilo camaulu” alabelesyegwa munzila yamaambilambali mu Magwalo aa Chihebrayo ikupandulula tempele lyansiku ndyobakali kubelesya bana Israyeli. (1Mk. 28:2; Int.132:7) Tempele eelyo ilyakali anyika lyakabeleka kalili busena bwabukombi bwakasimpe. Akaambo kaceeci, lyakali kweebeka ncobeni mumeso aa Jehova alimwi lyakali kulemeka busena bwamaulu aa Jehova.

3. Ino tempele lipati lyakumuuya lya Leza ninzi, alimwi ndilili nolyakatalika kubeleka?

³ Mazuba aano, busena bwabukombi bwakasimpe talili tempele lini-lini anyika. Nokuba boobo, kuli tempele lyacikozyanyo, ilipa bulemu kapati kuli Jehova kwiinda busena buli boonse ibuyakidwe. Oobu mbubambe ibupa kuti cikonzyeke kumvwana a Leza kwiinda mububambe bwabupaizi  alimwi acipaizyo ca Jesu Kristo. Bubambe oobu bwakatalika kubeleka mu 29 C.E. aciindi cakubbapatizyigwa kwa Jesu ciindi Jesu naakananikwa kuba Mupaizi Mupati watempele lipati lyakumuuya lya Jehova.—Heb. 9:11, 12.

4, 5. (a) Mbuti lugwalo lwa Intembauzyo 99 mbolukupandulula kulombozya nkobajisi bakombi ba Jehova bakasimpe? (b) Ino mubuzyo nzi ngotweelede kulibuzya?

⁴ Ikutegwa tutondezye kulumba akaambo kabubambe bwatempele lyakumuuya, tulamutembaula Jehova kwiinda mukwaambilizya zina lyakwe alimwi akumusumpula akaambo kabubambe bwakwe bwaluse ibwacinunuzyo. Eelo kaka cilakkomanisya kuzyiba kuti mazuba aano Banakristo bakasimpe ibainda ku 8 miliyoni baluujisi kutembaula Jehova! Kwiindana abasizikombelo bamwi ibayeeya kuti bayoomutembaula Leza baakuzwa buyo munyika akutolwa kujulu, Bakamboni ba Jehova boonse balizyi mbociyandika kumutembaula lino alimwi mpoonya aano aanyika.

⁵ Aboobo, tutobela cikozyanyo cababelesi ba Jehova basyomeka ibaambidwe mulugwalo lwa Intembauzyo 99:1-3, 5. (Amubale.) Mbubwenya mboitondezya intembauzyo eeyi, Musa, Aroni alimwi a Samuele bakalyaaba akugwasyilizya kapati bubambe bwabukombi bwakasimpe ciindi nobakali kupona. (Int. 99:6, 7) Mazuba aano, kabatanaunka kuyoobeleka kabali bapaizi a Jesu kujulu, ibasyeede akati kabanabokwabo ibananike balabeleka cakusyomeka mulubuwa lwaanyika lwatempele lyakumuuya. ‘Bambelele zimbi’ ibabalilwa kumamiliyoni balabagwasyilizya cakusyomeka. (Joh. 10:16) Nokuba kuti bajisi bulangizi bwiindene, boonse ibali munkamu zyobilo balamukomba Jehova calukamantano aano acilyatilo camaulu aa Leza. Nokuba boobo, umwi aumwi kumugama weelede kulibuzya kuti, ‘Sena ndilabugwasyilizya cakumaninina bubambe bwa Jehova bwabukombi busalala?’

6, 7. Ino ndipenzi nzi lyakabuka akati ka Banakristo bakusaanguna, alimwi ncinzi cakali kuyandika nokwakainda myaanda yamyaka?

⁶ Kakutanainda myaka iili 100 kuzwa ciindi mbungano ya Banakristo noyakatalisyigwa, luleyo ilwakasinsimwa lwakatalika kulibonya. (Mil. 20:28-30; 2Tes. 2:3, 4) Kuzwa waawo, cakaindila kukatazya kubazyiba ibakali kumubelekela Leza aatempele lyakwe lyakumuuya. Lilikke nokwakainda myaanda yamyaka iili mbwiibede ndendilyo nocakasika ciindi cakuti Jehova aasalazye makani aaya kwiinda mu Mwami wakwe mupya uubikkidwe, Jesu Kristo.

⁷ Kuzikusika mu 1919, aabo mbaakali kukkomanina Jehova alimwi ibakali kubeleka aatempele lyakwe lyakumuuya bakazyibwa kabotu-kabotu. Bakasalazyigwa kumuuya kutegwa mulimo wabo ukkomaninwe kapati a Leza. (Is. 4:2, 3; Mlk. 3:1-4) Ncaakabona mwaapostolo Paulo mucilengaano kakucili myaanda yamyaka cakatalika kuzuzikizyigwa buce-buce.

8, 9. Amupandulule zibeela zyotatwe ‘zyaparadaiso’ njaakabona Paulo mucilengaano.

⁸ Cilengaano ca Paulo cilaambidwe mulugwalo lwa 2 Bakorinto 12:1-4. (Amubale.) Ncaakabona Paulo mucilengaano cakwe cigambya cakaambwa kuti nciyubunuzyo. Cakali kujatikizya cintu ciyoocitika kumbele, ikutali cakacitika naakali kupona. Ciindi Paulo ‘naakakwempelwa kujulu lyatatu,’ ino ‘niparadaiso’ nzi njaakabona? Paradaiso njaakaamba Paulo yakali kuyoobikkilizya aparadaiso iini yaanyika, yakumuuya, alimwi ayakujulu, zibeela eezyi zyoonse izyakali kuyoozuzikizyigwa kumbele. Ilakonzya kuba Paradaiso iini yaanyika iilangilwa kumbele. (Lk. 23:43) Alimwi ilakonzya kuba paradaiso yakumuuya iiyooba cakumaninina munyika mpya. Kuyungizya waawo, ilakonzya kwaamba bukkale bubotu kujulu “muparadaiso ya Leza.”—Ciy. 2:7.

 ⁹ Pele nkaambo nzi Paulo ncaakaambila kuti ‘wakamvwa majwi aataambiki alimwi aatazumizyidwe kwaambwa amuntu’? Tiicakali ciindi ceelede kulinguwe kupandulula munzila iizwide zintu zikondelezya nzyaakabona mucilengaano eeco. Pele mazuba aano cileelela kubandika zilongezyo ziliko akati kabantu ba Leza!

10. Nkaambo nzi majwi aakuti “paradaiso yakumuuya” alimwi “atempele lyakumuuya” ncaataambi cintu comwe?

¹⁰ Mabala aakuti “paradaiso yakumuuya” mabala ngotubelesya kanji-kanji swebo Bakamboni ba Jehova. Mabala aaya apandulula bukkale bulibedelede bwakumuuya, ibutupa coolwe cakuba muluumuno a Leza alimwi abakwesu. Pele tatweelede kuyeeya kuti mabala aakuti “paradaiso yakumuuya” alimwi “atempele lyakumuuya” aamba cintu comwe. Tempele lyakumuuya mbubambe bwa Leza bwabukombi bwakasimpe. Paradaiso yakumuuya igwasya kubazyiba kabotu aabo mbakkomanina Leza alimwi ibamubelekela mazuba aano aatempele lyakwe lyakumuuya.—Mlk. 3:18.

11. Ino ncoolwe nzi ncotujisi mazuba aano kujatikizya makani aaparadaiso yakumuuya?

¹¹ Eelo kaka cilakkomanisya kuzyiba kuti kuzwa mu 1919, Jehova wazumizya bantu batalondokede kubeleka anguwe kutegwa paradaiso yakumuuya anyika ibambwe, iyumizyigwe alimwi akukomezyegwa! Sena mulalibona kamucita cibeela canu mumulimo ooyu uukkomanisya? Sena mulakulwaizyigwa kuzumanana kubeleka a Jehova mukulemeka ‘busena bwamaulu aakwe’?

MBUNGA YA JEHOVA ILI MUKUBOTEZYEGWA KWIINDA LYOONSE

12. Ino ncinzi ncotusinizyide toonse kujatikizya kuzuzikizyigwa kwalugwalo lwa Isaya 60:17? (Amubone cifwanikiso icili kumatalikilo aacibalo.)

¹² Mulimo uutaliboteli wakubambulula uujatikizya cibeela caanyika cambunga ya Jehova wakasinsimwa mulugwalo lwa Isaya 60:17. (Amubale.) Aabo bacili bana naa bapya mukasimpe bakabala makani aajatikizya bumboni bwakubambulula ooku naa bakamvwa kuli bamwi. Pele bali acoolwe kaka bakwesu alimwi abacizyi ibakalibonena cacigaminina kucinca ooku! Aanu nkakaambo kaako ncobasinizyide kuti kwiinda mu Mwami wakwe uubikkidwe, Jehova ulasololela akweendelezya mbunga yakwe! Balisinizyide ncobeni, mbubwenya mbotusinizyide toonse. Ikubamvwa kabaambaula kuzwa ansi amoyo kuyooyumya lusyomo lwanu alimwi alusyomo ndomujisi muli Jehova.

13. Ino lugwalo lwa Intembauzyo 48:12-14 lutupa mukuli nzi?

¹³ Tacikwe makani aciindi ncotwakkala mukasimpe, tweelede kwaambila bamwi kujatikizya mbunga ya Jehova. Paradaiso yakumuuya njotujisi munyika eeyi mbyaabi alimwi iinyina luyando, maleele! Zintu zigambya izijatikizya mbunga ya Jehova, naa “Ziyoni,” alimwi akasimpe ikajatikizya paradaiso yakumuuya zyeelede kuluulwa calukkomano ‘kuzyalani liboola.’—Amubale Intembauzyo 48:12-14.

14, 15. Ino nkucinca nzi mumbunga kwakacitwa mumyaka yakuma 1970, alimwi mbuti mbokwagwasya?

¹⁴ Kwamyaka iili mbwiibede, bacembeede akati kesu bakalibonena zintu zimwi zyakacinca mumbunga eezyo zyayungizya bubotu bwacibeela cambunga ya Jehova yaanyika. Balayeeya ciindi mbungano nozyakajisi mubelesi wambungano muciindi cakabunga kabaalu, ciindi zisi nozyakajisi mubelesi wamutabi muciindi ca Kkomiti ya Mutabi, alimwi aciindi busolozi nobwakali kupegwa amweendelezi wa Watch Tower Society muciindi ca Kabunga Keendelezya ka Bakamboni ba Jehova. Nokuba kuti bakwesu boonse aaba bakajisi basikubagwasyilizya basyomeka, mubwini muntu omwe buyo nguwakali kusala zyeelede kucitwa mumbungano, kumaofesi aamitabi, alimwi  akumaofesi eesu mapati. Mumyaka yakuma 1970, kwakaba kucinca kutegwa mukuli wakweendelezya mbungano ube mumaanza aatubunga twabaalu muciindi camuntu omwe.

¹⁵ Sena kucinca ooku kwagwasya? Inzya, kakunyina akuzumbauzya. Ino nkaambo nzi? Akaambo kakuti kucinca ooku kwakayeeme aaluzyibo luyungizyidwe lujatikizya cikozyanyo camu Magwalo. Muciindi cakuba amuntu omwe kuti kayendelezya zintu zyoonse, mbunga ilagwasyigwa abube bubotu bwabaalu boonse naa “zipego mubantu” Jehova nzyapede.—Ef. 4:8; Tus. 24:6.

16, 17. Ino nkucinca kuli buti ikwakacitika lino-lino ikwakamukkomanisya kapati, alimwi nkaambo nzi?

¹⁶ Alimwi amuyeeye kucinca kwalino-lino, mbuli kucinca ikujatikizya mbwaalibonya mabbuku eesu, twaambo tujanika mukati, alimwi anzila zibelesyegwa kwaabila mabbuku aaya. Eelo kaka cilakkomanisya kwaabila mabbuku aagwasya alimwi aaboneka kabotu ciindi notuli mumulimo wamumuunda! Alimwi notubelesya mincini yamazuba aano kumwaya kasimpe, mucikozyanyo kwiinda mukubelesya Webbusaiti ya jw.org/toi, tutondezya kuti Jehova ulababikkila maano bantu kufwumbwa nkobabede kwiinda mukubapa busolozi bunji bwabo mbobayandika kapati.

¹⁷ Icimbi ncotuteelede kuluba mbusongo ibwakapa kuti kube kucinca ooko ikwakatupa coolwe cakuba abubambe bwa Kukomba Mumukwasyi naa ciindi cinji cakucita ciiyo cesu tobeni. Alimwi tulalumba kapati kuyaambele kucitwa mumapulogilamu aamiswaangano yabbazu alimwi ayacooko. Kanji-kanji tulaamba kuti miswaangano iyaabwiindila kubota mwaka amwaka! Alimwi tulikkomene alwiiyo luyungizyidwe iluli mukupegwa kwiinda muzikolo zinji zyeendelezyegwa a Leza. Mukucinca koonse ooku, cilalibonya kuti Jehova ulaisololela  mbunga yakwe. Buce-buce ulaibotya mbunga alimwi aparadaiso yakumuuya eeyo iitukkomanisya noliba lino!

18, 19. Mbuti mbotukonzya kutola lubazu mukubotya paradaiso yakumuuya?

¹⁸ Ncoolwe citaliboteli kuzumizyigwa a Jehova kuti tube aalubazu mukubotya paradaiso yesu yakumuuya. Tulacita oobo kwiinda mukukambauka cabusungu makani mabotu aa Bwami alimwi akugwasya bantu banji kuba basikwiiya. Kufwumbwa ciindi notugwasya muntu kutegwa ayaambele akuba Munakristo uulyaabide, nkokuti twabeleka akukomezya paradaiso yakumuuya.—Is. 26:15; 54:2.

¹⁹ Alimwi tulakonzya kubotya paradaiso yesu yakumuuya kwiinda mukuyaambele kusumpula bube bwesu bwa Bunakristo. Munzila eeyi, tupa kuti paradaiso eeyi kaikondelezya kapati kuli baabo ibalangilila. Kanji-kanji, taluli luzyibo lwamu Bbaibbele ilusaanguna kukwelelezya bantu kumbunga alimwi akuli Leza a Kristo, pele nkulilemeka kwesu akuba bantu basiluumuno.

20. Kweelana alugwalo lwa Tusimpi 14:35, ncinzi ncotweelede kulombozya kucita?

²⁰ Eelo kaka Jehova a Jesu balakkomana ciindi nobabona paradaiso yesu yakumuuya yeebeka mazuba aano! Lukkomano ndotujisi lino mukutola lubazu mumulimo wakwiibotya, matalikilo buyo aalukkomano ndotuyooba andulo kumbele mumulimo wakupanga nyika eeyi kuti ibe paradaiso. Katwaayeeya lyoonse majwi aali mulugwalo lwa Tusimpi 14:35, aakuti: “Mwami ulamukkomanina mubelesi uucita zintu cabupampu.” Lyoonse atucite zintu cabupampu notubeleka canguzu mumulimo wakubotya paradaiso yakumuuya!